أشرف مروان .. و حكايتك إيه ياللي!

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/7cb8n62weo76

(أشرف مروان) من المواضيع اللي لو إنت عايز ترمي كلمة بين ناس عشان يمسكوا في خناق بعض بسببها  فده موضوع مناسب جداً .. تقريباً هو و الكورة في مصر يعتبروا من أكتر المواضيع اللي الناس بتتخانق عليها بس الإيجيبشن بريميير لييج مش هو موضوعنا النهاردة .. اللي أنا عايز أتكلم عنه هو (أشرف مروان) .. في حالة إنك متعرفش مين ده و الاسم ده معداش عليك قبل كده و في الحالة دي أنا نفسي أفهم إنت كنت عايش فين طول السنين اللي فاتت بس مش مهم .. إنت متعرفش مين هو (أشرف مروان) و أنا النهاردة حعرفك  .. خليني أحاول من دلوقتي أقولك هو الهدف من المقالة دي إيه .. النهاردة أنا عايز أجاوب علي كذا سؤال:

• يطلع مين الأخ ده؟
• إيه اللي حصل قبل حرب أكتوبر عشان دي نقطة عليها خناقة كبيرة؟
• ليه أصلاً (أشرف مروان) خان بلده؟
• هل (أشرف) كان جاسوس إسرائيلي ولا عميل مزدوج؟

خلينا نبدا بالسؤال الأول .. يطلع مين الأخ ده؟ .. بعد حرب أكتوبر و بعد ما الإسرائيليين خدوا علي قفاهم إتشكلت لجنة برئاسة رئيس المحكمة الدستورية العليا في إسرائيل (شيمون أرجانات Shimon Arganat) عشان يعرفوا هو إيه اللي حصل؟ .. التقرير بتاع اللجنة دي طلع قال إن اللي المفروض يشيل الليلة هو (إيلي زايرا Eli Zeira) .. مين الباشمهندس؟ .. ده يبقي وقت حرب أكتوبر كان مدير المخابرات الحربية الإسرائيلية اللي هم بيسموها (أمان) و السبب في إن تقرير اللجنة قال إنه هو اللي حيحشيل الليلة إن قبل الحرب بيوم إتعمل اجتماع لمجلس الأمن القومي الإسرائيلي بطلب من مدير المخابرات العامة الإسرائيلية اللي إنت تعرفها باسم الموساد Mossad و اللي وقتها كان اسمه (زفي زامير Zvi Zamir) و اللي في الإجتماع ده قال إن الحرب حتقوم بكره المغرب .. لما إتسأل في الإجتماع إنت جبت الكلام ده منين؟ قالهم من جاسوس موثوق منه جوه مؤسسة الرئاسة المصرية هو اللي بلغهم بالمعلومة دي .. في نفس الإجتماع ده (إيلي زايرا) حلف بالتوراة إن الكلام ده كدب و إن زي ما الموساد ليها جواسيس بتقول إن الحرب بكره فأمان برده ليها جواسيس بتقول إن الكلام ده هجص.

(إيلي زايرا) فضل يزن علي دماغ رئيسة الوزراء (جولدا مائيرGolda Meir) و وزير الدفاع (موشيه دايان) إنهم ميصدقوش كلام الموساد و ميصدقوش كلام (زفي زامير) و يصدقوه هو و ده اللي حصل فعلاً و بسببه إسرائيل لبست في الحيط .. التقرير ده لما إتنشر (إيلي زايرا) أُجبر علي الإستقالة و فضل لسنين يحاول يلمع سمعته اللي إتوسخت بالطين .. لسنين و (إيلي زايرا) بيدافع عن نظرية إن الجاسوس اللي (زفي زامير) فضل يستشهد به هو في الحقيقة عميل مزودج و إن المخابرات المصرية هي اللي زرعته في الموساد عشان يبلغهم معاد الحرب بس متأخر .. فضلت نظرية (إيلي زايرا) قايمة علي إن ليه الجاسوس ده قالهم الحرب حتقوم يوم 6 أكتوبر المغرب و الحرب قامت الساعة 2 الظهر؟ … (إيلي زايرا) فضل يمارس هوايته المفضلة في الزن و صحابه و اللي واقفين في صفه فضلوا يتكلموا عن نظرية إن الجاسوس اللي (زفي زامير) كان فرحان به هو أساساً كانت عميل مزدوج لحد ما في ديسمبر 2002 صحفي من جريدة الأهرام المصرية وصل لواحد من صحاب (إيلي زايرا) اللي هو (أهارون بريجمان Aharon Bregman) أستاذ التاريخ الإسرائيلي في كلية الملك في بريطانيا و اللي قاله إن (إيلي زايرا) عارف مين هو العميل المزدوج ده و إن اسمه هو (أشرف مروان) .. طبعاً جريدة الأهرام نشرت السبق الصحفي و ده أجبر مؤسسة الموساد إنها تطلع تقول أيوه (أشرف مروان) هو الجاسوس اللي (زفي زامير) كان بيتكلم عنه.

يوم 27 يونيو 2007 شرطة لندن جالها خبر إن واحد اسمه (أشرف مروان) إترمي من شباك بلكونته في الدور الخامس .. وقتها إتشكلت لجنة تحقيق من الموساد و من MI5 ودي تبقي المخابرات البريطانية الخاصة بالأمن الداخلي و التقرير اللي طلع قال إن والله مفيش أي دليل علي إنه إتقتل بس لو تسألنا أنتوا رأيكوا إيه حنقولك إن المخابرات المصرية هي اللي قتلته  .. كده إنت المفروض بقي عندك فكرة مين هو (أشرف مروان) .. دلوقتي تعالي نخش في الغويط شوية و نسأل هو هل هو جاسوس إسرائيلي فعلاً ولا عميل مزدوج لينا؟

يحكي أن في ديسمبر 1970 إدارة الموساد قررت تعين واحد اسمه (شمول جورين Shmuel Goren) في منصب مدير مكتب الموساد في أوروبا و مقره كان في العاصمة البلجيكية بروكسل .. من اسم المنصب باين إن الرجل ده دوره كان إنه يشرف علي شغل مكاتب الموساد المختلفة في أوروبا كلها .. من ضمن رحلاته أول ما استلم منصبه إنه راح زار مكتب الموساد في العاصمة البريطانية لندن و هو هناك قابل الملحق العسكري الإسرائيلي في السفارة و اللي كان الجنرال (شمول أيال Schmuel Eyal) و هم قاعدين بيتعشوا سوا مرة الجنرال قال ل(جورين) إن فيه شاب كل شوية يتصل بمكتبه في السفارة و كمان بيتصل بيا في البيت و مراتي بقت متضايقة جداً و الشاب ده بيقول إن اسمه (أشرف مروان) .. (جورين) سأله طب إنت ليه مبلغتش الموساد زي ما كان المفروض تعمل؟ .. كان رد الجنرال إنه أولاً ميعرفش مين (أشرف مروان) ده و ثانياً ده مش أول شاب عربي يكلم مكتبي في السفارة.

(جورين) بدأ يبص مين (أشرف مروان) ده فلقي إنه فعلاً كلم السفارة الإسرائيلية في لندن كذا مرة و محدش رد عليه و بعتلهم كذا جواب و أخر جواب هو كان قايل فيه إنه حيسيب لندن تاني يوم اللي (جورين) إتكلم فيه مع الجنرال (أيال) .. (جورين) كان عارف إنه المفروض إنه يذاكر (أشرف) ده كويس .. كان عارف إن المفروض الموساد يعمله زي ما تقول كده فيش و تشبيه .. يعرفوا مين ده؟ و عايز إيه؟ بس مكنش فيه وقت .. هي كانت Risk و (جورين) خدها .. (أشرف) كان مسافر بكره بره لندن و إحتمال ميسمعش منه خبر تاني .. و بعدين إيه أسوأ حاجة ممكن تحصل يعني؟ .. يطلع عيل فشنك ملوش لازمة و الموساد مش حيستفيد منه؟ .. و إيه يعني مش حيبقي أول ولا أخر واحد .. و بسبب السرعة اللي القرار طلع بيها (جورين) ملقاش حد يعينه ضابط حالة أو Case Officer ل(أشرف) غير ضابط لسه صغير يدوبك مبقالوش إلا كام شهر في الموساد زي ما حنشوف كمان شوية .. بس مش ده اللي غريب .. اللي غريب فعلاً إن الجوابات اللي (أشرف) بعتها للسفارة الإسرائيلية في لندن كان سايب فيها رقم تليفون و لما دوروا هو ده رقم مين لقوه رقم الملحق العسكري للسفارة المصرية في لندن .. ساعتها (جورين) قال لنفسه يا إما أنا بتعامل مع شخص مغرور بشكل مبالغ فيه يا بتعامل مع بني أدم حمار بشكل مبالغ فيه .. المهم إنهم كلموا الرقم و قالوله لو سمحت عايزين نكلم (أشرف) .. الموضوع مشي بمنتهي السهولة .. و بمكالمة تليفون إتحدد معاد.

تاني يوم كانت أول مرة (أشرف مروان) يقابل حد من الموساد .. كان في ديسمبر 1970 زي ما قلتلك في فندق رويال لانكاستر Royal Lancaster في العاصمة البريطانية لندن و الإجتماع ده خلي بالك كان بعد حوالي 3 شهور من وفاة (جمال عبدالناصر) الله يرحمه .. حتعرف أهمية المعلومة دي كمان شوية .. (أشرف) كان عنده 26 سنة و اللي المفروض إنه كان حيقابله كان اسمه (دوبي Dubi) و ده طبعاً مش اسمه الحقيقي ده مجرد اسم مستعار أو Code Name بس اللي أقدر أقوله ليك إن (دوبي) ده وقتها كان عنده 36 سنة و بداية من المقابلة دي و هو بقي ضابط الحالة أو Case Officer بتاع (أشرف) و علي فكرة (دوبي) لسه عايش و عنده حالياً 86 سنة .. (أشرف) مكنش عارف هو مين (دوبي) .. هو إتقاله إن فيه حد حيقابلك في قاعة الإستقبال بتاعة الفندق .. (دوبي) راحله و سلم عليه و إتكلم معاه بالعربي و قاله تعالي نقعد علي جنب  .. (أشرف) مشي معاه و لما بقوا في حتة علي جنب في القاعة بص ل(دوبي) و قاله إنت بتتكلم عربي ليه إحنا ممكن نكون متراقبين إتكلم معايا إنجليزي .. الإتنين إتكلموا مع بعض حوالي عشر دقايق بعدها طلعوا علي أوضة كانت محجوزة من قبلها بيوم و اللي حجزها كان (شمول جورين) و وقتها كان عنده 41 سنة و ده كان زي ما قلتلك بس مش مشكلة نفكرك تاني مدير وحدة العمليات الأوروبية في المخابرات العامة الإسرائيلية اللي إنت تعرفها باسم الموساد Mossad و اللي مقرها العاصمة البلجيكية بروكسل.

و هم في الأوضة (أشرف) طلع شوية ورق و بدأ يتكلم عربي عادي مع (دوبي) و قاله أنا حمليك حاجة و إنت ممكن تكتب ورايا .. الورق اللي كان مع (أشرف) كان فيه كل أرقام كتائب و لواءات و فرق الجيش المصري بأسامي القادة بتوعهم .. الكتيبة رقم كذا مدرعات القائد بتاعها اسمه كذا .. اللواء رقم كذا دفاع جوي القائد بتاعه اسمه كذا .. (دوبي) قعد يكتب وراه و هو ساكت .. بعد ما (أشرف) خلص (دوبي) بدأ يسأله شوية أسئلة كان محضرهاله (شمول جورين) عشان يقيموا هل فعلاً (أشرف) واصل أوي أو لا و من ضمن الأسئلة اللي كانت متحضرة هي إيه بالضبط إمكانيات سلاح الحرب الكيماوية المصري؟ .. (أشرف) قاله إنه معندوش إجابة بس المرة الجاية حيكون جاهز .. و فعلاً في المرة اللي وراها اللي إتقابلوا فيها (أشرف) كان محضر كل حاجة هو قدر يوصلها عن سلاح الحرب الكيماوية بتاعنا.

الإجتماعات اللي بعد كده كانت بتتنسق كالأتي .. (اشرف) بيرفع سماعة التليفون يكلم واحد ست يهودية عايشة في لندن محدش عارف اسمها بالكامل بس سجلات الموساد بتسميها (اس S) بحيث (اشرف) يسيبلها رسالة مشفرة زي مثلا يقولها “الشمس تشرق كل صباح” .. الاخت (اس) بترفع هي سماعة التليفون عشان تكلم (دوبي) تقوله ان (اشرف) عايز يكلمك .. (دوبي) بيروح ل(اس) و بيستني المكالمة اللي وراها من (اشرف).

مشكلة تعامل (دوبي) و (جورين) مع (اشرف) انه مشي عكس ما كتاب كيف تجند جاسوس للمبتدئين بيقول .. المفروض انك بتذاكر الجاسوس الاول و بعد كده بتجنده .. (اشرف) كان العكس .. هم جندوه و بعد كده ذاكروه و ده خلاهم مع الوقت يبقوا فرحانين جدا بيه و في نفس الوقت حاطين ايدهم علي قلبهم لان (اشرف) لما تيجي تذاكره حتلاقيه من الشخصيات المستهترة بشكل مش طبيعي وانا مش بهزر ومش ببالغ .. هو من مواليد 2 فبراير 1944 .. ابوه كان لواء في القوات المسلحة .. صحيح هو مكنش من الضباط الاحرار بس عيلته كانت تعرف ناس جوه مجلس قيادة الثورة فابوه اتحسب علي انه من الضباط الاحرار .. (اشرف) اتخرج من مدرسة كوبري القبة الثانوية شعبة علمي علوم و دخل كلية علوم قسم كيمياء .. سنة 1965 دخل الجيش كضابط و اتعين في سلاح الحرب الكيماوية .. هو كان شاب تقدر تقول عليه فلاتي و بتاع نسوان .. Bad Boy يعني ودي حاجة سيكسي جدا في نظر بنات كتير خصوصا وقتها .. هو كان بيلعب تنس في نادي هيلوبليس وفي يوم سنة 1965 يعني كان لسه متخرج من الكلية و حيخش الجيش فالبيه كان شايف نفسه حاجة و كان بيلعب تنس قابل بنت اسمها (مني) .. (مني) كانت لسه في الجامعة و اصغر من (اشرف) ب3 سنين بس مش ده المهم .. المهم انها كانت البنت الصغيرة ل(جمال عبدالناصر) الله يرحمه .. طبيعي البنت راحت قالت لابوها بحبه يا بابا بحبه يا بابا ف(جمال) زيه زي اي رجل شرقي جاب مدير مخابراته (سامي شرف) و قاله هاتلي قرار الواد ده .. تقرير (سامي شرف) مختلفش كتير عن تقييمي .. شاب طموح بيعشق الفلوس و فلاتي و بتاع نسوان .. (جمال) كان ضد الجوازة بس بنته ضغطت عليه و فعلا اتجوزوا في يوليو 1966.

بعد الجواز كل اللي قال عليه (سامي شرف) حصل .. (اشرف) بقي بيسافر (لندن) كتير و مقضيها قمار و شرب و نسوان .. شوية و بدأ يتداين .. شوية وبدأ يستلف من صحابه .. (جمال) حاول يجبر بنته تتطلق منه بس هي كانت بتحبه .. وسط كل الدراما العائلية اللي ممكن تلاقيها في مسلسلات رمضان دي كلها تحصل نكسة يونيو 1967 .. و وراها يتعرض (جمال) لازمة قلبية و يتوفي في سبتمبر 1970 و يجي مكانه (محمد انور السادات) الله يرحمه .. كل ده (جورين) و (دوبي) كانوا بيكتشفوه وهم بيتعاملوا مع (اشرف) .. مش كده و بس .. هم اكتشفوا ان محاولات (اشرف) انه يوصل للموساد بدأت من قبل ما حتي يبعت جوابات و يكلم مكتب الجنرال (شمول ايال) اللي بفكرك انه كان الملحق العسكري في السفارة الاسرائيلية في لندن .. في مارس 1970 لما (جمال) كان لسه عايش (اشرف) حاول يوصل يكلم الملحق العسكري لسفارة اسرائيل في لندن اللي كان في المنصب قبل الجنرال (شمول ايال) و كان الجنرال (اهارون افنون Aharon Avnon) بس برده موصلش لنتيجة.

سنة 1971 (سامي شرف) حب يعمل انقلاب علي (السادات) فمتفهمش ليه هو شاف (اشرف) شخص ينفع تثق فيه مع انه هو شخصيا اللي قال عليه فلاتي و بتاع نسوان .. يدوبك (اشرف) عرف باللي (سامي شرف) عايز يعمله راح جري قايل ل(السادات) اللي قرر انه يحبس (سامي شرف) ومعاه شلة حلوة كده من مجلس قيادة الثورة في الحركة اللي بتتسمي بثورة التصحيح بس ما علينا دلوقتي .. من بعدها و (السادات) دخل (اشرف) ضمن دايرته القريبة و حطه كمستشار خاص له .. كده انت وصلت لنفس خط النهاية اللي وصله (جورين) هو و (دوبي) لما كانوا بيذاكروا (اشرف) .. كده انت بدأت تكون صورة شبه واضحة عن شخصيته … و فهمت النظام اللي (اشرف) كان ماشي عليه مع الموساد فخليني احكيلك ايه اللي حصل في الكام يوم اللي قبل حرب اكتوبر عشان زي ما قلت في الاول دي عليها خناقة كبيرة اوي؟

من ضمن Job Description بتاع (اشرف مروان) كواحد من المقربين ل(انور السادات) انه كان همزة الوصل بين (السادات) و بين مديري المخابرات السودانية و الليبية و بعد كده علاقته بيهم خلته يقدر يخش بيزنس تجارة السلاح و يجيب منه فلوس زي الفل .. يقال ان (معمر القذافي) الله يرحمه كان بيحبه جدا .. المهم .. يوم 4 اكتوبر 1973 (السادات) طلب من (اشرف) يروح ليبيا عشان ينسق مع المخابرات الليبية تفاصيل نقل كل الطيارات المدنية الي تحت ايد شركة مصر للطيران من جوه المطارات المصرية للمطارات الليبية .. ومش بس كده .. ينسق معاه تفاصيل نقل القطع البحرية اللي مش اساسية في القوات البحرية المصرية لقاعدة طبرق البحرية في ليبيا .. في رأي (اشرف) الحاجتين دول مبيحصلوش الا لو الحرب حتقوم قريب اوي .. هو خلص شغله في ليبيا وخد طيارة علي العاصمة الفرنسية باريس .. وتقريبا وهو في السفارة المصرية في باريس اتصل باللي اسمها (اس) عشان يسيبلها رسالة مشفرة بانه محتاج يكلم (دوبي) ضروري .. بعدها بشوية زي ما هو متفق عليه (اشرف) كلم (اس) تاني و المرة دي اللي رد علي التليفون كان (دوبي) .. في المكالمة دي (اشرف) قاله انه عايز طلبية مواد كيماوية .. ده في الكود بينه و بين (دوبي) عشان (اشرف) زي ما قلتلك اساسا كيميائي فعشان لو حد سمعه وهو بيتكلم في التليفون بالصدفة فيبقي عنده حجة يدافع بيها عن نفسه وهي ان عنده بيزنس استيراد و تصدير مواد كيماوية .. المهم .. الكود كان ان كلمة مواد كيماوية دي معناه ان الحرب او علي الاقل فيه تصعيد عسكري حيحصل قريب .. لما (دوبي) سأل (اشرف) انهي نوع كيماويات فكان رد (اشرف) انواع مختلفة و بكميات كبيرة .. ده كان كود ان التصعيد العسكري حيكون بضربة جوية و قصف مدفعي .. (دوبي) اتخض لدرجة انه قال ل(اشرف) انه حيقابله بكره اللي هو يوم 5 اكتوبر يعني قبل الحرب بيوم بس مش حيكونوا لوحدهم .. (زفي زامير) مدير الموساد شخصيا حيبقي موجود.

يوم 5 اكتوبر (اشرف) كان في لندن وهو هناك قابل المدير الاقليمي لشركة مصر للطيران و اللي اكدله معلومة ان جاتله اوامر بانه ينقل كل طيارات مصر للطيران لمطارات جوه ليبيا .. كان المفروض ان معاد (اشرف) مع (دوبي) و (زفي زامير) في المنزل الامن او Safe House بتاع الموساد في لندن الساعة تسعة بليل .. هو وصل الساعة 11 عشان كان بيعمل شوية اتصالات للقاهرة عشان يبقي معاه اخر Update قبل ما يقعد مع (دوبي) و (زفي زامير) .. في الاجتماع في بدايته رغم ان (زفي) حضره بسبب تحذير (اشرف) في مكالمته مع (دوبي) ان الحرب حتقوم بكره الا انه مكنش مهتم اصلا يعرف اي حاجة عن الموضوع .. هو سأل (اشرف) عن التعاون المصري السوري اللليبي .. سأله عن هل فيه اي اخبار عن محاولة جديدة لمنظمة التحرير الفلسطينية انهم يخطفوا طيارة تكون تابعة لشركة الخطوط الجوية الاسرائيلية اللي بيسموها العال El Al لان قبلها بفترة (اشرف) ادي ل(دوبي) معلومة ان اعضاء في منظمة التحرير الفلسطينية حيخطفوا طيارة من مطار روما الدولي و الموساد قدر يحبط المحاولة دي .. بسبب ان (زفي) مكنش عايز يتكلم في موضوع الحرب فجأة (اشرف) زعق فيهم وقالهم ان فيه نسبة 99% الحرب حتقوم بكره .. بمنتهي البرود (زفي) سأله اشمعني؟ .. اساسا (زفي) كان من الناس اللي مش مقتنعة ان مصر حتحارب اصلا .. رد (اشرف) ان عشان بكره يوم عيد كيبور اقدس اعياد اليهود و بكره اجازة رسمي .. (زفي) سأل (اشرف) طب يا فالح الحرب حتقوم ازاي؟ .. رد (اشرف) بانه حيكون هجوم منسق بين مصر و سوريا و حيحصل الساعة 6 المغرب .. اساسا فكرة ان مصر تنسق مع سوريا الحرب ده كان من الحاجات اللي (ايلي زايرا) اللي بفكرك انه مدير المخابرات الحربية الاسرائيلية رافضها ومش مقتنع بيها خالص .. (اشرف) قالهم ان الحرب المصريين بيستعدوا ليها بقالهم اكتر من 6 شهور وان (السادات) قرر معاد الحرب من يوم 25 سبتمبر اللي فات و محدش كان عارف وختم ان في الوقت اللي انتوا مش مصدقيني كل قوات الجيش المصري علي الجبهة الليلة بتستعد للعبور بكره .. لحد هنا و اقف و خد ملاحظة .. (اشرف) حس ان الحرب حتقوم لما اتقاله ان طيارات مصر للطيران حتتنقل ليبيا فمنين جاب معلومة ان (السادات) قرر معاد الحرب من يوم 25 سبتمبر؟ .. متحاولش تفكر فيها كتير بس خليها في دماغك لبعدين.

الاجتماع ده قعد حوالي ساعتين .. (زفي زامير) بدأ الاجتماع وهو شبه مقتنع بان الحرب مش حتقوم و خرج منه شاكك و الشك لما بيخش قلب ضابط مخابرات بتبقي مصيبة .. من ضمن كل الكلام اللي (اشرف) قاله عن اللي حيحصل بكره هو وقف عند حتة معينة .. خطة العبور نفسها .. بالنسبة ل(زفي) تفاصيل خطة العبور لوحدها هي اللي خلته يقول لنفسه طب ليه لا؟ .. اصلها خطة حلوة اوي .. انت حبتدأ بضربة جوية و بقصف مدفعي مكثف و بعدها عبور المشاة و بعدها عبور المدرعات للضفة التانية من القناة عن طريق 9 رؤوس كباري .. انت مش عايز تخش سيناء كلها .. لا خالص .. انت بس محتاج تحط رجلك علي الضفة التانية .. سيطر يدوبك علي شريط بعمق 10 كيلومتر جوه سيناء ولو الدنيا مشيت معاك زي ما انت عايز حاول تتقدم لحد منطقة المضايق اللي هم متلا و الجدي يعني بتتكلم عن 35 كيلومتر جوه سيناء .. مجرد انك تكسر حالة اللاسلم واللاحرب .. اكسر حدود اتفاقية وقف اطلاق النار اللي اتمضت في اغسطس 1970 و اللي بسببها اعلن انتهاء حرب الاستنزاف .. الخطة حلوة اوي اوي يعني .. بعد الاجتماع ما خلص (زفي) و (دوبي) اتمشوا سوا من المنزل الامن اللي قابلوا فيه (اشرف) لحد بيت مدير مكتب الموساد في لندن وقتها وكان اسمه (رافي ميدان Rafi Meidan) وطول السكة وهو عمال يسمع خطة العبور بصوت عالي كأنه بيكلم نفسه .. الخطة حلوة و جامدة زحليقة .. طب انا ابلغ القيادة السياسية اقولها ايه؟ .. حصل قبل كده اني قلتلهم ان الحرب حتقوم مرتين ومحصلش حاجة .. مرة في مايو 1972 و مرة في مايو 1973 .. لو قلتلهم لتالت مرة ان الحرب حتقوم بكره و طلع الموضوع فشنك ساعتها انا حتشال من منصبي وش .. بس لو مقلتش حاجة و فعلا الحرب قامت بكره ساعتها انا حتعدم في ميدان عام .. لما (زفي) و (دوبي) وصلوا لبيت (رافي ميدان) كان تقريبا (زفي) حسم قراره .. اول ما وصل رفع سماعة التليفون و كلم مدير مكتبه (فريدي عيني Freddy Eini) و بلغه يكتب وراه الجملة دي .. الحرب حتقوم بكره الساعة 6 المغرب .. و قاله توصل الرسالة دي لمكتب رئيسة الوزراء (جولدا مائير).

اظن دلوقتي جه دور اهم سؤال .. ليه؟ .. ليه (اشرف) قرر يخون بلده؟ ده اذا كنت انت في الفريق اللي شايف انه جاسوس فعلا .. عشان بس نكون صرحاء اخر شخص ممكن تسأله عن دوافع (اشرف) انه يخون بلده هو (دوبي) .. صحيح هو كان ضابط الحالة بتاعه بس لما بتبقي ضابط حالة بتتعلم ان العميل بتاعك ده انت مينفعش تبقي صاحبه .. انتوا شركاء .. هو عايز حاجة وانت عايز حاجة و بتساعدوا بعض .. انتوا مش صحاب و عمركوا ما حتبقوا صحاب وده مهم علي فكرة لان مينفعش (دوبي) وهو قاعد مع (اشرف) في ساعة صفا يسأله الا قولي ياض يا (شرشر) انت خنت بلدك ليه؟ .. السؤال ده مينفعش يطلع من (دوبي) لانه ساعتها حيبان انه Judgmental  او بيحكم علي تصرفات (اشرف) ودي الحاجة اللي لو حصلت فالعلاقة بين ضابط الحالة و العميل بتاعه قول عليها يا رحمن يا رحيم .. في نفس الوقت لو رحت سألت قيادة الموساد فانت مش حتعرف تاخد منهم لا حق ولا باطل .. شوية يقولولك عشان الفلوس .. شوية يقولولك اصله بعد نكسة يونيو 1967 بقي معجب اوي بالمخابرات الاسرائيلية وكان حلم حياته يشتغل معاهم زي ما تكون بتتكلم عن لاعيب كورة بيلعب في اسمنت اسيوط و نفسه يلعب في النادي الاهلي .. بس نظرية (دوبي) هي الانتقام .. (اشرف) كان بيكره حماه و حماه كان اقوي رجل في مصر .. تخيل نفسك متجوز واحدة بس ابوها شخصيته قوية .. في الرايحة و الجاية يهزقك قدامها .. هو اساسا مش شايفك رجل .. يوم عن يوم و (اشرف) بيغلي من حماه .. لما حصلت نكسة يونيو و (جمال) بدأ يتعب فجأة (اشرف) مبقاش يخاف منه .. بالعكس .. ده شافه ضعيف وجه الوقت انه ينتقم  .. اه صحيح الفلوس ليها عامل .. (دوبي) مثلا كان شايف ان (اشرف) كان بيعشق الفلوس .. في الاول هم حبوا ميفتحوش عنيه و ادوله كام الف دولار بس هو زعق و رفض وطلب 20,000 دولار اللي هو بمعايير دلوقتي 100,000 دولار عن كل اجتماع يعمله مع (دوبي) عشان يديله معلومات .. بس حتي انك تقول ان الفلوس هي المبرر الاساسي ورا خيانة (اشرف) ممكن تلاقي نفسك مش قادر تقف معاه لما تعرف ان بعد حرب اكتوبر و بعد ما (اشرف) عمل فلوس زي الفل من تجارة السلاح قرر انه يكمل شغل مع الموساد من غير ما ياخد منهم ولا مليم .. علي فكرة بعد توقيع معاهدة السلام الدنيا اختلفت شوية .. العلاقه بين (السادات) و (اشرف) مبقتش زي الاول .. حتي اهمية (اشرف) للموساد مبقتش زي الاول.

 (اشرف مروان) من الشخصيات اللي عليها خناقة كبيرة بس يمكن اكبر خناقة هي هل هو كان جاسوس اسرائيلي ولا عميل مزدوج؟ .. الحقيقة ان نظريا علي الاقل الاجابة علي السؤال ده اتحسمت سنة 2007 بس احنا مش واخدين بالنا .. بعد ما (اشرف) مات اتشكلت لجنة تحقيق برئاسة واحد اسمه (ثيودور اور Theodor Or) وده كان رئيس المحكمة الدستورية العليا في اسرائيل والرجل ده كان المفروض يجاوب علي سؤال بسيط: هل (زفي زامير) مدير الموساد عنده حق ان (اشرف) كان الجاسوس بتاعه ولا (ايلي زايرا) مدير امان هو اللي عنده حق وان (اشرف) كان عميل مزدوج؟ .. نتيجة التحقيق كانت ان (زفي زامير) هو اللي عنده حق .. (ايلي زايرا) هو السبب في ان (اشرف) يموت لان وفق كلام التقرير لما سرب اسمه للصحافة و اتعرف هو مين المخابرات المصرية قتلته .. مش كده وبس .. اترفعت قضية ضد (ايلي زايرا) بتهمة تسريب اسرار الدولة وفضلت القضية في المحاكم من 2007 لحد 2012 لما النائب العام في اسرائيل وقتها (يهودا واينستين Yehuda Weinstein) اسقط التهم الموجهة ل(ايلي زايرا) مش عشان هو مش غلطان قد ما كان عشان وقتها كان بقي عنده 84 سنة اللي هو فككوا بقي يا جدعان و المسامح كريم و الرجل بينه و بين القبر خطوة.

انا عارف اني بتكلم عن موضوع حساس فيه وجهات نظر كتير .. علي ايدك اليمين ناس تقولك ايوه (اشرف) جاسوس .. بس لو هو جاسوس ليه في جنازته حضرها (حسني مبارك) شخصيا و عطي لمراته (مني) علم مصر و تعاملوا معاه علي انه بطل قومي؟ .. علي ايدك الشمال ناس تقولك ده عميل مزدوج بامارة ان حتي ضباط الموساد اللي كانوا بيراقبوه قالوا انه كان بيروح لاجتماعاته مع (دوبي) في المنزل الامن وهو راكب عربية تابعة للسفارة المصرية في لندن و السواق بيوصله لحد باب المنزل الامن .. يبقي اكيد المصريين كانوا مجندينه .. تسأل اللي بيؤيدوا النظرية دي طب تفسر بايه ان (اشرف) اتعمله جنازة عسكرية؟ يقولولك مجرد ان الحكومة المصرية مش عايزه تبوظ ذكري حرب اكتوبر و متنساش انه كان متجوز بنت (جمال عبدالناصر) برده .. تصدق مين و تكذب مين؟ .. تصدق التقرير اللي طلع من قاضي التحقيقات (ثيودور اور Theodor Or) بان (اشرف) جاسوس فعلا؟ ولا تصدق الكلام اللي بيطلع من بشكل مش رسمي من الحكومة المصرية بان (اشرف) بطل قومي؟ .. انا شخصيا محتار .. هل عندي نظرية؟ اه عندي بس معنديش اي دليل مادي يؤيدها او ينسفها و بالتالي مينفعش اقولها او احكيها .. دي كانت كل الحقائق اللي تحت ايدنا في موضوع (اشرف مروان) .. صدق اللي تصدقه و كون نظريتك بنفسك .. يمكن يبقي عندك حق.

المصادر:
مقالة بعنوان Code name ‘Angel’: Mossad agent who handled Isreael’s greatest spy speaks out نشرت في جريدة Haaretz الاسرائيلية وده لينك المقالة الاصلية:
https://www.haaretz.com/israel-news/.premium.MAGAZINE-code-name-angel-mossad-agent-who-handled-israel-s-greatest-spy-speaks-out-1.8405651