بص كده الخبر ده .. الإتحاد الإنجليزي مضي عقد مع قناة سكاي سبورتس Sky Sports إنها يبقي ليها حق بث ماتشات الدوري الإنجليزي الممتاز من أول موسم 2025 لحد موسم 2029 مقابل 6.7 مليار جنيه إسترليني اللي هم تقريباً 8.4 مليار دولار .. لحد هنا الخبر خلص .. ها بقي إيه رأيك؟ .. فيه منكوا اللي حيبص للرقم ويقول لنفسه عليا الطلاق ما أحنا عايشين .. فيه اللي حيعتبر نفسه من مواليد حواري لندن ويقولك طبعاً ما هو عشان كده البريميرلييج هو الدوري الأفضل علي مستوي العالم وده السبب اللي بيخلينا نستني السبت الممتاز من كل أسبوع .. بس عشان إنت عارفني كويس وعارف إن مش حجيب سيرة حاجة في كلامي إلا لو وراها مصيبة فخليني أفصصلك الرقم ده حيرسي في الأخر علي إيه وخليني برده أقولك إن ليه الصفقة دي اللي ناس كتير شايفاها ريكورد ودليل علي إن الناس اللي ماسكة الدوري الإنجليزي جامدين زحليقة في البيزنس بس في الواقع الصفقة دي مش حقول حتبقي خراب بيوت مستعجل بس بما يرضي الله يعني هي مش أحسن حاجة في الدنيا.
- معلومة رقم واحد .. عادة لما إتحاد كرة قدم يبيع عقد بث ماتشات الدوري الممتاز بتاعه لقناة فالعقد بيكون لمدة 3 سنين بس العقد اللي الإتحاد الإنجليزي مضاه مع Sky Sports مدته 4 سنين يعني لو جيت قسمت 6.7 مليار جنيه إسترليني علي 4 حتلاقي إن العقد مدته في السنة 1.675 مليار جنيه إسترليني .. السؤال بقي: هل دي حاجة كويسة؟
- معلومة رقم إتنين .. سنة 2015 الناس كلها كانت بتضرب كف علي كف لما نفس الإتحاد الإنجليزي لكرة القدم مضي عقد مع برده قناة Sky Sports إنه يبيع ليها حق بث ماتشات نفس الماتشات هي هي بتاعة الدوري الإنجليزي برده مقابل 1.713 مليار جنيه إسترليني في السنة بعقد مدته 3 سنين بحيث يشمل المواسم من 2016 لحد 2019 .. طب ده معناه إيه؟ .. معناه إنك لما تدخل في حسابك التضخم اللي خرب بيتنا واللي وصل 30% ده لو صدقت كلام الحكومة بتاعتنا فإنت بتتكلم بما يرضي الله يعني الإتحاد الإنجليزي إتضحك عليه.
- معلومة رقم ثلاثة .. عشان ده عقد مدته 4 سنين مش تلاتة زي ما قلتلك فإنت العقد بتاع 2024 لو قارنته بالعقد بتاع 2015 فهو زايد عليه ب99 ماتش اللي هم الموسم الزيادة .. ده معناه إنك لو جيت تحسب ثمن الماتش الواحد في الدوري الإنجليزي ففي صفقة 2024 الإتحاد الإنجليزي بايع الماتش الواحد بنص ثمنه اللي كان عليه في 2015.
المفروض دلوقتي إنك تكون بتهرش في شعرك .. فيه حاجة غلط .. منين الدوري الإنجليزي هو الدوري الأفضل والأمتع والأحلي والرز بلبن بالمكسرات والجيلاتي وفي نفس ذات الوقت ماتشاته بتتباع بالرخص؟ .. الحقيقة إن ده تريند في بيزنس بث ماتشات دوريات كرة القدم الأوروبية كلها وخليني أقولك إن الدوري الإنجليزي هو الناجح الوحيد من اللي بيحصل .. يعني صحيح عقد 2024 لو جيت قسمته علي 4 حتلاقيه مش جايب همه لو قارنته بالعقدين اللي قبلية سواء بتاع 2015 أو 2019 بس لو بصيت علي قيمة العقود الثلاثة كرقم مجرد فعقد 2024 قيمته أعلي 4% من العقدين اللي قبليه .. حلو صح؟ .. عايزك تعرف إن قيمة عقد بث ماتشات الدوري الإسباني الحالي قيمته أعلي يدوبك 1% من العقد اللي قبله .. عقد بيع بث ماتشات الدوري الألماني مزادتش أصلاً .. عقد بيع ماتشات الدوري الإيطالي قل 3% مزادش وعايزك تعرف إن الإتحاد الفرنساوي لكرة القدم مش لاقي أصلاً مشتري لماتشات الدوري الممتاز بتاعه .. فنرجع تاني للسؤال المهم .. إيه اللي حصل؟
الحقيقة إن فيه كذا عامل لما تحطهم مع بعض في الخلاط بتلاقي نفسك قدام واقع جديد .. عندك الستريمينج إن أي حد يقدر يخش علي مواقع زي في العارضة أو كورة سيتي ويتفرج علي الماتش أون لاين .. عندك فكرة إن ناس كتير بقت بتتفرج علي ملخص الماتشات علي YouTube بدل ما يضيع ساعة ونص من عمره عشان يتفرج علي ماتش .. خليني أقولهالك علي بلاطة .. ماتشات الدوري الإنجليزي بتتباع بالسعر ده اللي هو أعلي بكتير من سعر ماتشات باقي الدوريات الكبيرة في أوروبا مش لسبب غير إن فيه ناس عندها استعداد تدفع سواء بتتكلم عن Sky Sports أو BeIn Sports خصوصاً إن فيه ناس تانية بدأت تفكر تدخل في بيزنس بث ماتشات كرة القدم زي Apple TV+ اللي بقت بتذيع ماتشات الدوري الأميريكي الممتاز MLS.
نقطة بس أخيرة متعلقة بالحاجة اللي بنكرهها كلنا .. الحساب .. لو جيت تتكلم عن أي نادي يعجبك في أوروبا وليكن مثلاً نادي أتليتكو بلباو في الدوري الإسباني .. المفروض إن النادي ده بيصرف علي نفسه فلوس بتجيله من 3 مصادر ملهمش رابع: بث ماتشات الدوري الإسباني واللي بتتوزع علي الأندية بناء علي هو النادي كان مركزه كام في الموسم اللي فات .. الفلوس اللي بتيجي من بيع تذاكر الماتشات في الأستاد بتاعهم .. الفلوس اللي بتيجي من بيع التي شيرتات والاسكارفات والطواقي وأي بضاعة عليها شعار ولوجو النادي وعقود الرعاية اللي بيمضيها النادي مع الشركات اللي عايزة تحط اللوجو بتاعها علي تي شيرتات الفرقة .. جميل جداً .. دلوقتي أنا لو مكان إدارة أتليتيكو بلباو فأنا الفلوس اللي بتجيلي من بث ماتشات الدوري مش أنا اللي بحددها عشان ده بيكون بناء علي عقد بين القناة اللي بتذيع الماتش وبين الإتحاد الإسباني لكرة القدم .. وكمان أنا الأستاد بتاعي سان ماميس فيه عدد كراسي معين فانا بشكل أو بأخر الفلوس اللي بتجيلي من بيع التذاكر أقدر أحسبها من قبل ما حتي الحكم يصفر أول ماتش في الدوري .. وده بيخلي إن عقود الرعاية هي فعلياً يعني وبحسبة الورقة والقلم اللي بتفرق نادي عن نادي واللي بتخلي الأندية تعرف تقف علي رجلها وعشان كده إنت ممكن تلاقي تي شيرتات كتير من الأندية الأوروبية بقت عاملة زي كراسات الرسم أو شبه عربيات سباقات العربيات من كتر الإعلانات اللي بتتحط عليها .. كان زمان تلاقي إن فيه ماركة واحدة بس علي التي شيرت بس دلوقتي بقي فيه ماركة علي الظهر وماركة علي الكمام وماركة تانية علي التي شيرتات اللي اللاعيبة بتسخن بيها قبل ما الماتش يبدأ .. الشركات دي لو قدامها خيار إنها تروح تدفع فلوس لنادي زي أتليتيكو بلباو في أسبانيا أو نادي علي الله حكايته في إنجلترا زي لوتن تاون فعشان الدوري الإنجليزي بيتشاف أكتر بكتير من الدوري الإسباني فهم حيروحوا يحطوا فلوسهم في عقد رعاية لأندية الدوري الإنجليزي حتي لو نادي أغلب من الغٌلب.
ده بيحطنا قدام واقع جديد مخيف ومريب الحقيقة وهو إن كتير من الأندية في أسبانيا أو إيطاليا أو ألمانيا وأكيد فرنسا بسبب إن أغلب مصاريفها رايحه علي مرتبات اللاعيبة فالفلوس اللي بتخشلهم حتفضل تقل وتقل وتقل لإن الشركات بتروح إنجلترا تمضي عقود رعاية هناك وتسيب الدوريات التانية وحتفضل الفجوة الكبيرة بين ميزانيات أندية الدوري الإنجليزي وباقي الدوريات التانية تكبر وتكبر وعشان كده أنا بقول إن الصفقة دي مش ريكورد الإتحاد الإنجليزي يفرح بيه .. ده جرس إنذار لازم يخلوا بالهم منه.
المصادر:
- مقالة بعنوان Why Premier League’s new deal is a warning, not a record نشرت علي موقع قناة ESPN وده لينك المقالة الأصلية:
https://www.espn.com/soccer/story/_/id/39229682/why-premier-league-new-tv-deal-warning-not-record
