ملخص اللي أنا عايزك تعرف إن هوليوود عطلانة بقالها كذا شهر .. يوم 2 مايو 2023 الدنيا بدأت تقف لما نقابة الكتاب Writers Guild of America أو WGA إختصاراً دخلت في إضراب مفتوح خلي كل برامج التوك شو تقف و متشتغلش .. من 13 يوليو 2023 كل اللي شغالين في هوليوود دخلوا في إضراب مفتوح و أنا هنا بتكلم عن ممثلين و مخرجين و موسيقيين و كتاب سيناريو و مصوريين اللي كلهم أعضاء في نقابة المهن السينمائية و نقابة المهن الموسيقية اللي هم بيسموها SAG-AFTRA ودي إختصار Screen Actors Guild & American Federation of Television and Radio Artists ..و الناس دي خلي مصحتش الصبح قررت متروحش الشغل .. الناس دي فضلت لشهور بتتفاوض مع تكتل من شركات الإنتاج سموا نفسهم AMPTP اللي هي إختصار Alliance of Motion Picture and Television Producers يعني تحالف شركات الإنتاج السينمائية و التليفيزونية و التحالف ده بيضم شركات تقيلة أوي زي باراماونت Paramount و سوني Sony و نيتفلكس Netflix و استوديوهات والت ديزني Walt Disney Studios و وارنر براذرز Warner Bros بس المفاوضات فشلت في إنها توصل لحل يرضي الطرفين و ده اللي خلي المسئولة عن SAG-AFTRA وهي الممثلة (فران دريشر Fran Drescher) تطلع يوم 13 يوليو تعلن بداية الإضراب و ده اللي النهاردة عايز أتكلم عنه بإني أحاول أجاوب علي سؤالين:
- هو ليه الإضراب ده حصل؟ و الناس بتوع SAG-AFTRA دول عايزين إيه؟
- هي الدنيا رايحة علي فين؟ وهل فيه أمل إن الإضراب ده ينتهي قريب؟
ليه الناس مش عايزة تروح الشغل؟
الحقيقة إن السبب الأساسي ورا الإضراب هو حاجتين لما تحطهم جنب بعض حتبدأ تهرش في شعرك لإن نظرياً يعني دول حاجتين ملهمش علاقة ببعض اللي هم الفلوس و ده منطقي و مفهوم و غالباً أي إضراب بيحصل في الدنيا بيكون له علاقة بالفلوس بس الحاجة الثانية هي دخول الذكاء الصناعي A.I. ودي إختصار Artificial Intelligence في بيزنس صناعة السينما و التليفيزيون و النقطتين دول محتاجين يتشرحوا لإنهم مش بساط زي ما إنت ممكن تكون متخيل.
النقطة الأولانية في الخناقة .. الفلوس: الناس دي مش بتقول عايزين مرتباتنا تزيد ولا بتقول عايزين فلوس زيادة .. أنا ممثل مضيت عقد مع المنتج إني أعمل دور بفلوس معينة وأنا إرتضيت بده و مش حرجع في كلامي .. بس النقطة هي ما يسمي Residuals .. يعني البتاعة دي؟ .. دلوقتي مثلاً يعني أنا (ليوناردو دي كابريو Leonardo DiCaprio) بجلالة قدري و عملت فيلم Titanic و خدت عليه فلوس و بقيت نجم و معايا فلوس و الدنيا حلوة .. بتيجي شركة 21st Century Fox اللي بعد كده إشترتها شركة ديزني Disney تقوم كل 10 سنة بتعيد عرض الفيلم في السينمات عشان يجيب فلوس زيادة بس أنا و باقي الممثلين بلاقي نفسي إتنسيت كأني ما جيت .. أجي أقول لديزني طب مفيش حاجة حلوة لأخوكوا (ليو) يتقالي هو إنت مش خدت فلوسك من سنة 1998 .. طب لما قناة زي Netflix أو HBO Max تعرض الفيلم مفيش حاجة بتطلع كده تحلي بق الممثلين اللي عملوا الفيلم؟ .. ولا الهوا .. وهي دي القضية .. الناس بتاعة SAG-AFTRA مش عايزين إن يتحدد رقم معين يتكتب في العقد لإنهم عارفين إن مش كل الأعمال اللي بتتعرض الناس بتحبها إنما هم عايزين مبلغ يكون متناسب مع نسب المشاهدة علي قنوات Streaming .. خليني أديلك مثال .. مسلسل Suits الأمريكاني بعد ما إتوقف عرضه عند الموسم السابع جت قناة Netflix خدت حق عرضه و بناء علي الأرقام بتاعتهم هو ثالث أكتر مسلسل يحقق نسب مشاهدة علي Netflix من ساعة ما فتحوها .. طب الممثلين نابهم من الحب جانب؟ .. أبداً .. ولا حتي (هارفي سبيكتر)؟ .. ولا الهوا.
النقطة التانية في الخناقة .. الذكاء الصناعي: دلوقتي فيه بدعة بدأت تنتشر وسط صناعة السينما هي تكنولوجيا تصغير عمر الممثل أو De-Aging ودي إنت شفتها في فيلم The Irishman مثلاً إن الفيلم بيحكي عن قصة حياة كذا بني أدم في كذا مرحلة من حياتهم من وقت ما كانوا صغيرين لحد ما عجزوا فبدل ما المخرج (مارتن سكورسيزي Martin Scorcesse) مثلاً يختار ممثل صغير يقوم بنفس الشخصية اللي بيقوم بيها الممثل (روبيرت دي نيرو Robert De Nero) لما يكبر فهم خلوا (روبيرت دي نيرو) يعمل الشخصية حتي و هو صغير و بشوية جرافيكس صغروا ملامح وشه عشان يبان إنه لسه صغير .. فكرة De-Aging دي مثلاً شركة Disney بدأت تعتمد عليها كتير في مشاريع مسلسلات سلسلة Star Wars فالناس بتوع SAG-AFTRA كل اللي هم عايزينه إن يبقي فيه شوية ضمانات إن شركات الإنتاج ميجيش عليها اليوم اللي ترمي الممثلين في الشارع و تحل محلهم بشوية برامج جرافيكس بالذكاء الصناعي.
علي الناحية الثانية الإخوة بتوع تحالف شركات الإنتاج عاملين زي اللي عندنا مش عليهم غير إنهم يقولوا الفكرة مش إني مش عايز أديك .. الفكرة إني مش قادر أديك .. الزيادات في الفلوس اللي هم عارضينها علي الناس بتاعة SAG-AFTRA أقل بكتير من الحد الأدني اللي هم عايزينه و الحقيقة في رأيي موقف شركات الإنتاج جاي من الإحساس اللي عندهم إن الوقت في مصلحتهم عشان إنت مثلاً لو كاتب ضمن فريق العمل بتاع برنامج توك شو فإنت ممكن تكون محوش علي جنب مبلغ يخليك مستعد تضرب عن العمل لمدة شهر أو شهرين أو ثلاثة بس كل ما الوقت يجري و كل ما فلوسك تخلص حتلاقي نفسك بتقول للنقابة بتاعتك خلاص متصعبوش الشروط علي شركات الإنتاج لإن شوية و مش حلاقي أكل .. اللي شركات الإنتاج مكنتش عامله حسابهم عليه إن نجوم السينما في هوليوود زي ما تقول كده ما صدقوا يلاقوا خناقة يشبعوا فيها لطم و يمكن بداية ده كانت في العرض الرسمي أو البريميير بتاع فيلم Oppenheimer في العاصمة البريطانية لندن اللي لأجل الصدف يعني كان يوم 13 يوليو 2023 اللي هو نفس اليوم بتاع إعلان (فران دريشر) إضراب SAG-AFTRA .. الست طلعت الساعة 3 العصر في مؤتمر صحفي تعلن الإضراب .. يدوبك المؤتمر الصحفي خلص في لوس أنجيليس في أميركا و الخبر وصل لندن و كل الممثلين اللي شاركوا في العرض الرسمي للفيلم خدوا بعضهم و مشيوا و مكملوش العرض و الوحيد اللي فضل قاعد هو المخرج (كريستوفر نولان Christopher Nolan).
الدنيا رايحة علي فين؟
مهم تكون فاهم حاجتين .. الأولانية إن دي أول مرة إضراب بالحجم ده يحصل في هوليوود من 60 سنة .. الثانية إن ممثلين تقال و مليارديرات في أميركا واقفين مع الإضراب و مستعدين يصرفوا عليه .. أسامي زي (ميريل سترييب Meryl Streep) زي (جينيفر لورينس Jennifer Lawrence) زي (مارك رافلو Mark Ruffalo) اللي يمكن إنت عارفه من دور The Hulk في سلسلة أفلام مارفل .. في نفس الوقت سبب إن شركات الإنتاج مجالهاش Panic و إترعبت من الإضراب ده إن فيه أفلام كتير خلاص إتصورت و دخلت المونتاج و حتتعرض في السينمات في معادها .. إنت مشكلتك في الأفلام اللي حتتعرض في موسم الكريسماس و اللي كتير منها إتأجل عرضه سنة زي مثلاً يعني فيلم Dune الجزء الثاني .. غير كده تقديري الشخصي الوضع حيكمل حبة حلوين مش لسبب غير إن الوقت الحالي في هوليوود غريب جداً في حتة إنه ملوش كبير .. دلوقتي إنت عندك شركات إنتاج كتير بتنافس بعضها وفي الظروف العادية الكبير هو اللي بيتدخل بتقله عشان الازمة تتحل .. المشكلة إن الكبير دلوقتي في هوليوود هي ديزني و اللي للأسف مديرها (بوب أيجر Bob Iger) مزعل منه طوب الأرض بسبب تصريحاته اللي قالها عن الإضراب أول ما بدأ اللي هي ملخصها يعني إن المفروض الممثلين و الكتاب و المخرجين اللي شغالين في هوليوود يبوسوا إيدهم وش و ظهر علي إن فيه شغل و إنهم المفروض يشتغلوا من سكات.
المصادر:
- مقالة بعنوان The SAG-AFTRA strike in Hollywood, explained نشرت في موقع قناة Today وده لينك المقالة الأصلية:
https://www.today.com/popculture/hollywood-actors-sag-strike-2023-explained-rcna94122 - مقالة بعنوان In focus, an actor’s strike and Hollywood’s future نشرت في جريدة The New York Times و ده لينك المقالة الأصلية:
https://www.nytimes.com/2023/08/02/insider/hollywood-actors-strike.html
