انا عارف كويس ان البنات في مصر ملهاش في التسليح ومش بتحبه .. اي بنت في مصر لو سالتها ايه الفرق بين F-22 Raptor و MiG-29 Fulcrum غالبا حتفتكر انك بتسالها عن موديلات عربيات .. بس قول قدام اي بنت اسم الطياره الشبح و حتبقي عارفاها .. تقريبا مفيش بني ادم في مصر لو شاف صورتها مش حيقولك اه يا عم دي الطياره الشبح الامريكاني .. الطياره دي بقت تجسيد لمدي تفوق السلاح الامريكاني .. الطياره دي هي اللي غالبا هي و الماركه بتاعه ماكدونالدز بقوا علامه مميزه لازاي الامريكان دول ناس جامده .. الامريكان نجحوا يزرعوا في دماغنا ان مينفعش نقف قدامهم او نقولهم لا لان لو الحرب قامت بينا وبينهم طياره واحده من دول كفايه اوي انها ترجع مصر للعصر الحجري .. النهارده احنا عايزين نتكلم شويه عن الطياره دي .. مبدأيا واول معلومه ممكن تبقي صادمه لناس كتير بس الامريكان مش بيسموها الشبح .. بص هو مش ده اسمها اوي يعني .. هي اسمها B-2 Spirit يعني الروح و بصراحه اسم الشبح سيكسي عن اسم الروح .. تصدق تنفع ..ما علينا نفترض ان اسمها فعلا الشبح .. النهارده عايزين نحاول سوا نجاوب علي سؤالين: ايه كان التطور الطبيعي لفكره الطياره دي؟ او بمعني اخر ليه الامريكان عملوها من الاساس؟ .. السؤال الثاني هو بجد يعني و بحق ربنا هي الطياره دي بتعمل ايه و قدراتها ايه من غير مبالغه؟
التطور الطبيعي للطياره الشبح:
عشان تفهم الطياره دي لازم تفهم الهدف اللي هي اتعملت عشانه .. الطياره دي اتعملت في زمن كان فيه حاجه اسمها الاتحاد السوفيتي واللي لو انت متعرفش هو يطلع ايه البتاعه دي فتخيل ان روسيا دلوقتي بس واخده فياجرا .. الهسهس اللي كان في دماغ الامريكان هو لو جه اليوم وقامت الحرب النوويه فازاي هم حيضربوا السوفييت؟ .. كان فيه حلول كتير الحقيقه .. ممكن غواصه شايله صواريخ نوويه .. ممكن صواريخ عابره للقارات .. الحل اللي القوات الجويه كانت عايزاه هي ان يبقي عندها طياره تعرف تطير لمسافات طويله فشخ و بتقدر تشيل حموله تقيله فشخ عشان تطير فوق الاتحاد السوفيتي ترمي حمولتها واللي عباره عن قنابل نوويه و تروح تاني علي اميركا .. الطياره اللي بتعمل الشغلانه دي اسمها قاذفه او Bomber .. في الستينات سلاح الجو الامريكاني كان عنده طياره هم فرحانين بيها اوي اسمها B-52 كانت عباره عن عربيه نقل بتطير .. هي بطيئه صحيح بس بتشيل حموله تقيله .. شويه و الامريكان لقوا ان الطياره دي مبقتش نافعه لسببين: السبب الاول ان السوفييت بقوا يصنعوا طيارات سريعه اوي زي سوخوي-15 اللي اتصممت عشان تطلع بسرعه تصطاد الطيارات B-52 في الجو .. السبب الثاني هي ان السوفييت بقوا شاطرين اوي في انظمه الدفاع الجوي زي سام SAM اللي احنا استخدمناها في حرب اكتوبر و اللي بتعرف توقع الطيارات زي B-52 وهي بتطيرعلي ارتفاعات عاليه .. السؤال اللي الامريكان سالوه لنفسهم طب و بعدين؟
الحل ان الامريكان صرفوا دم قلبهم علي تطوير نوعين طيارات حلوين اوي اللي هم F-111 Aardvark و B-1 Lancer .. الاولانيه طلعت بره الخدمه خلاص و الثانيه لسه مكمله معانا ودول طيارات ينفع تسميهم قاذفات يعني طيارات بتطير لمسافات طويله و بتشيل حموله كبيره بس مش متصممين عشان يطيروا علي ارتفاعات كبيره .. هم اتصمموا عشان يطيروا علي نفس الارتفاعات بتاعه الطيارات المقاتله العاديه .. ايه الحكمه ورا ده؟ .. عشان المعلومه اللي كانت عند الامريكان ان انظمه الدفاع الجوي السوفيتيه زي SAM مش قويه اوي ضد الطيارات اللي بتطير علي ارتفاعات واطيه .. شويه و الامريكان اتصدموا لما السوفييت بقوا يدوسوا اوي في سكه انظمه الرادارات و الدفاع الجوي اللي بتتسمي Doppler Radar و كانوا بقوا شاطرين اوي في تطوير الرادارات اللي بتتركب علي الطيارت المقاتله .. تاني الامريكان بصوا لبعض و سالوا نفسهم: طب و بعدين؟
في الوقت ده كانت فيه افتكاسه بدأت تنتشر وسط المهندسين الامريكان اسمها المواد اللي بتقدر تمتص موجات الرادار و المواد اللي مش بتعكس الموجات الصوتيه من عليها .. الفكره انك لو جبت اي طياره وعملت السطح الخارجي بتاعها من المواد دي فانت نظريا تقدر تقلل من احتمالات ان الرادار يلقطها .. الفكره دي خدتها شركه لوكهيد مارتن Lockheed Martin و هبدت الاول بما فيه الكفايه في الطياره SR-71 Blackbird بس هم استفادوا من كل الهبد اللي هم هبدوه وكل العك اللي اتعمل في انهم يعملوا اول طياره تجسس ليها القدره علي التخفي من الرادار او زي ما بتتسمي Stealth بحق ربنا اللي هي F-117 Nighthawk .. كل ده جميل بس الطيارتين مش بيعملوا الوظيفه اللي سلاح الجو كان عايزها .. انا عايز Bomber او قاذفه و كمان تبقي Stealth يعني ليها القدره علي التخفي من الرادار .. عارف انهم شبه العيل الصغير اللي شبطان في لعبه بس ده التشبيه اللي فعلا يفهمك دماغ القوات الجويه الاميريكيه .. شويه اطفال شبطانين في لعبه .. المهم ان سنه 1981 طلباتهم دي اتحطت في مشروع اتسمي Advanced Technology Bomber او ATB اختصارا و اتقال للشركات اللي شغاله في بيزنس الطيارات اللي يعرف يديلنا تصميم يحققلنا الطلبات دي يوريهولنا.
لو كنت سالت اي حد وقتها جوه وزاره الدفاع تفتكر مين الشركه اللي حتاخد عقد مشروع ATB فكان حيقولك اكيد لوكهيد مارتن لانها هي الشركه اللي داست في سكه Stealth و عملت بيها طيارتين .. متفهمش ازاي شركه تانيه اسمها نورثروب Northrop طلعت فجاه قالتهم صاربرايز ماذرفاكرز .. اللي حصل ان سنه 1949 يعني قبل 32 سنه من ما القوات الجويه تقول انها عايزه قاذفه تبقي Stealth كانت الشركه بتجرب تصميم طياره شكلها غريب من غير ذيل و طول الجناحين بتوعها معديين 52 متر و مسميينها YB-49 .. التصميم ده في الطيران بيسموه Flying Wing يعني انت دلوقتي عارف ان اي طياره في الدنيا هي شاسيه ومتركب فيه جناحين و في اخره ديل .. كلمه Flying Wing معناها ان التصميم ده اتشال منه الشاسيه و اتشال منه الديل و بقي مجرد جناحين طايرين في الهوا .. الالمان في الحرب العالميه الثانيه كانوا جربوا يشتغلوا علي طياره بالتصميم ده و عملوا واحده اسمها هورتين هو Horten Ho 229 .. (جاك نورثروب Jack Northrop) مؤسس شركه نورثروب و واحد من اكتر مهندسين الطيران اللي دماغهم متكلفه في التاريخ هو اللي اشتغل علي تصميم YB-49 بنفسه .. سنه 1981 شركه نورثروب قدمت التصميم بتاع الطياره دي و سبحان الله اتوافق عليه و الشركه خدت العقد من بين ايدين لوكهيد مارتن.
تعامل وزاره الدفاع مع مشروع ATB كان غريب شويه .. هو اتقال قدام الناس ان القوات الجويه شغاله علي تصميم طياره جديده .. بتعمل ايه الطياره دي؟ محدش عارف .. طب مين اللي حيصممها؟ محدش عارف .. طب قدراتها ايه؟ محدش عارف .. لو مثلا التصميم بتاع شركه نورثروب فيه انهم عايزين يركبوا كومبريسور Compressor و محتاجين يشتروه و يركبوه و مثلا كانت الشركه اللي بتصنع الكومبريسور ده هي جنرال اليكتريك General Electric مثلا فوزاره الدفاع كانت بتخلي المحاسبين بتوع الوزاره يعملوا شركه وهميه عشان تطلب هي الكومبريسور من General Electric بدل ما شركه نورثروب اللي بتصنع الطياره هي اللي تطلبه .. اي حد كان بيراجع الحسابات بتاعه وزاره الدفاع ومعندوش اي خلفيه بتفاصيل مشروع ATB كان حيلاقي ان فيه حفره محدش عارف بتعمل ايه وزاره الدفاع عماله ترمي فيها فلوس .. سنه 1988 ميزانيه المشروع كانت عدت 42 مليار دولار و بمجرد ما الموضوع اتعرف كانت فضيحه .. انهي طياره دي اللي متكلفه المبلغ ده؟ .. عشان محدش كان مسموح له انه يعرف اي حاجه فطبيعي ان الناس تستغرب .. بسبب الضغط الشعبي ان الناس عايزه تعرف هي الفلوس دي كلها بتروح فين اضطرت وزاره الدفاع انها توري للامريكان الPrototype او النسخه التجريبيه للطياره في نفس السنه اللي هي 1988 .. السنه اللي وراها الطياره طارت اول طلعه جويه تجريبيه ليها .. لسه وزاره الدفاع هتقول هيييييه سنه 1993 لما كانت بتدي امر ان خط الانتاج بتاع الطياره يبدأ يشتغل بعد ما كل المشاكل وكل الكومنتات بتاعه التصميم اتحلت هوبا الاتحاد السوفيتي انهار.
حسبه الفلوس غيرت كل حاجه .. الطياره دي اتصرف عليها كتير فشخ وكان المبرر ورا كل الصرف ده كان هو انتوا مش عايزينا نحميكوا من السوفييت ولا ايه؟ .. طب دلوقتي الاتحاد السوفيتي راح في داهيه ازتي حنبرر صرف الفلوس دي كلها ؟ .. بلاش دي .. هو انت فاكر ان القوات الجويه هي اللي بس كانت بتبعزق فلوس تحت شعار الخطر السوفيتي؟ .. طب ما انت عندك القوات البحريه كانت برده بتصرف علي تطوير موديل غواصات جديد اسمه Sea Wolf .. وزاره الدفاع قالت اننا عشان نبرر الفلوس دي كلها عايزك تحط اي اوبشن انت محتاجه ولو حتي مش محتاجه .. المهم تكربسلي الطياره دي اوبشنات .. يعني ايه مش فاهم برده يا فندم؟ .. انت دلوقتي خليت الطياره بتشيل قنابل نوويه و التصميم بتاعها من بره بيخليها Stealth بس ده ميمنعش اننا نركب عليها احدث انظمه التشويش ع الرادار .. لو حد سال هي الاوبشنات دي كلها ضروريه ومحتاجينها يعني؟ حيكون الرد ان والله كان المفروض قبل ما الاوبشنات دي تتضاف ان الطياره B-2 Spirit حتطير و معاها شويه طيارات EA-6B Prowler ودي طيارات متركب عليها انظمه حرب اليكترونيه و تشويش ع الرادار فقلنا ان بدل ما يبقي فرح العمده ده بيطير مع بعضه فالطياره B-2 Spirit تبقي بتطير لوحدها.
برده الفلوس اللي حتدفع كانت كتير اوي .. في الاول قالوا طب خلاص احنا بدل ما كنا طالبين 132 طياره نخليهم 75 بس .. سنه 1993 ولسه خط الانتاج بتاع الطياره B-2 Spirit بيشد حيله طلع قرار من اداره الرئيس الاميريكي (جورج بوش الاب) ان عدد الطيارات المطلوب يقل من 75 لعشرين طياره بس .. في اداره الرئيس (بيل كلينتون) اللي جه الحكم بعد (جورج بوش الاب) جابوا الطياره الاولانيه خالص الPrototype عدلوا فيها شويه عشان في الاخر سلاح الجو يبقي تحت ايده 21 طياره.. حتعرف كمان شويه ان واحده منهم انفجرت سنه 2008 فده خلي ان اجمالي عدد الطيارات الشبح اللي في الخدمه دلوقتي عشرين طياره بس .. قرار اداره الرئيس (جورج بوش الاب) انهم يخسفوا بعدد طيارات B-2 Spirit اللي حتتصنع الارض بالشكل ده فرقع في وش الامريكان لان القرار ده رفع سعر الطياره الواحده من 500 مليون دولار بقي 737 مليون دولار .. زود عليهم اعمال التطوير و الصيانه و قطع الغيار تلاقي الطياره ثمنها نط بقي 900 مليون دولار .. المهم ان سنه 1997 الطياره دي خدت ختم انها ينفع تخش الخدمه و الختم ده الامريكان بيسموه Initial Operating Capability او IOC وده عامل زي ختم النسر اللي بتمضي بيه الورق من مدام (عفاف) في الدور الرابع و اللي بيقول ان الطياره دي زي الفل و ينفع تخش الحرب بكره الصبح .. الطياره فضلت مركونه سنتين لحد ما في يوم 24 مارس 1999 الطياره الشبح بتعمل اول مهمه رسميه ليها لما شاركت في الحمله الجويه ضد يوغوسلافيا وهنا انت محتاج تفهم نقطه .. كل الطيارات B-2 Spirit اللي في الخدمه محطوطين مع بعض في جناح القاذفات الجوي 509 وده نفس السرب اللي رمي القنبلتين النوويتين علي هيروشيما و ناجازاكي علي فكره و السرب ده مقره قاعده وايتمان الجويه في ولايه ميزوري .. ده معناه ان الطياره الشبح كانت بتطلع من القاعده الجويه بتاعتها في ولايه ميزوري و تروح تعدي المحيط الاطلنطي في رحله مدتها 30 ساعه رايح جاي عشان تضرب يوغوسلافيا و ترجع تاني .. في الحرب دي سرب طيارات الشبح نفذ 50 غاره جويه اترمي فيها 30% من اجمالي القنابل و الصواريخ اللي اتضربت علي يوغوسلافيا طول الحرب.
اذا كنت فاكر ان 30 ساعه طيران عشان تروح تضرب هدف و ترجع كتير فعايز اقولك ان سنه 2001 في غزو افغانستان اطقم الطيارات دي كانوا بيتفشخوا 70 ساعه طيران عشان يطيروا من ميزوري لحد افغانستان ويرجعوا وده كسر الرقم القياسي لاطول عدد ساعات طيران في غاره جويه في التاريخ .. الطيارات دي استخدمت في حرب العراق و كمان كانت هي اللي بتتولي ضرب الاهداف الليبيه وقت الثوره اللي قامت ضد (معمر القذافي) الله يرحمه .. يمكن عشان كده قمره القياده بتاعه الطياره فيه وراها اوضه محطوط فيها سرير و مطبخ و حمام.
امكانيات الطياره بين الحقيقه و الهبد:
حاول متنساش ان اهم امكانيه تحت ايد الطياره دي هي قدرتها علي الاختفاء من الرادار و خليني افهمك النقطه دي براحه .. كلمه رادار Radar دي اختصار Radio Detection and Ranging وعشان تفهم يعني ايه رادار تخيل معايا الاتي .. تخيل معايا ان انا و انت قاعدين مع بعض في اوضه بس انا لابس طاقيه الاخفاء .. متضحكش و حتفهم قصدي كمان شويه .. انت مطلوب منك تعرف انا فين بس انت مش شايفني .. تفكيرك حيهديك ان ليه لا اجيب جردل مياه و اقوم راميه في الاوضه في الهواء .. لما المياه تخبط فيا فهي حترتد عني و حيبقي باين اوي قدامك ان المياه خبطت في حد و ارتدت .. هي دي فكره الرادار .. الرادار ما هو الا Energy Pulse بتترمي في الهواء و حضرتك قاعد قدام شاشه الكومبيوتر عشان تشوف هل هي خبطت في جسم طاير في الجو او لا .. مجرد ان الEnergy Pulse دي تخبط في طياره و ترجع تاني فحضرتك كضابط دفاع جوي مطلوب منك تعرف شده الموجه اللي ارتدت و زاويه ارتدادها و بالمعلومتين دول تقدر تحدد حجم و موقع الهدف بتاعك .. لكن .. الطياره B-2 Spirit مفيهاش شاسيه .. الطياره مفيهاش ديل .. الشكل الخارجي للطياره اتصمم بحيث انه ميعكسش موجات الرادار بحيث لو انت ضابط دفاع جوي بتتفرج علي شاشه الرادار بتاعك انت حتشوفها كانها طير طاير في الجو .. زود علي كده الطلاء اللي بيمتص اشعه الرادار اللي جسم الطياره الخارجي مدهون بيه .. زود عليهم فكره ان محركي الطياره محطوطين جوه جسمها وده معناه ان الطياره دي ملهاش بصمه حراريه Hear Signature .. يا مؤمن دول حتي فتحات العادم بتوعها معمولين من نفس الماده اللي اتعمل منها السطح الخارجي لمكوك الفضاء .. الخلاصه دي ان دي طياره الامريكان صارفين عليها و مكلفين.
بس خلي بالك امكانيات الطياره الشبح مينفعش تتقال لوحدها كده .. انت كده بتبقي عامل زي اللي ماسك في الايه اللي بتقول ولا تقربوا الصلاه بس انت لازم تكملها للاخر عشان تعرف ان ربنا بيقول ولا تقربوا الصلاه وانتم سكاري .. صحيح الطياره امكانياتها فشيخه بس كمان مصاريفها فشيخه وانا هنا مش بتكلم عن ثمن الطياره .. انا بتكلم عن تكاليف الصيانه .. كل طياره لازم تتحط في هانجر مخصوص مكيف بالكامل عشان يحافظوا علي الطلاء الخارجي تكلفته بتعدي 5 مليون دولار .. كل سبع سنين الطياره الواحده بيتعملها عمره كامله بتكلفه 60 مليون دولار و العمره دي بتبقي للسطح الخارجي بتاعها بس عشان ينضفوا الطبقه الخارجيه اللي بتمتص اشعه الرادار و يكشفوا عن هل حصل فيها اي شروخ .. صيانه الطياره نفسها انت لو فكرت شويه في تكاليفها حتحس بكرشه نفس .. كل ساعه طيران بيتدفع قصادها 163,000 دولار صيانه ده غير مرتبات 60 فني ومهندس للطياره الواحده .. ده معناه انك سنويا بتدفع 40 مليون دولار صيانه بس للطياره الواحده .. طب خد التقيله بقي .. بحسبه الصيانات و قطع الغيار فالطياره الواحده واقفه ع الامريكان بحوالي 2 مليار دولار.
الطياره الشبح زي ما انت شايف هي طياره غريبه في شكلها و حكايتها .. حتي اسمها .. انت تعرف ان ال21 طياره اللي في الخدمه متسميين علي اسم ولايات اميركا .. هم فعليا 20 طياره دلوقتي لان فيه طياره انفجرت سنه 2008 في حادثه في قاعده جوام الجويه بس الطيار قدر انه يطلع من الطياره بالمقعد القاذف .. يعني اول طياره تخش الخدمه اتسمت روح ميزوري Spirit of Missouri .. يمكن الاستثناء الوحيد ان فيه طياره منهم اسمها روح كيتي هوك Spirit of Kitty Hawk ودي مدينه في ولايه نورث كارولاينا .. الامريكان بيخططوا ان علي سنه 2036 الطيارات دي حتطلع بره الخدمه عشان يحل محلها الجيل الجديد B-21 Raider .. بس يمكن السؤال المهم بالنسبه لي بغض النظر عن الاسئله زي يا تري ايه فرق الامكانيات بين الطيارتين هو هل يا تري الامريكان حيستحملوا يخشوا نفس الخناقه بتاعه التكاليف اللي هم عاشوها في الطياره B-2 Spirit؟ .. فكك من الكلام اللي حتسمعه بان الطياره الجديد B-21 Raider دي ارخص او انها معموله بتكنولوجيا Cost-Effective .. كل الكلام ده بلح .. ساعه الجد الميزانيات بتضرب في السما وفيه ناس بيجيلها امساك لما بتسمع الفلوس اللي اتصرفت وبتقول لنفسها احيه هو انا حدفع كل كده؟
المصادر:
مقاله بعنوان Meet the B-2 Spirit stealth bomber: The most expensive aircraft ever built نشرت في مجله The National Interest وده لينك المقاله الاصليه:
https://nationalinterest.org/blog/reboot/meet-b-2-spirit-stealth-bomber-most-expensive-aircraft-ever-built-163408
مقاله بعنوان B-2 Spirit: The $2 billion flying wing نشرت في موقع قناه CNN وده لينك المقاله الاصليه:
https://edition.cnn.com/style/article/b-2-spirit-stealth-bomber/index.html
لينك التسجيل الصوتي للمقاله علي Sound Cloud:
https://soundcloud.com/user-112011687-312727988/17mvblvl4vpf
