لينك التسجيل الصوتي للمقالة علي Sound Cloud:
https://soundcloud.com/user-112011687-312727988/fire-and-fury-m4a
موضوعنا النهاردة اللي حنتكلم عنه هو كتاب Fire & Fury: Inside The Trump White House اللي مكسر الدنيا في أميركا وعلي كلام جريدة The New York Times الأميريكية فهو أكتر كتاب حقق مبيعات في العالم حالياً واللي كتب الكتاب ده واحد إسمه (مايكل وولف Michael Wolff) .. إنت لما بتقرأ الكتاب ده فإنت بتكون واحد من إتنين .. يا إنت شايف إن الكتاب ده محاولة واحد صحفي إنه يشرحلك إزاي الفريق الرئاسي بتاع (دونالد ترامب Donald Trump) بيشتغل فإنت حتشوفه إنه تجربة صحفية تستحق الإحترام .. أو إنك حتشوفه إنه عامل زي ما يكون جرنان فضايح لم كل القصص والحكايات بتاعة فضايح البيت الأبيض جوه إدارة الرئيس الأميريكي وحطها في كتاب عشان يتباع والناس تشتريه ويجيب فلوس علي أساس فكرة هو مين فينا مش بيحب الفضايح؟ .. بس الحقيقة المُرة إن الكتاب ده في الحالة دي هو يعتبر الإتنين مع بعض وخليني أفهمك أنا قصدي إيه.
الكتاب ده هو ملخص كل حاجة (مايكل وولف) شافها بعنيه وسمعها بودانه جوه البيت الأبيض وملخص كل ده هو إن ده فريق بيت أبيض أو مؤسسة رئاسة مبنية علي الفضايح .. بإختصار شديد اللي بيقوله (مايكل وولف) عن أفراد مؤسسة الرئاسة أو الفريق الرئاسي اللي بيشتغل مع (دونالد ترامب) إنهم أكتر مجموعة مغفلين وهبل ومتخلفين عقلياً قدر التاريخ إنه يجمعهم في مكان واحد .. فيه شوية أسئلة محتاجين نفهم إجابتها عشان تبدأ تستوعب ليه كل الضجة دي إتعملت عن الكتاب ده:
السؤال الأول .. هو الأخ (مايكل وولف Michael Wolf) عرف كل ده إزاي؟ وإزاي دخل البيت الأبيض وإتكلم مع الناس اللي شغالة فيه؟
الحقيقة إن إجابة السؤال ده بتوريك إن فعلاً الفريق الرئاسي بتاع (دونالد ترامب) هم شوية مغفلين وهبل مش فاهمين حاجة .. فكر فيها كده .. أنا عارف إنك متعرفش مين هو (مايكل وولف) فخليني أديلك مثال تفهمه .. تخيل معايا إن مثلاً الإعلامي (معتز مطر) اللي معروف بإنه من أشد المعارضين للرئيس (عبدالفتاح السيسي) وقاعد في قطر وعنده برنامج عمال يشتم فيه في الحكومة المصرية الحالية .. تخيل إن (معتز مطر) قدم طلب إنه يجي مصر عشان يتكلم مع مثلاً اللواء (عباس كامل) أحد المقربين جداً من الرئيس (السيسي) واللي الرئيس (السيسي) عينه مدير للمخابرات العامة فبدل ما فريق الرئاسة يرفض ويقوله إنت إزاي يا إرهابي يا خاين تطلب حاجة زي كده فإذا بيهم زي ما يكونوا ميعرفوش مين هو (معتز مطر) ده أصلاً يقولوه إتفضل تأنس وتشرف والبيت بيتك.
ده بالضبط اللي حصل مع (مايكل وولف) .. ده رجل معروف في أميركا إنه كتب كذا كتاب زعل منه ناس كتير لإنه صريح ومبيجاملش حد ومعروف عنه إنه من أشد المعارضين ل(دونالد ترامب) فإذا به لما قدم طلب عشان يدخل البيت الأبيض يتكلم مع ناس جوه مؤسسة الرئاسة رحبوا به جداً وقالوله إتفضل .. دي نقطة .. النقطة التانية إن البيت الأبيض يتهيألك إنه كبير وضخم بس الحقيقة هو مش كده .. المكان اللي الفريق الرئاسي بيشتغل منه هو حتة بيسموها الجناح الغربي West Wing وده جزء من الدور الأرضي للبيت الأبيض يعني بتتكلم عن مكان صغير شوية عامل زي ما يكون مكتب شئون الطلبة في أي كلية .. اللي بيحصل إن علي مدار كذا يوم (مايكل وولف) بيقدم طلب عشان يقابل حد معين في مؤسسة الرئاسة في اليوم الفلاني وبكرة مثلاً يقابل شخص تاني وبعده يقابل شخص تالت وهكذا .. المهم إن في كل مرة بيدخل بيقعدوه في مكتب يستني لحد ما الشخص اللي هو جاي يقعد معاه يفضي .. لكن لإن الWest Wing مش بس في إدارة الرئيس (دونالد ترامب) إنما في كل فرق الرئاسة للرؤساء الأميريكيين اللي قبله فيهم نفس العيب ده وهو عدم النظام في المواعيد فإنت ممكن يكون معادك الساعة عشرة الصبح فتلاقي إن اللي المفروض تقابله مش فاضي وحتفضل مستنيه في مكتبه لحد ما يفضي وممكن تقابله مثلاً علي الساعة 3 العصر .. كل ده وإنت قاعد في المكتب محرج وحاسس إنك مش لاقي حاجة تعملها.
في الأول الموضوع ده كان مهين أوي .. يعني أنا مفضي نفسي وجاي الساعة عشرة الصبح عشان تسيبوني كل ده لوحدي .. في الأول بتحاول تفضل ساكت عشان محدش ياخد باله منك بس مع الوقت بتقول لنفسك أنا قاعد جوه المكان اللي بيحكموا منه أميركا فبتبدأ تفتح كلام وتدردش مع الناس .. ما إنت قاعد فاضي بقي .. (مايكل وولف) وهو ماشي ممكن يقابل حد فيسأله هو إنت جاي تقابل مين فيقوله مثلاً أنا جاي أقابل (ستيف بانون Steve Bannon) واللي كان كبير مستشاري (دونالد ترامب) قبل ما يقدم إستقالته فيقوله يااااااااه ده بني أدم زبالة ومبيحترمش مواعيده أنا رايح الكافيتريا أشرب حاجة تعالي معايا أعزمك علي حاجة بدل ما إنت مستني كده .. وعلي هذا الحال كل يوم .. كل يوم يقابل ناس شغالة جوه الWest Wing يدردش معاها ويقعد يسمع في حكاويهم .. ما هو فاضي بقي.
السؤال الثاني .. طب ده كتاب فضايح إزاي أعرف إن كل اللي فيه حقيقي؟ إزاي أعرف إن مثلاً حد حب يأسفن في زميله فإخترعله مصيبة وحكاها ل(مايكل وولف Michael Wolff) عشان يدمر سمعته؟
اللي إنت محتاج تعرفه إن ده كتاب بيحكي بدقة متناهية كل حاجة (مايكل وولف) شافها وسمعها جوه البيت الأبيض من غير ما يحط التاتش بتاعته .. الأهم إن دي ناس شغالة في مؤسسة الرئاسة ضمن الفريق بتاع (دونالد ترامب) .. الناس دي المفروض تحط مصلحة الرئيس ومصلحة أميركا فوق أي إعتبار .. مفيش حاجة إسمها نفسنة وأسفنة ولعب من تحت الطرابيزة بين أفراد الفريق الرئاسي .. فلما تتكلم مع الناس دي وتكتشف إن كلهم تقريباً شايفين إن البيت الأبيض ده تحول لمكان مينفعش تشتغل فيه ومينفعش تحكم منه وأغلبهم إن لم يكن كلهم مقتنعين بإن (دونالد ترامب) مينفعش يبقي رئيس يبقي أكيد فيه مصيبة .. الأغرب إن (مايكل وولف) مش هو الصحفي الوحيد اللي نقل كلام عن ناس جوه مؤسسة الرئاسة الأميريكية شايفين إن (دونالد ترامب) مينفعش يبقي رئيس .. صحفيين كتير من اللي مقربين من الناس دي نقلوا عنهم كلام زي ده .. الحقيقة إن الناس الوحيدة في أميركا اللي مقالتش رأيها في (دونالد ترامب) هم الصحفيين نفسهم .. الناس دي عماله تنقل كلام وأراء ناس ومحدش سألهم هو أنتوا إيه رأيكوا؟ ويمكن السبب في كده إن الصحفي شغلته إنه ينقل أخبار وأراء من غير ما يعبر عن رأيه الشخصي لإنه لو عبر عن رأيه الشخصي فمحدش حيتكلم معاه تاني وده اللي بيقوله (مايكل وولف) إنه بقي مقتنع إنه خلاص كده مش حيعتب من باب البيت الأبيض تاني.
السؤال الثالث .. هو إيه حكاية ساندوتشات الهامبرجر بالجبنة؟
واحد من أهم ويمكن أغرب الحاجات اللي الناس عرفتها عن أسلوب حياة (دونالد ترامب) من الكتاب ده هو إن الرجل بيعشق حاجة إسمها ساندوتشات الهامبرجر بالجبنة .. أنا أفهم إن (دونالد ترامب) رجل كبير في السن عدي السبعين سنة وبقي محتاج كل يوم يعمل دماغ .. فيه ناس بتعمل دماغ بإنها تشرب سيجارة في البلكونة أو إنها تشرب حجرين شيشة أو إنها تشرب كاس ويسكي أو أي حاجة تساعدهم يطفوا دماغهم شوية من هم الشغل خصوصاً إنه شغال في أصعب وظيفة في العالم .. بس فكرة إنك تعمل دماغ من إنك الساعة 6 بليل تلبس بيجامتك وتقعد في سريرك بتتفرج علي التليفيزيون جنبك الSmartphone بتاعك عشان تكتب تويتات بإيد وبالإيد التانية بتاكل ساندوتش هامبرجر بالجبنة فده فكر واحد كان شغال في الحكومة وطلع معاش ومش لاقي حاجة يعملها مش فكر رئيس أقوي دولة في العالم.
السؤال الرابع .. ناس كتير مش فاهمة إن إزاي (دونالد ترامب) اللي خلال حملته الإنتخابية باع نفسه للجمهور علي إنه رجل أعمال بيعرف يخلص صفقات وإنه مفاوض بارع بقي رئيس فاشل كده؟
بإختصار تخيل لو (مرتضي منصور) رشح نفسه للرئاسة وعرض نفسه للناس علي إنه (نجيب ساويرس) السياسة اللي هو رجل بيعرف يخلص صفقات ومفاوضات صعبة بكلمتين حلوين منه .. طب إزاي الرجل اللي باعلنا الصورة دي مش عارف يتفاوض مع الحزب الديموقراطي المعارض علي الإصلاحات المطلوبة في نظام الهجرة والضرائب والتأمين الصحي وغيرها؟
ده اللي بيقوله (مايكل وولف) في كتابه هو إن أفراد الطاقم الرئاسي اللي المفروض إنهم شغالين مع (دونالد ترامب) عارفين إنه رجل هلاس وكداب وعمره ما قعد علي طرابيزة مفاوضات قبل كده .. ده رجل أصلاً مبيعرفش يقرأ الBalance Sheet بتاع شركته اللي هو التقرير بتاع الأرباح والخسائر .. ده رجل إتعود يطلع في التليفيزيون يروج لنفسه علي إنه من عباقرة الBusiness بس الحقيقة إن فيه ناس شغالة معاه هي اللي بتعمل كل حاجة .. وده بيودينا لأهم نقطة في الكتاب .. فيه فرق إنك تكون رجل جاهل مش فاهم حاجة في الدنيا بس بتعرف تتكلم وتاكل بعقل اللي قدامك حلاوة فإنت لما بتتحط في موقف سلطة فتلاقي نفسك مش فاهم يعني إيه ضرائب؟ ويعني إيه تأمين صحي؟ ويعني إيه سياسة خارجية؟ فالناس اللي حوليك بتساعدك عشان تفهم وتبدأ تاخد القرارات الصح .. وفيه فرق بين إنك تكون رجل جاهل مش فاهم حاجة في الدنيا بس بتعرف تتكلم وتاكل بعقل اللي قدامك حلاوة وإنت أصلاً مش مهتم ومش عايز تحكم ومش في دماغك ترفع الضرائب عن مين ولا في دماغك إنك تساعد الفقراء ولا في دماغك أي حاجة خالص .. حاول تتخيل إن (دونالد ترامب) عامل زي باباك أو جدك اللي عدي السبعين سنة وطلع علي معاش ومقضي حياته كلها قدام التليفيزيون ومش عايز يعمل حاجة في حياته وده بيخلق حالة فراغ جوه مؤسسة الرئاسة .. طب لو (دونالد ترامب) مش عايز يبقي رئيس أومال مين اللي بيحكم؟
من الحاجات اللي المفروض تكون عارفها إن الناس اللي كانت مع (دونالد ترامب) في الإنتخابات ووصلته للرئاسة تقريباً كلهم قدموا إستقالاتهم ومشيوا .. فيه صورة عندك له وهو قاعد بيتكلم في التليفون وحوله ناس قاعدين وواقفين متعلم علي وشوهم بعلامة إكس بالأحمر .. اللي متعلم عليهم وشوشهم بإكس بالأحمر دول يبقي الناس اللي كانوا ضمن الفريق الرئاسي بتاع (دونالد ترامب) بس قدموا إستقالتهم ومشيوا قبل ما حتي (دونالد ترامب) يكمل سنة كاملة في الرئاسة .. أعتقد إنك ميزت منهم (ستيف بانون) اللي كان كبير مستشاريه ومشي ومتعينش حد مكانه .. منهم مدير مكتبه (راينس بريبس Reince Priebus) اللي برده قدم إستقالته ومستشاره للأمن القومي الجنرال (مايكل فلين Michael Flynn) اللي بيتحقق معاه دلوقتي بتهمة الخيانة العظمي لحساب روسيا ودي لوحدها فضيحة كان ممكن توقع (دونالد ترامب) ومنهم كمان المتحدث الرسمي السابق بتاعه (شون سبايسر Sean Spicer) اللي مشي وجابوه واحد مكانه مقعدش في منصبه أسبوع ومشي ودلوقتي عينوا مكانه واحدة .. الوحيد اللي محافظ علي منصبه هو نائب الرئيس (مايك بينس Mike Pence).
صحيح هو عين ناس جديدة مكانهم أهمهم مستشاره للأمن القومي الجنرال ( إتش أر ماكماستر H.R. McMaster) ومدير مكتبه الجنرال (جون كيلي John Kelly) وأكيد خدت بالك إن الإتنين جنرالات والإتنين مشيوا بالمناسبة بعد ما إتعينوا بس عشان (دونالد ترامب) ميعرفهومش ومكانوش معاه من فترة الإنتخابات فهو مكنش بيثق أوي فيهم وده كان خالق مشكلة كبيرة .. المشكلة إن دلوقتي أهم وأقدم إتنين مستشارين له هم:
- واحدة إسمها (هوب هيكس Hope Hicks) ودي واحدة زي القمر زي ما واضح من صورتها و(دونالد ترامب) مخليها معاه عشان هي حلوة وزي القمر والCV بتاعها مفيهوش غير إنها كانت شغالة جونيور في إدارة العلاقات العامة في مجلة موضة .. يعني دي واحدة أخرها تفهم في الفستاتين والمكياج ودلوقتي الزمن خلاها أهم مستشارة لرئيس الولايات المتحدة ودي للأسف مشيت من البيت الأبيض .. مشيت الصاروخ ليه يا (وديع).
- واحد إسمه (ستيفن ميلر Steven Miller) وده رجل مبيفهمش لدرجة إن في مرة (ستيف بانون) اللي بفكرك إنه كان كبيري مستشاري (دونالد ترامب) أيام الإنتخابات وصفه ل(مايكل وولف) بإنه الصبي بتاعه اللي بيكتبله الإيميلات.
عايزك تاخد نفس عميق وتتحاول تستوعب إن أهم إتنين مستشارين لرئيس أقوي دولة في العالم هم واحدة مبتفهمش غير في المكياج والموضة والفستانين وواحد وظيفته كانت إنه يكتب إيميلات .. وده بيحطك قدام واقع جديد .. (دونالد ترامب) مش عبقري ولا دماغه كبيرة ولا أي حاجة خالص .. ده بني أدم غبي ومبيفهمش بكل ما تحمله الكلمة من معني.
المصدر:
- Interview عملها (مايكل وولف Michael Wolff) مع برنامج The Daily Show with Trevor Noah وده لينك الحلقة الInterview علي YouTube لو حبيت تتفرج عليها:
http://www.cc.com/video-clips/2zblwq/the-daily-show-with-trevor-noah-michael-wolff—exposing-the-trump-white-house-in–fire-and-fury—-extended-interview?xrs=synd_facebook_012318_tds_56
