الإغتصاب .. الموضوع أعقد مما انت متخيل.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/svtnsmqblde7?si=ff66d04da75d44088c59da6bfd9ea6a6

لو أنا سألتك إيه رأيك في حد إرتكب جريمة إغتصاب؟ .. أنا أسف لو كان سؤال صعب بس أنا فعلاً بسأله لو إنتي بنت و جيت وقفتك قدام شخص إرتكب جريمة إغتصاب حتحسي بإيه و حتقوليله إيه؟ .. هل حتعتبريه ذئب بشري زي ما الإعلام بيسميهم؟ .. حتسميه وحش .. شيطان .. حيوان؟

خليني أحكيلك قصة حصلت سنة 2012 عن بنت .. البنت دي كانت بتدرس في كلية الطب .. في يوم طلعت من الكلية قابلت واحدة صاحبتها و راحوا السينما مع بعض .. وصلت صاحبتها لحد البيت و هي كملت لبيتها .. و هي مروحه هجم عليها أربعة شباب و إغتصبوها بوحشية و قتلوها و رموا جثتها في الشارع .. قصة ترعب صح؟ .. لو قلتلك إن القصة دي حصلت في مصر مش حتستغربي .. حتقولي لنفسك ما الدنيا مبقتش أمان .. مفيش حد فينا مسمعمش عن قصة زي دي حصلت في شوارع بلدنا .. من فترة قريبة الأمم المتحدة صنفت القاهرة علي إنها من أقل مدن العالم أماناً بالنسبة للمرأة في العالم .. بس خليني أطمنك إن القصة دي محصلتش في مصر إنما حصلت في الهند .. البنت كان إسمها  (نيربهايا Nirbhaya) و قصتها هزت الهند كلها اللي هي دولة أساساً مش بتهتز خالص لجرائم الإغتصاب .. و تهتز ليه ما دي دولة بناء علي كلام إدارة سجلات الجرائم الوطنية حصل فيها 34,651 جريمة إغتصاب في سنة 2015 بس .. إنت متخيل الرقم؟ الهند تعتبر أسوأ دولة من ضمن أقوي 20 إقتصاد علي مستوي العالم اللي بيسموهم G20 عشان تبقي بنت عايشة فيها .. إنك تبقي بنت و عايشة في الهند أسوأ من إنك تعيشي في قريش أيام الجاهلية.

موضوعنا اللي حنتكلم عنه هو البنت الشابة اللي قدامك في الصورة دي .. دي إسمها (مادهوميتا باندي Madhumita Pandey) و لك أن تتخيل إن البنت دي كان عندها 22 سنة بس لما زارت سجن تيهار في العاصمة الهندية نيودلهي عشان تعمل لقاءات و تقابل 100 شخص متهم بإرتكاب جرائم إغتصاب في الهند .. 3 سنين كاملة قضتها البنت دي بتتكلم مع ال100 متهم كجزء من بحثها في رسالة الدكتوراه بتاعتها في علم الجريمة في جامعة أنجليا راسكن Anglia Ruskin University البريطانية .. الحقيقة إن الفكره دي إنها تفهم إزاي المغتصب بيفكر جت ل (مادهوميتا باندي) سنة 2013 يعني بعد سنة واحدة من جريمة إغتصاب البنت (نيربهايا) .. (مادهوميتا باندي) مش زي أي بنت إنت تعرفها .. دي بنت مش زي ستات الجيل القديم بتاعنا اللي لما بتشوف بنت إتعرضت لحالة تحرش تلاقيها بتدافع عن المتحرش و تهاجم البنت اللي المفروض إنها الضحية .. و في نفس الوقت (مادهوميتا باندي) مقالتش لنفسها إن لازم المغتصبين دول يتحرقوا بجاز و هم أحياء في ميدان عام .. (مادهوميتا باندي) حبت تفهم .. تفهم هو إيه اللي بيخلي أي رجل عاقل يرتكب جريمة شنيعة زي الإغتصاب.

البحث اللي عملته (مادهوميتا باندي) و نتيجة كلامها مع 100 مغتصب خلاها تكتشف حقيقتين بمجرد ما تعرفهم حتبدأ تغير وجهة نظرك خالص عن إزاي تحل مشكلة زي الإغتصاب و التحرش الجنسي و إن كان صحيح الإغتصاب أقوي بكتير من التحرش الجنسي بس خلينا نعتبرهم زي بعض .. الحاجتين دول هم:

• أغلب المدانين بالإغتصاب اللي (مادهوميتا باندي) قابلتهم مش متعلمين .. يتعدوا علي الصوابع اللي معاهم ثانوية عامة و كتير منهم خرجوا من التعليم في مراحل الإبتدائية و الإعدادية .. لما (مادهوميتا باندي) راحت تتكلم معاهم كانت مقتنعة بإنها رايحه تتكلم مع وحوش زي ما الإعلام بيصورهم بس لما بدأت تتكلم معاهم إتصدمت إنها بتتكلم مع ناس أقل من العادية .. دي ناس مش زي (هانيبال ليكتر Hannibal Lecter) اللي هو المجرم المثقف المتعلم الأرستقراطي .. لا خالص .. الغالبية العظمي من المغتصبين مش بس في الهند إنما في أي حتة في العالم مش متعلمين .. و دي نقطة مهم تكون فاهمها.
• مينفعش تبقي مجتمع بتهمش دور المرأة و كاتم عليها نفسها و بتحرمها بإن يبقي ليها شخصيتها المستقلة و إنها تسعي عشان مستقبلها و مجرد شايف إن المرأة متنفعش غير إنها تتجوز و تربي العيال و تقعد في البيت و تستغرب هو ليه حالات التحرش الجنسي و الإغتصاب كتير أوي كده في المجتمع .. الشاب اللي بيكبر في مجتمع مريض زي المجتمع الهندي أو المصري بيكبر و في دماغه مباديء كلها غلط خالص عن الرجوله و إزاي تبقي رجل .. و كمان البنات بتكبر و عندها تفكير غلط خالص عن إزاي تبقي بنت .. لو إنت ليك أخت فغالباً أختك إتربت علي إنها هي اللي تعملك أكلك و تعملك الشاي .. بإختصار أمك عشان تريح دماغها علمت أختك إنها تبقي نائبة مامتك في البيت .. ده علمك إن الطبيعي إن الرجل يبقي سي السيد و هي إتعلمت إن الطبيعي إن البنت تبقي الست أمينة .. ده يوريك الحقيقة إن المغتصب ده مفيهوش حاجة غلط .. أنا أسف إن كلامي ممكن يزعل ناس كتير بس صدقني المغتصب ده مجرد جزء من مجتمع مريض .. المغتصب مش مخلوق فضائي جاي من كوكب تاني تبصله و تستغرب إزاي ده بقي كده .. لا كلنا شاركنا في صنع المخلوق ده .. لو المغتصب ده سلعة فحتلاقي مختوم علي قفاه صنع في المجتمع المصري .. حضرتك المغتصب أو المتحرش ده إحنا كمجتمع اللي خلقناه و خليناه كده .. نظام التعليم الفاشل و التربية الغلط في البيت و الإعلام اللي مش بيدي مثال محترم الناس تقتضي به حتي المؤسسات الدينية اللي تقريباً ملهاش أي دور.

خلاصة تجربة (مادهوميتا باندي) إنها لما إتكلمت مع المغتصبين دول يا عيني جتلها صدمة .. لما تسمع وجهة نظرهم بتلاقي نفسك ممكن تحس إنهم صعبانين عليك و دي مشكلة كبيرة .. (مادهوميتا باندي) معترفة إنها كبنت مينفعش تحس بده .. هي كبنت لازم تفضل حاسه بنار الغضب و إحساس إنها محتاجه عشان تشفي غليلها تجيب سكينة و تقطع العضو الذكري بتاع كل مغتصب فيهم .. بس اللي هي لقت نفسها مقتنعة به إن المغتصب ده أساساً مش عارف يعني إيه إغتصاب .. حضرتك إنت قدام شاب تعليمه و تربيته في البيت لم يؤهلوه إنه يفهم إن الجنس ده لازم يحصل بتراضي الطرفين .. هو أساساً الفكرة أو Concept بتاع الرضا أو الConsent ده مش عنده .. و ده خلاها تسأل نفسها هل هي عايشة في مجتمع كل من فيه مغتصب بس بدرجات متفاوتة؟

إنت في مصر في مراحل التعليم المختلفة معندناش حاجة إسمها Sex Education .. إنت لو مدرس أو تعرف حد مدرس في مدرسة إسأله كده هو الموبايلات اللي مع طلبة المدارس فيها إيه .. حيقولك فيها بلاوي سودا .. فكر فيها كده .. إنت بتتكلم عن طالب في ثانوية عامة عنده مثلاً 16 سنة .. طبعاً أهله مش فاضيين و لو فاضيين بيتكسفوا يكلموه عن الجنس و عن التغيرات الهرمونية في جسمه في فترة بلوغه .. طب إنسي الأهل و التربية .. حتي المدرسة مفيش حد من المدرسين بيعلمه حاجة فبيطلع كل اللي يعرفه عن الجنس بيتعلمه من الأفلام الإباحية اللي بيشوفها علي النت و اللي محدش أساساً بيقوله إنها غلط لا في المدرسة ولا في البيت ولا حتي في الجامع .. طب لو حبيت تكلم أعضاء مجلس الشعب يشوفوا حل للمشكلة حتلاقيهم بيقولولك إن أي محاولة لإدخال Sex Education في المناهج التعليمية هي محاولة لإفساد المجتمع و إفشاء الإباحية وسط الطلبة.

ده بيحط قدام واقع أسود .. لا المتحرش أو المغتصب ده حد علمه ولا فهمه و حتي لما إرتكب جريمته هو مش فاهم إن ده غلط و حتي لما إتقبض عليه و إتسجن هو مش فاهم هو إتسجن ليه .. فيه كتير أوي من اللي (مادهوميتا باندي) إتكلمت معاهم مش عارفين يعني إيه إغتصاب و كتير منهم بيبرر الجريمة لنفسه .. نفس فكرة أصل لبس البنت كان مستفز .. يعني يدوبك تلاثة أو أربعة بس هم اللي تابوا و إعترفوا إن اللي عملوه ده غلط .. اللي فعلاً سبب صدمة ل (مادهوميتا باندي) هو كلامها مع المغتصب رقم 49 و ده يعتبر حالة خاصة جداً .. ده واحد إغتصب بنت عندها 5 سنين .. الرجل ده قالها إنه فعلاً ندمان و معترف بغلطته .. هو معترف إنه دمر حياة البنت و يا عيني هو مقتنع إنه دمر حياتها  لمجرد لإنها مبقتش عذراء و بالتالي محدش حيتجوزها .. بدأت تشوف قد إيه تربية المجتمع ودت الناس في داهية؟ .. المصيبة مش في كده .. المصيبة إنه قال ل (مادهوميتا باندي) إنه مستعد لما يخرج من السجن يتجوز البنت اللي إغتصبها.

الحقيقة إن اللي عملته (مادهوميتا باندي) حطني في وضع إني فعلاً بقيت مقتنع بإن مفيش حل سريع لمشكلة التحرش الجنسي أو الإغتصاب في مصر .. المدارس مش مؤهلة إنها تعلم الطلبة جمع و طرح عشان تعلمهم إزاي يعاملوا البنات .. التليفيزيون و السينما زي ما إنت شايف بيقدسوا حد زي (محمد رمضان) و (ياسمين صبري) .. أنا معنديش مشكلة شخصية معاهم بس الشخصيات اللي بيقدموها مش أبطال خارقين يعني .. حتي الأزهر الشريف و الشيوخ إعتبرهم مش موجودين .. و ده حيخليني مقداميش غير الأهل .. أرجوكوا إتكلموا مع ولادكوا و بناتكوا .. أرجوكي يا أم متسيبيش إبنك يحمل أفلام إباحية علي تليفونه .. إنتي لو مش عارفه إنه بيعمل كده تبقي مصيبة بس لو إنتي عارفه و مطنشه تبقي مصيبة أكبر.

المصدر:

مقالة بعنوان A woman interviewed 100 convicted rapists in India. This is what she learned نشرت في جريدة The Washington Post الأميريكية و ده لينك المقالة الأصلية:
https://www.washingtonpost.com/news/worldviews/wp/2017/09/11/a-woman-interviewed-100-convicted-rapists-in-india-this-is-what-she-learned/?utm_term=.3cd6d454e240