فيه شعوب بتبقي شاطرة في حاجات معينة .. الطليان شاطرين في عمايل الأكل .. الألمان شاطرين في الهندسة .. الروس شاطرين في الطيارات .. مفيش حرب حصلت بين البني أدمين و مطلعش فيها طيارة روسي خلت الناس كلها تبلم قدام إمكانياتها .. في الحرب العالمية الثانية كانت الطيارة إيليوشين إثنين IL-2 .. في حرب أكتوبر 1973 و خصوصاً في معركة المنصورة الجوية كانت الطيارة MiG-21 .. لو جيت تبص دلوقتي علي الطيارات اللي تحت إيد القوات المسلحة الروسية فانت لازم عينك تلقط الطيارة الهليكوبتر Mil Mi-28 و اللي الأمريكان مديينها الإسم الكودي هافوك Havoc يعني الدمار و هي الحقيقة تستحق الإسم ده.
الروس لما فكروا يعملوا الطيارة دي كان في الثمانينات يعني بتتكلم عن طيارة عمرها داخل في الثلاثين سنة و ده رقم صغير علي فكرة .. المهم إن الروس أو السوفييت وقتها كانوا بيفكروا يعملوا طيارة فشيخة تقدر تصطاد الدبابات زي ما إنت بتصطاد الناموس لما بتروح الساحل الشمالي كده .. عشان برده تتحط في الصورة .. في الوقت اللي السوفييت فكروا فيه إنهم يعملوا الطيارة دي كانوا محتاسين حوسة البلجيك في أفغانستان و كان تحت إيدهم هناك طيارة هليكوبتر أسطورية إسمها Mil Mi-24 Hind .. إذن واضح من الإسم حتي إن الطيارة Mil Mi-28 حتبقي هي الUpgrade بتاع الطيارة Mil Mi-24 .. سهلة أهي.
لأسباب كتير معاد تسليم الطيارة Mil Mi-28 إتاخر لحد ما إتعرضت رسمي قدام الناس في معرض باريس الدولي للطيران سنة 1989 .. ده كان معناه إن الطيارة دي ملحقتش تخدم في الغزو السوفيتي لأفغانستان .. ده برده كان معناه إنها طيارة وشها فقر عشان السنة اللي وراها إنهار الإتحاد السوفيتي .. بداية من 1990 لحد 2010 يعني بتتكلم عن 20 سنة كاملة و الروس بيطوروا في كل حاجة في الطيارة دي .. كل ما يشوفوا عيب فيها يعالجوه لحد ما في الأخر سنة 2009 طلعولنا التحفة الفنية Mil Mi-28NM أخر Update ينزل ليها و اللي الحق يتقال هي أحسن طيارة هليكوبتر في الترسانة العسكرية الروسية و يمكن أحسن بكتير من الطيارة Kamov Ka-50 اللي إحنا هنا في مصر إشترينا حوالي 50 طيارة منها .. مهم تبقي فاهم سر إني بقول علي الطيارة دي قصايد الشعر دي كلها هم 3 حاجات .. تسليحها .. رادارها .. موتورها.
كتسليح هي تقدر تصطاد الدبابات و الطيارات بطرق أكتر من طرق عمايل الكنافة .. هي ممكن تستخدم صواريخ روسي مضادة للدروع إسمها S-13 و S-8 .. فيها مدفع رشاش عيار 30 مليمتر .. فيها صواريخ جو-جو إسمها R-73 .. كل ده كوم و صواريخ Izdeliye 305 دي كوم تاني .. دي صواريخ بتتصنف علي إنها LMUR يعني Light Multi-Role Unified Missile و باين من إسمها إنها صواريخ بتعمل كذا حاجة اللي هي تقدر تستخدمها ضد الطيارات و الدبابات سوا ولا يفرق معاها .. حط ده جنب رادار فشيخ زي H025 اللي بيخلي الطيارة ملهاش Blind Spot يعني هي تقدر تشوف كل اللي حوليها من غير ما فيه حاجة تقدر تستخبي .. حط ده جنب موتور Klimov VK2500P بيديها سرعة زيادة بنسبة 13% عن النسخة الأولانية خالص للطيارة فانت حتلاقي نفسك قصاد طيارة مقاتلة إتصممت و إتصنعت عشان تدوس علي وش أي حد.
بس مش معني كلامي إن الطيارة Mil Mi-28NM هي الوحيدة اللي جاحدة كده في الفئة بتاعتها من الطيارات الهليوكوبتر .. الأمريكان عندهم الأسطورة AH-64 Apache .. الأوروبيين عندهم الطيارة Eurocopter Tiger اللي بتخدم في القوات الجوية الألمانية و الفرنسية و الأسبانية و الأسترالية .. لحد دلوقتي محلصتش حرب خلت أي طيارتين من الثلاثة يقفوا في وش بعض عشان تقدر تقول مين فيهم أحسن من الثانية.
المصدر:
- مقالة بعنوان Mil Mi-28NM Havoc: The Russian Chopper That Made ISIS Run Screaming نشرت في موقع Hot Cars و ده لينك المقالة الأصلية:
https://www.hotcars.com/mil-mi-28nm-havoc-the-russian-chopper-that-made-isis-run-screaming/
