إيمانويل ماكرون ومراته .. أكبر فرق سن بين رئيس ومراته في العالم!

اللي قدامك في الصورة ده يبقي الرئيس الفرنسي الجديد (إيمانويل ماركون Emmanuel Macron) واللي واقفه جنبه دي تبقي مراته (بيرجيت Brigitte) وفي حالة إنك متعرفش فمراته أكبر منه في السن ب24 سنة .. لنفترض جدلاً إنك عمرك ما شفت (إيمانويل ماركون) قبل كده ولا كنت تعرف إنه رئيس فرنسا وجيت أول ما عرفتك عليه وريتك صورته هو مراته وقلتلك معلومة إنها أكبر منه في السن ب24 سنة فطبيعي إنك تفضل تسأل طب هم اتعرفوا علي بعض ازاي؟ وازاي اتجوزوا؟ .. لا حتسألني عن سياساته ولا عن توجهاته الاقتصادية ولا عن هو شايف مثلاً مستقبل العلاقات المصرية الفرنسية حتبقي ازاي في عهده .. كل اللي حيهمك تعرفه هو ازاي هو ومراته بينهم فرق السن الكبير ده؟ .. ده انت في مصر فمابالك بالفرنسيين .. الكلام والقيل والقال عن الحياة الزوجية بتاعة (إيمانويل ماركون) خلاه يقول في حوار عمله مع جريدة Le Parisian الفرنسية إنه لو كان هو اللي أكبر في السن من مراته ب24 سنة مكنش حد اهتم ولا اتكلم عن الموضوع.

لسبب كلنا عارفينه بقي فرق السن بين (إيمانويل ماكرون) ومراته (برجيت) أكتر حاجه الناس سواء في فرنسا أو بره فرنسا بتتكلم عنها .. لا حد بيتكلم عن سياساته الاقتصادية ولا سياساته الخارجية .. كل اللي الناس بتتكلم عنه هو ازاي فرق السن بينه وبين مراته كبير كده.

اللي حنحاول نتكلم عنه في المقالة دي هو إننا نجاوب علي سؤال واحد: هو فعلاً مفيش رئيس دولة فيك يا عالم صادف إن مراته تبقي أكبر منه في السن بالشكل ده؟

الحقيقة إن جواز (إيمانويل ماركون) من مراته حطم أرقام قياسية كتير أوي في فرنسا .. يعني مثلاً .. هو حيكون أول رئيس في تاريخ الجمهورية الخامسة الفرنسية اللي يكون سنه أصغر من مراته .. مش كده وبس .. فرق السن بينه وبين مراته حيكون أكبر فرق في السن بين أي رئيس ومراته في تاريخ الجمهورية الخامسة الفرنسية .. فيه رسم بياني عندك في الصور بيوريك فرق السن بين كل رئيس فرنسي ومراته وحتشوف فيه إن أكتر رئيسين كانوا (شارل دي جول Charles de Gaulle) و(فرانسوا أولاند Francois Hollande) اللي كل واحد فيهم فرق السن بينه وبين مراته لما بقي رئيس كان حوالي 10 سنين .. لكن .. وحط تحت لكن دي مليون خط .. الحياة العاطفية لرؤساء فرنسا لو ركزت فيها أوي حتلاقي فيها العجب وفيها جوازات أغرب بكتير من جوازة (إيمانويل ماركون).

فرق السن بين رؤساء الجمهورية الخامسة الفرنسية وبين مراتتهم وزي ما انت شايف (إيمانويل ماكرون) بيتربع علي العرش بفرق سن وصل 24 سنة عن مراته ووراه الرئيس الفرنسي (شارل ديجور) اللي كان فرق السن بين ومراته 10 سنين بس.

عندك مثلاً الرئيسين السابق (فرانسوا أولاند) واللي قبله (نيكولا ساركوزي Nicolas Sarkozy) .. الاتنين طلقوا مراتاتهم وهم في الرئاسة وبمجرد ما اتطلقوا تلاقي إن (أولاند) دخل في علاقة عاطفية مع الممثلة (جوليا جاييت Julia Gayet) واللي أصغر منه ب18 سنة و(ساركوزي) راح اتجوز عارضة الأزياء السابقة (كارلا بروني Carla Bruni) اللي هي كمان أصغر منه ب13 سنة .. أزيدك من الشعر بيت .. الرئيس الفرنسي (فرانسوا ميتران Francois Mitterand) كان له علاقة عاطفية مع المؤرخة الفنية (أن بينجو Anne Pingeot) اللي كانت أصغر منه ب27 سنة والعلاقة دي قعدت سنين في السر ونتج عنها طفلة غير شرعية وطبعاً فضيحة زي دي كانت كفيلة إنها تدمر حياته السياسية بس الشعب الفرنسي شعب جميل وبيحب الفضايح دي أوي وتقبل الموضوع بصدر رحب و(ميتران) كمل رئاسته بشكل طبيعي جداً .. بعد كل ده جاي تقولي إزاي (ماكرون) يتجوز واحدة أكبر منه ب24 سنة؟

الرئيس الفرنسي (فرانسوا أولاند) اللي كان بيحكم قبل (ماكرون) واللي شعبيته كانت في النازل لحد ما الفرنسيين صحيوا الصبح علي خبر إنه بيخون مراته مع الممثلة (جوليا جاييت) اللي أصغر منه ب18 سنة وهوبا دابل كيك الرجل شعبيته نطت في السما.

فضايح رؤساء فرنسا العاطفية إستمرت مع (نيكولا ساركوزي) اللي وهو في الرئاسة طلق مراته عشان يتجوز الموديل والممثلة (كارلا بروني) اللي هي كمان أصغر منه في السن ب13 سنة.

طب دي فرنسا .. لو حبيت تتكلم حول العالم بقي حتلاقي إنك تشوف رؤساء الدول متجوزين مين ده موضوع مسلي جداً .. بص علي الدول العشرين الأقوي إقتصادياً في العالم اللي بيتقال عليهم G20 تلاقي إن فيه رسم بياني عندك في الصور برده بيوريك فرق السن بين رؤساء الدول العشرين دي مع زوجاتهم .. فيه عندك 3 رؤساء اللي هم (جايكوب زوما Jacob Zuma) رئيس جنوب أفريقيا و (مايكل تيمير Michael Temer) رئيس البرازيل و (دونالد ترامب Donald Trump) رئيس أميركا فرق السن بينهم وبين مراتاتهم قريب من فرق السن اللي بين (ماكرون) و مراته .. والتنين المجنح اللي فيهم هو (جايكوب زوما) .. الرجل ده علي فكرة متجوز أكتر من واحدة و فرق السن بينه وبين أصغر زوجاته و إسمها (نومبوميليلو نتولي Nompumelelo Ntuli) حوالي 38 سنة.

(جايكوب زوما) رئيس جنوب أفريقيا أو الحاج متولي بتاع أفريقيا كلها اللي هو أصغر زوجاته فرق السن بينهم وصل 38 سنة.

فيه حالات خاصة تانية حول العالم .. يعني مثلاً العاهل السعودي الملك (سلمان) نعرف إنه متجوز أكثر من واحدة و أصغرهم سناً فيه فرق كبير في السن بينه وبينها بس مش عارفين كام سنة بالضبط وبالتالي إسمه مش مكتوب في الرسم البياني .. حالة تانية هي رئيس الوزراء الإيطالي (باولو جينتيلوني Paulo Gentiloni) اللي متجوز واحدة إسمها (إيمانويلا ماورو Emanuela Mauro) محدش عارف مولودة سنة كام و عشان كده برده مش حتلاقي إسمه في القائمة بتاعة الرسم البياني .. حالة ثالثة هي رئيس الوزراء الهندي (نيراندرا مودي Nerandra Modi) اللي أساساً منفصل عن مراته وعشان كده برده مش حتلاقي إسمه .. ويبقي التنين المجنح التاني الرئيس الروسي (فلاديمير بوتين Vladimir Putin) اللي سنة 2013 أعلن إنه إنفصل عن مراته ومن ساعتها وكل يومين تلاقيه ماشي مع بنت في عمر بنته.

زي ما انت شايف كل حكام أو خلينا نقول أغلب حكام الدول العشرين الأقوي إقتصادياً متجوزين ستات أصغر منهم في السن ويبقي الإستثناء الوحيد اللي ماشي علي نفس الخط مع (ماكرون) هي المستشارة الألمانية (أنجيلا ميركيل Angela Merkel) اللي متجوزه واحد إسمه (خواكيم ساور Joachim Sauer) أكبر منها في السن بخمس سنين.

المصدر: