الكلام بيحل كل المشاكل .. ده حقيقي علي فكرة خصوصاً في العلاقات بين البني أدمين .. كتير من الأوقات مشاكل تبان إنها عويصة ومش حيجي يوم والنفوس تتصافي تلاقي إن سبب المشكلة إن كان فيه سوء تفاهم محدش كلف خاطره إنه يوضحه .. بص علي كل الخلافات الزوجية اللي حوليك حتلاقي إن كتير منها إن لم يكن كلها يتحل لو الطرفين يقدروا يتكلموا مع بعض .. هي طبيعة النفس البشرية كده .. إنت ممكن تكون شايط ودمك بيغلي بس بكلمتين حلوين من حد عايز يصلح بجد تلاقي فجأة اللي كنت زعلان منه حتموت وتروح تبوس راسه تصالحه .. وعشان أنا من الناس المقتنعة إن اللي يمشي علي البني أدمين يمشي علي الدول فبرده لما بلدين متخانقين مع بعض وميبقاش فيه فرصة إنهم يتكلموا مع بعض فإعمل حسابك إن البلدين حيرفعوا السلاح علي بعض .. الكلام بيحل كل المشاكل .. ومفيش حد بيتكلم أكتر من الناس بتاعة السلك الدبلوماسي .. دي الناس اللي بتاخد فلوس عشان تتكلم .. أحياناً إنت كمواطن بتشوف وجودهم زي عدمه وده مثلاً رأينا كلنا في جامعة الدول العربية بس ساعات شغلهم بينقذ أرواح زي اللي عملته الخارجية المصرية وقت إتفاقية السلام بتاعة كامب ديفيد أو قضية التحكيم الدولي لإستعادة طابا وعشان كده موضوعنا النهاردة حيكون بمنتهي البساطة إن إزاي أميركا اللي هي القوة العظمي الأولي في العالم والكبير أوي بتاع الكرة الأرضية الدنيا بتفلت منها مش لسبب غير إنهم مش عارفين يعينوا ناس بتتكلم .. فيه حالة فراغ كبيرة فشخ في الخارجية الأميريكية مخلياهم مش عارفين يعينوا سفراء في كتير من دول العالم وخصوصاً الشرق الأوسط.
عشان بس تشوف بنفسك حجم الكارثة فلحد شهر يوليو 2023 أميركا مكنش ليها سفير في الدول دي .. جاهز؟ .. مصر والكويت وسلطنة عمان والإمارات العربية المتحدة والأردن وإسرائيل .. خد مصر مثلاً .. أخر سفير متعين رسمي عندنا كان (جوناثان كوهين Jonathan Cohen) واللي ساب منصبه يوم 31 مارس 2022 وفضلنا من غير سفير أميريكي في مصر لحد ما أخيراً إتعينت واحدة إسمها (هيرو مصطفي Herro Mustafa) يوم 1 نوفمبر 2023 .. يعني مصر اللي هي أهم دولة في الشرق الأوسط قعدت سنة كاملة مفيهاش سفير أميريكي .. إنت مستوعب اللي أنا قلته؟ .. نفس الكلام علي الكويت .. وبالنسبة للناس اللي متضايقة وشايفة إن خلاص مصر مبقتش هي الدولة الأهم في الشرق الأوسط وإن مستقبل صناعة القرار العربي بقي في الرياض فأحب أقولك إن صحيح الأمريكان في مارس 2023 عينوا سفير ليهم في المملكة بعد ما قعد المنصب فاضي لمدة سنتين .. سنتين يا مؤمن يا موحد بالله أميركا ملهاش سفير في السعودية .. ومش بس الدول العربية .. منصب سفير أميركا في إسرائيل قعد فاضي من يوم 5 ديسمبر 2021 ويدوبك الأمريكان لسه معينيين سفير ليهم في تل أبيب يوم 5 نوفمبر 2023.
فيه سؤالين مهمين لازم يتحطوا قدامك ونحاول نجاوب عليهم سوا النهاردة:
- هو بالصلاة علي النبي خلاص يعني وزارة الخارجية الأميريكية مش لاقيه ناس تعينها سفراء؟
- إيه تأثير الفراغ ده علي السياسة الخارجية الأميريكية؟ .. هل عادي إن بلد زي مصر تفضل أكتر من سنة من غير سفير أميريكي؟
إيه المشكلة في إنك تعين سفير؟
لو رحت سألت الناس بتاعة وزارة الخارجية الأميريكية حتلاقيهم عشان ميبانوش غلطانين قدام الناس بيقولوا إن السبب في العطلة دي هو إن فيه سفراء بيكونوا شايفين نفسهم شغالين في شركة قطاع خاص اللي هو يجيلك فجأة كده يبعت إيميل لوزير الخارجية يقوله فيها إنه ماشي ويسيب مهلة أو Notice Period شهر مثلاً وأخبطوا دماغكوا في أجدعها حيطة .. الحقيقة إن السبب ده اللي إنت ممكن تكون مستغربه وبتقول لنفسك اه صحيح ده أنا ليا واحد زميلي مشي من الشركة وساب Notice Period أسبوعين وأدينا عدي شهرين ولسه مش لاقيين حد نعينه بداله بس عايزك تعرف إن ده حصل في حالة واحدة يتيمة وهي (توماس نيديز Thomas R. Nides) اللي إتعين سفير في تل أبيب يوم 3 نوفمبر 2021 وهوبا قام مقدم إستقالته يوم 5 ديسمبر 2021 اللي هو يدوبك كمل شهر وتقريباً قال لنفسه أنا لو قعدت يوم كمان مع الصهيانة دول حموت نفسي بس هو الحقيقة جاله Offer حلو أوي من بنك في أميركا إسمه ويلز فارجو Wells Fargo عشان يبقي نائب رئيس مجلس الإدارة فرمي إستقالته في وش وزير الخارجية عشان فلوس القطاع الخاص تجري ريق أي حد وإتعين بداله (جاك ليو Jack Lew) زي ما قلتلك من شوية يوم 5 نوفمبر 2023.
الحقيقة إن السبب الأساسي ورا العطلة دي هي إن الناس بتاعة وزارة الخارجية الأميريكية علي قبها مراوح في حتة تعيين السفراء دي بالذات .. منصب سفير أميركا في الإمارات فضي في يناير 2021 ومحدش كلف خاطره يرشح حد جديد للمنصب غير في سبتمبر 2022 .. نفس الكلام في مصر اللي بقت من غير سفير في مارس 2022 وإفتكروا يعينوا حد في نوفمبر 2023 .. بس عشان برده أبقي منصف فخليني أشرحلك حتة هو بالصلاة علي النبي المكنة بتاعة تعيين السفراء الأمريكان في العالم بتشتغل إزاي .. اللي بيحصل إن بناء علي توصية وزير الخارجية فرئيس الجمهورية بيرشح حد وليكن مثلاً سي (جوني) عشان يبقي سفير أميركا في بلد إسمها المزاريطة .. السي في بتاع سي (جوني) بيتبعت للناس اللي بتشكل لجنة العلاقات الخارجية في مجلس الشعب عشان يقرروا هل سي (جوني) ينفع يبقي سفير أميركا في المزاريطة ولا لا .. المشكلة إن عملية التقييم في كتير من الأوقات مش بيكون ليها علاقة بمؤهلات وقدرات سي (جوني) إنما بتكون مرتبطة بالمصالح والخناقات بين أعضاء البرلمان كل واحد علي حسب هو منتمي لأي حزب وهل فيه عضو عايز ينكد علي الرئيس عيشته ويبان فيها رجل قدام الناس.
مثال بسيط علي ده (جاك ليو) اللي قلتلك إنه إتعين سفير أميركا في إسرائيل .. دلوقتي رئيس أميركا دلوقتي يبقي (جو بايدن Joe Biden) وده رجل منتمي للحزب الديموقراطي وهو اللي رشح (جاك ليو) للمنصب .. جميل .. الرجل ده في جلسة استجوابه قدام البرلمان حرفياً إتسلخ من أعضاء لجنة العلاقات الخارجية اللي منتمين للحزب الجمهوري اللي هو المفروض معارض للرئيس (جو بايدن) مش لسبب غير إن (جاك ليو) زمان كان هو وزير المالية في عهد الرئيس (باراك أوباما) .. يعني من زمان أوي .. والرجل ده في الوقت ده بحكم إنه وزير في حكومة (أوباما) فطلع دافع عن الإتفاق النووي الإيراني اللي الجمهوريين بيعتبروه أكبر جريمة في تاريخ السياسة الخارجية الأميريكية .. ليه وليه بقي .. وعشان يماين أموره في الإستجواب خلي الجمهوريين يسمعوا الكلام اللي هم عايزين يسمعوه لما قالهم إن من وجهة نظره إن الحكومة الإيرانية هي حطومة مجرمة وشريرة ووحشة وبتاكل العيال الصغيرة .. يعني عشان الرجل يمشي أموره أضطر يقف قدام الناس كلها ويقول علي (أوباما) إنه غلطان .. دي شخصية الرجل اللي أميركا حتعينه سفير ليها في إسرائيل .. إنت متخيل معايا إنت بتتعمل مع واحد كرامته مستواها واصل لحد فين.
حرفياً مفيش فرصة الجمهوريين بيفوتوها إنهم يعكننوا علي جدو (بايدن) عيشته .. الأرقام لوحدها مذهلة .. من نوفمبر 2021 (بايدن) قدم أوراق إعتماد 78 سفير للجنة العلاقات الخارجية في البرلمان عشان يتعينوا حول العالم بس من كل دول متقبلش منهم غير 7 سفراء يعني حوالي 9% بس من إجمالي المرشحين اللي إتقدموا.
إيه المشكلة في إنك متعينش سفير؟
زي ما قلتلك من شوية لما جه يوم 7 أكتوبر 2023 اللي حصلت فيه عملية طوفان الأقصي اللي نفذتها حركة المقاومة الإسلامية حماس ضد إسرائيل أميركا مكنش ليها سفير في إسرائيل ولا الكويت ولا لبنان ولا سلطنة عمان ولا حتي مصر .. طب إيه رأيك إن لحد دلوقتي وكالة التطوير الدولي أو US Agency for International Development اللي إنت عارفها أكتر بإسمها المختصر USAid بقالها 3 سنين أهو ملهاش مسئول عن شغلها في الشرق الأوسط .. بلاش دي .. هل تعلم سيدي القاريء إن منصب المنسق العام بين وكالات المخابرات الأميريكية وبين وزارة الخارجية الأميريكية لسه محدش إتعين فيه بقالنا أكتر من سنتين أهو .. الفراغ ده هو السبب إنك كمواطن مصري بتتفرج علي اللي بيحصل في قطاع غزة وحاسس إن الأمريكان عايشين في اللالاند .. إنت عندك إحساس داخلي إن وزارة الخارجية الأميريكية مش عايشة معانا أصلاً في الدنيا وصدقني إنت عندك حق لإن أساساً وزارة الخارجية الأميريكية معندهاش دلوقتي الناس اللي ينقلوا الصورة كاملة للرئيس (جو بايدن) وينصحوه يعمل إيه ويقول إيه وسط واحدة من أخطر الأزمات اللي تعدي علي الشرق الأوسط من سنين فاتت .. وعلي فكرة مش بس الشرق الأوسط .. لما الغزو الروسي لأوكرانيا حصل في 2022 مكنش فيه سفير أميريكي في أوكرانيا برده وده واحد من أسباب التخبط الكبير في طريقة تعامل أميركا مع الأزمة إن مفيش حد علي الأرض عارف ياخد قرار.
المصادر:
- مقالة بعنوان The Missing U.S. Ambassadors in the Middle East نشرت في موقع Council on Foreign Relations وده لينك المقالة الأصلية:
https://www.cfr.org/blog/missing-us-ambassadors-middle-east - مقالة بعنوان Dysfunction in Washington leaves Middle East without key U.S. diplomats نشرت في جريدة The Guardian وده لينك المقالة الأصلية:
https://www.theguardian.com/world/2023/oct/12/us-israel-gaza-dysfunction-democracy - مقالة بعنوان Senate acts on ‘unprecedented’ lack of U.S. ambassadors, spurred by Israel-Hamas war نشرت في موقع إذاعة NPR وده لينك المقالة الأصلية:
https://www.npr.org/2023/10/19/1205700419/israel-us-ambassador-senate-middle-east
