اللي أنا عايز أتكلم عنه النهاردة هو كلمة من الكلمات الأبيحة في السياسة الأميريكية زي كلمة أحيه عندنا اللي أنا مش فاهم ليه القاهروية بيتكسفوا منها .. الكلمة دي هي كلمة Impeachment و دي كلمة لو إنت حبيت تدور علي معناها في Google Translate حتلاقيها إتهام بس الحقيقة معناها مش كده أوي .. دي كلمة معناها عند الأمريكان إن الشعب يقول للرئيس إمشي يا إبن الوس&% من البيت الأبيض .. مهم برده تكون فاهم إن الأمريكان شايفين الرئيس بتاعهم (دونالد ترامب Donald Trump) زي ما إحنا في مصر شايفين (مروان محسن) كده .. الأهلاوية شايفينه أحسن مهاجم في مصر حالياً بس أمة سيدنا محمد (عليه الصلاة و السلام) كلها شايفه إن (كريم) إبن أختي اللي لسه في تالتة إبتدائي بيجيب جوان أكتر منه .. لو حنكمل في تشبيه (ترامب) بإنه (مروان محسن) بتاع أميركا فخليني أقولك إن الأهلاوية بتوع أميركا هم الجمهورين و دول الناس بتوع الحزب الجمهوري اللي (ترامب) مترشح عنه .. الزملكاوية بتوع أميركا هم الديموقراطيين و دول الناس بتوع الحزب الديموقراطي و اللي الحقيقة أكتر من 63% منهم شايفين إن لازم (ترامب) يتشال من منصبه أو زي ما حنسمي الحكاية دي Impeachment.
الديموقراطيين كارهين (ترامب) لدرجة إن واحدة زي (رشيدة طالب) أول أميريكية من أصل فلسطيني تخش الكونجرس عن الحزب الديموقراطي في الإنتخابات بتاعة سنة 2018 لما النتيجة إتعرفت إنها كسبت لمت الفريق بتاعها و عملوا حفلة صغيرة .. و هي في الحفلة مسكت المايك عشان تقول كلمة و حد إبن حلال كان ماسك موبايل قام مصور الكلمة بتاعتها .. الست يا عيني كانت متحمسة شويتين تلاتة لدرجة إنها قالت إنها حتشتغل ليل نهار عشان و خليني أقولك كلامها بالضبط .. Impeach the Motherfucker .. زي ما قلتلك معزة (ترامب) في قلب الديموقراطيين زي معزة (مروان محسن) في قلوبنا كلنا .. عشان كده مهم إني أتكلم عن يعني إيه Impeachment؟ و هل ممكن فعلاً نشوف (ترامب) بيتعزل من منصبه؟ و ده حيبقي محور المقالة بتاعة النهاردة.
معلومة رقم واحد .. مش معني إن الديموقراطيين عايزين (ترامب) يمشي فهو حيمشي بالساهل كده .. عشان رئيس يتعزل من منصبه في أميركا دي زي بالضبط زي ما مراتك تقرر تحشي ورق عنب .. هو يبان الموضوع سهل .. حنجيب خلطة الرز و نغلي ورق العنب و نحشيه .. بس التنفيذ أصعب بكتير من شرح الطريقة .. يمكن عشان كده أكتر حد معترض علي إن أساساً حد يتكلم عن موضوع Impeachment ده هو رئيسة الكونجرس و زعيمة الحزب الديموقراطي (نانسي بيلوسي Nancy Pelosi) .. حاول تستوعب إن زعيمة المعارضة في أميركا مش عايزه حد يجيب سيرة عزل الرئيس اللي هي نفسها شايفاه أونطجي و نصاب و مكانه السجن مش البيت الأبيض .. هي عارفه كل ده و نفسها تشوفه بيغور في ستين داهية بس هي مش ناوية تسعي خالص في الإجراءات القانونية لعزله عن منصبه .. أظن السؤال دلوقتي .. ليه يا ست (نانسي)؟
بسم الله الرحمن الرحيم كده محصلش قبل كده خالص إن رئيس أميريكي إتشال من منصبه وفق الإجراءات القانونية اللي كلمة Impeachment بتنص عليها .. طب أزيدك من الشعر بيت .. فيه إتنين رؤساء أمريكان اللي هم (بيل كلينتون Bill Clinton) و (أندرو جونسون Andrew Johnson) الكونجرس مشي معاهم في إجراءات عزلهم من منصبهم بس كملوا مددهم الرئاسية عادي خالص زي ما يكونوا منفضين للكونجرس .. بلاش دي .. أكتر رئيس أميريكي إرتبط إسمه بفضايح تودي في ستين داهية كان (ريتشارد نيكسون Richard Nixon) و اللي قدم إستقالته من منصبه قبل ما الكونجرس يخلص إجراءات عزله من منصبه .. ده حيوديني للسؤال اللي يمكن بيخليك تهرش في راسك دلوقتي .. هو بالصلاة علي النبي إيه هي إجراءات عزل أي رئيس في أميركا؟
زي ما إحنا عندنا في مصر فيه مجلس الشعب و مجلس الشوري بحيث إن مجلس الشوري ده ملوش أي ستين لازمة فبرده في أميركا عندها حاجة شبه مجلس الشوري ده إسمه مجلس النواب House of Representatives .. أول خطوة إن بتتشكل لجنة تحقيق في المصيبة اللي عملها الرئيس الأميريكي و اللجنة دي بتفضل تستجوب في ناس و تكتب تقرير طويل عريض بتعرضه في الأخر علي المجلس ولازم أغلبية المجلس توافق علي التقرير و يقولوا اه الرئيس ده عمل مصيبة ولازم يتشال .. دي أول خطوة .. تاني خطوة إن الموضوع بيتصعد لمجلس الشيوخ أو Senate و هنا بتتعمل محاكمة للرئيس و عشان الرئيس يتشال من منصبه لازم تلتين البرلمان يوافق .. واضح كده إن عشان رئيس أمريكاني يتشال لازم يبقي فيه إجماع علي إن الرجل ده عمل مصيبة زي ما كده كلنا أجمعنا إن بأي حال من الأحوال (مروان محسن) مينفعش يلبس تي-شيرت منتخب مصر تاني.
كده خلينا نتفق .. عشان أساساً الكونجرس هناك يفكر إنه يمشي في إجراءات Impeachment فلازم الرئيس يكون عمل مصيبة و يبقي فيه إجماع وسط الناس إن المصيبة دي كفاية أوي إنه يغور بره البيت الأبيض و بناء علي الدستور الأميريكي فالمصيبة اللي تستحق إن الرئيس يتعزل عشانها إما بتكون الخيانة العظمي .. أو إن الرئيس خد رشوة .. أو إن الرئيس إرتكب جريمة أو جنحة .. هنا بقي الكلام يحلو .. إيه الجرايم اللي (ترامب) متهم إنه عملها و عشان كده الديموقراطيين عايزين يشيلوه من منصبه بسببها؟
حتلاقي ناس مركزة علي جريمة محترمة أوي هي إنتهاك قوانين الإنتخابات عشان (ترامب) كان بياخد الفلوس اللي الناس كانت بتتبرع بيها لحملته الإنتخابية يصرفها علي شركاته و عيلته .. ناس تانية رايحه في سكة إنه بيستغل منصبه كرئيس إنه يزود من أرباح شركاته .. بس الجريمة اللي فعلاً ممكن تودي (ترامب) في ستين داهية هي Obstruction of Justice أو عرقلة مسار العدالة .. لمعلوماتك العامة دي الجريمة اللي الكونجرس طلع قرار بعزل (كلينتون) بسببها و دي الجريمة اللي برده الكونجرس كان حيطلع قرار بعزل (نيكسون) بسببها .. عرقلة سير العدالة دي عامله زي ست ترفع قضية خلع علي جوزها و القاضي يسألها عايزه تخلعيه ليه يا مدام و يكون ردها أخاف ألا اقيم حدود الله سيدي القاضي.
أنا من فترة إتكلمت عن التقرير بتاع قاضي التحقيقات (روبيرت مالر Robert Mueller) في الإنتهاكات اللي إرتكبها (ترامب) خلال السنين اللي فاتت و حابب أفكرك إن التقرير ده حط 10 حالات خلال الكام سنة اللي فاتوا (ترامب) ممكن يكون فيها إرتكب جريمة عرقلة سير العدالة .. طبعاً أنا معنديش وقت إني أكلمك عن ال10 حالات دول فخليني أنقيلك أكبر و أخطر واحدة فيهم و اللي بتدور حول واحد أنا جبت سيرته برده في المقالة بتاعة تقرير (روبيرت مالر) و هو محامي البيت الأبيض (دون ماجان Don McGahn) و اللي الحقيقة الإعلام الأمريكاني مركز معاه أوي لإن لما الفريق بتاع (روبيرت مالر) حقق معاه و سألوه هو حضرتك قدمت إستقالتك من منصبك ليه كمحامي للبيت الأبيض؟ قالهم إن الرئيس كان بيخليني أعمل Crazy Shit و أنا هنا بنقل كلامه حرفياً .. تعالي بقي نفصص شوية تطلع إيه الCrazy Shit اللي الأخ (دون ماجان) بيتكلم عنها؟
دلوقتي (روبيرت مالر) قاضي تحقيقات مستقل متعين من البرلمان عشان يعرف هل (ترامب) عمل حاجة غلط ولا لا يعني بأي حال من الأحوال مينفعش الحكومة تشيله .. لا (ترامب) ولا أي حد شغال في الحكومة يقدر يشيل (روبيرت مالر) لإنه زي ما قلت البرلمان هو اللي معينه .. اللي حصل إن (ترامب) إتصل ب(دون ماجان) بالتليفون و قاله طلع قرار بعزل (روبيرت مالر) و قاله في التليفون إبقي كلمني لما تطلع القرار .. لما (دون ماجان) نفض ل(ترامب) و مسمعش كلامه (ترامب) إتصل به تاني و سأله هو إنت ليه مشلتش (روبيرت مالر)؟ .. لما إتعرف إن (ترامب) طلب من (دون ماجان) إنه يشيل (روبيرت مالر) و زي ما قلتلك مجرد إنه يطلب الطلب ده فده في حد ذاته جريمة فهو إتصل ب(دون ماجان) وطلب منه يطلع في التليفيزيون ينفي إن (ترامب) طلب منه إنه يشيل (روبيرت مالر) .. عشان بس تستوعب معايا اللي عمله (ترامب) .. هو لقي إن فيه حد بيحقق و بينخرب وراه و هو عارف إنه مينفعش يشيله من منصبه فطلب من المحامي بتاع البيت الأبيض إنه يشيله ولما المحامي رفض قاله مشلتوش ليه ولما الموضوع إتفضح طلب من المحامي يكدب قدام الناس كلها ويقول إن (ترامب) مطلبش منه حاجة.
هنا إنت محتاج تفهم إن كل ده فنكوش .. شعبية (ترامب) وسط الأهلاوية أو الجمهوريين عالية و حتفضل عالية لإن محدش بيتكلم وسط الجمهوريين علي الفضايح دي كلها .. هم كلهم في إعلامهم و في جرايدهم عمالين يقنعوا الناس بإن (ترامب) فلة شمعة منورة .. إتفرج علي الإعلام المحافظ في أميركا و اللي أكبر مثال له هو قناة فوكس نيوز Fox News تلاقي إنهم مثلاً بيقولوا إن التقرير بتاع (روبيرت مالر) طلع (ترامب) بريء و إن (ترامب) كمان من حقه يرفع قضية علي الحكومة عشان ياخد تعويض عن الضرر النفسي اللي هو حس به من التحقيق معاه .. ده بالضبط لما تبقي كل أخبارك عن مصر بتاخدها من واحد زي (أحمد موسي) .. طبيعي وقتها إنك تتخيل إن مصر محققه معدلات نمو مخليه الصينيين و الأمريكان نفسهم ياخدوا الرئيس (عبدالفتاح السيسي) عندهم سنة إعارة.
الديموقراطيين نفسهم بدأوا يفهموا المشكلة دي و بيحاولوا يحلوها بإنهم يجيبوا الناس اللي عارفه المصايب بتاعة (ترامب) و يقعدوهم قدام لجنة تحقيق علنية في البرلمان عشان الناس كلها تسمع الحقيقة .. هم حاولوا يجيبوا (دون ماجان) عشان يشهد قدام البرلمان بس (ترامب) طلع قرار بمنعه من إنه يشهد .. ده خلي الديموقراطيين يجيبوا (روبيرت مالر) شخصياً إنه يشهد قدام الناس كلها علي إيه اللي حصل؟ و اللي في رأيي حتبقي أهم جلسة إستماع في تاريخ أميركا و تحس إن الأمريكان حينشروهم غسيلهم الوسخ قدام الناس كلها ودي حاجة أنا شخصياً مستنيها جداً.
عشان كده واحدة زي (نانسي بيلوسي) و رغم إني زي ما قلت نفسها تشوف (ترامب) غار في ستين داهية النهاردة قبل بكره إلا إنها مش حتسعي خالص إنها تمشي في إجراءات عزله .. هي شايفه إن الشارع مش عايز ده و هي عندها حق .. أغلب إستطلاعات الرأي بتقول إن أغلب الأمريكان مش عايزين (ترامب) يمشي بإن الكونجرس يعزله .. (نانسي بيلوسي) بتراهن علي الوقت .. هي شايفه إن تأييد الجمهوريين الأعمي ل(ترامب) عامل زي تأييد الأهلاوية أو الزملكاوية الأعمي لأنديتهم .. إنت لما بتبقي زملكاوي أو أهلاوي متعصب بتبقي مش مستحمل حد يقول علي النادي اللي إنت بتشجعه كلمة وحشة حتي لو كان اللي بيتكلم عنده حق .. إنت بتبقي مُتعصب لدرجة إنك مش بتبقي شايف الحقيقة .. أغلب الأمريكان ميعرفوش إيه أساساً اللي موجود في تقرير (روبيرت مالر) و أهم قاعدة تكون فاهمها في السياسة هي إن الجهل بيوصلك في الأخر للتأييد الأعمي.
بص لواحد زي (ريتشارد نيكسون) .. ده واحد أنا عارف إن اللي منكوا من جيل الألفينات تقريباً مسمعش الإسم ده قبل كده خالص فخليني أديلك زتونة اللي هببه الرجل ده .. ده رجل بقي رئيس بعد ما الحزب الجمهوري اللي بفكرك إنه الأهلاوية بتوع أميركا رشحوه و كسب .. و هو رئيس كانت فيه إنتخابات برلمانية جايه فهو خاف إن الحزب بتاعه يخسرها يقوم أبو العريف يعمل إيه .. بعيد عنك طلب من ضباط مخابرات في وكالة المخابرات المركزية CIA إنهم يزرعوا أجهزة تنصت في أوضة الناس بتوع سكرتارية الحزب الديموقراطي و اللي كانوا وقتها قاعدين في فندق مشهور أوي في واشنطن إسمه ووترجيت Watergate .. لما الموضوع إتعرف و (نيكسون) بقت فضيحته بجلاجل الأمريكان بقوا بيقارنوا أي فضيحة سياسية تحصل بفضيحة ووترجيت .. بالنسبة ليهم ووترجيت عامله زي ماتش الستة واحد بتاع الأهلي و الزمالك .. عايز تقارن مثلاً الزمالك إدي الأهلي فوق دماغه في ماتش القمة قد إيه قارن نتيجة الماتش بنتيجة ماتش الستة واحد.
الغريب إن في الأيام الأولي لفضيحة ووترجيت و لإن الأمريكان مكنوش فاهمين أوي أبعاد الفضيحة فلو كنت نزلت سألت أي حد ماشي في الشارع هل إنت مع عزل (نيكسون) من منصبه أو لا؟ حتكون الإجابة هي لا طبعاً خليه قاعد يعني هو الرجل عمل إيه .. ده برده اللي خايفه منه (نانسي بيلوسي) .. نقطة تانية و هي إن طالما مفيش إجماع شعبي علي إن الرئيس لازم يمشي فغالباً لو حزب قرر إنه يمشي في سكة Impeachment ضد الرئيس فغالباً حتفرقع في وش الحزب في الإنتخابات .. ده اللي حصل مع (كلينتون) .. مكنش فيه إجماع في الشارع علي إن الرجل عمل حاجة غلط فلما الجمهوريين مشيو في سكة عزله من منصبه و جت الإنتخابات الديموقراطيين كسبوها.
أنا عارف إني طولت عليك بما فيه الكفاية و غالباً إنت بتقول لنفسك كفاية رغي بقي بس خليني أختم بإن فعلياً مفيش أي أمل إن (ترامب) يتشال من منصبه .. حتي لو الديموقراطيين حد وداهم عند (صبحي كابر) و ضربوا نص مشكل لحمة بالليلة و حسوا إنهم جامدين و رجاله أوي في نفسهم فالجمهوريين عمرهم ما حيخونوا رئيسهم حتي لو هو إبن ستين كلب .. زي ما عمر ما الأهلاوية حيقولوا كلمة وحشة علي (محمود الخطيب) مع إنهم عارفين من جواهم إن (محمود طاهر) كان برقبته .. حتي لو بقدرة قادر أعضاء في الكونجرس عن الحزب الجمهوري ضميرهم نقح عليهم و وافقوا علي إقالة (ترامب) فهو شخصياً قال إنه مش حيمشي إلا لما مدته تخلص .. اللي أنا شايفه إن خلال الشهور الجايه الديموقراطيين حيركزوا أوي علي فضح (ترامب) .. كل تفاصيل فساده .. كل تفاصيل عرقلته لمسار العدالة .. بإختصار شديد إنت الفترة الجاية حتشوف في أميركا نفس الخناقة اللي إنت بتشوفها بين الأهلاوية و الزملكاوية بعد كل مرة (مرتضي منصور) يتخانق مع (محمود الخطيب).
المصدر:
- حلقة من برنامج Last Week Tonight with John Oliver بتتذاع علي قناة HBO و ده لينك الحلقة علي YouTube لو حبيت تشوفها:
ءs://www.youtube.com/watch?v=zxT8CM8XntA&t=4s
