تعديل إتعمل يوم 10 مارس 2021 .. يوم 31 يناير 2020 بريطانيا خرجت رسمي من الإتحاد الأوروبي .. (تيريسا ماي) قدمت إستقالتها سنة 2019 وجه مكانها (بوريس جونسون) ولحد يوم 31 ديسمبر 2020 كانت لسه المفاوضات شغاله بين بريطانيا و الإتحاد الأوروبي علي تفاصيل خروج بريطانيا.
بريكزت أو Brexit دي عشان تفهمها حاول تتخيل إنك تسمي أكبر خازوق خدته في حياتك إسم كيوت .. زي مثلاً واحدة إتجوزت لسنين و جوزها كان بيبهدلها و مطلع عنيها لحد ما إتطلقت منه بطلوع الروح بس لسه مسمياه علي الموبايل بتاعها (كوكي) .. للناس اللي مش عارفه يعني إيه بريكزت أو Brexit؟ فدي إختصار كلمتين في بعض هم Britain و Exit و دي بإختصار شديد الخطة اللي علي أساسها حتنفصل بريطانيا عن الإتحاد الأوروبي .. من حوالي سنتين و نص إتعمل إستفتاء جوه بريطانيا عشان الناس يجاوبوا علي سؤال بسيط .. هو أنتوا عايزين تفضلوا جوه الإتحاد الأوروبي ولا عايزين تطلقوا منه؟ .. الإجابة كانت قريبة أوي بحيث 51.9% بس من البريطانيين قالوا اه إحنا عايزين نتطلق من الإتحاد الأوروبي .. عشان تفهم الموضوع حاول تتخيل فعلاً إنه طلاق بين أي إتنين متجوزين .. زي ما أي حالة طلاق فيها تفاصيل كتير لازم تتحل من أول مين حيمشي من الشقة؟ و القايمة حتتدفع إزاي؟ و مصاريف نفقة الزوجة و الأولاد كام؟ والأب حيشوف عياله كام مرة في الأسبوع؟ و إمتي؟ و فين؟ .. فبرده طلاق بريطانيا من الإتحاد الأوروبي مليان تفاصيل صغيرة ممكن بسببها تقوم خناقات كتير.
مفيش بيت في بريطانيا إلا و شايل هم بريكزت .. علي القهاوي و التليفيزونات و في الكلام بين الناس في شغلهم حتلاقيهم مبيتكلموش عن حاجة إلا اللي حصل في الدوري الإنجليزي و بريكزت .. رغم كل ده أنا عايزك تعرف إن بريكزت لسه محصلش .. لحد اللحظة دي بريطانيا لسه متطلقتش من الإتحاد الأوروبي بس في نفس الوقت الإقتصاد البريطاني فعلياً بيتداس علي وشه .. هم أسوأ إقتصاد من بين إقتصاديات الدول السبع الصناعية الكبري اللي بيتسموا G7 .. شركات زي Nissan اليابانية قرروا إنهم يمشوا بره بريطانيا و ده معناه إنهم حيمشوا ناس كانت شغاله في مصانعهم .. فوق ده كله إن الجنيه الإسترليني فقد 14% من قيمته خلال السنتين و نص اللي فاتوا .. بس إذا كان كل دي مصايب بتتحدف علي دماغ البريطانيين بقالها سنتين فيوم 29 مارس 2019 هو يوم الطلاق الرسمي و اللي فعلاً يكون اليوم اللي الليلة كلها تتطربق علي دماغ الإنجليز .. لإن زي أي طلاق عندنا في مجتمعنا في الأول إحنا بنقول حنسيب بعض بما يرضي الله بس في الأخر بنتخانق و بنجرجر بعض في المحاكم.
الإتفاق كان إن من بعد إعلان نتيجة الإستفتاء بتاع بريكزت لحد يوم 29 مارس 2019 يعني بتتكلم إن كان الإنجليز عندهم حوالي 3 سنين بيتسموا الفترة الإنتقالية Transition Period و خلال الفترة دي حتتعمل مفاوضات بين بريطانيا و بين الإتحاد الأوروبي عشان يتفقوا علي كل الحاجات اللي أي إتنين بيتطلقوا بيتفقوا عليها بحيث لما يجي يوم 29 مارس 2019 يكون كل حاجة تم الإتفاق عليها و بريطانيا تتطلق عن الإتحاد الأوروبي بما يرضي الله .. خلال الفترة اللي فاتت الحكومة البريطانية اللي ماسكاها رئيسة الوزراء (تيريسا ماي Theresa May) إتفاوضت مع الإتحاد الأوروبي لحد ما في الاخر وصلوا لحاجة سموها Transition Plan أو الخطة الإنتقالية و لما جت تقدمها للبرلمان عشان يوافقوا عليها إتفاجئت إن مش بس المعارضة اللي رفضت الخطة دول حتي أعضاء حزبها جوه البرلمان رفضوها و بكده (تيريسا ماي) كسرت الرقم القياسي لأسوأ هزيمة لرئيس وزراء في تاريخ بريطانيا يقدم مقترح للبرلمان و يترفض .. طب ده معناه إيه؟ .. فيه ناس كانت متوقعة إن المفاوضات تخلص علي مفيش و إن لما يجي يوم 29 مارس 2019 و بريطانيا تطلق من الإتحاد الأوروبي من غير ما يكونوا وصلوا لإتفاق .. اللي ححاول أفهمهولك النهاردة هو الإجابة عن 3 أسئلة:
- ليه محدش في بريطانيا وافق علي الخطة بتاعة (تيريسا ماي) و اللي بقالها أكتر من سنتين بتكتب فيها؟
- هل حيحصل حاجة يعني لو بريطانيا إتطلقت من الإتحاد الأوروبي من غير ما يوصلوا لإتفاق؟
- هل ينفع إن موضوع بريكزت ده يتلغي من أساسه؟
خليني أبدأ معاك بالسؤال الأول .. هي مشكلة الإتفاق اللي وصلت له (تيريسا ماي) مع الإتحاد الأوروبي إيه بالضبط؟ .. الحقيقة هم مشاكل كتير بس يمكن أكبر مشكلة ليها علاقة بأيرلندا الشمالية .. خليني أفهمك براحة .. بريطانيا أساساً هي 4 دول في بعض اللي هم إنجلترا و ويلز و سكوتلندا و أيرلندا الشمالية .. أيرلندا الشمالية ليها حدود مع جمهورية أيرلندا بس لحد دلوقتي مفيش مشكلة .. الخمس دول حالياً أعضاء في الإتحاد الأوروبي يعني البضايع بتتنقل بينهم من غير جمارك اللي هو حاجه كده لما يبقي عندك عمارة فيها دور فيه 5 شقق بس منفدين علي بعض يعني الأكل اللي بيعمله الخمس شقق بيتشاركوا فيه كلهم .. لما إن شاء الله بريطانيا تطلق من الإتحاد الأوروبي فإنت كأنك بنيت حيطة تفصل الشقة الخامسة عن الأربع شقق التانيين .. يعني حيبقي عندك حدود تفصل بين أيرلندا الشمالية و جمهورية أيرلندا و هي دي المشكلة .. حالياً لا المكان المناسب و لا الوقت المناسب إني أشرحلك هي إيه مشكلة أيرلندا بس خليني أشبههالك بإني أسألك عارف الصهيانة و الفلسطينين؟ أهي أيرلندا أسوأ.
المهم اللي عايزك تعرفه إن فضلت الحدود مقفولة بين البلدين لحد ما في سنة 1998 إتمضي إتفاق السلام المعروف بإسم Good Friday Agreement أو إتفاق يوم الجمعة الحلوة واللي أهم حاجة فيه إن نقاط التفتيش علي الحدود بين أيرلندا الشمالية و جمهورية أيرلندا تتشال .. فلو بريطانيا إتطلقت من الإتحاد الأوروبي و ده أدي إن ترجع تاني تبقي فيه حدود و نقاط تفتيش و جمارك في أيرلندا فالمنطقة كلها حتولع.
الخازوق ده محدش كان عامل حسابه من الناس اللي صرفت دم قلبها عشان تقنع البريطانيين إنهم يصوتوا في الإستفتاء بتاع بريكزت إن بريطانيا تطلق من الإتحاد الأوروبي .. عندك واحد زي (بوريس جونسون Boris Johnson) مثلاً .. ده واحد من أكتر الناس اللي كانت بتحارب عشان الطلاق ده يكمل لدرجة إنه أصر يتعين وزير خارجية في حكومة (تيريسا ماي) و قدم استقالته من الحكومة لما شاف إن الإتفاق اللي هي وصلتله مع الإتحاد الأوروبي مش بيوفي كل الشروط اللي هو كان عايزها .. الرجل ده فعلياً و مش بهزر لو صحفي سأله هو إنتوا حتعملوا إيه في مشكلة الجمارك و نقاط التفتيش اللي حترجع تاني تتعمل بين أيرلندا الشمالية و جمهورية أيرلندا بياخد بعضه و يجري عشان ميجاوبش .. أنا مش بهزر و لو مش مصدقني خش علي YouTube و إكتب Boris Johnson Brexit و حتشوف بنفسك .. خازوق أيرلندا ده حيودينا للسؤال اللي وراه .. هو لو لا قدر الله (تيريسا ماي) و الإتحاد الأوروبي متفقوش علي حاجة لحد يوم 29 مارس 2019 إيه اللي حيحصل؟
في الحالة دي حيتعمل حاجة إسمها Back Stop .. في الحالة دي حتلاقي إن أيرلندا الشمالية حتنفصل عن بريطانيا و حتفضل جوه الإتحاد الأوروبي مؤقتاً هي و جمهورية أيرلندا فده معناه إن بدل ما الجمارك و نقاط التفتيش علي الحدود حتبقي بين أيرلندا الشمالية و جمهورية أيرلندا فهي حتبقي بين أيرلندا كلها علي بعض و بين باقي بريطانيا .. الحل ده حيفضل شغال لحد ما (تيريسا ماي) و الإتحاد الأوروبي يوصلوا لإتفاق يحل مشكلة خازوق أيرلندا .. المشكلة إن في بريطانيا محدش موافق علي إقتراح Back Stop ده و شايفين إن الأفضل إن أيرلندا تولع أحسن من إن بريطانيا تخسر أيرلندا الشمالية .. المشكلة كمان مش بس أيرلندا .. بريطانيا جزيرة بيفصلها عن أوروبا بحر المانش أو القنال الإنجليزي بحيث إن أغلب البضايع الأوروبية اللي بتدخل بريطانيا بتيجي عن طريق فرنسا و الترلات المتحملة بضاعة بتعدي في معديات من ميناء دانكيرك الفرنسي مثلاً لحد ميناء دوفر الإنجليزي أو عن طريق النفق اللي بيربط بين بريطانيا و فرنسا .. لو حصل إن بريطانيا إتطلقت من الإتحاد الأوروبي من غير إتفاق مسبق فساعتها القواعد بتاعة منظمة التجارة العالمية لازم تتطبق و ده معناه إن حيبقي فيه جمارك.
عشان تفهم حجم الفوضي اللي حاجة زي دي ممكن تعملها فكر في المعلومة دي .. لو مسئولي الجمارك خدوا 6 ثواني بس عشان يبصوا علي ورق أي ترلة بتركب المعدية اللي رايحة لميناء دوفر الإنجليزي من ميناء دانكيرك الفرنسي فإنت عشان تخلص ورق الترلات اللي حيركبوا معدية واحدة حتحتاج 6 أيام .. أرجوك متكلمش قراية إلا لما تستوعب المعلومة دي و تفهمها كويس و تقدر حجم الكارثة .. تخيل نفسك بتعمل Shopping في كارفور مثلاً ليلة وقفة العيد و المكان زحمة بشكل مستفز و إنت واقف في طابور طويل عريض عايز تدفع و تمشي وتلاقي حد واقف عند الكاشير الفلوس عجزت معاه فعمال يسأل دي بكام و دي بكام عشان يرجع حاجات إشتراها.
الوضع دلوقتي في بريطانيا إن الناس هناك زي ما يكونوا راكبين التيتانيك و عرفوا إنها بتغرق فبيوزعوا الLife Jackets علي الركاب .. الحكومة بدأت توزع منشورات تنصح الناس تعمل إيه بمجرد ما ييجي يوم 29 مارس 2019 و متمضاش إتفاق ينظم طلاق بريطانيا من الإتحاد الأوروبي .. الناس هناك مرعوبة فعلياً من إن يجي اليوم اللي بريطانيا يبقي عندها عجز في الأكل و الشرب و الأدوية لإن بريطانيا بيجيلها بضايع زي دي كتير من دول الإتحاد الأوروبي .. فكرة إنك تقلق متلاقيش لبن الأطفال أو أدوية لمراتك اللي عندها مرض مزمن دي إحنا ممكن نحسها هنا لإننا عايشين في بلد في قعر الكنيف بس بالنسبة للبريطانيين هم كانوا بيشوفوها في الأفلام بس .. أيا كان الحل اللي حيتطبق فهو حيبقي زي الزفت علي دماغ البريطانيين .. لو بقدرة قادر البرلمان رجع في كلامه و وافق علي الإتفاق اللي وصلتله (تيريسا ماي) مع الإتحاد الأوروبي فخلال 15 سنة الإقتصاد البريطاني حينكمش بنسبة 3.9% .. لو إتصدمت فعايزك تعرف إن لو بريطانيا إتطلقت من الإتحاد الأوروبي من غير إتفاق فالإقتصاد البريطاني حيتهان و ينكمش بنسبة 9.3%.
اللي فعلاً يغيطك إن حزب الكنبة بتاع إنجلترا اللي هم الناس اللي سنهم كبير حبتين و عاشوا فترة الحرب العالمية الثانية و فاكرين إن بريطانيا دي جامدة تنين شوية و حتطلع نار من بقها و مفيش حاجة تهزها هم اللي شايلين البلد و موديينها في ستين داهية .. عشان أشبههالك فواحدة من أسوأ الكوارث الطبيعية اللي حصلت في تاريخ البشر اللي هو لما بركان بومباي في إيطاليا إنفجر و دفن مدينة كاملة اللي هي بومباي تحت الرماد .. أهو بالضبط بريطانيا عاملة زي بومباي بس لو بدل ما البركان إنفجر بأمر ربنا فهو إنفجر لإن أهل البلد عملوا إستفتاء و أغلبهم قالوا إحنا جامدين زحليقة و نقدر نقف قدام أي حاجة.
ده حيوديني لأخر سؤال .. هو ينفع إن بريكزت دي تتلغي من أساسه؟ .. علي الورق اه .. في ديسمبر 2018 المحكمة الأوروبية طلعت حكم قالت فيه إن من حق بريطانيا إنها ترجع في كلامها .. عشان ده يحصل عندك حاجة من إتنين:
- يا إما (تيريسا ماي) تعمل أشجع خطوة ممكن أي رئيس وزراء بريطاني يعملها من ساعة ما (وينستون تشرشل Winston Churchill) وقف قدام البرلمان و تحدي الحزب بتاعه و أعلن إن بريطانيا مش حتستسلم و حتفضل تكمل في حربها ضد ألمانيا النازية فهي ممكن برده تقف قدام البرلمان و تتحدي الحزب بتاعها و تقول إن كل الأدلة الإقتصادية بتقول إن بريكزت حتخرب بيت بريطانيا و تلغي الموضوع خالص .. بس طبعاً ده مش حيحصل لإن ده يعتبر إنتحار سياسي ليها.
- الحل الثاني إن يتعمل إستفتاء تاني علي بريكزت بس حتي الحل ده مينفعش .. مبدأياً الDeadline هو 29 مارس 2019 في حين إن أي إستفتاء عشان يتعمل محتاج علي الأقل 22 أسبوع عشان يتنظم .. و بعدين إنت حتعمل إستفتاء تخلي الإختيارات فيه إيه؟ .. هل حيبقي ما بين إن بريكزت تتلغي قصاد خطة (تيريسا ماي) اللي محدش وافق عليها؟ .. ولا حيبقي بين إن بريزكت تتلغي في مقابل إن بريطانيا تتطلق من الإتحاد الأوروبي من غير إتفاق؟ .. ولا تحط ال3 إختيارات قدام المواطن و هو يختار و ساعتها الأصوات حتتوزع علي 3؟ ساعتها إحتمال كبير ميبقاش عندك أغلبية و الدنيا تتعك أكتر.
فكرة الإستفتاء الثاني ملهاش أي ستين لازمة لإن لا هي ولا الإستفتاء الأول كان المفروض يتعملوا .. الإستفتاء الأول حط المواطن بين خيارين يا إما يفضل جوه الإتحاد الأوروبي أو يخرج بس محدش شرحله ده معناه إيه؟ و ده معناه إيه؟ .. محدش شرحله أي حاجة و الحقيقة المواطن مش شغلته إنه يعرف .. فكرة الديموقراطية إني بجيب حد أنتخبه في مجلس الشعب عشان ياخد قرارات بالنيابة عني لإني مش فاضي أنا كمواطن شغال مهندس إني أروح بعد الظهر أقعد أقرأ في إتفاقية التجارة بيني و بين الإتحاد الأوروبي و إلا انا تاعب نفسي و روحت إنتخبتك ليه؟ .. أنا لو رحت أكشف عند دكتور باطنة و قلتله أنا بطني بتوجعني لو لقيته بيسألني تحب نشيلك المرارة ولا نسيبهالك فردي حيكون إني حشتمه .. أومال انا جايلك ليه ما كنت أنا دخلت كلية طب و إتفحت 7 سنين عشان أكشف علي نفسي.
أنا شخصياً معرفش الدنيا حتخلص علي إيه؟ و أي حد يقولك إيه اللي حيحصل قوله إنت بتهبد لإن مفيش حد عارف .. هل (تيريسا ماي) ممكن تبقي Wonder Woman بتاعة بريطانيا و تنقذ بلدها بس في المقابل حتضحي بالCareer بتاعها؟ ولا حنشوف بريطانيا و وراها الإتحاد الأوروبي كله بيتفكك حتة حتة؟ .. الله أعلم.
المصدر:
حلقة من برنامج Last Week Tonight with John Oliver و ده لينك الحلقة علي YouTube:
https://www.youtube.com/watch?v=HaBQfSAVt0s
