لينك التسجيل الصوتي للمقالة علي Sound Cloud:
https://soundcloud.com/user-112011687-312727988/m4a-1
أي حد يفتح الفيسبوك قدامه غالباً حيلاقي 3 حاجات بيتنططوا في البوستات .. يا تريقة علي الزمالك .. يا مكان أكل معموله ريفيو وغالباً بفلوس ولما بتروح تجربه بتقول لنفسك أنا إيه اللي أنا عملته في معدتي ده .. يا ناس عايزة تخس ومش عارفه أو ناس خست وبتغيظ في الناس اللي مش عارفه تخس .. ولو إنت زملكاوي فبيتحرق دمك وبتروح تاكل .. الحقيقة إن المصريين بيعشقوا الأكل وده في حد ذاته مش عيب علي فكرة .. الأكل ده نعمة من نعم الحياة الدنيا بس السؤال اللي أنا عايز أسأله لحضرتك وفكر قبل ما تجاوب .. دلوقتي إنت أكيد كنت بتسمع حكايات من باباك ومامتك وجدودك يمكن عن إزاي زمان الخير كان مغرق البلد والناس بتصحي الصبح تسيح لية ضاني عشان تشربها علي الريق زي ما إنت بتشرب كوباية النسكافية كده .. إزاي المصريين زمان كانوا بياكلوا أكل أقل ما يُقال عنه إنه بيجيب إنسداد في الشرايين بس مكنش عندهم نسبة سمنة زي دلوقتي؟ .. إحنا فعلياً جيلنا مش بياكل محشي مثلاً بنفس الكم اللي كان أباءنا وأجدادنا بياكلوه ورغم كده إحنا أطخن منهم .. تاني .. ليه؟
قبل ما تبدأ تهرش في شعرك وتبدأ تفكر ليه إنت لازم تفهم حجم أو Scale الزيادة في الوزن في مجتمعنا .. عارف مبادرة 100 مليون صحة اللي عملها طويل العمر دي؟ لو إنت كنت عايش في كهف ومش داري بالدنيا فالحكومة المصرية عملت المبادرة دي عشان إنت كمواطن تكشف عن هل عندك فيروس سي أو لا؟ وإتعملت حملة كبيرة أوي فكرتها إنك بتروح لمستشفي يقيسوا ضغطك ووزنك وطولك وياخدوا عينة من دمك .. فكك من إن هل الكشف ده دقيق أو لا دي مش قضيتي .. اللي عايز أتكلم فيه إن 17 مليون مصري عملوا الكشف ده وإتاخد وزنهم وإتقاس طولهم ولقوا إن 35% من المصريين وزنهم فوق الطبيعي و 33% وصلوا لمرحلة السمنة و 6% عدوا الناحية التانية للسمنة المفرطة .. طب يا سيدي بلاش ناخد بكلام وزارة الصحة بتاعتنا عشان دي ناس هجاصة .. عندك الإتحاد العالمي للسمنة World Obesity Federation طلع دراسة قالت إن 32% من الأطفال المصريين مصابين بالسمنة وده بيحط مصر في المركز السابع علي مستوي العالم من حيث سمنة الأطفال .. واضح إني مش بتكلم عن واحد أو إتنين جابوا طقم عشان يلبسوه ولما طلعوه من الدولاب لقوا إنه مش داخل عليهم .. أنا بتكلم عن حاجة شبه الوباء وأنا مش ببالغ علي فكرة.
عارف يعني إيه 33% من المصريين وصلوا لمرحلة السمنة؟ يعني الواحد فيهم إحتمالية إنه يتعرض لأزمة قلبية في أي لحظة هي 64% .. إحتمالية إنه يجيله إنسداد في الشرايين بتنط 50% .. وإحتمالات إصابته بالسكر بتبقي 200% .. بس خلي بالك .. إحنا مش لوحدنا .. متفتكرش إن هوس المصريين بالدايت وعايزين نخس ويا تري إيه الفرق بين دايت كيتو ودايت الصيام المتقطع ده عندنا لوحدنا .. لا خالص .. عندك بلد زي البرازيل مثلاً اللي كل سنة بيزيد عندهم مليون حالة سمنة .. بلد تانية زي الصين الإحصائيات بتقول إن علي سنة 2025 وعليك خير حيبقي عندهم 50 مليون طفل وصلوا لمرحلة السمنة .. صحيح إن جزء من المشكلة هو سياسة الطفل الواحد اللي إتكلمت عنها قبل كده بس مش السبب الوحيد .. الحقيقة إن وباء الزيادة في الوزن اللي بقي في كل حتة في العالم دي سببه حاجة واحدة وهي إن سبحان الله بقينا كلنا بناكل زي الأمريكان.
فكر فيها كده .. غمض عينك وشوف إنت أكلت إيه في 3 أيام اللي فاتوا .. إنت بنسبة كبيرة أكلت وشربت حاجات فيها سكر كتير فشخ .. كلت حاجة فيها دهون ودهون هنا مش قصدي حتة لحمة ضاني ملبسة مسلوقة أو حتي مشوية .. أنا قصدي إنك ضربتلك يا شاورمة يا فراخ بروستد .. هو بالهنا والشفا وكل حاجة بس الأكل ده مكنش الأكل اللي أباءنا وأجدادنا كانوا بياكلوه .. بس إذا كان الأكل اللي إنت بتاكله هو السبب في كرشك ده فاللي خلاك تاكل الأكل ده بالذات هو ميكس بين 3 حاجات لما أتكلم عنهم حتحس إن كل واحد لوحده مش كفاية إنه يكون السبب في المصيبة اللي إحنا فيها بس لما تحط الثلاثة جنب بعض حتبدأ تقول لنفسك زي الكابتن (مصطفي الكيلاني) وهو بيعلق علي الماتشات .. يا خبرررر أبيييييييض.
الحاجة الأولانية .. إنت بيتضحك عليك تحت مسمي إن فيه دراسة علمية قالت إن الشيكولاتة حلوة .. كلوا شيكولاتة:
إحنا ناس مش بنشرب في حياتنا غير الشاي والقهوة والحاجة الساقعة وأنا كنت إتكلمت قبل كده عن إزاي شركات الحاجة الساقعة بالذات بتضحك علينا بإنها تدفع فلوس لجامعات عشان تطلع دراسات علمية تقول إن السكر حلو وأنتوا ظالمين السكر بس يمكن مفيش شركة سوري في الكلمة يعني في وساخة كوكاكولا .. كوكاكولا لوحدها دافعة ثمن 389 دراسة علمية كلها بتقول إن يا جدعان مفيش علاقة بين إنك تسف السكر زي الهروين وإن يجيلك مرض السكر .. مش بس كده .. كوكاكولا من تحت الطرابيزة عملت معهد أبحاث علمية عشان تطلع منه دراسات من تحت بير السلم وكلها بتقول إن السكر ده حاجة زي الفل ولما إتقفشوا طلع الCEO بتاع الشركة كتب مقالة في جرنان إسمه The Wall Street Journal عشان يعتذر .. لما تيجي تقرأ الدراسات العلمية دي كلها تلاقيها رايحه في سكة إنك لو عايز تخس إتمرن كويس وعك في الأكل براحتك .. إيه يعني تروح الجيم تتفحتلك ساعة ونص وبعد ما تخلص تقوم شاربلك لتر بيبسي عشان تعوض اللي إنت عرقته.
من التسعينات والخناقة دي مولعة في أميركا .. واحدة واحدة الأمريكان بقوا بيتعاملوا مع الحاجة الساقعة زي السجاير .. واحدة واحدة استهلاك الأمريكان من الحاجة الساقعة عمال يقل وده اللي خلي شركات الحاجة الساقعة الأمريكاني سواء بيبسي أو كوكاكولا تبدأ تدور علي زباين تانيين زي ما شركات السجاير عملت .. شغل كوكاكولا في إنها تبيع منتجاتها في العالم كله يخليك تحس إن (بابلو أسكوبار Pablo Escobar) الله يمسيه بالخير كان ملاك بالنسبة ليهم وخليني بس أوريك مثال واحد علي الحكاية دي وهي دور كوكاكولا في الصين لإن فعلاً ده حيفتح عنيك علي إزاي إنت غلبان قصاد الشركات دي.
في السبعينات لما الرئيس الأميريكي (ريتشارد نيكسون Richard Nixon) بدأ يدق باب الصين الشيوعية كانت كوكاكولا أول شركة أميريكية تدخل البلد .. جري الشريط لحد دلوقتي وتكتشف إن كوكاكولا مستحوذة علي 50% من سوق الحاجة الساقعة في الصين .. سنة 1975 ودي السنة اللي كوكاكولا بدأت تدخل الصين كانت نسبة الصينيين اللي عندهم سمنة يدوبك متعديش 10% من إجمالي عدد السكان .. سنة 2016 النسبة دي وصلت 32% .. الحكومة الصينية شافت ده بيحصل وقالت إن لازم يتصرفوا ولما كوكاكولا شمت خبر إتكلمت مع الحكومة الصينية .. لا إتكلمت إيه .. دي أجبرت الحكومة الصينية إنها بدل ما كانت حتطلع سياسات وتوجيهات بإن المواطن الصيني يبدأ يقلل شوية من استهلاكه للحاجة الساقعة إذا بيهم غيروا السياسات دي إن المواطن الصيني لازم يتمرن ويروح الجيم أكتر .. طبيعي إنك تسأل وتستغرب إزاي كوكاكولا ليها النفوذ ده كله عند الصينيين؟ .. يعني إنت عايز تفهمني إن الصين اللي جاية علي الإيجور زي ما إتكلمنا قبل كده ومانعه Google يدخل عندهم وأميركا مش عارفه تاخد منهم لا حق ولا باطل وتيجي كوكاكولا تمشي معاهم بفكرة كن فيكون .. طب إزاي؟ .. الفكرة إن كوكاكولا عامله في الصين جمعية خيرية زي رسالة كده إسمها International Life Sciences Institute أو المعهد الدولي للعلوم الحياتية وإختصاراً بيتسمي ILSI وكتير من مجلس إدارة الجمعية دي ناس ماسكة مناصب عالية في الحكومة الصينية .. كل سياسات الصين بخصوص السمنة وإزاي المواطن الصيني لازم يهتم بالرياضة مش إنه يحسن أكله هي توجيهات بتطلع من رسايل علمية نشرتها ILSI وكل ده بسبب إن اللي ماسك الحكومة الصينية بيتكيش فلوس حلوة أوي.
الحاجة الثانية .. إنت عارف ليه أكل الشارع رخيص؟ عشان مش معمول بسكر .. معمول بحاجة أنيل:
في السبعينات برده الإقتصاد العالمي كان عنده مشكلة كبيرة وهي إن سعر الأكل عموماً غالي وكحل للمشكلة دي طيب الذكر تاني (ريتشارد نيكسون) بدأ يحط حوافز للفلاحين الأمريكان إنهم يزرعوا أكتر وخصوصاً ذرة وده خلي إنتاج أميركا من الذرة ينط بشكل فشيخ ونتيجة ده إن بقي عند الأمريكان حاجة إسمها High Fructose Corn Syrup أو مشروب الذرة عالي الفركتوز وإختصاراً بيتسمي HFCS وده اللي شركات تصنيع الأكل في أميركا بدأت تستخدمه كمُحلي بدل السكر لإنه أرخص .. التقديرات متفاوتة بس بتحط HFCS أرخص من السكر بحوالي 50-70% .. سنة 1980 شركات بيبسي وكوكاكولا بقت بتستخدم HFCS في منتجاتها .. من 1980 لحد دلوقتي استهلاك صناعات الأغذية لHigh Fructose Corn Syrup نط لأكتر من 1000% والرقم ده مش غلطة في الكتابة فصدقني لو قلتلك إنت بتضحك علي نفسك لو قلت إنك بتاكل Healthy لإن شركات الأغذية بتحط البتاع ده في كل حاجة .. الزبادي .. توست الدايت .. الكاتشاب .. المربي .. ولإن في التجارة الدنيا دي أوضة وصالة فأسرع مما تتخيل سواء المنتجات الأميريكية أو حتي المصانع المصرية بقت بتمشي زي ما الشركات الأميريكية بتعمل وهوبا بقي دمنا كله HFCS يا عم الشيخ (عتمان) بس ده عمره ما كان حيحصل من غير الحاجة الثالثة.
الحاجة الثالثة .. التجارة العالمية هي السبب في كروشنا:
عشان تفهم الحتة دي بالذات خليني أديلك مثال من بره وبعد كده حتفهم إيه علاقة الكلام ده بينا .. سنة 1993 إتمضت إتفاقية إسمها NAFTA ودي إختصار North American Free Trade Agreement وزي ما باين من إسمها إتمضت بين أميركا وكندا والمكسيك اللي هي دول أميركا الشمالية واللي بمجرد ما إتمضت والنظام الغذائي للمكسيكيين إتفشخ لإن شركات الأغذية الأميريكية بقت بترمي منتجاتها اللي هي عبارة عن أكل كله سعرات حرارية ومفيهوش أي قيمة غذائية علي المكسيك .. المكسيكيين لقوا نفسهم كل شوية عندهم محلات أكل بتعمل بيتزا ومكرونات وهامبرجر .. مبقوش يشربوا مياه وبقوا شبه عايشين علي البيبسي والكوكاكولا .. شوية بشوية ونسبة أكلهم اللي معمول بHigh Fructose Corn Syrup نطت 1200% وتاني دي مش غلطة مطبعية .. تأثير NAFTA علي المكسيك إنها فعلياً فشخت صحة المكسيكيين .. قبل توقيع الإتفاقية دي سنة 1993 كانت نسبة المكسيكيين اللي بيعانوا من السمنة يدوبك 34.5% ودي كانت نسبة معقولة وإن كانت برده عالية .. سنة 2018 النسبة دي بقت 75.2% .. مش كده وبس .. عارف إيه أكتر سبب للوفيات في المكسيك؟ .. المخدرات؟ .. أعمال العنف بتاعة تجار المخدرات؟ .. لا ولا .. أكتر سبب للوفيات في المكسيك هو مرض السكر .. تدري ليش؟ .. المكسيكيين هم أكتر شعب علي الأرض بيشرب كوكاكولا .. كل ده قصاد إن سنة 2019 المكسيك كانت أكتر بلد صدرت فاكهة وخضار لأمريكا .. الصادرات المكسيكية لأميركا من الخضار والفاكهة بس عدت 13.4 مليار دولار وده سببه إن حوالي 70% من الإنتاج الزراعي المكسيكي بيتصدر لأميركا.
إيه علاقة المكسيك بينا؟ لإن اللي بتعمله أميركا مع المكسيك هو هو اللي بتعمله معانا لإن خلال سنة 2018 مثلاً إحنا صدرنا لأميركا 1.7 مليار دولار بضاعة من اللي ملهاش علاقة بالبترول ومن المبلغ ده كله 61% منه منسوجات .. قصاد إن في نفس السنة إحنا استوردنا من أميركا بضاعة ب5 مليار دولار منها 33.33% عبارة عن أغذية مصنعة و Fast Food .. إحنا بنديهم بضاعة تفيدهم وبيصدرولنا بضاعة تتخنا وتضرنا وللأسف منقدرش نقولهم تلت التلاتة كام عشان هي دي التجارة العالمية.
إحنا فعلياً في زمن غريب جداً .. طول عمر البشر وهم في سباق إزاي يوفروا أكل للجعان بس إحنا دلوقتي الأية إتقلبت وبقي عندنا عدد الناس اللي بتاكل زيادة عن اللزوم أكتر من الناس اللي مش لاقية تاكل بس مش معني إنك كل يوم بتحفلك ألفين سعر حراري أكل إن جسمك كده بيستفاد .. لا خالص .. إنت لو أكلك أغلبه أكل مُصنع فإنت كده فعلياً بتفشخ جسمك .. يمكن دلوقتي جه وقت إني أقولك طب أنا كاتب الكلام ده كله ومصدعك ليه؟ .. معاك إن حسب إحصائيات كتير 75% من المصريين مش بيمارسوا الرياضة بشكل منتظم ومستمر وده بيخليني أقول إنك مهما حاولت تعمل دايت فإنت مش حتوصل للي إنت عايزه .. إنت عايش في نظام عالمي متصمم عشان إنت تتخن من أول شركات الأغذية اللي مش بتفكر في حاجة غير إنها تجيب فلوس لسياسات التجارة الحرة اللي مخليه الدول الغنية تلوي دراع الدول الفقيرة .. الأمريكان صدرولنا طريقة أكلهم وللأسف مش عارفين نتخلص منها .. خليني أختم معاك بإن نصيحتي ليك أنزل روح أعمل إشتراك جيم وروح إتمرن وفي نفس الوقت إبعد عن الأكل المُصنع قدر الإمكان.
المصادر:
- مقالة بعنوان Egypt’s obesity battle: ‘No one cares about calories here’ نشرت في جريدة The Guardian البريطانية وده لينك المقالة الأصلية:
https://www.theguardian.com/world/2016/oct/07/egypt-obesity-battle-calories-overweight - حلقة من برنامج Patriot Act with Hassan Minhaj بتتذاع علي قناة Netflix وده لينك الحلقة علي YouTube:
https://www.youtube.com/watch?v=kmo6lZcdkO0&t=311s&pbjreload=10 - مقالة بعنوان “معدلات سمنة مخيفة في هذا البلد العربي ورئيسه يتدخل” نشرت علي موقع قناة العربية وده لينك المقالة الأصلية:
https://www.alarabiya.net/ar/medicine-and-health/2018/12/17/%D9%85%D8%B9%D8%AF%D9%84%D8%A7%D8%AA-%D8%A7%D9%84%D8%B3%D9%85%D9%86%D8%A9-%D9%81%D9%8A-%D9%85%D8%B5%D8%B1-%D8%A7%D9%84%D8%A3%D8%B1%D9%82%D8%A7%D9%85-%D9%85%D8%AE%D9%8A%D9%81%D8%A9-%D9%88%D8%A7%D9%84%D8%B3%D9%8A%D8%B3%D9%8A-%D9%8A%D8%AA%D8%AF%D8%AE%D9%84
