أنا من الناس اللي مقتنعة جداً بمقولة إن السياسة نجاسة .. يمكن دي من أكتر التشبيهات الصح اللي إتقالت في وصف السياسة و مفيش حد يقدر يثبت صحة التشبيه ده أكتر من بني أدم نجس زي (أفيجادور ليبرمان Avigador Lieberman) .. لو أنا وريتك صورته فإنت حتميزه علي طول و تقول مش ده اللي كان وزير دفاع إسرائيل و كان شغال حارس في كباريه .. و الحقيقة المعلومتين دول صح و المصيبة إن دول المعلومتين اللي بس عندنا كعرب و كمصريين عن رجل يعتبر من أهم الرجاله في إسرائيل دلوقتي .. الرجل ده إحتمال كبير يبقي رئيس وزراء إسرائيل الجاي و إحتمال كبير هو يكون السبب ورا دخول إسرائيل في حرب مع إيران و إحنا منعرفش عنه غير إنه كان شغال بتاع أمن في كباريه وده اللي أنا ححاول أغيره النهاردة .. مقالة النهاردة هي كورس سريع جداً في إنك تفهم دماغ الرجل اللي فعلاً و أنا مش بهزر لما بقول إنه أكبر خازوق تاخده إسرائيل في حياتها .. عشان أفهمك قصدي خليني أبدأ معاك بإني أحكيلك قصته من ورا لقدام و خليني أبدأ بإني أكلمك شوية عن هو الرجل ده بيعمل إيه اليومين دول؟
إفتح أي قناة إخبارية إسرائيلية و حتلاقي إن مفيش قعدة قهوة في إسرائيل إلا و بتتكلم عن حاجتين: إيه اللي حيحصل في الإنتخابات الجاية اللي حتتعمل يوم 17 سبتمبر؟ و عن إيه الجديد في الخناقة بين (ليبرمان) و (بنيامين نتنياهو) رئيس الوزراء .. الإتنين فعلياً كل يوم الصبح فيه وصلة ردح و تهزيق بينهم علي التليفيزيون و علي Social Media .. الإسرائيليين بيبصوا للخناقة دي و بيضربوا كف علي كف .. إزاي صحاب زمان بقوا بيقطعوا في هدوم بعض دلوقتي؟ .. الخناقة بين الإتنين بدأت في 2015 .. في السنة دي إتعملت الإنتخابات البرلمانية و حزب الليكود بتاع (نتنياهو) كسب الإنتخابات و عين واحد اسمه (موشيه يعالون Moshe Ya’alon) وزير دفاع و اللي كان قبلها ماسك منصب رئيس أركان حرب القوات المسلحة فكان إلي حد ما قرار منطقي .. وقتها (نتنياهو) عزم علي (ليبرمان) إنه يدخل الحكومة بس هو رفض و فضل إنه يفضل في المعارضة .. هوبا في 2016 قامت الحرب بين إسرائيل و حماس .. حماس تضرب صواريخ علي إسرائيل و إسرائيل ترد بغارات جوية علي القطاع و محدش عارف ياخد من التاني لا حق و لا باطل .. و لإن اللي إيده في المياه مش زي اللي إيده في النار كان كل يوم (ليبرمان) يطلع في التليفزيون يشتم في في (موشيه يعالون) ويقول إن لو هو اللي كان ماسك وزارة الدفاع كان طلع قال ل(إسماعيل هنية) زعيم حماس إن قدامك 48 ساعة عشان تستسلم و إلا حقتلك إنت و عيلتك.
تقدر تقول إن الكلام معلهوش ضرائب .. في مارس 2016 حصلت حادثة مشهورة أوي إن ضابط إسرائيلي قتل واحد فلسطيني كان متكتف و متعور علي الأرض بدون أي مبرر .. (موشيه يعالون) عشان منظره قدام العالم و إن مينفعش وزير الدفاع بتاع دولة المفروض إنها بتحترم نفسها يقف في صف ضابط إرتكب جريمة حرب قال إن اللي عمله الضابط ده غلط و حيتحاكم .. تاني يوم بعد ضغط شعبي رهيب (يعالون) كان متشال من منصبه و مين كان اللي مستني يمسك في الفرصة بإيده و سنانه .. (أفيجادور ليبرمان) .. في نوفمبر 2016 المواجهات بين إسرائيل و حماس إتصعدت أوي و بعد يومين من ضرب الصواريخ من القطاع و قدام الناس (ليبرمان) بان إنه كان عايز يدوس علي وش حماس بس (نتنياهو) هو اللي وقفله .. هل الكلام ده صح ولا غلط محدش عارف بس اللي إحنا عارفينه إن (ليبرمان) قدم استقالته من الحكومة .. بعدها بيومين الحكومة وقعت و إتعملت إنتخابات برلمانية جديدة و (نتنياهو) كسبها برده.
الخناقة دي ولعت في مارس 2019 لما أُعلنت نتيجة الإنتخابات البرلمانية الإسرائيلية .. اه الإسرائيليين حيعملوا إنتخابات الشهر ده مع إنهم لسه عاملين واحدة في مارس اللي فات و حتفهم ليه كمان شوية .. لما النتيجة أٌعلنت الناس سقفت ل(نتنياهو) لإن الحزب بتاعه اللي هو حزب الليكود قدر ياخد 35 كرسي من أصل 120 كرسي في البرلمان الإسرائيلي اللي بيتسمي الكنيست .. حزب الليكود و ده حزب يميني يعني حزب رأسمالي متطرف حبتين دخل الإنتخابات قصاد حزب تاني وسطي اسمه حزب الأزرق و الأبيض وده حزب لسه ابن إمبارح أسسه رئيس أركان حرب القوات المسلحة السابق (بيني جانتز Benny Gantz) .. شوف يا أخي عندهم رئيس أركان حرب سابق بيخش الإنتخابات عادي جداً إزاي .. لسه (نتنياهو) حيقول هيييييييه أنا حشكل الحكومة طلعله خازوق اسمه إسرائيل بيتنا و ده الحزب بتاع (ليبرمان) و اللي كسب يدوبك 4 كراسي بس في الإنتخابات.
المفروض إن (نتنياهو) و (ليبرمان) صحاب .. المفروض إن طبيعي (ليبرمان) ينضم ل(نتنياهو) و بكده ال35 كرسي بتوع الليكود حيتجمعوا علي الأربع كراسي بتوع إسرائيل بيتنا و زيتنا في دقيقنا و (ليبرمان) يمسك وزارة في الحكومة و جُبرت علي كده .. بس (ليبرمان) مكنش بس عايز يمسك وزارة هو كان عايز (نتنياهو) يوعده إنه لما يبقي رئيس وزراء يعمل مشروع قانون يجبر أبناء الطائفة اليهودية الحريدية علي الخدمة في القوات المسلحة و دول ناس إنت تقدر تسميهم مجازاً يعني لمجرد التشبيه الدعوة السلفية بتوع إسرائيل .. الفكره إن القانون هناك بيقول إن بما إن الطائفة دي بتطبق التوراة بحذافيرها في حياتها اليومية فهم مينفعش يخدموا في الجيش .. لما (نتنياهو) رفض (ليبرمان) هو كمان رفض ينضم للتحالف الحاكم .. جري الشريط كام شهر و (نتنياهو) بقي مُجبر إنه يعمل إنتخابات مبكرة عشان حزبه مش عارف يشكل حكومة بال35 كرسي اللي تحت إيده.
ناس كتير بتتوقع إن الإنتخابات الجاية حتخلص بإن حزب إسرائيل بيتنا بعد موقفه المتشدد مع حزب الليكود و إنه علّم عليهم جامد حياخد بالميت 12 كرسي في البرلمان و لو ده حصل يبقي نهار ازرق يا أستاذ ممتاز .. ده معناه إن (نتنياهو) لو كسب الإنتخابات فهو حيبقي مضطر يتحالف مع (ليبرمان) أيا كانت شروطه .. أو إن (بيني جانتز) هو اللي يكسب الإنتخابات و ساعتها الله اعلم إيه اللي حيحصل .. اللي فعلاً قبله بيقع بين رجليه هو (نتنياهو) لإن لو حزبه مجابش عدد الكراسي اللي هو عايزها فده معناه إنه ولو حتي مؤقتاً حيقدم استقالته من رئاسة الوزراء و لو ده حصل يدوبك و هو خارج من مكتبه النيابة حيتقبض عليه بتهم فساد لإن القانون هناك بيقول إن رئيس الوزراء له حصانة قضائية و مينفعش يتقبض عليه .. إنت إحتمال كبير أوي تشوف (ليبرمان) بقي هو رئيس وزراء إسرائيل الجاي يمكن عشان كده إنت محتاج تفهم شوية مين الرجل ده و بيفكر إزاي بدل ما إحنا كل اللي نعرفه عنه انه كان شغال مع رقاصات.
عشان تفهم دماغ (أفيجادور ليبرمان) حاول تتخيل إنك بتتكلم عن (محمد رمضان) أيام ما كان لسه بيعمل أفلام هابطة زي الألماني و قلب الأسد .. هو إتولد في مدينة اسمها كيشينيف بقت دلوقتي عاصمة بلد اسمها مولدوفا بس فكك من المعلومة دي ولا تهمك في حاجة .. اللي يهمك إن سنة 1978 الرجل ده عيلته هاجرت لإسرائيل .. إنت بتتكلم عن شاب بيعرف يتكلم روماني و روسي و عبري .. شاب جه بلد جديدة و مش لاقي شغل فخدم شوية في جيش الدفاع و لما خرج إشتغل حارس أمن في كباريه ولإنه مش لاقي فلوس و مش لاقي مستقبل فالناس بتوع التيارات اليمينية المتطرفة استلموه .. هم معرضوش عليه حل لمشاكله هم بس قالوله يلوم مين و شاورا للفلسطينيين و لعرب 48 و قالوله هم دول السبب في إنك مش لاقي شغل و إنك ملكش مستقبل .. بس يمكن أهم ميزة في (ليبرمان) إنه بيعرف يشمشم علي الفرص كويس أوي .. بالصدفة إتعرف علي (نتنياهو) و الحقيقة إن الإتنين مختلفين عن بعض بشكل رهيب .. واحد مكملش تعليمه و التاني متعلم من معهد MIT في أميركا .. واحد إتولد وفي بقه معلقة دهب و الثاني مكنش لاقي شغل فإشتغل حارس في كباريه .. متفهمش (نتنياهو) شاف إيه في (ليبرمان)عشان يعينه سكرتير عام لحزب الليكود و سنة 1996 عينه مدير مكتبه بعد ما كسب الإنتخابات و بقي رئيس وزراء إسرائيل .. فجأة الشاب اللي كان بيلم النقطة ورا الرقاصات بقي قاعد في واحد من أهم مكاتب صنع القرار في إسرائيل وهو لسه مكملش 40 سنة.
السنة اللي وراها علي طول كان مقدم استقالته .. ليه؟ .. إعتراضاً علي قرار (نتنياهو) إنه يمضي علي إتفاقية واي ريفر و اللي بناء عليها السلطة الفلسطينية خدت منطقة الجليل .. الناس كلها في إسرائيل بقت مستغربة إن إزاي (ليبرمان) يعض الإيد اللي إتمدت له .. ناس كتير بصتله و قالتله خلاص يعني المباديء خدتك أوي .. بس يمكن اللي ناس كتير مشافتوش إن (ليبرمان) ده شخصية بنت و%$# .. اللي ناس كتير جوه إسرائيل مشافتوش إن خلال التسعينات فيه أكتر من مليون مهاجر جم من الإتحاد السوفيتي لإسرائيل .. مليون بني أدم أولاً أغلبهم مبيتكلمش عبري أصلاً .. مليون بني أدم جايين بفكر Built-In في دماغهم بإن الفلسطينيين دول مش لازم يعيشوا لبكره .. الأهم إنهم مليون بني أدم حيطلعوا بطاقة إنتخابية و ميعرفوش حد في إسرائيل عشان ينتخبوه .. من هنا إتولد حزب إسرائيل بيتنا .. حزب إتعمل عشان المهاجرين الروس اللي مش عارفين أي حاجة في أي حاجة و عايزين ينتخبوا حد بيتكلم روسي زيهم .. خلال 3 إنتخابات برلمانية متتالية حزب إسرائيل بيتنا دخل الإنتخابات و خد عدد كراسي كان كافي إن (ليبرمان) يمسك وزارة في الحكومة وفي كل مرة كان بيقدم استقالته إحتجاجاً علي حاجة هو كان بيقول ضد مبادئه وفي كل مرة الناس بتقول إن ده إنتحار سياسي و في كل مرة ابن الو#%$ ده بيرجع تاني زي الخازوق أقوي من الأول.
هو دخل الحكومة بعد إنتخابات 2000 و مشي منها في 2002 إحتجاجاً علي خطة خريطة الطريق بتاعة (جورج بوش الابن) لو تفتكر .. دخل الحكومة في إنتخابات 2004 و طلع منها في 2005 إعتراضاً علي قرار (أرئيل شارون) رئيس الوزراء وقتها بفك الإرتباط بقطاع غزة و إنسحاب كل القوات و المستوطنين الإسرائيليين من القطاع .. دخل الحكومة تالت في إنتخابات 2006 و خرج منها إعتراضاً برده علي الكلام اللي إتقال إن رئيس الوزراء وقتها (إيهود أولمرت) بيفكر يخش في مفاوضات سلام مع الفلسطينيين .. (ليبرمان) شخصية بنت و#$% بس عنده مبدأ و المبدأ ده هو إنه ضد التفاوض مع الفلسطينيين و إنه شايف إن عرب 48 دول شوية خونة لإسرائيل ميستحقوش يبقي معاهم الجنسية الإسرائيلية.
إحنا دلوقتي في 2019 و خلال العشر سنين اللي فاتوا مفيش سيرة بيتقال فيه اسم (ليبرمان) في إسرائيل إلا عشان حاجتين: تهم الفساد اللي هو شخصياً و ناس في حزبه متهمين فيه و فيه ناس منهم إتسجن فعلياً بسببها .. و الحاجة التانية هي الشتايم اللي عمال يوجهها سواء للفلسطينييين أو لعرب 48 .. يا رجل ده حتي هو مقترح حاجة اسمها المثلت إنه يخلي عرب 48 اللي عايشين جوه إسرائيل يسيبوا بيوتهم و حياتهم و يعزلوا للضفة الغربية و لما حد بيقوله إن دي حاجة مش قانونية بيرد يقوله طب و ايه يعني ما أنا في 2005 و معايا 9000 مستوطن تاني (شارون) أجبرنا نسيب بيوتنا و حياتنا في قطاع غزة .. أنا شخصياً مستني أشوف (ليبرمان) حيعمل إيه في الإنتخابات الجايه .. أنا محضر فشاري و إزازة البيبسي بتاعتي و مستني .. يمكن أكتر حاجة مستنيها إن (نتنياهو) ميجبش الكراسي اللي هو عايزها و يضطر يقدم استقالته و ساعتها النيابة حتشبع بيه .. هنا بقي أنا نفسي أشوف وش (محمد بن سلمان) و (دونالد ترامب) .. فعلياً نفسي أشوف وشهم لما ده يحصل .. طبعاً حضراتكوا شبعتوا أخبار و كلام عن ما يسمي صفقة القرن و اللي عشان تتعمل لازم (نتنياهو) يبقي الحكم .. لو (نتنياهو) مبقاش رئيس الوزراء فإنت فعلياً تقدر تقول علي صفقة القرن يا رحمن يا رحيم.
المصدر:
مقالة بعنوان Israel’s Prince of Paradoxes .. نشرت في مجلة The Atlantic وده لينك المقالة الأصلية:
/archive/2019/08/avigdor-lieberman-israels-paradox/597010/
