عشان تفهم موضوعنا اللي حنتكلم فيه النهاردة عايزك تسأل نفسك سؤال .. هل إنت شخصياً أو هل إنت تعرف شخص مقتنع بإن الست لازم تقعد في البيت و الرجل هو اللي يشتغل و يصرف علي البيت و هي اللي تربي العيال؟ .. لو إنت من الناس اللي مقتنعة بالرأي ده فأحب أقولك إنك مش لوحدك .. حضرتك البلد كلها ماشية بالمبدأ ده .. أيوه ده مجتمع ذكوري .. ده مجتمع شايف إن الرجل هو الكل في الكل .. الرجل هو اللي مسيطر علي البرلمان و الحكومة و القضاء .. حتي القانون نفسه بيعتبر إن الست مواطن درجة ثانية .. ده مش سر و كلنا عارفينه بس فيه بحث إتعمل بالتعاون بين الأمم المتحدة و بين جمعية خيرية إسمها Promundo و البحث ده ركز في نقطة العلاقة بين الرجل و الست في 4 دول عربية هي مصر و لبنان و المغرب و فلسطين .. عشان بس الأبحاث من النوع ده بيبقي فيها لت و عجن كتير و محدش بيفهم منها حاجة فخلينا نحطلك شوية نتائج من اللي وصل ليها البحث في نقط بس ياريت تبص علي الرسم البياني اللي عندك في الصور كمان:
- حوالي 90% من الرجاله المصريين شايفين إن الرجل لازم يبقي هو صاحب القرار النهائي في كل حاجة بتحصل في البيت و إن الست هي اللي تتولي شغل البيت من عمايل أكل وتنظيف و غسيل و تربية الأطفال.
- حولي 77% من الرجاله المغاربة شايفين إن واجب عليهم إنهم يمارسوا دور القوامة علي زوجاتهم يعني هو اللي يصرف علي البيت و هي متشتغلش.
- في الدول الأربعة (بفكرك إنهم مصر و لبنان و المغرب و فلسطين) ما بين 10-45% من الرجال اللي متجوزين أو مطلقين إعترفوا إنهم ضربوا زوجاتهم علي الأقل مرة واحدة.
- في الدول الأربعة ما بين 31-64% من الرجال إعترفوا بإنهم تحرشوا جنسياً بستات في الشارع.
- أقل من 50% من الرجاله المغاربة شايفين إن الزوج لما يغتصب زوجته فده يعتبر جريمة و لازم القانون يعاقب الزوج اللي يرتكب الجريمة دي.
- أغلب الرجاله المغاربة شايفين إن الزوج من حقه إن زوجته تشبع رغباته الجنسية وقت ما هو يعوز و مش من حقها تقوله معلش أصلي تعبانه أو مش في المود دلوقتي.
- حوالي 70% من الرجاله المصريين موافقين علي ختان البنات اللي بيسموه Female Genital Mutilation أو FGM عشان لو شفت المصطلح ده بعد كده تكون عارف معناه إيه.
- أكثر من 50% من الستات المصريات موافقين هم كمان علي ختان البنات.
- في مصر و فلسطين أكثر من 50% من الستات و الرجاله شايفين إن لو إمرأه أغتصبت فهي لازم تتجوز اللي إغتصبها.
- بإستثناء لبنان .. أكتر الستات شايفين إن لو المرأة و هي ماشية في الشارع كانت لابسه لبس مستفز فهي تستاهل لو إتعرضت لتحرش جنسي.
- أكثر النساء اللي الدراسة شملتهم موافقين علي مبدأ القوامة بإن الرجال قوامون علي النساء.
بالنسبة لمصر بس:
- حوالي 75% من الستات في مصر شايفين إن فعلاً الرجال قوامون علي النساء رغم إني بدأت أقتنع بإن الرجاله و الستات في مصر عندهم مفهومين مختلفين خالص عن بعض لمفهوم القوامة.
- أكثر من 50% من الرجال المصريين شايفين إن فيه أوقات كتير الستات بتستحق إن زوجها يضربها.
- حوالي 25% من الستات شايفين إن مينفعش الرجل يشارك في شغل البيت و تربية الأطفال .. أيوه حضرتك لو Feminist عايشة في القاهرة أو الإسكندرية فيه ملايين غيرك إتربوا في الصعيد و الأرياف و ليهم مفهوم مختلف خالص عنك بخصوص معني الأنوثة.
- أكثر من 25% من الستات شايفين إن البنت اللي مش متجوزة يحقلها إنها يبقي ليها حياتها المستقلة و ممكن تأجر شقة لوحدها و تشتغل و تصرف علي نفسها زيها زي الرجل العازب اللي لسه متجوزش.
خلينا نختم بسؤال بسيط .. تفتكر ده سببه إيه؟
فيه رقم مرعب الدراسة وصلتله و هو إن 75% من الرجاله عندهم حالة رعب نفسي من فكرة إنهم ميبقوش قادرين يصرفوا علي بيوتهم .. في دولتين بالذات هم مصر و فلسطين الرجال قالوا إنهم إما عندهم إكتئاب أو ضغط نفسي شديد لإرتفاع معدلات البطالة و مفيش شغل و حتي اللي بيشتغل بيلاقي إن الفلوس اللي بتدخل البيت مش مكفياه .. صحيح إن ده مش مبرر و إن الست هي كمان بتحس إنها مضغوطو و إنها مكتئبة بس المشكلة اللي الدراسة وصلتلتها إن الحالة الإقتصادية اللي الدول العربية وصلت ليها خلقت حالة جديدة بيسموها أزمة الرجولة Crises of Masculinity .. أزمة الرجولة بتخلي الرجاله في الدول العربية الأربعة بدل ما تقتنع بإن فيه مشكلة و تبدأ تحلها إذا بيهم بيتمسكوا أكتر بالحاجة اللي بتخلي المشكلة تسوء أكتر.
الدراسة إكتشفت إن بإستثناء لبنان تلاقي إن الرجاله في مصر و فلسطين و المغرب اللي معدل أعمارهم قليل يعني المفروض إنهم شباب منفتحين علي العالم و المفروض إنهم متعلمين كوي رأيهم في العلاقة بين الرجل و الست متختلفش كتير عن رأي أباءهم و أجدادهم .. تفسير ده من وجهة نظر اللي عملوا الدراسة هو الوضع الإقتصادي الحالي .. الفكرة إن الشباب العربي لإنه مش لاقي شغل و حتي اللي بيشتغل مش لاقي مصاريف إنه يتجوز و يفتح بيت و ده في حد ذاته خالق المشكلة اللي انت بتشوفها بنفسك بين أي شاب و بين أي بنت شايفة نفسها إنها سترونج انديبيندت وومان Strong Independent Woman.
فكر فيها كده .. لو انتي بنت بتشتغلي و بتاخدي مرتب و شايفه إنك لمجرد مش بتاخدي فلوس من أبوكي و مامتك فإنتي كده وصلتي للإستقلال المالي و بالتالي حاسه إنك ملكة قرارك .. طبيعي إنك تحسي إن عندك مشكلة كبيرة مع أي شاب يتقدملك و بتحسي إنه عايز يقعدك في البيت و ميخلكيش تشتغلي أو علي الأقل يحسسك إن شغل البيت ده بتاعك انتي مش بتاعه .. فجأة بتحسي إنك بينك و بينه نفس العلاقة بين باتمان و الجوكر كده .. بس اللي انت محتاجه تفهميه إن وجهة النظر الذكورية دي مش جايه من إحساس الشاب بالقوة إنما جايه من إحساسه بالضعف.
فيه دول تانية زي المملكة العربية السعودية مثلاً الدراسة بتقول إن عامل الدين بيبقي له تقل و أهمية أكبر من الدول الأربعة اللي الدراسة شملتهم .. دولة زي السعودية مثلاً عندها مبدأ القوامة ده مش مجرد رأي فقهي إنما ده إسلوب حياة أو Life Style .. صحيح إن الدين برده بيبقي له عامل في الدول الأربعة يعني فيه شباب كتير في مصر رأيهم بإن الست تقعد في البيت جاي من إعتقاد ديني بإن الرجال قوامون علي النساء.
طب و الحل؟
فيه ناس شايفة إن الحل إنك تعلم البنات إنهم يبقوا Strong Independent Women لما تبقي مستقلة مالياً و ده لوحده حيخلي ليها شخصيتها المستقلة بس كل المؤشرات بتقول إن الحل ده مش جايب نتيجة .. الحل المناسب من وجهة نظر ناس تانية إنك تبدأ تشتغل علي الرجل نفسه .. إنك تبدأ تعلمه يعني إيه يبقي رجل و يعني إيه يبقي أب و إزاي يتعامل مع زميلته في الشغل.
المصدر:
مقالة بعنوان The sorry state of Arab men نشرت في مجلة The Economist و ده لينك المقالة الأصلية:
https://www.economist.com/news/middle-east-and-africa/21721651-they-are-clinging-patriarchy-comfort-sorry-state-arab-men
