لينك التسجيل الصوتي للمقالة علي ساوند كلاود:
https://on.soundcloud.com/211oH
في حالة إنك مش دريان باللي بيحصل في الدنيا ففيه خناقة لرب السما بين أميركا و أستراليا من جهة ضد فرنسا من جهة تانية و سبب الخناقة دي عشان أبسطهولك خالص هو هو السبب اللي بيخليك لو إنت ساكن في عمارة فيها بقال فإنت لو إشتريت حاجة من عند سوبرماركت و إنت مروح بتحاول تداري الكيسة اللي فيها الحاجة اللي إنت أشتريتها .. مفيش سبب منطقي يخليك تعمل ده علي فكرة غير إنك مش عايز تجرح مشاعر البقال اللي تحت بيتكوا .. محدش قال إن البضاعة اللي هو بيبيعها مش موجودة في السوق و محدش قال إن البقال علي قد حاله لدرجة إنه مش بيبيع غير جبنة مثلثات طعمة ميلك بس إنت مش بتاكل غير جبنة لافاش كيري .. هي مجرد رغبة إنسانية منك إنك متجرحش مشاعره و إنك متعملش مشاكل .. شفت سهلة أهي.
يهمني النهاردة انك تطلع علي الأقل فاهم هي المشكلة فين؟ و إيه سبب الخناقة؟
اللي حصل إن سنة 2016 إتمضي إتفاق بين فرنسا و أستراليا عشان أستراليا تشتري من فرنسا 12 غواصة بتشتغل بمواتير ديزل بقيمة 65 مليار دولار بس أنا عايزك تحاول تستوعب يعني إيه بلد تشتري من بلد تانية 12 غواصة .. حاول تفكر فيها علي إن مراتك بتحب الطبيخ و نفسها يبقي عندها البيزنس بتاعها اللي هو تعمل أكل بيتي و تبيعه و هوبا في يوم يجيلها أوردر من 12 زبون عشان تعمل أكل يكفي 12 عزومة .. صحيح مراتك و إنت شخصياً حتتفشخوا شغل عشان الأكل يتعمل بس في نفس الوقت البقال اللي جنبكوا حيسترزق .. الجزار اللي جنبكوا حيسترزق .. الخضري اللي جنبكوا حيسترزق .. نفس الكلام علي طلبية توريد 12 غواصة .. الكلام في فرنسا علي إن دي أكبر صفقة سلاح تعملها فرنسا من بعد صفقة بيع 36 طيارة Rafale من تصنيع شركة داسولت للطيران Dassault Aviation للهند سنة 2015.
تاني .. صفقة بيع 12 غواصة مش حتبقي حاجة سهلة .. دي صفقة حتخلي فرنسا و أستراليا بينهم بيزنس لمدة أكثر من 50 سنة لإن ده حيشمل توريد قطع غيار و صيانات و تدريب أطقم الغواصات الأستراليين .. طب أزيدك من الشعر بيت .. فيه مكونات جوه الغواصات دي كانت حتوردها شركة لوكهيد مارتن Lockheed Martin و لمن لا يعلم يعني دي شركة أمريكاني و تبقي هي اللي بتصنع طيارات F-35 Lightening II فحتي الشركات الأمريكاني حينولها من الحب جانب في الصفقة الفشيخة دي لحد ما جت الصدمة .. يوم 15 سبتمبر 2021 طلع الرئيس الأمريكاني (جو بايدن Joe Biden) في مؤتمر صحفي مع رئيس وزراء بريطانيا (بوريس جونسون Boris Johnson) و رئيس وزراء أستراليا (سكوت موريسون Scott Morrison) قال إن أميركا حتدي لأستراليا سر الخلطة بتاع إزاي تعمل غواصات نووية .. ده معناه إن أستراليا حترمي صفقة الغواصات الفرنساوي دي في الزبالة لإن ليه أشتري غواصات ديزل لما ممكن أميركا تديني غواصات نووية؟
هو ليه الفرنساويين زعلانين أوي كده يعني؟
جزء من غضب الفرنساويين من الإعلان ده سببه إن السبوبة حتروح و ده شيء منطقي بس جزء تاني جاي من فكرة إن إنتي يا أستراليا ماضية عقد نهائي معايا بقالك أكتر من 18 شهر بس أكيد يعني الأمريكان مقرروش من يوم و ليلة إنهم يدوكي سر الخلطة بتاعة تصنيع الغواصات النووية فأنتوا أكيد بقالكوا شهور بتتفاوضوا علي تفاصيل الإعلان ده .. ليه محدش قالي؟ .. ليه أعرف من الأخبار؟ .. اللي خلي فعلاً الفرنساويين يطلعوا دخان من ودانهم هو اللي حصل لما صحفي سأل (جين ساكي Jen Psaki) و دي تبقي المتحدثة الرسمية بإسم البيت الأبيض هو ليه محدش قال للفرنساويين من بدري فهي ردت و قالت لا بقي هم كانوا عارفين بقالهم فترة عشان يطلع وزير الخارجية الأمريكاني (أنتوني بلينكين Anthony Blinken) يطلع يقول لا هي بس (جين) غلطانة الفرنساويين عرفوا قبل الإعلان الرسمي للإتفاق مع أستراليا ب24 ساعة.
بس ده الكلام اللي إنت حتلاقيه في الجرايد و في بوستات السوشيال ميديا لإن ده اللي علي الوش .. ده الكلام اللي المنطق بسهولة يفهمه و هو إن الفرنساويين زعلانين علي السبوبة اللي راحت و حاسين إنه إتضحك عليهم و دي فعلاً حاجات تزعل و تعصب بس تحت كل ده فيه حاجة تانية .. فيه الكلام اللي صعب يتقال و ده اللي إنت محتاج تفهمه و عشان خاطري حاول تبص للأزمة من وجهة نظر الفرنساويين .. حاول تغمض عنيك و تتخيل نفسك شاب فرنساوي سيس إسمه (جون كلود) بتفطر كل يوم كرواسون و قهوة حليب و تبص للوضع زي ما هو شايفه .. دلوقتي إنتي فرنسا اللي كانت زمان قوة إستعمارية ولازالت واحدة من الدول الكبيرة في العالم .. إنتي بتبص علي العالم دلوقتي و شايفة بعنيكي إن زمان الخناقة اللي كانت أميركا داخلاها بقلبها هي الحرب علي الإرهاب و إنتي الحق يتقال عملتي كذا دور جدعنة معاهم و وقفتي في ظهرهم .. ليكي قوات في مالي .. إديتيهم قاعدتك البحرية اللي في جيبوتي .. سندتيهم في الصومال .. بس دلوقتي الوضع إختلف .. دلوقتي الحرب علي الإرهاب مبقتش سيكسي زي زمان .. دلوقتي الأمريكان بيشمشموا علي خطر جديد يعيشوا علي حسه و يصرفوا فلوسهم علي التسليح ضده و الخطر ده هو الصين و الحقيقة إنك لو كان يا فرنسا ليكي دور زمان في الحرب علي الإرهاب فإنتي حتبقي أهم لاعيب في التشكيلة اللي حتلعب ضد الصين.
اللي واقف تاني واحد علي الشمال يبقي الرئيس الفرنساوي (إيمانويل ماكرون Emmanuel Macron) و اللي واقف في النص لابس كرافت برتقالي يبقي رئيس الوزراء الأسترالي (سكوت موريسون Scott Morrison) و الصورة دي متاخدة علي سطح الغواصة إتش إم إيه إس والر HMAS Waller و دي تبقي غواصة من طراز كولينز Collins-Class تابعة للبحرية الأسترالية في جزيرة جاردن في مدينة سيدني الأسترالية في مايو 2018.
الخناقة ضد الصين حتبقي في الحتة من العالم اللي بتتسمي Indo-Pacific يعني الحتة من المحيطين الهندي و الهاديء اللي قصاد السواحل الصينية .. في الحتة دي من العالم فرنسا ليها شوية جزر و 4 قواعد بحرية .. فرنسا ليها ما بين 5,000-7,000 عسكري و ما بين 20-40 طيارة و 7 قطع بحرية .. الفرنساويين بيقولوا لنفسهم لو الفاس وقعت في الراس و الدنيا ولعت فإحنا حيبقي لينا دور و دور كبير كمان لدرجة إن سنة 2018 وزارة الدفاع الفرنسية طلعت تقرير بيشرح إستراتيجية المواجهة المحتملة ضد الصين و من وقتها و الفرنساويين حيبوسوا إيد الإتحاد الأوروبي عشان هم كمان يرسموا إستراتيجية واضحة تقول هم حيتنيلوا علي عينهم يعملوا إيه لو الحرب الأميريكية الصينية ولعت .. بس فضل الأوروبيين زيهم زي أي رجل مصري أصيل مراته تقوله لمبة المطبخ عايزه تتغير و هو مكبر دماغه لحد ما في يوم 15 سبتمبر اللي هو نفس يوم إعلان الأمريكان إنهم حيدوا الأستراليين غواصات نووية الفرنساويين إتصدموا لما لقوا الإتحاد الأوروبي بيقدم للعالم إستراتيجيته لمواجهة الصين اللي هم سموها AUKUS و طبعاً الفرنساويين إتغاظوا و ده منطقي و مفهوم.
تاني عشان خاطري بص للموضوع من وجهة النظر الفرنساويين .. أنتوا من 2018 و أنتوا بترسموا خطة كبيرة طويلة عريضة عشان تثبتوا للأمريكان إن وقت الجد إحنا في ظهركوا و المشكلة إن أستراليا كانت جزء مهم من إسترتيجية الفرنساويين .. سيبك من صفقة الغواصات .. فرنسا مش بلد فقيرة عشان صفقة ب65 مليار دولار تزعلها .. المشكلة أكبر من كده .. المشكلة إنك لما تيجي تذاكر و تشوف هي الخطة الأمريكاني اللي أٌعلنت للتعاون مع أستراليا تكتشف إن الأمريكان مسابوش حاجة متعملتش .. غواصات نووية يدوها لإستراليا موجود .. تعاون مخابراتي عشان يعرفوا كل صغيرة و كبيرة عن تحركات و نشاط القوات البحرية الصينية موجود .. شبكة حماية ضد القرصنة الأليكترونية من الهاكرز الصينيين تلاقي .. تعاون فشيخ ضمن مشروع Five Eyes أو العيون الخمسة و ده عبارة عن برنامج تعاون بين المخابرات الأميريكية و الكندية و البريطانية و الأسترالية و النيوزلندية بحيث فعلياً الخمس أجهزة مخابرات بيحلقوا علي الصين زي ما إنت بتحلق علي البط كده .. كل ده موجود .. دي إتفاقية تعاون بقالها شهور و يمكن سنين بتتكتب .. كنا فين إحنا من كل ده؟
فعلياً فرنسا متضايقة إنها من يوم و ليلة كل التعب و الشغل و الساعات اللي هم قضوها عشان يفرشوا أرضية لدورهم في منطقة Indo-Pacific راح .. و مش بس فرنسا .. اللي عملته أميركا مع أستراليا خلي فعلياً إن أوروبا ملهاش مكان في الخناقة الجايه و بلاش تقولي بريطانيا جزء من أوروبا لإن بعد Brexit فعلياً كل واحد راح لحاله .. فالسؤال دلوقتي هو هل لأوروبا أي دور في المرحلة الجاية؟ .. خلاص كده راحت عليهم؟ .. ده يفسرلك إن بعد إعلان أميركا و أستراليا خبر إن الأولانية حتدي للتانية غواصات نووية طلع جرنان L’Opinion الفرنساوي في المانشيت الرئيسي بتاعها تطلع تسأل السؤال بتاع سنو وايت بس بتويست شوية لما قالت .. مرايتي يا مرايتي هو أنا لسه قوة عظمي في العالم؟
في رأيي الشخصي فرنسا بلد شايفه نفسها زيادة عن اللزوم .. دي بلد بتعتبر نفسها حامي حمي الليبرالية و قيم الحرية و المساواة يعني مثلاً هم مفهومهم عن الليبرالية إن الستات متلبسش حجاب و لازم تقلع مع إن ده مش اللي الليبرالية بتقوله أصلاً .. الليبرالية بتقول إن اللي عايز يتحجب يتحجب و اللي عايز يتنقب يتنقب و اللي عايز يربي دقنه يربيها و اللي عايزة تقلع الحجاب تقلعه .. الفرنساويين مقتنعين بحاجة معينة و شايفينها هي بس اللي صح و عايزين يقنعوا بيها باقي خلق ربنا و من علامات ده إن الفرنساويين نفسهم مش مقتنعين إنهم لا قوة عظمي ولا نيلة .. زي أي بلد في الدنيا جواها تيارات سياسية مختلفة فتلاقي اليمينيين المتطرفين جوه فرنسا مقتنعين زي ما يكونوا عايشين أيام (نابليون بونابرت) إن كلمة فرنسا تمشي علي أطخن طخين و إنت عايز تقولهم يا عم إتنيل ده لولا المهاجرين العرب و الأفارقة مكنش حد سمع سيرتكوا في أي إنجاز.
حتي أفريقيا اللي كان زمان الفرنساويين بيقولوا عليها دي بتاعتي دلوقتي مش لوحدهم اللي بيلعبوا في مصير الأفارقة .. فيه الصينيين و فيه الروس و فيه الأتراك ده غير الأمريكان .. الفرنساويين لسه لحد دلوقتي مش شايفين إنها راحت عليهم .. كلنا شفنا لما (ماكرون) زار لبنان بعد إنفجار مرفأ بيروت و أنا شخصياً كتبت إن اللبنانيين بعد الزيارة دي بقوا بيطلبوا إن ترجع لبنان تحت حكم فرنسا تاني و في الزياردة دي (ماكرون) طلع وعد إن حتتشكل لجنة وفاق وطني برعايته هو شخصياً .. جري الشريط كام شهر و (ماكرون) زار لبنان تاني و رجع بلده و هو بيسب و يلعن و بيتهم السياسيين اللبنانيين إنهم شوية خونة .. بمجرد ما فرنسا تقتنع إنها راحت عليها حتلاقي نفسها جالها مناعة من حرقة الدم اللي هي عايشة فيها دلوقتي.
المصادر:
- مقالة بعنوان Why the French are so furious at the Biden Administration over a derailed submarine deal نشرت في جريدة The Washington Post الأميريكية وده لينك المقالة الأصلية:
https://www.washingtonpost.com/world/2021/09/17/france-submarine-australia-anger/ - مقالة بعنوان No wonder the French are angry نشرت في جريدة The New York Times وده لينك المقالة الأصلية:
https://www.nytimes.com/2021/09/22/opinion/france-us-china-submarines.html - مقالة بعنوان An Uncomfortable Question in France: Are We Still a Great Power نشرت ف يجريدة The New York Times و ده لينك المقالة الأصلية:
https://www.nytimes.com/2021/09/23/world/europe/france-submarine-deal-australia.html?
تفتكر ان فرنسا ممكن تخرج من الاتحاد الأوروبي و تعمل زي بريطانيا و يكون ده مسمار من المسامير اللي اتدقت في نعش الاتحاد الاوروبي في خلال الكام سنة اللي فاتت انا شايف انه قرار محتمل و وارد رغم صعوبته بس مش مستبعد