لينك التسجيل الصوتي علي ساوند كلاود:
https://on.soundcloud.com/iowvz
الضحك من غير سبب قلة أدب .. الجملة دي أنا فاكر إني كنت بسمعها وأنا صغير لما كنت ببقي قاعد في الفصل في حصة مملة وحد من صحابي يقول نكتة غالباً بتكون +18 فنضحك كلنا وسط محاولات فاشلة إننا نضحك بصوت واطي وكنا دايماً بنتقفش .. المدرس بيبصلنا وبينقي الغلبان اللي فينا يسأله إنت بتضحك ليه .. طبعاً السؤال بيكون في ديله شتيمة بالأم بس ده مش موضوعنا دلوقتي بس دايماً بتكون إجابة اللي بيقف هي مفيش حاجة يا مستر واللي برده بيكون رد المدرس عليها جاهز .. الضحك من غير سبب قلة أدب .. يمكن ده علمني إن مفيش حاجة ملهاش سبب حتي لو الحاجة غلط .. لازم يبقي فيه مبرر .. قصة النهاردة حتكون عن أكبر كذبة في التاريخ الحديث .. قصة عن إزاي تبقي عايز تعمل عملة بس عشان إنت عارف إن لازم يبقي فيه سبب فبتقرر تخترع سبب .. قصة النهاردة حتكون حول كذبة غزو العراق سنة 2003 عن إزاي إن عشان الرئيس العراقي الراحل (صدام حسين) الله يرحمه كان عنده أسلحة دمار شامل فده كان بيشكل تهديد واضح وصريح للأمن القومي الأميريكي اللي يستدعي إن أميركا تغزو العراق .. النهاردة حنحكي إزاي الكذبة دي إتألفت وإتحكت والأهم إنك تفهم إزاي إتصدقت لإن ده المهم .. كذبة كانت السبب في ترحيل 9 مليون عراقي ومقتل 300,000 مدني عراقي ومقتل 4,400 عسكري أميريكي .. إن كذاب يكذب ده شيء وإن الناس العاقلة اللي دارسه بره وجوه يصدقوه ده موضوع تاني وده اللي محتاجين نفهمه سوا بس يمكن بداية إنك تفهم أي حاجة لازم الأول نرجع لنقطة البداية واللي طبيعي إنها تبدأ من لحظة وقوع هجمات 11 سبتمبر 2001.
أنا أقدر أفهم إن الصدمة ممكن تخليك يا تبقي عاجز إنك تاخد قرار يا تخلي مشاعرك هي اللي بتحركك فتقرر تاخد خطوات كارثية بس إن تكون البلد لسه بتحاول تستوعب اللي حصل يوم 11 سبتمبر 2001 فالناس اللي جوه وزارة الدفاع الأميريكية الساعة 2:40 العصر تلاقي جالها مذكرة ممضية من وزير الدفاع وقتها (دونالد رامسفيلد Donald Rumsfeld) ورايحة لقادة الأفرع الرئيسية للقوات المسلحة بتقولهم إن كل واحد يشوف مع رجالته الأدلة المتاحة عندهم اللي ممكن تدي الولايات المتحدة صلاحية إنها توجه ضربة عسكرية مش بس لقائد تنظيم القاعدة (أسامة بن لادن) الله يرحمه اللي كان أعلن مسئوليته عن الهجمات إنما كمان ضد (صدام حسين) فده شيء كفيل إن الفار لازم يلعب في عبك.
يوم 14 سبتمبر 2001 الرئيس الأميريكي (جورج بوش الإبن George W. Bush) بيعمل أول مكالمة تليفونية لرئيس أجنبي بعد هجمات 11 سبتمبر وكانت لرئيس الوزراء البريطاني (توني بلير Tony Blair) واللي بناء علي كلام واحد اسمه (بروس ريديل Bruce Riedel) كان ضمن مجلس الأمن القومي وكان قاعد في المكتب البيضاوي اللي هو مكتب الرئيس الأميريكي وقت المكالمة ف(بوش) طلب من (بلير) إنه يقف في ظهره لما قريب أوي حيبدأ ضربه للعراق وعلي فكرة مش بس (بروس ريديل) اللي شهد إن بمجرد ما (بلير) سمع الطلب إتخض وطلب من (بوش) إن المخابرات الأميريكية تقدم بشكل لا يمكن الشك فيه معلومات مؤكدة بتثبت إن (صدام) كان له علاقة بهجمات 11 سبتمبر لإن يمكن اللي الأمريكان مكانوش عارفينه إن المخابرات البريطانية مكنش عندها أي دليل علي الإتهام ده .. كتير جوه مؤسسة المخابرات البريطانية كانوا شايفين زي ما أنا قلت من شوية إن صدمة هجمات 11 سبتمبر مخلية الأمريكان بيشمشموا ورا أي حد يضربوه وخلاص .. في الحرب العالمية الثانية لما الأمريكان إتضربوا في بيرل هاربور فالجاني كان قدامهم والناس كلها عارفاه .. هنا الدنيا مش واضحة .. بس اللي يمكن الأخوة بتوع المخابرات البريطانية مكانوش عارفينه إن العجلة بدأت تدور خلاص.
يوم 7 أكتوبر 2001 بدأ الغزو الأميريكي لأفغانستان ويوم 27 نوفمبر 2001 نائب وزير الدفاع الأميريكي (بول وولفويتز Paul Wolfowitz) بعت مذكرة لمديره اللي هو يبقي (دونالد رامسفيلد) بتشرح إيه هي الخطوات اللي في رأيه ممكن تؤدي في النهاية للإطاحة بحكم (صدام حسين) واللي لازم تعتمد علي حملة إعلامية مكثفة لإقناع الناس بأي هري يكون هدفه إن العراق بتشكل تهديد واضح وصريح للأمن القومي الأميريكي وهي دي النقطة اللي ممكن تكون مش مفهومة عند ناس كتير .. اه صحيح العراق كان فيها بترول بس كان ممكن أميركا تحط إيدها عليه بطرق تانية .. هي الفكرة كلها إن مؤسسة الحكم في أميركا بعد ما خدوا علي قفاهم في 11 سبتمبر كانوا محتاجين يخلوا أي حد عبرة لمن لا يعتبر .. كانوا عايزين هدف علي حسب كلام (رامسفيلد) هدف يضربوه عشان يفكروا الشعب الأميريكي إن حكومته قادرة تحميه ولو مش عارفه تحميه فهي عارفه تنتقم ليه .. بس كل ده مش حيتحقق من غير ما يبقي فيه المبرر .. إيه اللي يخلي أميركا تروح تضرب العراق؟
الإجابة أبسط مما تتخيل .. هم الأمريكان زعلانين ليه دلوقتي؟ .. عشان مات ليهم ناس في هجمات 11 سبتمبر .. يبقي خلاص العراق مسئولة عن هجمات 11 سبتمبر .. شفت سهلة إزاي .. ومش بس كده .. إحنا كمان حنزود شوية بهارات ونقول إن العراق عندها أسلحة دمار شامل كانت عايزة تستخدمها في هجمات إرهابية تانية ضد أميركا فإحنا حنروح نتغدي بيهم قبل ما يتعشوا بينا .. السؤال دلوقتي هو إزاي تقنع الناس بالزرط ده؟ .. برده بسيطة .. الزن علي الودان أمر من السحر.
يوم 29 يناير 2002 وقف (بوش) قدام الكونجرس عشان يلقي خطاب حالة الإتحاد State of the Union Address وده خطاب سنوي بيعرض فيه الرئيس هو نيل إيه في عيشته خلال السنة اللي فاتت وناوي يهبب إيه في السنة الجايه .. في الخطاب ده (بوش) هبد الهبداية المشهورة بتاعته محور الشر Axis of Evil اللي هم العراق وإيران وكوريا الشمالية .. في يوليو 2002 الكلام اللي كتبه (بول وولفويتز) لمديره تحول لسياسة ممنهجة للزن فوق دماغ الناس .. العراق وحشة .. العراق وحشة .. العراق وحشة .. الكلام ده بيطلع من بق وزير الدفاع (دونالد رامسفيلد) .. بيطلع من بق (كولين كاوبل Colin Powell) وزير الخارجية .. بيطلع من بق (ديك تشيني Dick Cheney) نائب الرئيس .. يوم 23 يوليو 2002 مدير المخابرات البريطانية اللي إنت عارفها باسم MI6 وقتها (ريتشارد ديرلاف Richard Dearlove) راح يزور مدير وكالة المخابرات المركزية الأميريكية اللي إنت عارفها باسم CIA وقتها (جورج تينيت George Tenet) اللي بدأ يزرطله نفس البق الحمضان اللي كان بيتوزع علي الناس الكبيرة في مؤسسة الرئاسة الأميريكية .. العراق وحشة .. العراق وحشة .. العراق وحشة .. بس لما (ريتشارد ديرلاف) سأل السؤال المنطقي اللي بيطلع من بق الناس العاقلة اللي هو فين دليلكوا علي الهري ده؟ بيلاقي الرد هو صوت صرصور الحقل.
(ريتشارد ديرلاف) رجع تاني لندن وقعد مع (توني بلير) وقاله بص يا ريس الناس دي هراية وكذابين كذب الإبل وعايزين يضربوا العراق ومعندهمش بربع جنيه سلكان .. الناس دي مش فارق معاها الحقيقة فين وهم مقررين يضربوا العراق عافية كده ولو حد سألهم جري إيه بس لكل ده حيتقالهم زي ما قلتلك من شوية عشان العراق كان ليها دور في هجمات 11 سبتمبر واللي مش عاجبه المبرر ده بيترزعله المبرر اللي وراه إن العراق عندها أسلحة دمار شامل واللي مش مصدقنا يروح العراق يستأذنهم يدور عندهم علي أسلحة دمار شامل قال يعني العراقيين حيسمحوله يخطي عتبة المطار .. رأي (ريتشارد ديرلاف) ده إتحط في مذكرة وعلي فكرة المذكرة دي إتسربت للصحافة سنة 2005 يعني بعد الغزو بسنتين.
والزن علي الودان بدأ يجيب نتيجة .. في سبتمبر 2002 استطلاعات الرأي كانت بتقول إن 57% من الأمريكان موافقين علي توجه ضربة عسكرية للعراق بناء علي الكذب اللي عمالين يسمعوه من بق المسئولين بتوعهم .. وسط كل ده كانت القوات البرية الأميريكية طالع ميتينها في أفغانستان وهناك القوات الأميريكية قدرت تقبض علي واحد اسمه (ابن الشيخ الليبي) واللي في تقدير المخابرات الأميريكية كان له علاقة بتنظيم القاعدة والكلام ده كان في فبراير 2002 .. المهم .. الأمريكان حطوا الأخ ده علي طيارة وبعتوه علي القاهرة وهنا المخابرات العامة بدأت تستجوبه وطبعاً طلعوا ميتين أمه وفي نفس الوقت طلعوا منه بإعتراف بإنه اه عضو في تنظيم القاعدة وإن التنظيم حالياً بيساعد العراق إنها يبقي تحت إيدها أسلحة بيولوجية .. المعلومة اللي كانت عند المخابرات العامة إن الأمريكان متؤكدين إن (ابن الشيخ الليبي) ده شوية وحيطلع نار من بقه من كتر ما هم شايفينه إرهابي مجابتوش ولادة وده اللي لما عناصر المخابرات العامة استجوبته كانوا متؤكدين منه .. أصل يعني إيه اللي حيخلي الأمريكان يكدبوا .. المهم إنه تحت تأثير التعذيب هو صحيح إعترف بس بعد كده عرفنا سنة 2014 لما الكونجرس الأميريكي نشر ما يسمي تقرير التعذيب اللي هو مراجعة لكل حالات التعذيب اللي قامت بيها يا إما المخابرات الأميريكية يا أجهزة مخابرات صديقة لأميركا إكتشفوا إن كل اللي إعترف بيه (ابن الشيخ الليبي) كان كذب وإنه سمّع المخابرات العامة اللي هم كانوا عايزين يسمعوا لمجرد يوقفوا تعذيبه .. بس مش دي القضية .. القضية إن في فبراير 2003 (كولين باول) وقف قدام مجلس الأمن التابع للأمم المتحدة وسمعهم الإعترافات بتاعة (ابن الشيخ الليبي) كجزء من الأدلة اللي تحت إيد أميركا ضد (صدام حسين) .. ودي مش الكذبة الوحيدة .. خلال السنتين اللي من هجمات 11 سبتمبر 2001 لحد الغزو في 20 مارس 2003 (بوش) وحاشيته قالوا 935 كذبة وللأسف الناس صدقت.
في سبتمبر 2002 (بوش) قدم طلب رسمي للكونجرس عشان ياخد إذنهم لغزو العراق وهنا إتطلبت الحاجة اللي كان المفروض تعطل الدنيا .. تقرير رأي مؤسسة المخابرات أو ما يسمي National Intelligence Estimate .. يطلع إيه البتاع ده؟ .. ده تقرير بتكتبه 4 جهات:
- وكالة المخابرات المركزية الأميريكية Central Intelligence Agency أو CIA ودي تبقي زي ما تقول كده جهاز المخابرات العامة بتاعنا.
- وزارة الخارجية الأميريكية.
- وكالة مخابرات وزارة الدفاع Defense Intelligence Agency ودي تبقي النسخة الأمريكاني من المخابرات الحربية.
- جهاز المخابرات البحرية أو Defense of Naval Intelligence.
التقرير ده كان المفروض إنه يبقي رصاصة الرحمة للهري بتاع غزو العراق بس المشكلة إن واحدة من الجهات اللي كتبت التقرير اللي هي CIA مديرها اللي هو (جورج تينيت) كان جزء من الفريق بتاع (بوش) وده خلاه يطلع من تحت إيده تقرير في أكتوبر 2002 غريب الشكل بيقول إن العراق عندها تشكيلة متنوعة من أسلحة الدمار الشامل شبه تشكيلة طقم الصيني اللي مراتك جابته وحطاه في النيش ومش مسموح لحد يستخدمه .. أسلحة كيماوية ماشي .. أسلحة بيولوجية ميضرش .. يا مؤمن ده التقرير قال إن العراق قدامها 10 سنين ويبقي تحت إيدها قنبلة نووية .. التقرير ده خلي أي حد معارض للحرب يحط جزمة في بقه ويمضي من سكات .. بس ده كان الكونجرس .. قصاد ده كان فيه ناس عايزه تسعي في الخير ومتخيله إن ده شيطان ودخل بين أميركا والعراق ومتخيله إن العراق لو حد إدالها فرصة ممكن تبريء نفسها والناس دي كانت دول مش عايزة الدم يبقي للركب بس في نفس الوقت مكنش عندهم خلفية عن إن الأمريكان خلاص واخدين قرار الضرب من قبل ما حتي دم الناس اللي ماتت في 11 سبتمبر ينشف .. في نوفمبر 2002 بيطلع القرار رقم 1441 من مجلس الأمن اللي بيقول للعراق افتحي باب بيتك لمفتشين دوليين عشان يتأكدوا إن معندكيش أسلحة دمار شامل وعشان الناس كلها تعرف إن ده مجرد سوء تفاهم بينك وبين الأمريكان .. علي الناحية الثانية (بوش) ورجالته شافوا القرار ده علي إنه فرصة .. ليه؟ .. لو حصل و(صدام حسين) ركب دماغه وقال للأمم المتحدة مفيش حد حيهوب ناحية عتبة بلدي فده حيعتبر دليل إدانة .. اللي محدش عمل حسابه عليه إن (صدام حسين) فتح بابه علي البحري للمفتشين الدوليين.
4 شهور كاملة ولجنة برئاسة (هانز بليكس Hans Blix) المدير السابق للوكالة الدولية للطاقة الذرية مسابتش حتة مدورتش عليها .. عملوا 200 زيارة تفتيتشية لأكثر من 500 مكان متوزعين في العراق كلها والإجابة كانت صفر .. صفر أسلحة دمار شامل .. صفر أسلحة بيولوجية .. صفر برنامج نووي لا سلمي ولا عسكري باستثناء حاجتين:
- أول حاجة إن العراق كان تحت إيدها شوية صواريخ باليستية وكلمة صاروخ باليستي معناها إنه صاروخ لو مثلاً أنا ضربته من الأسكندرية لحد تل أبيب فهو بيطلع من إسكندرية لفوق يخترق الغلاف الجوي للأرض ويطيرله شوية في الفضاء وينزل فوق دماغ تل أبيب بحيث مدي الصواريخ دي اللي لقوها في العراق معدي 150 كيلومتر وده بيخليها صواريخ بتنتهك القانون الدولي ولازم العراق يخلص منها.
- ثاني حاجة إن فيه عجز 6,500 رأس شايلين غاز أعصاب بين السجلات بتاعة وزارة الدفاع العراقية وبين الرؤوس اللي موجودة فعلاً في مستودعاتها .. ده مش معناه إن العراق عندها أسلحة كيماوية خلي بالك .. ده معناه إن فيه غلطة في الجرد فمحتاجين بس شوية وقت نطلع الغلطة فين بالضبط.
الامريكان خدوا النقطة الثانية دي ومسكوا فيها وقالك باااااس ده الدليل .. يوم 5 فبراير 2003 قعد (كولين باول) قصاد الأمم المتحدة وشرح قصة طويلة عريضة من الأدلة اللي ملهاش أي أساس إن إزاي العجز في عدد الرؤوس اللي شايلة غاز أغصاب مع إعتراف (ابن الشيخ الليبي) بيرسموا صورة كاملة إن (صدام حسين) هو خليفة إبليس في الأرض وإن إزاي العراق تعتبر ملاذ أمن للإرهابيين التقال في السوق زي (أبو مصعب الزرقاوي) اللي بعد كده بقي مؤسس تنظيم الدولة الإسلامية في العراق والشام اللي إنت عارفه بإسم داعش .. عايز أقولك إن في الخطاب اللي قاله (كولين باول) إسم (الزرقاوي) إتكرر 21 مرة ولفظ أسلحة دمار شامل إتقال 17 مرة .. كلام (كولين باول) كان كفيل جداً إن (توني بلير) يحط رأي مدير مخابراته علي جنب دلوقتي ويطلع قدام البرلمان البريطاني يعلن دعمه للغزو الأميريكي للعراق اللي بدأ في 20 مارس 2003.
جزء مهم من المشكلة ورا إن الناس صدقت يمكن أنا في رأيي مش سببه الناس أصلاً .. معلش المواطن الأميريكي البسيط صحي الصبح لقي أهل بلده بيتقتلوا بالالاف علي أرضهم ولولا ستر ربنا لكان البنتاجون اللي هو مقر وزارة الدفاع والبيت الأبيض كانوا حصلوا برجي التجارة العالميين .. المواطن الأميريكي والأوروبي كان مرعوب خلقة ومستعد يصدق أي حاجة تقولهاله الحكومة فحبقي مفتري لو رميت اللوم عليه .. المشكلة كانت في الإعلام .. جرنان زي The New York Times اللي هي المفروض أنظف جرنان في العالم طلع سنة 2004 إعترف بإنه ساعد في نشر الأكاذيب بتاعة إدارة الرئيس (جورج بوش الإبن) لإن لما الحكومة كانت بتقول كذبة محدش من الصحفيين كان بيستجري يروح يكلم حد في الحكومة العراقية خوفاً من شبهة إن يتقال شايفين الإعلام الخاين للبلد .. كل المصادر العراقية اللي الجرنان كان بيروحلها كانوا سجناء سياسيين سابقين أو لاجئين سياسيين عراقيين هربانين بره البلد بسبب (صدام حسين) فطبيعي إن الناس دي مش حتقول شعر في (صدام) وحتي مش حتقول الحق لإنهم عايزينه يغور في أي داهية تاخده وموقفهم مفهوم برده ويمكن ده اللي كان المفروض الصحفيين يقولوه لنفسهم بس هم إكتشفوا ده بعد فوات الأوان.
بس يمكن الحكمة الأزلية اللي أنا طلعت بيها من قصة كذبة غزو العراق هي إن من حفر حفرة لأخيه وقع فيها .. ناس كتير بتنسي إن (صدام حسين) وصل للكرسي بإنه حط إيده في إيد المخابرات الأميريكية اللي ساعدته يوصل للكرسي في إنقلاب عسكري ضد رئيس الوزراء (عبدالكريم قاسم) اللي تجرأ وحاول يغير شروط عقود بيع البترول العراقي للشركات الأميريكية والإنجليزية اللي كانت شايفة العراق كنز مينفعش يتفرط فيه .. العراق صحيح فيها تاني أكبر إحتياطي نفط في العالم بعد المملكة العربية السعودية بس النفط العراقي فيه ميزة إن نسبة الكربون فيه عالية ونسبة الكبريت فيه قليلة وده بيخليه أكتر بترول بيجيب همه في السوق يعني عشان أحطك في الصورة برميل البترول العراقي عشان يتعمل إنت بتصرف عليه 1-1.5 دولار قصاد إن البترول الماليزي أو العماني أو الروسي إنت بتصرف عليه 5-8 دولار للبرميل .. ده معناه إن بحسبة بسيطة سنة 2003 فإحتياطي البترول العراقي ممكن يجيبلك 3.125 ترليون دولار مستريح .. بس يمكن بعد قرار (صدام حسين) تأميم قطاع البترول سنة 1972 وفي التسعينات علي أمل إنه يزود شوية من عائدات النفط بتاعته وبقي بيسعي إنه يطرد شركات البترول الأميريكية والإنجليزية من العراق ويجيب مكانهم شركات فرنساوية وروسية ويابانية فده خلي (صدام) يتحول في نظر مؤسسة الرئاسة الأميريكية من شخص ولاءه ليهم لشخص عاملهم صداع خصوصاً لما تعرف إن كتير من الناس اللي جوه مؤسسة الرئاسة الأميريكية يا عندهم شركات بترول يا كانوا أعضاء في مجالس إدارة شركات بترول .. ناس كتير بتنسي إن (جورج بوش) سواء الأب أو الإبن عندهم شركة بترول .. النائب بتاع (جورج بوش الإبن) اللي هو (ديك تشيني) كان CEO بتاع شركة هاليبيرتون Halliburton أكبر شركة بترول أميريكية .. (كونداليزا رايس Condoleezza Rice) مستشارة الأمن القومي بتاعته كانت مديرة شركة تشيفرون Chevron .. يا مؤمن ده (توني بلير) رئيس وزراء بريطانيا كان بياخد فلوس تبرعات من شركة بريتيش بيتروليوم British Petroleum.
لك أن تتخيل إن يدوبك بعد سقوط بغداد الحكومة الأميريكية بتدي عقد إسناد مباشر لشركة كيلوج براون أند رووت Kellog Brown and Root وإختصاراً معروفة في السوق باسم KBR ودي تبقي شركة تحت مظلة شركة Halliburton للتنقيب عن البترول في العراق .. خلال أول سنة من غزو العراق شركة Halliburton حققت أرباح 680% اللي هي نسبة تخليك تهرش في شعرك في محاولة يائسة منك إنك تستوعب الرقم .. خلال الفترة من 2003-2013 شركة KBR دخلها شغل في العراق بس بقيمة 39.5 مليار دولار .. ريحة الفساد كانت مفحفحة ومغرقة الدنيا ودي كانت قصة كذبة غزو العراق .. ميكس بين الكذب والجشع والإفتراء علي الناس .. قصة توريك إزاي إنك كمواطن قبل ما تسمع كلام الحكومات والإعلام لازم تفتح مخك كويس وتعقل الكلام قبل ما تصدقه.
المصادر:
- مقالة بعنوان The Iraq war started the post-truth era. And America is to blame نشرت في جريدة The Guardian وده لينك المقالة الأصلية:
https://www.theguardian.com/commentisfree/2023/mar/14/iraq-war-9-11-george-bush-post-truth - فيديو بعنوان How 9/11 was used to sell a war نشر علي YouTube وده لينك الفيديو:
https://www.youtube.com/watch?v=LP3T_VAkY9o - مقالة بعنوان 20 years of the Iraq war: A war for oil, fueled by lies نشرت في موقع The Business Standard وده لينك المقالة الأصلية:
https://www.tbsnews.net/features/panorama/20-years-iraq-war-war-oil-fuelled-lies-604698
