لينك التسجيل الصوتي للمقالة علي Sound Cloud:
https://soundcloud.com/user-112011687-312727988/paifxfolgihb?si=289f5e74a5ce4204b15966b1e0a0cc70
موضوعنا النهاردة هو موضوع حساس و معقد شوية و في نفس الوقت بسيط جداً .. موضوعنا هو تجارة الأسلحة الخفيفة أو Small Arms .. كلمة أسلحة خفيفة بنقصد به المسدسات و البنادق الألية و أخرنا خالص الصواريخ المحمولة علي الكتف اللي أشهر نوع منها هو الRPG .. تجارة السلاح هي سوق زيها زي تجارة الموبايلات و العربيات .. بيبقي عندك موبايلات غالية أوي زي iPhone و موبايلات رخصية زي الصيني اللي الناس البسيطة بتشتريها لإن ببساطة معهاش فلوس تشتري iPhone .. النوعين ليهم زباينهم .. الناس و في حالتنا دي الدول اللي معاها فلوس فتقدر تروح تشتري مقاتلات متطورة و دبابات و سفن حربية .. الدول الفقيرة برده هم زباين .. زباين بيبقوا عايزين يشتروا سلاح بس معهمش فلوس يروحوا يشتروا دبابات و طيارات فبيروحوا يشتروا الأسلحة الخفيفة اللي هي المسدسات و البنادق الألية .. الأسلحة الخفيفة زباينها نوعين .. نوع زي ما قلتلك الدول الفقيرة اللي معهاش فلوس و النوع الثاني من الزباين دول عادة بيبقوا التنظيمات الإرهابية.
فكر فيها كده .. انت كل يوم بتسمع عن تفجير أو هجوم إرهابي في حتت كتير في العالم منها في شمال سيناء مثلاً قامت به عناصر إرهابية ضد القوات المصرية .. أكيد سألت نفسك أحياناً هي الناس دي بتجيب سلاحها منين؟ .. حضر نفسك للمفاجأة بقي .. هل تعلم إن أهم 3 دول بتصدر أسلحة خفيفة في العالم هم كوريا الشمالية و المملكة العربية السعودية و إيران .. و الله العظيم زي ما بقولك كده و ده بناء علي بحث إسمه Small Arms Survey Trade Update إتعمل سنة 2017 فيه شوية حاجات لازم تكون فاهمها كويس بخصوص تجارة الأسلحة الخفيفة:
- أولاً إنت بتتكلم عن شريحة محددة من السلاح .. ده مش دبابات ولا مقاتلات عشان تحتاج الشركة اللي صنعته إنها تيجي تعملك صيانة دورية و تمرن العناصر بتاعتك علي الإستخدام و الصيانة .. ده مدفع رشاش .. أي حد لعب Video Game محترمة زي Call of Duty حيبقي عارف إزاي يستخدم البندقية الألية كلاشنيكوفا Kalashnikov اللي معروفة بإسم AK-47.
- ثانياً إن زي ما قلتلك تجارة الأسلحة الخفيفة بتعتبر شريحة من سوق كبير اللي هو سوق تجارة السلاح بس الفلوس اللي بتتصرف علي تجارة الأسلحة الخفيفة سنوياً بتعدي 6 مليار دولار .. و دول كتير أوي بتحط إيدها في الشغلانة دي .. صحيح إن فيه إتجاه إن الدول تبقي شفافة أكتر و تبقي أمينة أكثر في الأسلحة الخفيفة اللي بتبيعها و إن فعلاً 55% من إجمالي دول العالم اللي بتصدر أسلحة خفيفة ورقها مضبوط و محددة هي باعت لمين و بكام و باعتله إيه بالضبط .. بس يبقي ال45% الباقيين من الدول المصدرة للأسلحة الخفيفة اللي معندوهمش مشكلة إنهم مش بس يبيعوا سلاح لمنظمات إرهابية و حكومات قمعية .. دول معندهمش مشكلة يبيعوا سلاح لإبليس شخصياً عشان ياخدوا فلوس.
- ده يودينا لإيران و كوريا الشمالية و السعودية .. الدول الثلاثة دول هم أكثر دول بتبيع أسلحة خفيفة بشكل غير شرعي .. و كلمة غير شرعي هنا معناها إن مفيش ورق و مفيش دليل علي مين اللي باع و مين اللي إشتري و مفيش مستندات .. مفيش أي حاجة خالص.
مش عارف إنت سمعت عن الخبر ده ولا لا بس من فترة قريبة جريدة The Washington Post الأميريكية كتبت تقرير علي إن شهر يونيو 2017 فيه سفينة شحن عليها علم كوريا الشمالية تم إعتراضها عن طريق خفر السواحل المصري جوه المياه الإقليمية المصرية و لقوا إن السفينة دي غير إنها شايله 2300 طن حديد لقوا فيها 30,000 صندوق RPG بالذخيرة بتاعتهم .. طب السلاح ده كان رايح فين و مين دفع ثمنه؟ .. التقرير بتاع The Washington Post بيفتح عنيك علي حاجات كتير أوي بخصوص تجارة الأسلحة الخفيفة اللي هو الموضوع اللي بنتكلم عنه النهاردة:
التقرير بيقول إن في شهر أغسطس 2017 وكالة المخابرات المركزية الأميريكية CIA لقطت سفينة قديمة بتبحر بإتجاه قناة السويس .. اللي خلي المخابرات الأميريكية تشك في السفينة دي إنها زي ما قلتلك سفينة قديمة و شايلة علم دولة كمبوديا و إن حمولة السفينة مستخبية تحت عباية مموهة من اللي منصات صواريخ الدفاع الجوي بتستخدمها عشان تخبي نفسها عن طيارات الإستطلاع .. المخابرات الأميريكية بعتت رسالة للمخابرات المصرية بتحذرهم من إن السفينة دي إحتمال كبير تبقي سفينة كورية شمالية و مش من كمبوديا و إحتمال كبير تكون حمولتها دي كلها عبارة عن أسلحة .. لما مسئولي الجمارك في مصر فتشوا السفينة دي فعلاً إكتشفوا إن طاقم السفينة مخبي زي ما قلت 30,000 صندوق ذخيرة من صواريخ RPG .. الأمم المتحدة كتبت تقرير قالت فيه إن الحمولة دي تعتبر أضخم حمولة ذخيرة في تاريخ كوريا الشمالية تتمسك في طريقها و هي رايحة تتباع .. برده إحنا لسه مجاوبناش علي سؤال هو يا تري يا هل تري مين اللي كان ناوي يشتري الحمولة دي كلها؟ .. مممم حضر نفسك للمفاجأة و هي إن الCIA قالت إن الحمولة دي كانت رايحة لمصر و إن شركات تابعة للجيش المصري دفعت 23 مليون دولار لحكومة كوريا الشمالية عشان تشتري الذخيرة دي كلها.
يمكن اللي إنت متعرفوش إن بعد اللي حصل ده الإدارة الأميريكية قررت إن في شهر يوليو 2017 إنها تجمد 290 مليون دولار كانوا المفروض يوصلوا مصر في صورة مساعدات عسكرية أميريكية بسبب اللي حصل ده .. في حالة إنك مش فاهم .. بص يا سيدي .. دلوقتي أميركا فارضة عقوبات إقتصادية صارمة ضد نظام كوريا الشمالية و معني كده إن مينفعش أي دولة في العالم تعمل أي تعاملات تجارية شرعية أو غير شرعية مع كوريا الشمالية .. بما إن مصر تعتبر حليف إستراتيجي لأميركا فكان المفروض إننا نسمع كلام الأمريكان و منروحش نشتري أي حاجة من كوريا الشمالية إياكش حتي نروح نشتري منهم سبح و مصليات مش أسلحة .. المبرر اللي إتقال في الإعلام للقرار الأميريكي هو سجل مصر الغير مرضي لإنتهاكات حقوق الإنسان بس الحقيقة كانت غير كده .. دي مش أول مرة سفينة تابعة لكوريا الشمالية تتقفش و هي متحملة بسلاح رايح لدولة تانية .. سنة 2009 خفر السواحل التايلاندي إعترض سفينة رافعة علم كوريا الشمالية برده كان عليها سلاح قيمته 18 مليون دولار والسفينة كانت رايحه لإيران.
المصيبة إن فيه دول زي إيران و كوريا الشمالية و السعودية و الإمارات و إسرائيل لما بتبيع صفقة سلاح قيمتها أقل من 10 مليون دولار مش بتعملها أي ورق رسمي .. إنت حتي لو حبيت ترفع قضية دولية ضد الحكومات الأربعة مش حتعرف و ده يبان أوي من الرسم البياني اللي عندك في الصور .. الرسم البياني ده عليه الدول اللي خلال الفترة من 2001 لحد 2014 باعت أسلحة خفيفة بمبالغ تعدي ال10 مليون دولار .. واخد بالك إن دول زي إيران و السعودية و إسرائيل و الإمارات و كوريا الشمالية موجودين؟
بس خليني أحاول أشرحلك نقطة .. السعودية معندهاش مصانع سلاح .. السعودية معندهاش مصانع بنادق ألية AK-47 و معندهاش مصانع مسدسات و قنابل .. اللي بيحصل زي ما فعلاً حصل في الفترة من 2012 لحد 2015 إن المخابرات السعوديه إشترت عشرات الالاف من البنادق الألية و المدافع الرشاشة و قاذفات الصواريخ و أكثر من 350 مليون طلقة ذخيرة من دول شرق أوروبا زي ألبانيا و البوسنة و الهارسك و صربيا و الجبل الأسود .. السلاح ده كله بيتنقل بطيارات عسكرية سعودية لقواعد جوية أردنية و سعودية و إماراتية و بعد كده المخابرات السعودية بتوزع السلاح ده علي العناصر المسلحة الموالية للسعودية سواء في سوريا أو اليمن .. طبعاً الموضوع بيتم بسرية تامة و من غير ورق و من غير أي وثائق و من غير أي محاسبة .. إيش عرفني إن ضابط المخابرات السعودي اللي بيشرف علي العملية دي كلها مذاكر و فاهم كويس مين العناصر اللي فعلاً موالية للسعودية في سوريا؟ .. لو فعلاً المخابرات السعودية مصحصة أوي كده إزاي الإيرانيين و النظام السوري تقريباً قربوا يحسموا الحرب الأهلية السورية لصالحهم؟ .. إزاي حرب اليمن لحد دلوقتي مخلصتش؟ .. إلا إذا اللي بيحصل إن السعوديين و الإماراتيين بيدوا سلاح من غير حساب لعناصر مش موالية ليهم و في الأخر السلاح ده بيوجه ضد المصالح السعودية و الإماراتية .. انا الحقيقة مش شايفلها أي تفسير تاني.
التقرير اللي إسمه Small Arms Survey Trade Update فيه شوية معلومات صادمة و خليني أحطلك شوية منهم في نقط ورا بعضها:
- لأول مرة البرازيل بقت ضمن أكبر 5 مصدرين للأسلحة الخفيفة في العالم و بكده هي بتشكل الخماسي الكبير اللي بيضم أميركا و ألمانيا و كوريا الجنوبية و إيطاليا و البرازيل.
- بريطانيا تعتبر من أكبر مصدري الأسلحة الخفيفة في العالم .. خلال الفترة من 2013 لحد 2014 مبيعات الأسلحة الخفيفة البريطانية زادت بنسبة 18% عشان توصل لرقم 109 مليون دولار.
- مهم أوي تفهم إن دول كوريا الشمالية و إيران و السعودية و الإمارات إما إنها بتصنع أسلحة خفيفة و تصدرها أو بتشتري أسلحة خفيفة و بتعيد تصديرها .. في الحالتين السلاح ده بيروح غالباً للعناصر المسلحة في سوريا و العراق و اليمن و لبنان.
- خلال سنة 2014 كانت العراق من أكثر 10 دول علي مستوي العالم اللي بتستورد أسلحة خفيفة و خلال السنة دي بس الحكومة العراقية إشترت أسلحة خفيفة ب139 مليون دولار مع العلم إن قبلها بسنة يعني 2013 كانوا صارفين 129 مليون دولار علي شراء أسلحة خفيفة برده.
- تبقي أميركا هي أكبر مصدر للأسلحة الخفيفة في العالم و مبيعاتهم سنة 2014 بس وصلت 1.1 مليار دولار.
مشكلة الأسلحة الخفيفة إنك ممكن تكون نيتك صافية و برده السلاح اللي انت بتبيعه ينتهي بإنه يروح لعناصر إرهابية .. يعني عندك مثلاً تقرير للأمم المتحدة إتنشر بداية 2017 قال إن رغم دولة زي البرازيل بتعمل حسابها كويس أوي إن صفقات الأسلحة الخفيفة اللي بتعملها الشركات البرازيلية تبقي زي الكتاب ما بيقول و مفيهاش غش و متراقبة كويس إلا إن فيه شحنة مسدسات كان المفروض إن شركة برازيلية باعتها لحكومة جيبوتي بس إكتشفوا إن بعد 3 شهور من التسليم إن الوسيط كان تاجر سلاح يمني خد الشحنة و هربها لليمن .. حتي لو انت كمواطن حسيت إن الموضوع ده مينفعش تسكت عليه و إنك لازم تحارب عشان توقفه فأحب أقولك إن شهر يوليو 2017 صدر حكم من المحكمة الدستورية العليا في بريطانيا برفض قضية رفعها نشطاء سياسيين ضد الحكومة البريطانية عشان يجبروها تبطل تبيع أسلحة خفيفة و ذخيرة للسعودية بحجة إن الذخيرة دي بتستخدم ضد مدنيين في اليمن .. المشكلة إن المحكمة مكنش عندها ورق تحكم به .. الناس كلها عارفه إن السلاح اللي السعودية بتستخدمه في اليمن بريطاني و الناس كلها عارفه إن المخابرات السعودية بتشتري السلاح ده من تحت الطرابيزة بس عشان مفيش دليل و مفيش ورق فالقضية إترفضت.
المصادر:
- مقالة بعنوان North Korea’s secretive small arms exports under spotlight in global survey نشرت في جريدة The Guardian البريطانية و ده لينك المقالة الأصلية:
https://www.theguardian.com/world/2017/sep/13/north-korea-is-one-of-worlds-most-secretive-small-arms-exporters - مقاله بعنوان Egypt Ordered 30,000 Rockets From North Korea in $23m Deal Foiled by U.S. نشرت في جريده هاارتس Haaretz الإسرائيلية و ده لينك المقالة الأصلية:
https://www.haaretz.com/us-news/1.815268
