تكلفة صيانة الطيارات الأمريكاني .. أراك توزع من مال الست الوالدة.

أي معلومة في الدنيا ممكن تتقدم بطريقتين .. إما إني أديلك الزتونة بتاع الموضوع .. الخلاصة من غير تفاصيل وساعتها إنت حتبقي معاك معلومة ناقصة .. صحيح حتبقي فرحان بيها وحتحسسك إنك أذكي سيكا من صحابك بس حبقي بظلمك لو عملت كده .. الطريقة الثانية إني أحاول أشرحلك شوية تفاصيل عن الموضوع .. اللي أهم من الزتونة إنك تفهم الإجابة عن أهم سؤال وجودي في الحياة .. ليه؟ .. عشان تفهم قصدي بص علي الصورة اللي عندك.

لو بصيت عليها من غير ما تقرأ الكلام وتتشرحلك الحكاية اللي ورا الصورة فإنت حتقول لنفسك دي تكاليف الطيارات اللي تحت إيد سلاح الجو الأمريكاني وباين كده إن الطيارة الشبح غالية بغباوة وشكراً علي كده .. لو إنت دحيح ونيرد شوية حتنزل بعنيك تدور هي الطيارة F-35 مكانها فين في الجدول ده لزوم العلم بالشيء يعني وحتلاقيها هي وأختها الكبيرة F-22 Raptor أغلي طيارتين مقاتلتين في سلاح الجو الأمريكاني ودي معلومة منطقية بالنسبة للمعلومات اللي عندك من قبل كده .. دي كده زتونة الموضوع .. دلوقتي يجي دور إنك تفهم الحكاية ورا الصورة دي.

فيه جهة حكومية في أميركا إسمها مكتب المحاسبة الحكومية Government Accountability Office وإختصاراً بيتسمي GAO وكلمة محاسبة هنا مش جايه من الحسابات قد ما هي جايه من فكرة الحساب علي الأخطاء .. المهم إن الناس بتوع GAO كتبوا تقرير إتسحلوا فيه سنين الحقيقة عشان يحاولوا يجاوبوا علي سؤال بسيط .. إيه هي تكلفة طيارات سلاح الجو؟ .. الأمريكان عندهم 40 نوع طيارات مختلف في قواتهم المسلحة .. يا تري الطيارات دي واقفه علينا بكام في السنة؟ .. التقرير مسك الفلوس اللي سلاح الجو صرفها علي طياراته من 2011 لحد 2019 ولقوا مش حقول مصايب بس خليني أقول إنهم طلعوا بدروس لازم نقف قدامها ونبقي مستوعبين زي ما دايماً بقول إن شرا السلاح فن مش عن عن.

لما حضرتك بتقرر تشتري طيارة مقاتلة فإنت الفلوس الكاش اللي بتدفعها عشان تشتري الطيارة متجيش حاجة قصاد الفلوس اللي بتتحط تحت بند Operational & Support Costs واللي بتتسمي O&S ودي تبقي فلوس الصيانة والتشغيل .. عشان أديلك مثال .. التقرير بتاع GAO قال إن سلاح الجو الأمريكاني صرف في السنة المالية بتاعة 2018 علي صيانة طياراته بس 49 مليار دولار .. خلي بالك إنهم مليار مش مليون .. اللي التقرير بتاع GAO بيقوله إن أي سلاح في الدنيا سواء بتتكلم عن دبابة أو طيارة أو مدمرة لو بصيت علي فترة عمر السلاح كلها اللي حيقضيها في الخدمة ف70% من الفلوس اللي بتتدفع في السنين دي كلها بتروح في O&S ده شامل الصيانة وقطع الغيار والزيت والفلاتر وفلوس المرتبات بتاعة الموظفين والفنيين اللي حيعملوا الصيانة دي.

أكتر فئة طيارات بتعتبر بلاعة فلوس هي القاذفات الجوية Bombers وده لأسباب كتير الحقيقة من ضمنها إن القاذفات الجوية اللي تحت إيد الأمريكان كلها قديمة فإتبنت أيام الرخص بس مع الوقت صيانتها بقت مكلفة جداً .. حاجة تانية إن كتير من القاذفات اللي تحت إيد الأمريكان بيتحطوا تحت فئة Stealth Aircraft يعني الطيارات اللي ليها القدرة علي التخفي من الرادارات والنوع ده من الطيارات معقد جداً في تصميمه وتصنيعه وبالتالي صيانته بتبقي يوم أسود في حياة المهندسين اللي بيشتغلوا عليها .. عشان برده كلامي ميبقاش عام تعالي ناخد مثال بالطيارة الشبح اللي إسمها الحقيقي B-2 Spirit .. الطيارة الواحدة في السنة بيتصرف عليها 63 مليون دولار .. ده رقم خزعبلي بس تفسيره هي إنها من إسمها هي طيارة Stealth فصيانتها غالية .. القاذفتين التانيين اللي تحت إيد سلاح الجو الأمريكاني هم B-52 Stratofortress اللي بيتصرف عليها في السنة 25 مليون دولار وإختها الصغيرة B-1B Lancer اللي بيتصرف عليها في السنة 23.7 مليون دولار .. صحيح لو قارنت الأرقام دي بتكلفة صيانة الطيارة الشبح فحتلاقيهم أرخص بس في المجمل يعني إنك تدفع 25 مليون دولار في السنة علي صيانة طيارة فده مش رقم قليل .. ليه الرقم ده بيتدفع؟ .. عشان الطيارتين B-52 و B-1B إتبنوا في السبعينات أيام الرخص .. قطع غيارهم عشان تتصنع دلوقتي بتبقي غالية .. أي حد عنده عربية قديمة قطع غيارها مش موجودة في السوق حتلاقيه بيقرأ الكلام ده ويهز راسه.

تاني أكتر فئة بيتصرف عليها فلوس في سلاح الجو الأمريكاني هي الطيارات المقاتلة ومفيش طيارة بتطلع عينهم في صيانتها أكتر من F-22 Raptor .. دي طيارة عشان تتصين بيتدفع فيها في السنة 22 مليون دولار .. دي طيارة بعد كل 300 ساعة طيران بتروح الورشة تفضل هناك 3 أسابيع عشان يتعملها عمرة كاملة .. طيارة لو إنت طيار مقاتل فإنت حتقع في غرامها بس لو إنت مهندس صيانة فإنت بتكره اليوم اللي هي إتصنعت فيه .. الأخطاء اللي المهندسين وقعوا فيها وهم بيصمموا F-22 Raptor وبالتالي نكدت عليهم في الصيانة حاولوا يتفادوها في F-35 .. دي طيارة تكلفة صيانتها في السنة 13.4 مليون دولار .. صحيح أقل من F-22 Raptor بس لو جيت تقارنها مثلاً يعني بتكلفة صيانة الطيارات المقاتلة القديمة شوية فحتلاقي نفسك بتصرف علي صيانة الطيارة F-16 Fighting Falcon حوالي 5 مليون دولار في السنة وبتصرف 10 مليون دولار في السنة علي صيانة F-15 Eagle.

المصدر:

• مقالة بعنوان The Mammoth Cost of Operating America’s Combat Aircraft نشرت في مجلة Forbes وده لينك المقالة الأصلية:
  https://www.forbes.com/sites/niallmccarthy/2020/11/26/the-mammoth-cost-of-operating-americas-combat-aircraft-infographic/?sh=7872327da728