من ساعة فيلم أمريكا شيكا بيكا و من و إحنا صغيرين بنحلم باليوم اللي أي واحد فينا الزهر يلعب معاه و يهاجر أميركا .. ياااااه ده حلم أي حد .. سواء بقي بتتكلم عن دكتور مهندس محامي صنايعي .. الهجرة لأميركا ده مش عارف بيجي تحت أو فوق تحرير القدس كواحد من طموحات أي مصري .. بس يمكن اللي إحنا منعرفوش إن الهجرة لأميركا دي إذا كنا إحنا هنا في مصر بنشوفه إنه حلم فهناك هو بالنسبة ليهم قضية سياسية .. زي ما انت كده و انت صغير في حضانة بتحلم تروح المدرسة زي إخواتك و ماما تعملك سندوتشاتك و تلبس اليونيفورم بقي .. ده حلم بالنسبة ليك .. بالنسبة لمامتك و باباك ده بيبقي فيلم رعب .. مين يوديك و مين يجيبك و مين يذاكرلك و مين يعملك الأكل .. الهجرة لأميركا بالنسبة للأمريكان هي قضية رأي عام كل واحد بيشوفها من وجهة نظره هو و انا النهاردة مش ناوي أشرحلك هي الخناقة بين الإتنين عامله إزاي أو مين واخد أنهي صف .. انت معاكش بطاقة إنتخابية أميركاني عشان يهمك الموضوع .. انا حكلمك عن الموضوع اللي يهمك و هو إذا انت كنت بتحلم تهاجر لأميركا تعمل إيه؟ .. لإن أيا كان اللي بيحكم أميركا و أيا كان رأيك إيه في كيس الشيتوس الحجم العائلي اللي ماسكها دلوقتي و أيا كان رأيك في اللي حينزل قدامه الإنتخابات السنة الجاية فالوضع علي الأرض إن فيه System معمول للهجرة و النهاردة انا جاي أكلمك و أفهمك الSystem ده ماشي إزاي.
الهجرة لأميركا بالنسبة للأمريكان مرتبطة بكذا مصطلح أهمهم هو Legal Immigration أو الهجرة الشرعية و ده عامل زي مفهوم المايوه الشرعي كده .. كلنا عارفين إنه حاجة مهمة لإن أي بنت محجبة من حقها تروح تستمتع بالبحر زيها أي حد تاني و في نفس الوقت إحنا مش عارفين نعمله ولا نصممه و إسأل أي بنت حاولت تشتري مايوه شرعي قبل كده .. الأمريكان عارفين إن Legal Immigration دي حاجة مهمة و أهميتها بتسّمع في قوة الأداء الإقتصادي للبلد .. مش كده وبس .. زي ما البنات المحجبات في مصر كتير فبرده المهاجرين الشرعيين في أميركا كتير .. 13% من إجمالي تعداد سكان أميركا دلوقتي أساساً مهاجرين جايين من بره البلد .. 77% من ال13% دول مهاجرين شرعيين .. معني كده إن الموضوع مهم و حساس و محتاج System جامد فشخ عشان يعرف يدّخل مين و ميدّخلش مين .. المشكلة إن في أول 100 سنة من تأسيس الدولة الأميريكية الأمريكان مكانش عندهم قوانين هجرة و الSystem بتاع الهجرة إتحط لما عدد المهاجرين زاد أوي و محدش بقي عارف هو مين جه منين و إمتي .. عشان كده System الهجرة لأميركا فيه كمية هبد انت عمرك ما شفتها قبل كده زي ما انت حتشوف بنفسك كمان شوية.
أول و يمكن أكبر هبدة انا حتكلم عنها النهاردة في الSystem بتاع Legal Immigration لأميركا هو حاجة إسمها Country Caps يعني سقف عدد المهاجرين من كل دولة .. الهبدة دي بتقول إن كل سنة مينفعش عدد المهاجرين اللي جايين من دولة معينة يعدي 7% من إجمالي عدد المهاجرين اللي جايين أميركا السنة دي .. ده معناه إن لو انا مواطن مصري أو صيني أو هندي أو مكسيكي يعني عايش في بلد عدد سكانها كبير فانا بتعامل بنفس المعايير بتاعة مواطن عايش في بلد مفيهاش حد زي جزر القمر أو قبرص .. حكاية Country Caps دي بتمشي علي كل فئات الهجرة اللي انا حتكلم عنها دلوقتي و اللي هم 4 .. فيه 4 فئات انت ممكن تهاجر بيهم لأميركا:
- العائلة .. إن يبقي ليك حد من قرايبك عايش في أميركا و معاه Green Card أو الجنسية و دول أكتر فئة الناس بتهاجر لأميركا عليها.
- شغل .. إن يجيبلك Offer من شركة أمريكاني.
- انت من المحاظيظ .. يعني دخلت في الهجرة العشوائية أو Visa Lottery و كسبت و دي حاجة حشرحها كمان شوية و علي فكرة دول أقل فئة من حيث العدد من الناس اللي فعلاً بتقدر تهاجر لأميركا.
- انت من اللي الدنيا داست علي وشهم .. انت لاجيء جاي من بلدك هربان.
خليني أخدهم واحدة واحدة بسرعة أوي و أبدأ بالكلام عن العائلة:
فعلياً تلتين اللي بيهاجروا لأميركا كل سنة بيخشوا تحت بند العائلات و دي حاجة منطقية و مفهومة جداً .. لو انت ليك حد هناك فحيقدر يستقبلك و يرعاك و يوفرلك سكن لحد ما تشتغل و تقف علي رجلك .. ده علي أساس إنك في عيلة طايقة بعض طبعاً .. المشكلة إن زي ما قلتلك الهجرة لأميركا موضوع سياسي بحت بالنسبة للأمريكان .. كيس الشيتوس لما كسب الإنتخابات إستغل النقطة دي لصالحه أوي .. حاول تتخيل مثلاً إن لا قدر الله يعني حصلت عندنا إنتخابات رئاسية و إن طويل العمر يطول عمره يزهزه عصره و ينصره علي مين يعاديه اللي عندنا دخل قصاد مرشح تاني و المرشح ده مثلاً قال إنه لو بقي رئيس حيرمي الزملكاوية كلهم في السجن .. طبعاً الأهلاوية كلهم حيروحوا جري ينتخبوه و ينسوا إن الزملكاوية دول إخواتهم في الوطن .. ده اللي عمله كيس الشيتوس .. هو جه قال إن من أولوياته إنه يلغي الهجرة لأميركا تحت بند العائلات اللي هو بيسميه Chain Migration أو هجرة السلسلة علي أساس إن الهجرة من النوع ده زي السلسلة أو بكرة الخيط بيكروا ورا بعض و مش بتعرف تتحكم فيها و ده إسم هو إخترعه من دماغه عشان يخوف الأمريكان من الهجرة .. المنطق اللي هو باعه للأمريكان إن الSystem المطبق في أميركا حالياً بيقول إن لو انا مهاجر من مصر جيت أميركا فانا أقدر أدخل عيلتي كلها .. مراتي و عيالي و عماتي و خالاتي و ولاد أختي .. طبعاً دي هبداية بعيدة المدي و عابرة للقارات بس (دونالد ترامب Donald Trump) بطريقة ما عرف يقنع بيها أنصاره و مؤيديه .. ليه بقي دي هبداية؟
انا عشان أجيب حد من عيلتي فالSystem بيقول إن لازم من قرايب الدرجة الأولي يعني يا مراتي يا إخواتي يا أبويا يا أمي .. مش كده و بس .. لازم يتعمل Background Check للي حييجي يعني يتعمل عنه تحريات ممكن تاخد سنين .. مش كده و بس .. فاكر Country Caps؟ .. ده بينطبق في حالة إني حجيب حد من أهلي .. عشان أحطك في الصورة بس .. لو انا مهاجر صيني عايز أجيب حد من إخواتي لأميركا فحالياً إدارة الجوازات و الهجرة في أميركا بتعمل Background Checks لناس مقدمة طلبات هجرة من 2006 .. لو انا مهاجر هندي فحالياً هم وصلوا للطلبات اللي إتقدمت من سنة 2004 .. أما بقي لو انا مكسيكي فاللهم صلي علي النبي هم لسه عطلانين من سنة 1997 ..و عشان تعرف بس إن كيس الشيتوس ده رجل ابن و#%&هو كان مقدم مشروع قانون لتعديل بند العائلة في Immigration System عشان يسمح بدخول الزوجة و الأولاد بس رغم إنه هو شخصياً مخلي مراته اللي هي أساساً مهاجرة سلوفينية تدخل أبوها و أمها لأميركا من كام شهر.
تاني طريقة انت ممكن تروح بيها أميركا هي الشغل:
اللي بيحصل إن شركة في أميركا بتبعتلك Offer عشان تروح تشتغل هناك و بتروح علي فيزا شغل مؤقتة .. بس خليك دايماً فاكر إنها فيزا مؤقتة يعني حيجيلها وقت و تخلص .. اه هي ممكن تتجدد بس ده بيعتمد إن الشركه أو صاحب الشغل اللي انت شغال عنده عايز يجددلك إقامتك .. فوق ده كله إن مش كل الشغلانات ممكن تروح بيها أميركا علي حسها .. بند الشغل في الهجرة متقسم كذا حاجة يعني مثلا فيه R-1 و ده معمول للشغلانات الدينية زي شيخ أو قسيس أو حاخام .. و فيه P-1A و ده لو انت لاعيب كورة مثلاً رحت لعبت في نادي أميركاني .. و فيه H-2A و ده لو انت جالك شغل في مزرعة عشان تشتغل فلاح هناك .. الفكرة إنك ممكن تروح هناك تشتغل علي فيزا مؤقتة و لما الشركة بتاعتك تحاول تجددهالك تترفض .. ده حصل لملايين من ضمنهم واحد هندي إسمه (كونال بال Kunal Bahl) جاله شغل في شركة مايكروسوفت و لما حاولوا يجددوا إقامته إترفضت و إضطر يرجع الهند و هناك أسس شركة إسمها Snapdeal و بقت من أكبر شركات Startup هناك .. كل سنة بيبقي فيه 140 ألف فيزا للشغل بتتفتح كل سنة و بيتقدم ليها سواء اللي أول مرة يجي أميركا يشتغل أو اللي أساساً في أميركا شغال .. لو انت مصري رحت أميركا علي فيزا عمل مؤقتة فانت كل 11 شهر بتيجي تقدم ورقك للسفارة الأميريكية في القاهرة و انت بتدعي و تصلي إن الفيزا بتاعتك تتقبل .. و لو حاولت تاخد الGreen Card من فيزا الشغل حتلاقي نفسك لبست في الحيط لإن قاعدة Country Caps بتطبق هنا كمان.
لو كل اللي انا قلته ده مجابلكش إحباط فخليني أجبلك إكتئاب .. 80% من اللي بيهاجروا أميركا كل سنة بيجوا عن طريق يا إما العيلة أو الشغل .. لنفترض بقي إنك من المحاظيظ .. هنا بيجي الكلام عن الهجرة العشوائية:
إسمها بالكامل Diversity Visa Lottery و دي زيها زي بند العائلة في نظام الهجرة لأميركا عليها خناقة كبيرة .. كيس الشيتوس بيقول إن الSystem عامل بالضبط زي قرعة دور المجموعات من Champions League .. الدول بتحط أسامي الناس اللي هي عايزه تخلص منهم و أميركا بتحط الأسامي دي في شفشق و بيجي حد يمد إيده جوه الشفشق ينقي في الأسامي اللي حتيجي أميركا .. انا مش بهزر ولا بقلش .. هو فعلاً بيقول كده و هو فعلاً مقتنع إن ده الSystem بتاع الهجرة العشوائية .. طبعاً هو حمار .. اللي بيحصل إن مثلاً زي 2017 لما فيه 22 مليون بني أدم قدموا طلباتهم في الموقع الرسمي بتاع الهجرة العشوائية عشان برنامج كومبيوتر بشكل عشوائي يختار 50,000 إسم من أصل 22 مليون .. يعني فرصتك إنك تكسب في الهجرة العشوائية دي إن إسمك يجي صدفة من ضمن 285 إسم .. و علي فكرة دي نفس فرصتك إنك بمجرد ما تيجي أميركا تروح سوبرماركت تشتري حاجة تلاقي حد ماسك مدفع رشاش راح قتله كام بني أدم و تكون انت منهم .. الحقيقة إن الهجرة العشوائية دي أقل نسبة من الناس اللي بتهاجر أميركا كل سنة و عشان كده محدش في أميركا شاغل نفسه بيها أوي.
هنا بيجي الكلام عن أخر فئة .. اللي الدنيا داست علي وشهم أو اللاجئين:
قدام الناس الأمريكان بينفخوا صدرهم أوي و يقولوا إنهم أكتر بلد في العالم بتستقبل لاجئين كل سنة .. بالأرقام الناس دي عندها حق .. في أخر سنة في حكم (باراك اوباما) أميركا إستقبلت 110,000 لاجيء في 2017 .. لما جه كيس الشيتوس و في أول سنة له في الحكم في 2018 العدد ده إتخسف به الأرض ل45,000 .. السنة دي الرقم قل أكتر ل30,000 و فيه كلام علي إن إدارة (دونالد ترامب) بتفكر تقلل الرقم ده و تخليه .. حزر فزر كام؟ .. صفر .. هو مش عايز أميركا تستقبل أي لاجئين خالص و ده بيوديني لأهم نقطة في اللي عايز أوصله ليك النهاردة و هو إن (دونالد ترامب) مش عايز مهاجرين ييجوا أميركا .. في أول سنة له في الرئاسة هو قدم للكونجرس مشروع قانون بيقلل عدد المهاجرين اللي بيدخلوا أميركا كل سنة للنص .. لما القانون متوافقش عليه بدأت إدارته تعدل في لائحة الهجرة عشان الوقت اللي أي حد محتاجه عشان ورق الهجرة بتاعه يخلص بيزيد بنسبة بتتعدي 64% .. يعني لو انا مش عارف أخليك متجيش فانا حطلع عينك عشان تيجي .. و عشان أطلع عينك زيادة هم زودوا حتة جديدة في اللايحة إسمها Public Charge Rule و هي إنهم بيشوفوا حسابك في البنك و لو حسوا إنك لما تيجي أميركا مش حيبقي معاك فلوس فانت مش حتيجي.
اللي انا عايز أوصله ليك إن الSystem مش Fair و مش عادل و لو انت ناوي تمشي في سكة الهجرة لأميركا فانت حيطلع عين أهلك عشان تروح و حتي لو رحت حيطلع عين أهلك عشان تعيش .. هناك هم بيتخانقوا كتير علي قوانين الهجرة و مين يجي و مين ميجيش .. في رأيي إن الخناقة دي لو تعبت نفسي عشان أفهمالك مش حتفرق معاك كتير .. اللي حيفرق معاك إنك تفهم System و زي ما انت شايف ده System ابن وس%$#.
المصدر:
حلقة من برنامج Last Week Tonight with John Oliver و ده لينك الحلقة علي YouTube لو حبيت تتفرج عليها:
http://ww.youtube.com/watch?v=tXqnRMU1fTs
