لينك التسجيل الصوتي للمقالة علي ساوند كلاود:
https://on.soundcloud.com/8V4t6
اللي بيحصل في فنزويلا دلوقتي ده مينفعش يتوصف لإن محصلش إن دولة في العالم حصل فيها اللي بيحصل دلوقتي .. أنا أسمع عن دولة شعبها ميبقاش طايق رئيسها زي ما الفينزويليين مش طايقين الرئيس (نيكولاس مادورو Nicolas Maduro) اللي بيحكم غصب وعافية وبحماية الجيش .. إحنا في مصر عارفين ده وحاسينه وفاهمينه كويس .. اللي موجود في فنزويلا ومش حتلاقيه في حتة تانية إن دي بلد بيهرب منها كل سنة 3 مليون بني أدم .. دي بلد إقتصادها بيعاني من نقص حاد في الأكل والشرب والكهرباء ومن تضخم رهيب لدرجة إن بتوع الإقتصاد سموه Hyperinflation وده مصطلح محدش كان متخيل إنه ممكن يحصل في إقتصاد بلد يعني إنك تروح تشتري فرخة تلاقي إن بسبب عملة بلدك إتمسح بكرامتها الأرض فتدي للفرارجي أربعة كيلو جنيهات .. هناك العملة مبتتعدش دي بتتوزن .. اللي أنا ححاول أفهمهولك وأفصصهولك زي ما الست والدتك بتفصصلك السمك كده هو إيه اللي بيحصل بالضبط في البلد الغريبة دي وخليني أحاول أجاوب علي 3 أسئلة:
- ليه فيه خناقة علي هو مين رئيس فنزويلا؟
- دولياً بقي مين واقف مع مين ضد مين؟
- هل فيه حل للأزمة دي؟
خليني أبدأ معاك من الأول .. هو ليه فيه خناقة علي مين هو رئيس فنزويلا؟
الليلة كلها ولعت يوم 23 يناير 2018 .. في اليوم الأسود ده واحد إسمه (خوان جايدو Juan Guaido) كان رئيس البرلمان في فنزويلا طلع قال يا جدعان أنا الرئيس الشرعي للبلد مع إن قبلها بأسبوعين كان (نيكولاس مادورو) طلع قال إنه هو اللي كسب الإنتخابات الرئاسية اللي إتعملت في 2018 عشان يستمر في منصبه لفترة رئاسية ثانية مدتها 6 سنين .. يعني بإختصار شديد إنت عندك إتنين كل واحد فيهم بيقول إنه هو الرئيس الشرعي لفنزويلا .. (نيكولاس مادورو) بيقول إنه هو اللي كسب الإنتخابات وإن (خوان جايدو) عميل أميركا بعتاه عشان يبقي عروسة في إيدها ضمن المؤامرة الإمبريالية الغربية علي فنزويلا .. علي الناحية الثانية (خوان جايدو) بيقول علي (نيكولاس مادورو) إنه ديكتاتور وظالم ومفتري وياريته حتي عارف يدير شئون البلد وإن هو اللي لبس البلد كلها في الحيط .. أظن السؤال دلوقتي هو مين معاه حق؟
تسمع عن حد إسمه (هيوجو تشافيز Hugo Chavez)؟ في حالة إنك متعرفش مين ده فهو تقدر تقول عليه إنه كان (جمال عبدالناصر) الله يرحمه بتاع فنزويلا .. ده رجل كان بيحكم فنزويلا بداية من سنة 1999 وكان بني أدم إشتراكي يعني مؤمن بإن القطاع العام هو الوحيد اللي ينفع يقود إقتصاد البلد فلما جه مشي في سكة تأميم كل الشركات الكبيرة ولإن فنزويلا معندهاش حاجة تبيعها غير البترول فهو أمم كل شركات البترول الأجنبية في البلد .. الفنزويلين كانوا بيموتوا في (هيوجو تشافيز) لإنه باعلهم فكرة إنه جاي عشانهم .. هو قالهم أنا باخد من الغني وأديكوا وهم صدقوا .. خد عندك مثلاً سياسته بتاعة تقنين الأسعار .. هو قال أن لازم الحكومة تتدخل وتقلل الأسعار عشان الناس تاكل ودي حاجة كويسة بس لازم تتعمل صح وإلا الموضوع حيفرقع في وشك لإن رجال الأعمال اللي عندهم مصانع أكل بطلوا ينتجوا لإنهم إكتشفوا إنهم بيبيعوا بالخسارة وده سبب جوهري في أزمة الأكل اللي بتعيشها فنزويلا دلوقتي وهي إن مفيش مصانع أكل بتصنع أي حاجة مكتوب عليها صنع في فنزويلا .. خد عندك برده سياسة إن البنك المركزي بيتحكم في سعر العملة واللي بدأ العمل بيها سنة 2013 ودي كان هدفها برده التحكم في الأسعار ودي حاجة كويسة بس برده لازم تتعمل صح وإلا حتلاقيها برده فرقعت في وشك ولقيت السوق السودا لتغيير العملة بقت بتاكل جاتوه من عند ساليه سوكريه علي قفا الإقتصاد وهي السبب في التضخم اللي مش طبيعي اللي بتعيشه فنزويلا دلوقتي .. تقدر تقول إن (هيوجو تشافيز) خرب البلد لمجرد إنه كان مبسوط إن الناس بتهتف باسمه ومعلقه صورته في كل حتة.
لما (هيوجو تشافيز) كان بيموت في 2013 هو بنفسه اللي شاور علي (نيكولاس مادورو) وقال هو ده اللي يحكم من بعدي مع إن الناس كلها كانت عارفه إنه أهبل بس متفهمش (هيوجو تشافيز) كان شايف فيه إيه ولما بقول إن الناس كلها كانت عارفه إنه أهبل مش قصدي علي الفئة اللي حولين (هيوجو تشافيز) بس .. أنا فعلاً قصدي إن الشعب كله كان شايف إنه أهبل .. في إبريل 2013 لما إتعملت الإنتخابات الرئاسية (نيكولاس مادورو) كسب بفرق 1.6% يعني كسب بطلوع الروح بس الكلام اللي إتقال يا جماعة ده رأي الصندوق وهي دي الديموقراطية سيبوا الرجل يشتغل.
لمدة 6 سنين اللي هي فترة رئاسته الأولانية والإقتصاد الفنزويلي بيغرق ولا التايتانك ومع كل يوم بيعدي الفنزويليين بيلوموه هو والحزب الإشتراكي الحاكم وفضلوا مستحملين ال6 سنين لحد ما يخلصوا ويخلصوا من شنبه بس للأسف لما إنتخابات الرئاسة قربت في مايو 2018 عمل تعديلات في قانون الإنتخابات بحيث إن الإنتخابات إتفصلت علي مقاسه عشان هو اللي يكسب في الأخر .. كمان في 2017 طلع قرار بتقليل صلاحيات البرلمان المنتخب وعمل هو برلمان تاني بالتعيين سماه المجلس الدستوري الوطني وبالتالي كل المعارضة في فنزويلا قاطعت الإنتخابات وحتي البرلمان اللي بتسيطر عليه المعارضة معترفش بنتايج الإنتخابات دي.
(نيكولاس مادورو) مش يتهد بقي ويقعد ساكت .. قالك لا أنا حفضل مستمر في مدتي الأولانية لحد أخر يوم فيها وبعد كده تنصبوني رئيس لمدة تانية تبدأ في يناير 2019 .. يعني بدل ما مدته الرئاسية الثانية تبدأ في مايو 2018 قالك لا أنا عايزها تبدأ في 10 يناير 2019 .. عدي يوم 10 يناير والرجل بدأ مدته الثانية ولسه حيقول هيييييييييييييه أنا رئيس طلعت المعارضة قالتله لا إستني هنا إنت حضرتك ماسك البلد من مايو 2018 لحد يناير 2019 غصب وعشان كده خلال الفترة دي إنت كنت رئيس غير شرعي لإنك إغتصبت الرئاسة .. إتهام إغتصاب الرئاسة ده هو اللي دايماً زعيم المعارضة ورئيس البرلمان (خوان جايدو) بيكرره ولا كأنها لبانة في بقه .. (خوان جايدو) رغم إن عنده 35 سنة إلا إنه بيعرف يتكلم شوية بس حجته الأساسية إن بناء علي المادتين 233 و 333 من الدستور ففي حالة إن حد استولي علي الرئاسة بشكل غير شرعي فمنصب الرئيس بيروح لرئيس البرلمان .. عشان كده يوم 23 يناير 2018 (خوان جويدو) طلع قال أنا الرئيس الشرعي لفنزويلا.
نيجي بقي للسؤال الثاني .. دولياً مين واقف مع مين ضد مين؟
يدوبك بعد كام ساعة من إعلان (خوان جايدو) إنه هو الرئيس الشرعي للبلد طلع (دونالد ترامب Donald Trump) في تويتة لإنه مبيعرفش يتواصل معانا ببقه لازم علي تويتر بإن حكومة الولايات المتحدة بتعترف به .. طبعاً طلع بعدها (نيكولاس مادورو) يزعق شايفين شايفين الإمبريالية الغربية اللي عايزة تحتل بلدنا هي والعميل الخاين بتاعها وطلع قرار بأنه بيدي الدبلوماسيين الأمريكان 72 ساعة عشان يمشوا بره البلد .. داخلياً فنزويلا بلد مقسومة بالنص .. اللي جوه الحكومة بيقولوا إن (نيكولاس مادورو) هو الرئيس الشرعي وأي حد ضده يبقي خاين وعميل .. اللي بره الحكومة بيقولوا ما تغور بقي يا وش البومة بشنبك ده .. صحيح (خوان جايدو) مدعوم من أميركا وشوية دول في أميركا الجنوبية بس البرلمان اللي هو بيقوده ولا له أي ستين لازمة لإن أغلب السلطات التشريعية في إيد المجلس الدستوري الوطني اللي هو الإفتكاسة اللي عملها (نيكولاس مادورو) عشان يفصل قوانين علي مقاسه.
السر اللي الناس كلها عارفاه هي إن القوات المسلحة هي اللي في إيدها تحل الأزمة بس المشكلة إن (نيكولاس مادورو) شاري ولاءهم بإنه كل شوية عمال يزود من مرتباتهم وبيعين الجنرالات المتقاعدين في مناصب عليا في البلد .. مبيفكركش بحد نعرفه؟ .. بس إنت متقدرش تضمن ولاء مؤسسة كاملة .. في فيديوهات كتير علي Social Media لضباط في الحرس الجمهوري بيرفضوا يضربوا نار علي المتظاهرين .. من ناحيته (خوان جايدو) عرض علي القادة العسكريين العفو الرئاسي إذا ما قرروا إنهم ينقلبوا علي (نيكولاس مادورو).
يمكن أهم سؤال قدامنا دلوقتي هو هل فيه حل للأزمة؟
فكك من الأزمة السياسية لإن دي خناقة بين إتنين عايزين الكرسي .. المصيبة اللي فعلاً بتعيشها فنزويلا هي الإقتصاد وخصوصاً معدل التضخم الرهيب اللي بيتسمي Hyperinflation .. عشان بس تستوعب يعني إيه Hyperinflation فمعدل التضخم سنوياً لحد نوفمبر 2018 وصل 1,300,000% .. مش قادر تستوعب أنا عارف .. علي أواخر 2018 سعر أي حاجة وليكن مثلاً كيس السكر بيزيد الضعف كل 19 يوم .. ده خلي الفنزويليين معندهمش حاجة ياكلوها .. في شهر ديسمبر 2018 إنت عشان تروح تشرب كوباية قهوة في أي قهوة بلدي هناك حتدفع 400 بوليفار اللي هو عملة البلد .. عشان كده إنت عشان تروح تشتري حاجة كنت بتوزن الفلوس .. بروح أشتري مثلاً كيلو بطاطس ألاقي نفسي بدفع 4 كيلو بوليفار.
بداية من أغسطس 2018 الحكومة نزلت عملة جديدة إسمها البوليفار السيادي وده قيمته 100,000 البوليفار القديم عشان بدل ما إنت مثلاً تروح تشتري كيلو بطاطس ب4 كيلو بوليفار فإنت بتروح للخضري تديله 4 ورقات بوليفار سيادي ولا كأن الحكومة بتلعب بنك الحظ .. كمان الحكومة نزلت ورق بنكنوت جديد فلو إنت في فنزويلا زي ما إنت في مصر عندك ورقة بخمسة جنيه وعشرة وعشرين وخمسين ومية ومتين .. في فنزويلا عندهم ورقه بإتنين وخمسة وعشرين وخمسين ومية ومتين وخمسمية بوليفار سيادي .. اللي يغيظ إن الحكومة مقتنعة إن سياسة بنك الحظ دي هي اللي حتنقذ الإقتصاد .. وطبعاً النتيجة إن العملة سواء الجديدة أو القديمة عمالة تقع و الإقتصاد عمال يتخرب بيته.
كتير من الفنزويليين ملقوش حل غير الهجرة .. بناء علي أرقام الأمم المتحدة فبداية من 2014 فيه أكثر من 3 مليون فنزويلي سابوا البلد ومشيو وطبعاً بتطلع الحكومة تقول عليا الطلاق كدب وإن دي إشاعات مغرضة هدفها إنها تدي مبرر للدول اللي حول فنزويلا إنها يا إما تتدخل عسكرياً أو إنها تفوض أميركا إنها تتدخل عسكرياً في فنزويلا .. أغلب اللي بيسيبوا البلد بيروحوا كولومبيا ومنها بيتوزعوا علي الإكوادور وبيرو وتشيلي وفيه بيروح لحد البرازيل .. الهجرة الجماعية للفنزويليين دي تعتبر أكبر عملية أزاحة إجبارية لسكان تحصل في الأميريكتين في التاريخ.
المصدر:
- مقالة بعنوان Venezuela Crises: How the Political Situation Escalated .. أزمة فنزويلا: إزاي الوضع السياسي إتصعد أوي كده .. نشرت علي موقع هيئة الإذاعة البريطانية BBC وده لينك المقالة الأصلية:
https://www.bbc.com/news/world-latin-america-36319877
