العجل وقع هاتوا السكينة .. جملة كنا بنسمعها وإحنا صغيرين في العيد الكبير لما الجزار بيدبح عجل .. بمجرد ما العجل بيقع سكاكينه بتكتر .. ده بالضبط اللي بيحصل مع (بنيامين نتنياهو) .. العجل خسر الإنتخابات .. بس مش ده اللي يستحق إني أركز عليه كلامي .. أي سياسي ممكن يخش إنتخابات ويخسرها زي ما أي فرقة كورة ممكن تخسر ماتش .. الخسارة جزء مهم من حياة البني أدمين .. اللي عايز أتكلم عنه هو إنك تحسس نفسك وتعيش الدور أوي إنك كسبان كسبان وفجأة تلاقي الدنيا بتطربق فوق نافوخك .. (نتنياهو) دخل الإنتخابات اللي إتعملت يوم 17 سبتمبر وهو عايش دور الأهلي كل ما يلاعب الزمالك .. أنا حاخد المعارضة ورا مصنع الكراسي والحقيقة تلومه إزاي وهو باني حملته الإنتخابية كلها علي فكرة إن أنا والرئيس الأميريكي صحاب .. (ترامب) صاحبي لدرجة إنه عشان خاطري نقل السفارة الأميريكية عندنا من تل أبيب للقدس .. عشان خاطر سواد عيوني (ترامب) إعترف بإن مرتفعات الجولان بتاعتي مع إن الناس كلها عارفه إني واخدها إغتصاب من 5 يونيو 1967 .. فجأة العلاقة دي إتطربقت فوق نافوخ (نتنياهو) لما إتقال في الأخبار إن (ترامب) معندوش أي مشكلة إنه يقعد مع الرئيس الإيراني (حسن روحاني) عشان يلاقوا مخرج للأزمة بين إيران والسعودية بسبب اليمن .. اللي أنيل من كل ده إن بعد ما النتائج الأولية للإنتخابات الإسرائيلية أُعلنت الصحفيين سألوا (ترامب) عن رأيه فقال إن بقاله فترة متكلمش مع (نتنياهو) .. مش كده وبس .. هو قال إن هو و(نتنياهو) مش صحاب زي ما ناس كتير بتقول .. شغلي يا إبني أغنية عايش في بحر الغدر شط الندالة مليان.
لحد دلوقتي الوضع كالأتي .. السباق في الإنتخابات كان علي 120 كرسي ودي تبقي الكراسي بتاعة الكنيست أو البرلمان الإسرائيلي .. النتيجة إن حزب الليكود اللي بيقوده (نتنياهو) خد 31 كرسي بس حزب الأزرق و الأبيض أو كاحول لافان Kahol Lavan بالعبري اللي بيقوده رئيس هيئة الأركان المشتركة للقوات المسلحة سابقاً (بيني جانتز Benny Gantz) خد 33 كرسي .. عشان تتشكل الحكومة الإسرائيلية لازم الرئيس يختار واحد من الإتنين إنه يشكل الحكومة يا إما (نتنياهو) يا إما (جانتز) .. أو إن الإتنين ينسوا خلافاتهم ويشكلوا مع بعض حكومة وحدة وطنية وده الحل اللي هم الإتنين استبعدوه لإن ولا واحد فيهم طايق التاني .. ده معناه إن أيا كان اللي الرئيس الإسرائيلي حيختاره لازم بقدرة قادر يلاقي طريقة إنه يقنع 30 عضو في البرلمان أيا كان بقي هم من أحزاب إيه إنهم ينضموا ليه عشان يبقي معاه 61 كرسي وبكده يبقي معاه الأغلبية إنه يمشي كلمته علي أطخن طخين .. عشان الرئيس الإسرائيلي (رؤوفين ريفلين Reuven Rivlin) واللي تحسه النسخة الإسرائيلي اللي عامل دايت من الرئيس (عدلي منصور) يهرب من الوارطة دي طلب من الناس اللي كسبت في الإنتخابات إن كل واحد فيهم يرشح حد من (نتنياهو) أو (جانتز) في إقتراع سري بحيث إن في الأخر الرئيس يعد التوصيات ويشوف الناس عايزه إيه .. إذ يكتشف إن (جانتز) خد 54 توصية قصاد 55 توصية خدها (نتنياهو) و20 واحد رفضوا يدوا أصواتهم .. فطبعاً فرق توصية واحدة ده مش كفاية إن الرئيس يختار حد فيهم إلا إذا بقي طلع جنيه معدن من جيبه وعمل قرعة.
كل حاجة في الإنتخابات الإسرائيلية اللي حصلت دي مشيت عكس ما (نتنياهو) عايز .. قبل الإنتخابات بكام يوم طلع قدام الناس قال أنا بحذركوا إنكوا لازم تروحوا تنتخبوا لإن عرب إسرائيل مأجرين أوتوبيسات عشان تاخد الناس تروح تنتخب ومتخلوش المرشحين اللي من عرب 48 ياخدوا كراسي كتير .. طبعاً ده كلام ميطلعش غير من بني أدم إبن س&^ بس إذا كان هو قال كده عشان يستفز اليمينيين المتطرفين في إسرائيل فكلامه إستفز عرب 48 أكتر .. الناس راحت إنتخبت بأعداد محصلتش قبل كده في تاريخ إسرائيل والمرشحين من عرب 48 اللي إتوحدوا كلهم في قايمة واحدة سموها القائمة المشتركة خدوا ثالث أكبر عدد من الكراسي في الكنيست .. ده معناه إن أيا كان اللي حيمسك رئاسة الوزراء سواء بقي (بنيامين نتنياهو) أو (بيني جانتز) حيلاقي نفسه قصاد معارضة من عرب 48 اللي بيقودهم واحد إسمه (أيمن عوده) واللي بناء علي كده وفق القانون حيبقي موجود في أي إجتماع لمجلس الأمن القومي وحيحضر كل الإجتماعات السرية مع قيادات المخابرات الإسرائيلية ودي حاجة محصلتش من ساعة ما قالوا يلا نعمل دولة إسرائيل.
موقف النواب بتوع عرب 48 اللي كسبوا الإنتخابات وبقوا أعضاء في الكنيسيت فعلاً مخلي الإسرائيليين يبصوا لبعض ويقولوا هو إيه اللي بيحصل ده .. هم قالوا إنهم شايفين (جانتز) هو اللي يبقي رئيس وزراء إسرائيل اللي جاي .. المشكلة إنك لو بصيت علي الإتنين سواء (نتنياهو) أو (جانتز) حتلاقي نفسك بتقول ما أنيل من سيدي إلا ستي .. إذا كان (نتنياهو) شخصية بنت وس&% ف(جانتز) ده سفاح معندوش يا أما إرحميني .. ده كان لما ماسك قيادة الأركان الإسرائيلية كان علي وشه إبتسامه من ودنه اليمين للشمال وهو بيعد الضحايا من المدنيين الفلسطينيين اللي بيموتوا في القصف الإسرائيلي علي قطاع غزة .. أنا فاهم إن عرب 48 شايفين إن (نتنياهو) إبن وسخ&^ بس ده مش معناه إن (جانتز) بميتين أمه ملاك يعني .. زود علي كده نقطة .. دلوقتي (نتنياهو) لما شاف النواب بتوع القايمة المشتركة واقفين في صف (جانتز) بقي بيطلع في التليفيزيون يقول شايفين أهو (جانتز) اللي واقف وراه الإرهابيين .. هو وصل لمرحلة من اليأس إنه بقي يطلع يقول علي مواطن إسرائيلي إرهابي من غير أي دليل علي الهري ده لإن أي حد من ال1.8 مليون بني أدم من عرب 48 قاعد في إسرائيل معاه الجنسية الإسرائيلية .. في نفس الوقت يمكن أهم شخصية في عالم سمسم اللي في إسرائيل دلوقتي هو (أفيجادور ليبرمان Avigador Lieberman) واللي يمكن هو متخاصم مع (نتنياهو) بس بيلعن سلسفين عرب 48 فلو عرب 48 وقفوا في صف (جانتز) و (جانتز) راح إتكلم مع (ليبرمان) عشان ينضم له فهو عمره ما حيوافق يتحط في نفس الفريق مع ناس هو شايفهم ميستحقوش يعيشوا .. ده بإختصار شديد الوضع في إسرائيل دلوقتي .
هنا يجي الكلام عن إني أدردش معاك شوية في يا تري يا هل تري (نتنياهو) خسر الإنتخابات ليه؟ لإن الموضوع فعلاً مليان تفاصيل ومينفعش أختصره وأختذله في مجرد كلام طلع في الأخبار إن (ترامب) عايز يقعد مع (روحاني) .. إنت تقدر تقول إن (نتنياهو) حفر قبره بإيديه لما في إبريل 2019 بعد ما أُعلنت النتايج بتاعة الإنتخابات البرلمانية .. اه الإسرائيليين عملوا إنتخابات في إبريل و إنتخابات جديدة في سبتمبر إنت مش غلطان لو خدت بالك .. لما (نتنياهو) لقي إنه كسب الإنتخابات بنتيجة يدوبك علي الحركرك أجبر أعضاء الحزب بتاعه إنهم يوافقوا علي مشروع قانون هو كتبه تفصيل علي مقاسه عشان يديله حصانة ضد الملاحقة القضائية بسبب قضايا الفساد اللي هو متهم فيها و أنا إتكلمت عنها قبل كده .. الرجل مخه لسع لدرجة إنه مضّي الناس بتوع الحزب بتاعه علي ورقة سماها قسم الولاء عشان لو حصل والنيابة قدمت ضده إتهامات رسمية فهم عمرهم ما حيخونوه ويطالبوا بسحب الثقة عنه.
تاني مسمار هو دقه في نعشه كانت لما الحزب بتاعه قبل الإنتخابات بتاعة سبتمبر قدم مشروع قانون عشان يسمح للمراقبين بتوع الحزب إنهم يصوروا لجان الإقتراع .. القانون إعترض عليه النائب العام ولجنة الإنتخابات وحتي المحامي بتاع الكنيست إعترض علي القانون ده .. الفضيحة كانت قبل الإنتخابات بكام يوم لما حزب الليكود بتاع (نتنياهو) كان عامل مؤتمر إنتخابي في مدينة أشدود وهوبا صاروخ جاي من قطاع غزة نزل علي المدينة والحرس بتاع (نتنياهو) جريوا عشان ينزلوه من علي المسرح ويهربوه بره المدينة رغم إن أغلب الناس في الساحة اللي كان معمول فيها المؤتمر الإنتخابي فضلوا واقفين .. تاني يوم عشان يبان قدام الناس إنه رجل أوي حب يؤمر بتنفيذ عملية عسكرية ضد حماس بس النائب العام (أفيخاي ماندلبليت Avichai Mendelblit) قاله إن دستورياً ده مينفعش لإن قرار الحرب لازم يوافق عليه مجلس الوزراء اللي هم أساساً داخلين إنتخابات وفعلياً هم مش في مناصبهم.
في رأيي الشخصي إن الهسهس اللي جاب أجل (نتنياهو) حاجتين .. إيران و الفضايح العائلية .. و خليني أخدهم واحدة واحدة:
- (نتنياهو) كان بيبيع نفسه للناس علي إنه أكتر حد بيعرف يحافظ علي أمن إسرائيل .. أنصاره بيقولوا إن سبب إنكوا نايمين بليل في أمان هو إن القوات الجوية الإسرائيلية بتنفذ غارات جوية جوه العراق وجوه سوريا وفي قطاع غزة ضد أهداف تابعة للحرس الثوري الإيراني والغارات دي بتحصل عشان (نتنياهو) دكر مبيهموش حد .. هو بيبيع نفسه جوه إسرائيل علي إنه فعلياً هو وزير دفاع السعودية .. لما الحوثيين ضربوا منشأت نفطية سعودية بطيارات بدون طيار فدي مش بس كانت فضيحة للمؤسسة العسكرية السعودية إنما كمان ردت في صدر (نتنياهو) قتلته .. حتفرق في إيه إن القوات الجوية الإسرائيلية بتضرب العراق إذا كانت الحرب مع إيران ممكن تقوم بسب إن السعوديين مش عارفين إزاي يشغلوا زرار الPower بتاع منصات الدفاع الجوي بتاعتهم.
- إذا كان (جانتز) عنده زوجة واحدة وأربع أطفال محدش عارف عنهم حاجة لإنهم عايشين بره الأضواء بتاعة السياسة ف(نتنياهو) إتجوز 3 مرات .. مراته الحالية أعصابها بتفلت منها ومرفوع عليها قضايا سب وقذف في المحاكم .. إبنه عبيط وأهبل لدرجة إنه مرة كان سهران مع صحابه وسكران فكتب علي Facebook إنه بيدور علي عاهرة بفلوس تقضي معاه الليلة.
إسرائيل زيها زي دول كتير فيها مشاكل إقتصادية وإجتماعية بس (نتنياهو) بني أدم مش فارق معاه إنه يحل المشاكل دي كلها .. هو عايز يفضل في السلطة وعشان تفضل في السلطة في بلد بيتعمل فيها إنتخابات كل اللي إنت محتاج تعمله إنك تقسم الناس نصين .. نص يكرهك ونص يحبك وتخلي النص اللي بيحبك يروح ينتخبك .. بس ده مش معناه إن سياساتك حتؤدي إن حياة الناس كلها في البلد تتحسن .. تكتيكه في السياسة إنه يفضل يدلع في الفئات الدينية المتشددة ويغريهم بإنه حيعفي عيالهم من الخدمة في القوات المسلحة ولما المحكمة الدستورية العليا رفضت الكلام ده راح ماشي بمبدأ يابا علمني أبقي مهم قاله تعالي في الهايفة وإتصدر .. يطلع يقولك إن عشان تاخد الجنسية الإسرائيلية لازم تعمل تحليل DNA عشان يتأكدوا إنك يهودي .. شوية ويقولك أنا عايز أطلع قانون بإن وسائل المواصلات العامة متشتغلش يوم السبت عشان ده أجازة دينية .. يمكن عشان كده الناس مختارتش (نتنياهو) وإختارت (جانتز) لإنه يعتبر بديل كويس .. هم شافوا رجل جاي يقولهم إن لازم يتحط سقف لعدد المرات اللي ممكن بني أدم واحد يمسك منصب رئاسة الوزراء .. جه قالهم إنه عايز يمنع أي حد متهم في قضايا وإتحكم عليه بإنه مذنب بإنه يخش البرلمان أصلاً .. رجل قال إنه عايز يحد شوية من نفوذ المؤسسة الدينية وجاي يحط فلوس كإستثمارات في الصحة والتعليم.
أبقي فعلياً بهبد وبفتي لو قلتلك إني عارف الوضع حيخلص علي إيه لإن مفيش حد عارف .. فيه مفاوضات وكلام بيتعمل من تحت الطرابيزة بس اللي أنا أقدر أضمنه ليك إن اللي حيمسك إسرائيل هو واحد من إتنين ولاد وس&^.
المصادر:
- مقالة بعنوان Bye-Bye Bibi: Why Netanyahu Failed .. نشرت في مجلة The American Conservative و ده لينك المقالة الأصلية:
https://www.theamericanconservative.com/articles/bye-bye-bibi-why-netanyahu-failed/ - مقالة بعنوان Israel’s Arab parties want Netanyahu gone so bad that they have endorsed a General who bombed Gaza .. نشرت في موقع Vice و ده لينك المقالة الأصلية:
https://www.vice.com/en_us/article/9ked5p/israels-arab-parties-want-netanyahu-gone-so-bad-that-theyve-endorsed-a-general-who-bombed-gaza
