الأمريكان دول شوية سفاحين .. أنا عارف إن ده مطلع صادم لمقالة بس ده حقيقي .. غالباً فيه ناس مقتنعة بالرأي ده بسبب اللي الأمريكان عملوه مع العراقيين أو الأفغان بس صدقني لو قلتلك إن غزو العراق و تدمير أفغانستان ده كان لعب عيال قصاد اللي عمله الأمريكان في كوريا الشمالية في الحرب الكورية .. أنا كنت إتكلمت عن الموضوع ده قبل كده بس خلينا نقول ملخص سريع عنه .. من الفترة سنة 1950 لحد سنة 1953 قامت الحرب الكورية بين أميركا و كوريا الشمالية و اللي تقدر تقول خلصت بالتعادل بإن الحدود بين الكوريتين بقت رسمي هي خط عرض 38 درجة .. فيه ناس رأيها إن سبب أساسي في إن الأمريكان محققوش اللي هم كانوا عايزينه في الحرب دي هي إن الصين وقفت جامد في ظهر كوريا الشمالية و ده رأي يُحترم بس في نفس الوقت أداء القوات المسلحة الكورية الشمالية كان رائع و يمكن بسبب ده الأمريكان ورونا وشهم الوسخ ..فيه شوية حقائق لازم تبقي عارفها كويس عن الحرب الكورية و لما الحقائق دي تتحط جنب بعضها قدامك حتبدأ تفهم و تقدر ليه أنا بدأت كلامي بجملة إن الأمريكان دول شوية سفاحين.
حقيقة رقم واحد .. حجم الدمار و القتل في الحرب دي عدي حتي الحرب العالمية الثانية .. عارف إن ده كلام ممكن تحسه مٌبالغ فيه بس خليني أفهمك .. عدد ضحايا الحرب العالمية الثانية كان ما بين 60-85 مليون بني أدم و إن كان فيه ناس بتقول إن الرقم ده قليل أوي .. فيه ناس بتقول إن الصين لوحدها مات ليها فوق الخمسين مليون بني أدم .. طب لنفترض إن عدد القتلي كان 60 مليون فعلاً .. دول حوالي 3% من إجمالي تعداد سكان العالم اللي كانوا وصلوا 2.3 مليار بني أدم سنة 1940 .. في الحرب الكورية مات 3 مليون بني أدم الغالبية العظمي منهم كانوا في كوريا الشمالية .. طب لنفترض جدلاً يعني إن الثلاثة مليون بني أدم اللي ماتوا دول كانوا كلهم في كوريا الشمالية .. هو يبان رقم قليل بس هي المشكلة في النسبة و التناسب .. الثلاثة مليون بني أدم دول صحيح يبانوا رقم قليل لو قارنته بعدد ضحايا الحرب العالمية الثانية بس الرقم ده بيمثل 12-15% من إجمالي تعداد سكان كوريا الشمالية .. كنسبة و تناسب كوريا الشمالية خسرت بني أدمين أكتر ما الإتحاد السوفيتي خسر خلال الحرب العالمية الثانية كلها.
حقيقة رقم إتنين مرتبطة بالأسباب ورا ليه الناس دي كلها ماتت؟ .. الحقيقة هو ميكس بين سوء الحظ و الافترا .. سوء الحظ إن التوزيع السكاني لكوريا الشمالية وقت الحرب خلي إن كتير أوي من الناس تلاقيهم قاعدين في حتة واحدة فبمجرد ما تقع قنبلة علي شارع مثلاً فالقنبلة دي بتقتل معاها عدد كبير من الناس .. النقطة دي مش غلطة حد .. أنا مينفعش ألوم الناس اللي ماتت و أقولهم أصلكوا أنتوا اللي إخترتوا تعيشوا في الشارع الغلط .. النقطة اللي ينفع توجه فيها اللوم لحد هي الافترا .. الغل اللي بيعمي القلوب .. الكراهية اللي خلت الأمريكان خلال 3 سنين بس يرموا فوق كوريا الشمالية كمية قنابل أكتر من اللي رموها علي اليابان في الحرب العالمية الثانية .. تاني .. عارف إنك ممكن تقرأ الكلام ده و متبقاش مصدق و تقولي إنت إيه يا بني أدم إنت اللي إنت بتقوله ده بس صدقني كمان مرة دي الحقيقة .. في الحرب العالمية الثانية الأمريكان دمروا 64 مدينة يابانية و علي فكرة ده مش شامل تدمير مدينتي هيروشيما و ناجازاكي بالقنابل النووية .. خلال الحرب العالمية الثانية الأمريكان رموا علي اليابان 503,000 طن قنابل .. صدق أو لا تصدق إن في الحرب الكورية و خلال 3 سنين بس الأمريكان رموا فوق كوريا الشمالية 635,000 طن قنابل.
المصدر:
مقالة بعنوان Not even America’s toughest soldiers could stomach North Korea’s brutality نشرت في مجلة The National Interest و ده لينك المقالة الأصلية:
https://nationalinterest.org/blog/buzz/not-even-americas-toughest-soldiers-could-stomach-north-koreas-brutality-132427
بالتوفيق يا فوقش