الجيوش زيها زي الشركات بتتحط قدامها مشكلة و بيبدأوا يدوروا ليها علي حل .. خد مثلاً القوات البحرية الإسرائيلية .. قائد القوات البحرية الإسرائيلية الجنرال (إيلاي شارفيت Eli Sharvit) إتقاله بص يا برنس إحنا بلد حطينا إيدنا علي كذا حقل غاز في البحر المتوسط من ضمنهم حقول غاز كبيرة زي ليفاياثان Leviathan و تامار Tamar و أفرودايتي Aphrodite .. لو جيت تشوف مساحة الحقول دي حتلاقيها حوالي ضعف مساحة إسرائيل و مطلوب منك يا برنس تلاقي صرفة إن القوات اللي تحت إيدك تحمي المساحة الفشيخة دي كلها .. جه الجنرال لم رجالته و عملوا إجتماع و سألوا نفسهم سؤال مهم .. إيه اللي ممكن يحصل يعني؟ .. بمعني أخر هي القوات البحرية الإسرائيلية محتاجة تحمي حقول الغاز الطبيعي دي من إيه؟
الإجابة كانت حاجات كتير الحقيقة .. خد عندك حزب الله مثلاً .. سنة 2006 هم ضربوا سفينة حربية إسرائيلية INS Hanit قصاد سواحل لبنان بصاروخ مضاد للسفن .. سنة 2015 لانش صواريخ مصري إتضرب بصاروخ مضاد للسفن من سيناء لو تفتكر .. الحوثيين ضربوا سفن سعودية و إماراتية قصاد سواحل اليمن بصواريخ مضادة للسفن .. في حرب الإستنزاف مصر غرقت المدمرة إيلات بصاروخ مضاد للسفن إتضرب من لانش .. لما المخابرات الإسرائيلية إتسألت هو حزب الله تحت إيده صواريخ قد إيه كانت الإجابة حوالي 150,000 و الرقم ده مش غلطة مطبعية .. السؤال دلوقتي لو إنت مكان الإسرائيليين تعمل إيه؟ .. إزاي تحمي نفسك من خطر زي ده؟
الإجابة كانت في السفينة اللي قدامك .. زي ما العربيات عبارة عن فئات يعني فيه العربيات السيدان و فيه العربيات الهاتش باك و العربيات الكوبية و الكابورليه فبرده السفن الحربية بتتقسم فئات .. طبعاً فيه حاملة الطائرات .. تحت منها فيه حاجة إسمها مدمرة Destroyer .. تحت منها فيه الفرقاطة أو Frigate .. تحت منها فيه الفرقيطة و دي تصغير فرقاطة و معروفة إكتر بإسمها الإنجليزي كورفيت Corvette .. لو حنستخدم تشبية العربيات فالكورفيت دي عاملة زي إنك تجيب عربية KIA Picanto .. هي عربية محندقة و صغيرة و بتؤدي الغرض .. صحيح هي غالية أوفر بالنسبة لإمكانياتها بس إنت مضطر تشتريها عشان معكش فلوس الفرقاطة اللي هي السكودا أوكتافيا و الفولكس فاجن باسات مثلاً في العربيات .. السفينة اللي قدامك دي من طراز كورفيت إسمها ساعر ستة Sa’ar 6 الواحدة فيهم وزنها 2,000 طن و إتصنعوا في ألمانيا علي إيد شركة ثيسين كروب ThyssenKrupp Marine Systems و إسرائيل طلبت تشتري أربعة منها .. أول واحدة فيهم حيبقي إسمها INS Magen و كلمة Magen دي كلمة عبري معناها الدرع .. السفينة دي طلعت من ترسانة شركة ThyssenKrupp في مدينة كيل Kiel الألمانية يوم 11 نوفمبر 2020 و بعد كده حتبحر لحد إسرائيل .. و هي هناك الضباط الإسرائيليين هم اللي حيركبوا الأنظمة بتاعتها.
الكورفيت دي إتصممت أولاً و أخيراً عشان تحمي نفسها من الصواريخ المضادة للسفن .. أغلب التكنولوجيا اللي السفينة دي بتستخدمها تصنيع محلي إسرائيلي علي فكرة .. نظام الرادار بتاعها إسمه أدير Adir و دي كلمة عبري معناها العظيم أو الجبار .. نظام الدفاع الجوي ضد الصواريخ المضادة للسفن عبارة عن 3 أنظمة حتشتغل مع بعض:
- نظام إسمه C-Gem و عملته شركة رفاييل Rafael Advanced Defense Systems و ده عبارة عن Active Decoy يعني إسطوانة بلاستيك بتعمل نفس وظيفة Flares اللي الطيارة بترميها لما بيجري وراها صاروخ .. البتاعة الإسطواني دي بتترمي في الجو فالصاروخ المضاد للسفن بيجري وراها بدل ما يروح علي السفينة نفسها.
- صواريخ مضادة للصوايخ إسمها باراك Barak و نوع تاني من الصواريخ المضادة للصواريخ تعتبر النسخة المعدلة من منظومة الدفاع الجوي القبة الحديدية Iron Dome و الإتنين من تصنيع شركة IAI الإسرائيلية .. الصاروخين حيتركب عليهم أنظمة توجيه عاملاهم شركة إسرائيلية برده إسمها البيت Elbit Systems.
المصدر:
مقالة بعنوان The Israeli Navy’s new Sa’ar 6 warships are a gamechanger نشرت في مجلة The National Interest و ده لينك المقالة الأصلية:
https://nationalinterest.org/blog/buzz/israeli-navy%E2%80%99s-new-sa%E2%80%99ar-6-warships-are-gamechanger-172211
