لما إتقال الخبر إن الممثلة (جال جادوت Gal Gadot) اللي إنت عارفها من تجسيدها لشخصية Wonder Woman حتقدم دور الملكة (كليوباترا السابعة) في فيلم جديد ناس كتير إتعصبت و إستنكرت و زعقت و شتمت و قالت إن ده مينفعش .. الغريبة إن الناس اللي رفضت الموضوع ده كانوا من جوه العالم العربي و براه بس اللي إنت محتاج تفهمه إن الأسباب ورا رفض العرب إن (جال جادوت) تقدم شخصية الملكة (كليوباترا) دي حمادة و الأسباب اللي مخليه الناس اللي بره ترفض الموضوع ده حمادة تاني خالص .. أنا أقدر أفهم إنك رافض فكرة إن ملكة مصر و أخر حكام الفراعنة تجسدها ممثلة إسرائيلية بس صدقني لو قلتلك إن بره الناس مش بتتكلم عن الموضوع ده أصلاً .. بره الناس بتهري في حكاية تانية خالص .. حكاية الغرب بيسميها Whitewashing أو وايت-ووشينج اللي إنت تقدر تقول عليها هو معلش يعني إيه اللي يخلي ممثل نيوزلندي أبيض و عينه زرقا زي (جول إيدجرتون Joel Edgerton) يجسد شخصية فرعون مصر (رمسيس الثاني) في فيلم Exodus: Gods and Kings؟ .. بمعني أخر .. إيه اللي لم الشامي علي المغربي؟
علي إيدك اليمين الناس اللي حتعمل الفيلم .. الفيلم حتخرجه واحدة ست اللي هي (باتي جينكينز Patty Jenkins) اللي أخرجت الجزئين الأولانين من سلسلة Wonder Woman .. الفيلم حتكتبه واحدة ست اللي هي (لايتا كالوجريديس Laeta Kalogridis) .. الممثلة اللي حتعمل الدور إسرائيلية و بما إن إسرائيل دولة شرق أوسطية يبقي إحنا عدانا العيب .. معلش يعني الممثلات اللي إتقال إن الدور إتعرض عليهم كانوا (أنجلينا جولي Angelina Julie) و دي حاجة إلي حد ما مفهومة يعني و كمان (لايدي جاجا Lady Gaga) .. هو صحيح فيلم A Star is Born كان حلو و كل حاجة بس معلش يعني هو أنتوا ناويين تعملوا فيلم عن (كليوباترا) تطلع تغني فيه عشان تختاروا (لايدي جاجا) تعمل الدور؟ .. طب بلاش دي .. هو أنتوا مش عجبكوا فيلم Aladdin اللي نزل من فترة ده؟ .. مش الممثلة اللي عملت دور الأميرة (ياسمين) عجبتكوا؟ .. طب ما إحنا جبنا ممثلة إسمها (نايومي سكوت Naomi Scott) أبوها إنجليزي و أمها هندية عشان تعمل دور أميرة عراقية و كانت زي الفل.
علي إيدك الشمال الناس اللي بتسأل معلش يعني هم ممثلات شمال أفريقيا معيوبين؟ .. لو حنتكلم تاريخ فصحيح جد أبو (كليوباترا) اللي هو الملك (بطليموس الثاني عشر) أصله مقدوني اللي هو يوناني يعني لإن جدها الكبير يبقي (بطليموس الأول) بس كتير من المؤرخين بيقولوا إن أغلب الظن يعني أمها مصرية .. ده معناه إن الست دي لو رجعنا بالزمن يعني عشان نشوف وشها فأكيد هي لا شبه (أنجلينا جولي) ولا شبه (لايدي جاجا) .. هل إنت عمرك مشيت في الشارع في مصر و لقيت بنت شبه الست (أنجلينا جولي)؟ .. إحنا حنستهبل؟ .. أنتوا ولا مرة عملتوا فيلم أحداثه بتدور في شمال أفريقيا و جبتوا ممثلين عرب .. من أول فيلم The Ten Commandments لحد The English Patient و سلسلة The Mummy .. يا مؤمن ده فيلم Death on the Nile اللي إسمه فيه نهر النيل و متصور في مركب في النيل مفيهوش ولا ممثلة أو ممثل مصري .. التجربة الوحيدة لتجسيد شخصية (كليوباترا) بحق ربنا يعني كانت في العرض الجديد لمسرحية Anthony and Cleopatra إتعرضت علي المسرح الوطني الإنجليزي و اللي جسدت شخصية (كليوباترا) كانت ممثلة سمرا إسمها (صوفي أوكونيدو Sophie Okenedo) .. شفت بقي إننا كنا متعصبين علي حاجة و الغرب بيهاتي في حاجة تانية خالص؟
المصدر:
مقالة بعنوان Gal Gadot as Cleopatra is a backwards step for Hollywood representation نشرت في جريدة The Guardian البريطانية و ده لينك المقالة الأصلية:
https://www.theguardian.com/film/2020/oct/14/gal-gadot-cleopatra-backwards-step-for-hollywood-representation
