لينك التسجيل الصوتي للمقالة علي Sound Cloud:
https://soundcloud.com/user-112011687-312727988/q65fpqpxgwle
خليني أبدأ معاك من الأول وأقولك إن فيه خناقة إحنا منعرفش عنها حاجة حول حتة من أفريقيا بتتسمي Horn of Africa أو القرن الأفريقي .. زي ما إنت شايف فالقرن الأفريقي ده حتة من قارة أفريفيا في شرقها اللي بتطل علي البحر الأحمر ومضيق باب المندب وعلي المحيط الهندي والحتة دي عايش فيها 5 دول اللي هم أثيوبيا وأريتيريا والصومال وصوماليلاند وجيبوتي .. إنت ممكن تكون سمعت أسامي أربع دول منهم قبل كده بس الاسم اللي غريب عليك هو صوماليلاند واللي الحقيقة هي دولة جديدة أعلنت استقلالها عن الصومال سنة 1991 ولسه لحد دلوقتي مخدتش إعتراف رسمي بوجودها من الأمم المتحدة .. أثيوبيا هي اكبر الدول الخمسة وتعتبر ثاني أهم الدول الخمسة لأسباب كتير من ضمنها إن أثيوبيا دولة كبيرة تعداد سكانها كتير معديين ال105مليون بني أدم وإقتصادها بينمو بسرعة أوي وكبر 10 أضعاف خلال ال15 سنة اللي فاتوا لحد ما بقي إقتصاد بيلعب في دخل سنوي عدي 80 مليار دولار وده رقم حلو أوي لدولة أفريقية.
بس مشكلة أثيوبيا الوحيدة هي إنها دولة حبيسة يعني مش بتطل علي أي ساحل سواء للبحر الأحمر أو للمحيط الهندي وعشان كده أنا قلت عليها ثاني أهم دولة من الدول الخمسة لإن أهم دولة في رأيي هي جيبوتي ودي اللي محتاجين نتكلم عنها كتير شوية .. الناس بدأت تتكلم عن أهمية الحتة اللي هي Horn of Africa دي لما زادت أوي عمليات القرصنة اللي كان بيقوم بيها قراصنة صوماليين من كام سنة لو تفتكر .. الناس اللي مش عارفه أنا بتكلم عن إيه أنصحكم تروحوا تتفرجوا علي فيلم Captain Phillips اللي من بطولة (توم هانكس Tom Hanks) وأحداثه كلها حصلت فعلاً علي فكرة .. عشان العالم أو خلينا نقول القوي العظمي اللي كانت بتخسر فلوس بالهبل بسبب القرصنة وبسبب إن شركات شحن كتير بقت بتفضل تمشي من طريق الرجاء الصالح بدل ما تخاطر وتمشي من قناة السويس وده في حد ذاته بفلوس فهم قرروا يبقي ليهم وجود مسلح عبارة عن قواعد بحرية لحماية طرق التجارة .. الدول اللي بقي ليها وجود مسلح في المنطقة هم اللاعيبة الأساسية اللي هم أميركا والصين وفرنسا بإعتبار إن فرنسا زمان كانت محتلة الصومال وجيبوتي وإنضم ليهم اليابان والمملكة العربية السعودية .. الدول دي كلها ليها قواعد بحرية عسكرية في المنطقة وحزر فزر حطينها فين؟ .. في جيبوتي.
جيبوتي دي دولة صغيرة .. هي المفروض إنها عضوة في جامعة الدول العربية يعني علي الورق هي دولة عربية بس إعتبر المعلومة دي ولا كإنك سمعتها .. جيبوتي كانت ولا زالت الحقيقة ماشية بمبدأ أبيع نفسي لأول مشتري أت .. بس يمكن الفرق إنها دلوقتي بقت بتعرف إزاي تنقي اللي يشتري .. جيبوتي كان ليها ميناء موقعه تحفة اسمه ميناء دوراليه Doraleh والميناء ده هم باعوا حق إدارته سنة 2006 لشركة DP World الإماراتية لمدة 30 سنة يعني العقد حيخلص في 2036 .. للي منكوا أول مرة يسمعوا اسم شركة DP World فالشركة دي هي شركة مقرها دبي وتعتبر أكبر شركة إدارة موانيء في العالم .. شهر فبراير 2019 جيبوتي ربنا كرمها واستردت حقها في إدارة الميناء بعد خناقة قانونية قعدت سنين في المحاكم الدولية ولا أجدعها قضية طلاق في محكمة الأسرة عندنا .. بس مهم تكون فاهم هو سبب الخناقة دي إيه .. شركة DP World زيها زي أي شركة عايزه تجيب فلوس وعشان كده هم عايزين يسيطروا علي طريق التجارة من أول سنغافورة لحد قناة السويس وعشان كده هم حاطين إيديهم علي كذا ميناء في الطريق ده زي ميناء جده السعودي وميناء بربرة Berbera في دولة صوماليلاند اللي لحد دلوقتي مش معترف بيها دولياً زي ما قلتلك.
لحد دلوقتي الكلام جميل .. في يوليو 2017 جيبوتي مضت عقد مع شركة صيني اسمها ميرشانتس جروب Merchants Group عشان تعمل منطقة تجارة حرة ب3.5 مليار دولار .. المشكلة إن هيئة إدارة ميناء داليان Dalian Port Authority اللي هو واحد من أكبر موانيء الصين والعالم بتملك حصة في شركة Merchants Group وبناء عليه الصفقة دي لما إتمضت (علي الأقل من وجهة نظر DP World) خلت منافس ليها اللي هي Dalian Port Authority تاخد حتة من التورتة بتاعتها اللي هي دافعه ثمنها .. جيبوتي و DP World رفعوا قواضي علي بعض لحد ما زي ما قلتلك في شهر فبراير 2019 جيبوتي رجعت تاني تدير الميناء بتاعها.
إذا كانت جيبوتي في رأيي هي أهم دولة في Horn of Africa ففي رأيي برده إن أهم شخصية هو بني أدم إنت مسمعتش اسمه قبل كده هو (أبي أحمد Abiy Ahmed) رئيس وزراء أثيوبيا .. الرجل ده عنده 42 سنة ويعتبر أصغر حاكم في أفريقيا كلها بس مش ده المهم .. الرجل ده لما مسك الحكم خد بلده أثيوبيا ونفضها زي ما الست والدتك كده بتنفض سجاد الشقة لما بتروق البيت .. إنت لو دخلت علي النت عملت Search بسيط أوي عنه حتلاقي إن الناس كاتبه إن أهم إنجازاته هي إنه بدأ يدي القطاع الخاص فرصة إنه يدخل يشتغل في حتت في الإقتصاد مكنش مسموحله إنه يقرب منها زي الإتصالات والنقل الجوي ودي حاجة حلوة أوي .. وكمان إنه طلع الالاف من المعتقلين السياسيين من السجن ودي حاجة حلوة أوي أوي .. بس يمكن الحاجة اللي عملها وتعتبر أهم إنجازاته إنه مضي إتفاق سلام مع أريتيريا عشان تنتهي الحرب بين البلدين اللي بقالها أكتر من 20 سنة .. لمجرد تقريب الصورة حاول تتخيل إن إيران مضت إتفاق سلام مع السعودية وإن إيران رجعت الجزر الإماراتية الثلاثة اللي كانت محتلاها وإن السُنة والشيعة بقوا عايشين في تبات ونبات وخلفوا صبيان وبنات .. أهو ده اللي عمله (أبي أحمد) .. الرجل خلي أثيوبيا يبقي ليها الحق في إنها تستخدم موانيء أصعب Assab وماساوا Massawa اللي كانوا تبع أثيوبيا بس راحوا منها لما أريتريا استقلت عن أثيوبيا سنه 1993 وبناء علي إتفاق السلام بينه وبين أريتريا بقي من حقه يستخدم الموانيء دي.
فيه منكوا دلوقتي بيقول لنفسه إيه ده كله أنا تعبت .. هو إيه علاقة أثيوبيا بأريتريا بجيبوتي بالسعودية؟ .. إنت دخلتني في ميه موضوع في بعض .. أنا عارف إنك تهت عشان كده خليني أبسطلك الدنيا في الأخر.
السعودية والإمارات رسموا نفسهم قدام العالم إنها هم حمامة السلام اللي خلت أثيوبيا وأريتريا يرجعوا لبعض .. السعودية هي اللي تولت الجانب الدبلوماسي من الصلح إنها إتكلمت مع الطرفين وقعدتهم مع بعض لحد ما إتصالحوا .. الإمارات هي اللي دفعت من جيبها 3 مليار دولار لأثيوبيا عشان تنقذ عملتها من الإنهيار وكأنها بتلوي دراعها عشان تقبل بتدخل السعودية إنها تصلح بينهم .. المهم إن أثيوبيا وأريتريا إتصالحوا وإن نفوذ السعودية والإمارات دلوقتي بقي مهم وكلمتهم بتتسمع .. طب وبعدين .. شركة DP World اللي زي ما تكون معتبرة جيبوتي هي الإيكس بتاعها وقررت تغيطها فترتبط بحد تاني .. الشركة حطت 442 مليون دولار كاستثمارات مباشرة في ميناء بربرة Berbera اللي بفكرك بس إنه موجود في صوماليلاند .. أثيوبيا قالت إنها مستعدة تشتري حصة 19% من أسهم الميناء عشان شركة DP World تبقي معاها 51% والباقي بتملكه حكومة صوماليلاند .. عشان جيبوتي متحسش إن أثيوبيا بتقف في صف DP World قصادها فأثيوبيا قررت تشتري حصة من أسهم ميناء جيبوتي اللي هو أهم ميناء عندها واللي أثيوبيا 90% من المنتجات اللي بتصدرها بتعدي منه .. طب أزيدك من الشعر بيت .. فيه كلام علي إن حيتعمل خط سكة حديد يربط بين جيبوتي وبين العاصمة الأثيوبية أديس أبابا بتكلفة 4 مليار دولار حتدفعهم الصين من جيبها.
فيه ليلة كبيرة وفلوس كتير بتتدفع ودول كتير بتمد نفوذها في منطقة القرن الأفريقي وإحنا عايشين في اللالا لاند .. لحد إمتي حنفضل كده؟ .. إنت بتتكلم علي إن حيتعمل 10 موانيء علي ساحل شرق أفريقيا وإحنا لحد دلوقتي محتاسين في تطبيق فكرة مشروع ميناء بورسعيد ومش عارفين نعمل المنطقة الحرة وصرفنا القرشين اللي حيلتنا علي ترعة قناة السويس اللي ملهاش أي ستين لازمة .. بس إحنا عندنا الConcept بتاع الحمد لله.
المصدر:
- مقالة بعنوان Everyone wants a piece of the Horn of Africa’s ports .. كله عايز حتة من تورته موانيء القرن الأفريقي .. نشرت في موقع OZY وده لينك المقالة الأصلية:
https://www.ozy.com/fast-forward/everyone-wants-a-piece-of-the-horn-of-africas-ports/90536
