لينك التسجيل الصوتي علي ساوند كلاود:
https://on.soundcloud.com/W2xyt
فيه تجارب في حياة البني أدمين لما بيخرجوا منها مش بيكونوا زي ما دخلوها خالص .. الطلاق واحدة من التجارب دي .. وفاة والدتك أو والدك من التجارب دي .. في حياة الدول بقي مفيش تجربة ممكن تغير دماغ دولة زي الحرب .. سواء الهزيمة أو النصر علي فكرة .. يعني مثلاً أميركا قبل الحرب العالمية الثانية مش هي أميركا اللي طلعت من الحرب منتصرة و بتعتبر نفسها قوة عظمي علي مستوي العالم .. في نفس الوقت مصر قبل نكسة يونيو مش هي مصر بعدها .. واحدة من أكتر الحروب اللي غيرت دول كتير هي حرب الخليج الثانية اللي إنت عارفها باسم حرب تحرير الكويت .. دي حرب الخليج قبلها كان حمادة و بعدها بقي حمادة تاني خالص.
يمكن عشان جيلنا كان لسه صغير وقت ما الحرب دي قامت يعني أنا مثلاً كان عندي سنتين بس فمن الحاجات اللي إحنا مش عارفينها إن الحرب دي حصلت علي 3 مراحل .. المرحلة الأولانية هي قرار (صدام حسين) الله يرحمه دخول الكويت .. المرحلة الثانية هي عملية درع الصحراء Desert Shield ودي ببساطة فترة ال6 شهور اللي أميركا نقلت فيها 500,000 عسكري للمملكة العربية السعودية و نشرتهم علي طول حدودها مع العراق .. المرحلة الثالثة واللي بدأت الساعة 2:39 صباح يوم 17 يناير 1991 واللي تبقي عملية عاصفة الصحراء Desert Storm ودي تبقي عملية تحرير الكويت نفسها من الإحتلال العراقي .. المرحلة الثالثة دي اللي ناس كتير بتركز عليها و الصراحة عندهم حق .. إنت بتتكلم عن فترة 6 أسابيع إتعملت فيهم 116,000 غارة جوية إترمي فيها 88,500 طن قنابل تمهيداً غزو بري مقعدش أكتر من 100 ساعة وكان خلص .. الأرقام لوحدها تخليك تقول بنفس طريقة (عادل إمام) لا إله إلا الله .. أنا بس عايزك تعرف إن في الضربة الجوية الأولي بتاعة يوم 17 يناير القوات الجوية الأميريكية ضربت عدد أهداف جوه العراق كعدد يعني هم أكتر من عدد الأهداف اللي القوات الجوية الأميريكية ضربتها جوه ألمانيا في الحرب العالمية الثانية.
اللي عايزين نطلع بيه من المقالة دي هو إنك تبقي عارف إجابة 3 أسئلة .. هي الحرب دي قامت ليه؟ .. الحرب دي مشيت إزاي؟ .. و بما إننا عارفين هي الحرب دي خلصت علي إيه فخلينا نتكلم عن هو إحنا إستفدنا إيه من الحرب دي؟
هي حرب الخليج الثانية قامت ليه؟
مشكلة العراق مع الكويت حاجتين .. الجغرافيا و الإقتصاد .. خلينا نبدأ بالسهل اللي مفيهوش أرقام اللي هي الجغرافيا .. من لحظة ما فرنسا و إنجلترا مضوا مع بعض إتفاقية سايكس- بيكو وهم حطوا العراق و الكويت في سكة اللي يروح ما يرجعش .. فكر فيها كده .. العراق عندها نهري دجلة و الفرات يعني عندها أرض زراعية بتحلم بيها أي دولة .. طبيعي إن مع الوقت الإنتاج الزراعي للعراق حيزيد فوق إحتياجاتها و بالتالي حيفكروا إنهم يصدروا .. حيبصوا لأقرب ميناء ليهم ومش حيلاقوا .. خريطة العراق زي ما رسمتها إنجلترا و فرنسا خلت العراق شبه دولة حبيسة .. العراق مكنش ليها منفذ بحري غير شبر مياه عند حتة إسمها شط العرب علي الخليج العربي .. ده في الوقت اللي دولة تانية إتولدت برده من الحبر اللي اتكتبت بيه إتفاقية سايكس- بيكو اللي هي الكويت بسم الله ما شاء الله عندها كورنيش يجنن علي الخليج العربي .. طبيعي إن مع الوقت العراقيين يبصوا لنفسهم و يقولوا هو إحنا ليه نقول للكوايته والنبي خلونا نستخدم الموانيء بتاعتهم طب ما إحنا ممكن ناخد الكويت كلها؟
فضل الإحساس ده عند العراقيين اللي هو شبه إحساس لما تبقي جعان و قاعدين علي الغدا و تبص لمناب الفرخة بتاع أخوك الصغير و تقول لنفسك طب ما أضربه و أخد منابه مش بيكتمه غير خوف العراقيين من رد الفعل اللي هو بالضبط إنت خايف من إن أبوك يرنك علقة عشان ضربت أخوك الصغير لحد ما حصلت حرب الخليج الأولي .. حرب الخليج الأولي دي حصلت بين العراق و إيران و يهمني إنك تعرف عنها حاجتين .. أول حاجة إن محدش كسب الحرب دي رغم إنها إستمرت 8 سنين .. ثاني حاجة هي إن الحرب دي لما خلصت العراق طلعت مديونة لشوشتها .. العراق كانت مديونة بحوالي 14 مليار دولار وده كان رقم خزعبلي في الثمانينات .. زي أي دين في الدنيا محتاج إنك تقسطه وعشان تدفع أقساط و فوايد الديون دي كلها العراق كانت معتمدة بشكل شبه كلي علي عائدات النفط وهنا يجي دور الكويت.
عشان البترول يفضل غالي لازم الدول اللي بتنتجه تقلل من إنتاجها شوية وده اللي بتحكمه قاعدة العرض و الطلب .. المشكلة إن الكويت مكنتش عايزه تقلل من إنتاجها وده خلي البترول رخيص في السوق و بالتالي الفلوس اللي بتخش العراق مكنتش كفاية مش بس عشان العراق تسدد أقساط الديون إنما دي مكنتش كفاية إن العراق تصرف علي نفسها .. قدام الناس إتقال إن العراق متضايقة من الكويت عشان هي بتسرق بترولها بس مش دي الحقيقة .. العراق كانت متغاظة من الكويت عشان الكويت كانت بتاخد من العراق أكل عيشها ولو أنا عايزك تتعلم مني حاجة إياك ثم إياك ثم إياك تضايق حد في أكل عيشه .. يوم 2 أغسطس 1990 القوات العراقية بتخش الكويت.
زي ما حضرتك متوقع بعد ما ضربت أخوك الصغير عشان تاخد حتة الفرخة بتاعته أبوك زعقلك .. اللي حصل إن رئيس أميركا وقتها (جورج بوش الأب) و رئيسة وزراء بريطانيا (مارجريت ثاتشر) إتفقوا إنهم يبعتوا قوات للمملكة العربية السعودية عشان تشارك في تحرير الكويت من العراق .. طلع قرار من الأمم المتحدة بإن يا عراق قدامك لحد يوم 15 يناير 1991 عشان تنسحبي من الكويت وهنا بيجي دور المرحلة الثانية من حرب الخليج اللي هي عملية درع الصحراء Desert Shield وعشان خاطري حاول تستوعب الرقم اللي حيقولهولك ده .. خلال 6 شهور فيه 35 دولة بعتت حوالي مليون عسكري للسعودية .. بتتكلم عن 2213 طيارة مقاتلة .. بتتكلم عن 6 حاملات طائرات بسلاطاتهم و بابا غنوجهم.
الحرب دي مشيت إزاي؟
أهم حاجة تحطها في دماغك عشان تفهم أحداث حرب الخليج الثانية إنك تبقي عارف إن أحداثها أو علي الأقل أول كام يوم فيها هم هم بالضبط أول كام يوم من حرب أكتوبر 1973 .. زي ما حرب أكتوبر بدأت بضربة جوية قدرت فيها إنك تخلي كل الطيارات المقاتلة اللي تحت إيد سلاح الجو المصري إنها تتجمع في وقت واحد الساعة 2 الظهر عشان تضرب أهداف جوه سيناء فبرده الأمريكان إحتاجوا يجمعوا عدد كبير أوي من الطيارات ومش بس الأمريكان فيه دول تانية شاركت في الضربة الجوية الأولي ضد القوات العراقية .. الصداع اللي كان في دماغ الأمريكان هو منظومة الدفاع الجوي العراقية .. عايزك تعرف إن العراق كان بيحميها 154 بطارية صواريخ دفاع جوي بإجمالي 16,000 صاروخ أرض – جو و معاهم 9500 مدفع مضاد للطيارات .. 478 قاعدة رادارات بتراقب سماء العراق 24 ساعة 7 أيام في الأسبوع .. ورا ده كله فيه 550 طيارة مقاتلة تحت إيد سلاح الجو العراقي.
تسلسل الأحداث بتاع الضربة الجوية الأولي كان الأتي:
إحنا إتفقنا إن الضربة الجوية الأولي حصلت الساعة 2:39 صباح يوم 17 يناير 1991 .. قبلها ب36 ساعة فيه 7 طيارات من اللي بيتقال عليهم قاذفات من طراز B-52 Stratofortress طلعت من قاعدة باركسدايل Barksdale الجوية في ولاية لويزيانا الأميريكية .. الطيارات دي طلعت من هناك و عدت المحيط الأطلنطي و طاروا فوق البحر المتوسط لحد ما وصلوا للعراق .. زي ما حضرتك شايف فده مشوار ما يعلم بيه إلا ربنا ولا مشوار تجديد رخصتك في المرور .. لحد اليوم ده دي كانت أطول مسافة تطيرها طيارات عشان تنفذ غارة جوية في تاريخ البني أدمين .. الساعة 12:39 يعني قبل ساعتين من ساعة الصفر كانت السبع طيارات عدت البحر المتوسط وبقت فوق المجال الجوي الإسرائيلي.
في التوقيت ده كان فيه سربين طيارات هيلوكوبتر كل سرب فيه 5 طيارات .. طيارة واحدة طراز MH-53 Pave Low ودي طيارة عاملة زي الصيني اللي في النيش كده مبتطلعش إلا للضيوف و أربع طيارات أباتشي AH-64 Apache .. السربين دول مهمتهم كانت إنهم يطيروا علي إرتفاع واطي أوي عشان يضربوا منصتين رادارات من اللي بتحمي العراق .. الفكرة إنك عشان توقع الدفاع الجوي العراقي إنت مش محتاج تضرب كل ال478 قاعدة رادار في وقت واحد .. محدش قال كده .. إنت محتاج تخلق ثغرة بس عشان الطيارات تعدي منها .. الساعة 2:38 صباح يوم 17 يناير 1991 بدأت حرب تحرير الكويت بتدمير محطتين الرادارات لإن فعلياً أول صاروخ فرقع في الحرب كان من واحدة من طيارات الأباتشي دي .. في أربع دقايق بس كان السربين ضربوا 27 صاروخ Hellfire و 4000 طلقة مدفع رشاش.
بمجرد ما محطتين الرادارات العراقيين إتضربوا و إتخلقت ثغرة في الدفاع الجوي العراقي فالسرب بتاع السبع قاذفات B-52 Stratofortress هو اللي ضرب أول طلقة في الحرب علي بغداد لما كل طيارة ضربت 5 صواريخ كروز ADM36 علي محطات الكهرباء اللي بتغذي العاصمة بغداد .. الطيارات ضربت الأهداف بتاعتها و رجعت تاني علي أميركا من غير ما تهبط.
تاني حد ضرب نار كانت القوات البحرية الأميريكية لما السفن بتاعتها اللي راكنه في الخليج العربي ضربت بغداد بصواريخ توماهوك ودي صواريخ كروز و علي فكرة من ضمن السفن الأمريكاني اللي شاركت في القصف كانوا بارجتين من أيام الحرب العالمية الثانية اللي هم البارجة ميزوري U.S.S Missouri و البارجة ويسكونسن U.S.S Wisconsin.
فوق ده كله كان فيه طيارتين إستطلاع من اللي إحنا بنسميهم AWAC ودي إختصار Airborne Warning and Control كانوا واخدين الإسم الكودي A2 و A3 .. الاف الطيارات الأمريكاني كانت فعلياً في الجو قبل ساعة الصفر بساعتين بتطير في تشكيلات عشوائية ودي مناورة هم كانوا بيعملوها من شهور عشان ميخلوش العراقيين متوقعين النقطة اللي هم حيضربوا العراق منها .. تاني حاول تربط بين ده وبين اللي عملناه في حرب أكتوبر .. خطة الخداع الإستراتيجي بتاعة الرئيس (محمد أنور السادات) الله يرحمه كانت إننا نهوش الإسرائيليين مرتين بإننا نرفع درجة الإستعداد القتالي كأننا رايحين نحارب .. في المرتين الإسرائيليين لبسوا في الحيط لما الحرب مقامتش وهم أعلنوا التعبئة علي الفاضي و دفعوا فلوس كتير إترمت في الزبالة .. هنا نفس الوضع الأمريكان بقالهم شهور كل شوية يطلعوا الاف الطيارات تطير فوق السعودية بشكل عشوائي قال يعني الحرب حتقوم ومكنش بيحصل حاجة.
بمجرد ما الثغرة إتفتحت 3 طيارات تشويش علي الرادارات طراز EF-111 Raven عدوا من فوق قاعدتي الرادارات اللي إتدمروا و طاروا جري علي العاصمة بغداد .. إشمعني بقي؟ .. قبل ساعة الصفر كانت فيه 10 طيارات F-117 Nighthawk ودي كانت أول طيارة ليها قدرة علي التخفي من الرادارات أو زي ما بيتقال عليها Stealth تعملها اميركا كانت عبرت الحدود بين السعودية و العراق .. السرب ده من الطيارات كان دوره هو ضرب البنية التحتية للإتصالات العسكرية العراقية ويمكن أهم هدف هم راحوا يضربوه كان مركز الإتصالات الدولي وده تقدر تقول عليه الراوتر اللي كل الإتصالات العسكرية العراقية بتعدي عليه .. دي كانت أول مرة تكنولوجيا Stealth تتجرب في معركة .. طب إفرض التكنولوجيا دي مطلعتش قد كده و سرب الطيارات ده إتكشف؟ .. ساعتها ال3 طيارات EF-111 Raven حيكون دورهم هو التشويش علي الرادارات اللي بتحمي بغداد عشان طيارات F-117 Nighthawk متتكشفش.
عشان الطيارات دي تفضل محافظة علي خاصية Stealth بتاعتها فالطيارين ميقدروش يبلغوا القيادة بتاعتهم هم عملوا إيه؟ ولا يقدروا يحذروا القيادة من أي مصيبة حصلت .. الطيارين حيطيروا وهم قافلين الراديو بتاعهم لحد ما مش بس يضربوا الأهداف بتاعتهم جوه بغداد إنما كمان لما يرجعوا و يقربوا من الحدود العراقية السعودية .. الغريبة إن الطريقة اللي القيادة العسكرية الأميريكية عرفت إن الطيارات نجحت في مهمتها كان عن طريق CNN .. اللي حصل إن بمجرد ما Deadline بتاع الأمم المتحدة اللي حطته للعراق عشان تنسحب من الكويت إتحط و كتير من محطات الاخبار العالمية بعتت مراسليين عسكريين لبغداد عشان يغطوا الحرب اللي أكيد حتحصل حتحصل ومن ضمن محطات الأخبار دي كانت CNN .. قبل ساعة الصفر بدقايق مراسل CNN في بغداد عمل بث مباشر من أوضة الفندق بتاعته عشان يسمع العالم صوت الطيارات اللي بتطير علي إرتفاع واطي أوي فوق بغداد .. بمجرد ما أول قنبلة ضربتها طيارات F-117 Nighthawk ضربت مركز الإتصالات الدولي في بغداد و البث المباشر لمراسل CNN إتقطع فالقيادة العسكرية الأميريكية عرفت إن الضربة نجحت.
بمجرد ما القنابل بتاعة الطيارات الأمريكاني وقعت فوق بغداد و أكتر من 2000 مدفع مضاد للطيارات بيحموا المدينة بقوا بيضربوا نار عشوائي للسما .. الطيارات F-117 Nighthawk العشرة ضربت 17 صاروخ موجه علي الأهداف بتاعتها جوه بغداد اللي كان من ضمنها واحد من قصور (صدام حسين) بالمناسبة و إنسحبت علي طول للحدود السعودية عشان خايفين من أي طلقة مدفع تايهة تجيب واحدة فيهم بالحظ .. فاكر صواريخ توماهوك اللي ضربتها السفن الأميريكية؟ .. أهو بمجرد إنسحاب طيارات F-117 Nighthawk وقع 116 صاروخ فوق أهداف متوزعة في بغداد من ضمنها مقر وزارة الدفاع و مقر حزب البعث الحاكم و مصنع صواريخ باليستية و قصر تاني من بتوع (صدام حسين).
الدقايق الأولي دي أولاً خلت القوات العراقية لا عارفه تشوف اللي بيحصل ولا عارفه تتكلم مع بعضها عشان شبكة الإتصالات بتاعتهم إتضربت .. منظومة الدفاع الجوي بتاعتهم إتفتح فيها ثغرة .. ده خلي خلال الساعات الأولي للحرب 668 طيارة مقاتلة أميركية و بريطانية تتسلي علي منصات الدفاع الجوي العراقي اللي علي طول الحدود مع السعودية بس فضلت بغداد صداع في راس الأمريكان .. الدفاع الجوي العراقي حول بغداد مش سهل .. زي ما قلتلك بغداد مش بس محمية ببطاريات صواريخ أرض – جو كمان بيحميها الالاف من المدافع المضادة للطيارات .. طب و الحل؟
الحل هي فكرة بسيطة أوي وهي إن طيارات A-6 Intruder تابعة للقوات البحرية الأميريكية طارت بإتجاه بغداد و أطلقت طيارات بدون طيار Drones صغيرة .. الرادارات العراقية إفتكترت الطيارات اللي بدون طيار دي إنها طيارات أميريكية معادية فكل رادار نشن علي طيارة و ضرب عليها صاروخ أرض- جو .. كل ما الصواريخ توقع طيارة بدون طيار ضباط الدفاع الجوي العراقي يهيصوا .. هم متخيلين إنهم بيوقعوا طيارات أمريكاني بس اللي هم مكانوش واخدين بالهم منه هو إن فيه سرب طيارات F/A-18 Hornet شايلين صواريخ مضادة للرادارات .. كل صاروخ لقت الإشارة اللي بتطلع من كل رادار عراقي بينشن علي طيارة بدون طيار و بيحفظ مكانها .. خلال دقايق 75 صاروخ إتضربوا علي منصات الرادارات اللي بتحمي بغداد و دمروا 35 بطارية صواريخ مضادة للطيارات بالرادارات بتاعتها.
في أول 24 ساعة إتنفذت 2775 غارة ضد أهداف عراقية قصاد إن القوات الجوية العراقية نفذت بس 120 طلعة جوية خسروا فيهم 8 طيارات قصاد إن صحيح الأمريكان و البريطانيين خسروا 18 طيارة .. لمدة 5 أسابيع و الغارات الجوية علي العراق مش بتقف بمعدل 2500 غارة جوية يومياً .. رغم إن القوات الجوية العراقية كانت بتتصنف علي إنها رابع أقوي سلاح جو في العالم وقتها إلا إن طلع قرار من القيادة العسكرية العراقية إننا مش حنضحي بالطيارات و الطيارين بتوعنا في حرب خسرانة قصاد الأمريكان .. خلال ال5 أسابيع بتوع الغارات الجوية علي العراق وقع فيهم 39 طيارة أميريكية و بريطانية علي إيد الدفاع الجوي العراقي و 36 طيارة وقعوا بسبب حوادث أو بسبب نيران صديقة .. يوم 24 فبراير بيبدأ الغزو البري للكويت بس زي ما الشيخ (محمد متولي الشعراوي) الله يرحمه كان بيقول و لنا في ذلك حديث أخر إن شاء الله.
المصادر:
- مقالة بعنوان ‘Most Successful War of the 20th Century: What the U.S Did Right in Desert Storm نشرت في موقع Military وده لينك المقالة الأصلية:
https://www.military.com/daily-news/2021/01/18/most-successful-war-of-20th-century-what-us-did-right-desert-storm.html - فيديو بعنوان Desert Storm-The Air War, Day 1-Animated نشر علي YouTube وده لينك الفيديو:
https://www.youtube.com/watch?v=zxRgfBXn6Mg&t=122s
