مانشستر يونايتد .. كان يوم اسود يوم ما مشيت يا (رونالدو)

غالبا لو سالت اي حد من الناس اللي بتشجع مانشستر يونايتد امتي في رأيه كان اليوم الاسود اللي حال النادي فيه اتشقلب من نادي بينافس علي اللقب لنادي الله اعلم حيبقي ضمن الاربعه الكبار ولا لا حتكون اجابته في اليوم اللي ما طلعت له شمس لما السير (اليكس فيرجسون Alex Ferguson) قرر انه يعتزل و يسيب النادي .. هو فعليا مسابش النادي .. هو بيحضر الماتشات اللي الفرقه بتلعبها علي استاد اولد ترافورد في المدرج اللي متسمي علي اسمه و بيتحرق دمه زيه زي اي مشجع عادي خالص بس يبقي السؤال هل ده حقيقي؟ .. هل نهايه موسم 2012-2013 اللي مانشستر يونايتد خدوا فيه اخر دوري ليهم هو بدايه الفتره السودا اللي النادي عايش فيها دلوقتي؟ في رايي انا لا .. بدايه النهايه كانت لما النادي وافق ان (كريستيانو رونالدو Cristiano Ronaldo) يتباع لريال مدريد في موسم 2009-2010 و المبلغ اللي اتدفع فيه وقتها كان رقم خزعبلي .. انت بتتكلم هم 80 مليون جنيه استرليني.. قبل ما تتنرفز و تزعق و تقولي انت ايه ياض الكلام الماسخ اللي انت بتقوله ده عايزك تهدي كده و تسمعني للاخر.

مبدأيا انا مش جاي اثبت ان (رونالدو Ronaldo) من افشخ اللاعيبه اللي جت في تاريخ مانشستر يونايتد .. هو اساسا مفيش غيره و 3 لاعيبه تانيين خدوا جايزه البالون دو اور Ballon d’Or وهم في مانشستر يونايتد و مجرد اني افتح السيره دي فانا كده بهينه مش بمجد فيه .. بس ليه انا بقول ان قرار مانشستر يونايتد انه يبيع (رونالدو Ronaldo) لريال مدريد هو بدايه النهايه؟ عشان عايزك تبص للظروف اللي هو ساب النادي فيها و بص للظروف اللي هو جه النادي فيها .. هو ساب مانشستر يونايتد وهم ابطال انجلترا .. ساب مانشستر يونايتد وهم وصلوا لنهائيين Champions League ورا بعض .. هو ساب فرقه فشيخه في اقوي فتره ليها .. مش كده وبس .. لما تيجي تبص لازاي (رونالدو Ronaldo) جه مانشستر يونايتد فهو جه سنه 2003 بعد ما النادي دخل في خناقه مع ارسنال علي مين يشتريه من سبورتينج لشبونه البرتغالي و مانشستر يونايتد مكنش عنده اي مشكله يدفع 12 مليون جنيه استرليني ع الطرابيزه في لاعيب لسه مراهق .. ليه؟ .. عشان فلسفه مانشستر يونايتد ايام (فيرجسون Ferguson) هي ان احنا معندناش اي مشكله نكع دم قلبنا عشان نشتري لاعيبه صغيره في السن بس لما تكبر و عظمها ينشف حتشيل النادي لسنين قدام .. هم عملوا كده مع (واين روني Wayne Rooney) لما دفعوا فيه 25.6 مليون جنيه استرليني عشان يشتروه من ايفرتون وهو لسه ورور عنده 18 سنه .. في موسم 2007-2008 دفعوا 50 مليون جنيه استرليني عشان يشتروا (ناني Nani) و (انديرسون Anderson) و وقتها الاتنين سنهم مكنش عدي 20 سنه .. يا راجل ده اكبر لاعيب سنا اشتروه كان (ديميتار برباتوف Dimitar Berbatov) و كان عنده 26 سنه و دفعوا فيه 34 مليون جنيه استرليني وده كان رقم فشيخ ايام موسم 2008-2009 .. بس مش مهم .. نصرف علي لاعيبه صغيره بس حتشيلنا لقدام .. بس كل ده انتهي ببيع (رونالدو Ronaldo).

من الشمال لليمين .. (ناني) و (كريستيانو رونالدو) و (انديرسون) و (رافاييل دا سيلفا) لاعيبه مانشستر يونايتد بيحتفلوا بفوزهم بلقب الدوري الانجليزي بعد فوزهم علي ارسنال في الماتش اللي اتلعب يوم 16 مايو 2009

لما (رونالدو Ronaldo) مشي النادي جاب مكانه (مايكل اوين Michael Owen) اللي كان تقريبا بيشطب كوره و جاب جناح نادي ويجان (انتونيو فالنسيا Antonio Valencia) .. يمكن الاسثتناء كان انهم جابوا (ديفيد دي خيا David de Gea) في موسم 2011-2012 و دفعوا فيه 22.5 مليون جنيه استرليني وده كان رقم غريب يتدفع في حارس مرمي وقتها .. الموسم اللي وراه السير (فيرجسون Ferguson) جاب (روبين فان بيرسي Robin van Persie) من ارسنال في صفقه فعلا يتقال عليها ضربه معلم جابتله الدوري بس كان حل مؤقت ومش هو اللاعيب اللي ينفع يتقال عليه انه حيقوم الفرقه كلها علي كتافه .. اللي انا عايز اقوله ان عشان مانشستر يونايتد يرجع فالقضيه مش مين اللي حيدرب الفرقه .. القضيه ان لازم سياسه شراء اللاعيبه ترجع تاني لنفس الفلسفه اللي السير (فيرجسون Ferguson) حطها و مشيت معاه زي السكينه في الجاتوه .. اصرف علي لاعيبه صغيره في السن ليها مستقبل و اللاعيبه دي هي اللي حتشيلك قدام و اياك تكرر نفس غلطتك لما سبت (رونالدو Ronaldo) يمشي في 2009.