باربينهايمر .. بداية النهاية لأفلام السوبرهيروز.

خلينا نكون صادقين مع نفسنا إن أكتر حاجة بتوجع أي بيزنس هي الفلوس .. لما شركة تنزل منتج و المنتج ميتباعش في السوق فالشركة بتبطل تنتجه فالسبب الأساسي اللي خلاهم ياخدوا القرار ده هي الفلوس عشان المنتج بقي واقف عليهم بخسارة يعني الفلوس اللي بتتدفع فيه مش بيجي مكانها ربح .. حسبة حساب بسيطة هي اللي قائم عليها أي بيزنس في الدنيا من أول موبايلات iPhone لحد الجنبة البراميلي .. يمكن الاستثناء لده هو سوق العربيات في مصر لإنه سوق أهبل تحس اللي ماسكينه كانوا زمايل تختة لتجار المخدرات بتوع المكسيك و كولومبيا بس مش دي القضية .. القضية إن صناعة السينما بيزنس و بما إنها بيزنس فهي زي ما قلت من شوية قائمة علي فكرة إن أنا كشركة إنتاج أو كمنتج بدفع فلوس عشان في الأخر يجيلي فلوس .. لو المنتج اللي في حالتنا هنا هو الفيلم السينمائي بطل يجيبلي فلوس فأنا حبطل أعمله .. خصوصاً لو لقيت نفسي داخل السوق في منافسة مع منتجين بيعملوا أفلام بس بيصرفوا عليها أقل بكتير من اللي أنا بصرفه لا و كمان بيعملوا فلوس أكتر من اللي أنا بعملها وهنا يجي دور الكلام عن المعلم الكبير في سوق صناعة السينما اليومين دول .. ديزني Disney.

ديزني هي البهظ بيه بتاع السوق .. هي (عبدالملك زرزور) اللي محدش يقدر يكسرله كلمة .. هي الشركة اللي بتنتج أفلام و مسلسلات Star Wars .. هي اللي بتنتج سلسلة أفلام Avatar .. هي اللي بتنتج كل ما له علاقة بكلمة مارفل Marvel من أفلام و مسلسلات .. بس في الفترة اللي فاتت حصلت حاجة غريبة جداً و هي إن ديزني لقت نفسها بتاخد علي وشها بالقلم من فيلمين نزلوا مع وقت في وقت واحد اللي هم باربي Barbie و أوبينهايمر Oppenheimer و أنا اللي يهمني جداً دلوقتي هو حسبة الفلوس خلي بالك .. فيلم Oppenheimer تكلفته شاكب راكب بالإنتاج بالدعاية بمرتبات الممثلين وقفت علي شركة يونيفيرسال Universal اللي أنتجته حوالي 100 مليون دولار .. فيلم Barbie وقف علي شركة ماتيل Mattel المنتجة ليه بحوالي 145 مليون دولار .. إجمعهم علي بعض تلاقي نفسك قدام فيلمين متكلفين 245 مليون دولار .. بص علي أرباحهم في أول Weekend من عرضهم تلاقي نفسك قدام رابع أكبر ربح في تاريخ السينما من ساعة ما قالوا يلا نعمل أفلام .. أرباح الفيلمين في أول Weekend من عرضهم مشفنهاش من ساعة عرض فيلم Avengers: Endgame سنة 2019 .. علي الناحية الثانية معرفش إنت عدي عليك خبر إن ديزني نزلت مسلسل بيتذاع علي القناة بتاعتهم Disney Plus اسمه Secret Invasion ضمن سلسلة Marvel ولا لا بس المسلسل ده تكلفته وصلت 212 مليون دولار .. مش كده و بس .. تكلفة Barbie و Oppenheimer علي بعض أقل من الأفلام دي و كلها و كلها أفلام سوبرهيروز .. جاهز؟ .. أقل من 250 مليون دولار إتصرفوا علي الزبالة اللي اسمها Thor: Love and Thunder .. أقل من ميزانية العته الفني اللي اسمه Antman and the Wasp: Quantummania .. أقل من الفلوس اللي إتصرفت علي فيلم The Flash و جابوا في Weekend بس فلوس أكتر من كل أرباح الفيلم خلال الشهر اللي إتعرض فيه في كل سينمات العالم.

يمكن مفيش في مصر غيري و إتنين كمان هم اللي إتفرجوا علي مسلسل Secret Invasion.

ده بيحطك قدام واقع جديد يمكن محدش مننا توقع إننا نوصله .. الناس مش بس زهقت من أفلام السوبرهيروز ده كمان شركات الإنتاج بدأت تفكر جدياً في إنها مش حقول تبطل تعملهم بس علي الأقل يفرملوا شوية إنتاجهم منها .. السنة دي لوحدها كانت مذبحة لكل ما له علاقة بالسوبرهيروز سواء بتتكلم عن Marvel أو DC علي فكرة .. من أول Shazam: Fury of the Gods مروراً بالكارثة اللي اسمها Black Adam و إنتهاءاً بالمصيبة اللي اسمها The Flash اللي بقي أسوأ فيلم في تاريخ أفلام السوبرهيروز كلها .. وعشان متحسش إني جاي علي DC أوي فيه عندك Antman and the Wasp: Quantummania و جبنا سيرة Thor: Love and Thunder و إنتهاءاً بمسلسل Secret Invasion اللي تقريباً محدش بيتفرج عليه في مصر غيري و يمكن أنا بتفرج مش عشان المسلسل حلو قد ما هو لمجرد العلم بالشيء عشان بس ميفوتنيش أحداث .. اللي إحنا متؤكدين منه إن ديزني قررت تفرمل إنتاج أي مسلسلات جديدة ضمن العالم بتاع Marvel .. بس الأهم إن شركات الإنتاج حتبدأ تعمل الحاجة اللي كنا بنترجاهم يعملوها من زمان .. سيبوا المخرجين يشتغلوا .. سيبوا (جريتا جرويج Greta Gerwig) تعمل اللي هي عايزاه في السيناريو بتاع Barbie و سيبوا (كريستوفر نولان Christopher Nolan) يختار الممثلين اللي هو عايزهم .. إنت ليك في الأخر كمنتج يجيلك فلوس فلو سمحت إقعدلنا علي جنب و لما نقولك تدفع تدفع من سكات .. بس يمكن النقطة الأهم إن بقي فيه كلام كتير علي إن (نولان) عنده حق في فكرة إن الإعتماد المفرط و الغير مبرر علي الجرافيكس أو ما يسمي CGI بوظ السينما.

المصادر: