اللي حنتكلم عنه النهاردة هو الرجل اللي يبان غلبان اللي عندك في الصورة ده .. ده اسمه (يحيي السنوار) .. عنده 56 سنة وحالياُ هو اللي ماسك حركة حماس في قطاع غزة .. لو حبيت تشبه الرجل ده بحد عشان تقدر تفهم أنا ليه بتكلم عنه النهاردة فده يبقي نسخة بالكربون من (نيلسون مانديلا Nelson Mandela) .. أو علي الأقل هو عايز يبقي كده .. (يحيي السنوار) هو أهم رجل في فلسطين ومش ببالغ علي فكرة لما بقول كده .. مثال صغير عشان أثبتلك وجهة نظري .. يوم 14 مايو 2018 حصل إن الجيش الإسرائيلي قتل 60 متظاهر سلمي فلسطيني من قطاع غزة عملوا مظاهرة كبيرة علي الحدود بين إسرائيل والقطاع لو تفتكر .. بعدها بيومين يعني يوم 16 مايو أهل قطاع غزة قعدوا قدام التليفيزيون عشان يعرفوا مصيرهم هل حتحصل حرب جديدة بين إسرائيل وحماس ولا لا .. عشان يعرفوا ده إتفرجوا علي قناة الجزيرة وهي بتتكلم مع (يحيي السنوار) .. (يحيي السنوار) مش (محمود عباس ابومازن) رئيس فلسطين ولا حتي (إسماعيل هنية) قائد حركة حماس .. (يحيي السنوار) اللي كان ولا يزال في إيده القرار هل حماس حتخش حرب جديدة مع إسرائيل أو لا .. بدأت تفهم ليه أنا بتكلم عنه النهاردة؟
في الفترة من 14 لحد 16 مايو الرجل ده كان محطوط تحت ضغط ما يعلم به إلا ربنا و إحمد ربنا وبوس إيدك وش وظهر إنك مكنتش مكانه .. قادة كتائب (عز الدين القسام) الذراع العسكري لحركة حماس كانوا بيزنوا فوق دماغه إنه يعلنها حرب علي إسرائيل .. بس هو علي عكس كل التوقعات لما طلع علي الجزيرة قال إن حماس ماشية في سكة التظاهر السلمي .. من تحت الطرابيزة هو كان مخلي الحركة فاضلها شوية وتبوس إيد أهل القطاع بلاش تتظاهروا وإرجعوا بيوتكوا .. موقف حماس ده خلي ناس كتير تستغرب وتهرش في شعرها خصوصاً إن دول كتير أوي في العالم بتعتبر حماس منظمة إرهابية .. اللي خلي ناس كتير والإسرائيليين بالذات فعلاً مش مصدقين وبيبصوا للتليفيزيون وبيسألوا هو ده (يحيي السنوار) فعلاً ولا النت كان إنك لما تفتح الCV بتاعه وتقراه وتشوفه وهو بيتكلم علي الجزيرة حتبقي عامل زي (عادل إمام) في مسرحية (الواد سيد الشغال) عمال تقول .. ده!!
بإختصار شديد (يحيي السنوار) كان (إبراهيم الأبيض) بتاع حركة حماس .. هو من مواليد مخيم لاجئين خان يونس في القطاع .. إتجند في الحركة وهو صغير وكان من مؤسسي حاجة تقدر تشبهها بإنها مباحث أمن الدولة بتاعتهم .. الرجل كانت شغلته إنه يفضل يدور علي الفلسطينيين اللي بيتعاونوا مع الإسرائيليين عشان يعدمهم مش بس عشان يقبض عليهم ويقدمهم للمحاكمة .. وعلي فكرة هو بنفسه أعدم ناس منهم .. سنة 1988 الإسرائيليين إعتقلوه وحكموا عليه بأربع أحكام مؤبد يعني بتتكلم عن 100 سنة سجن .. (يحيي السنوار) فضل محبوس في السجن 20 سنة لحد ما جه مسلسل (جلعاد شاليط) لو تفتكر.
حماس كانت أسرت عسكري إسرائيلي اسمه (جلعاد شاليط) أكيد سمعت اسمه وعدي عليك في الأخبار قبل كده وقالت إن لو إسرائيل عايزاه يرجع فهي لازم تفرج عن 1000 معتقل من بتوع حماس محبوسين في السجون الإسرائيلية .. الإسرائيليين خلوا (يحيي السنوار) هو اللي يتفاوض مع قادة حماس عشان ياخد من حماس الأسامي ويرجع يديها للإسرائيليين يشطبوا علي الأسماء اللي هم رافضين يفرجوا عنها .. فين وفين لحد ما إتفقوا علي ال1000 اسم اللي حيُفرج عنهم وكان من ضمنهم اسم (يحيي السنوار) .. تقدر تسميها نصيب السمسار من صفقة البيع والشرا لو حبيت .. سنة 2011 (يحيي السنوار) أُفرج عنه وبعدها علي طول الإسرائيليين ضربوا نفسهم بالجزمة علي إنهم سابوه يطلع لما شافوه بقي قائد في كتائب (عز الدين القسام).
زيها زي أي حزب سياسي له ذراع مسلح فحركة حماس من ساعة ما إتعملت في الثمانينات الناس بتوع المكتب السياسي وبتوع كتائب (عز الدين القسام) مش بيطيقوا بعض ولا بينزلوا لبعض من زور .. الخناقة دي ولعت بعد الحرب الإسرائيلية علي القطاع سنة 2014 .. في الحرب دي أُستشهد 2,300 فلسطيني من القطاع في مقابل مقتل 70 إسرائيلي بس .. اللي حصل ده غيّر حاجة جوه دماغ (يحيي السنوار) .. من بره يبان إن ده رجل أسس مباحث أمن الدولة بتاعة حماس وقضي 20 سنة مسجون ولما طلع كان قائد من قادة كتائب (عز الدين القسام) .. علي الورق هو يخليك تبصم بالعشرة إنه بني أدم عنيف ومبيتفاهمش ومعندوش يا أما إرحميني زي ما بنقول .. حتي الإسرائيليين نفسهم كانوا متراهنين إنه مش حينفع في شغلانة السياسة وحيسبلهم ميه ملة وياخد بعضه ويمشي .. بس مش ده اللي حصل.
سنة 2017 الناس بتوع المكتب السياسي إختاروا (يحيي السنوار) عشان يبقي هو اللي يمسك حركة حماس في القطاع .. سواء الفلسطينيين أو الإسرائيليين أول ما سمعوا الخبر جريوا فتحوا الCV بتاعه وقروه عشان بناء عليه يستنتجوا إيه اللي ممكن يحصل بعد كده .. بس عمر ما قراية الCV تقدر تخليك تفهم الشخصية اللي قدامك .. أي حد شغال في الHR يقدر يفهم أنا قصدي إيه .. عندك واحد زي (جادي إيزينكوت Gadi Eizenkot) رئيس أركان حرب الجيش الإسرائيلي معملش حاجة غير إنه مجرد قرأ الCV طلع قال بس كده جبرت يا جدعان .. كده المكتب السياسي بقي هو كتائب (عزالدين القسام) وإن (يحيي السنوار) ده رجل مريض نفسي من كتر ما إتسجن وحيطلع يطلع كل عقده النفسية دي علي الفلسطينيين والإسرائيليين .. الإسرائيليين لما لقوا إن قراية الCV مش جايبه همها راحوا سألوا ضابط الموساد الإسرائيلي اللي كان بيستجوب (يحيي السنوار) في السجن عشان يسألوه عن رأيه في شخصيته وكان تقييمه إنه شخصية متشددة جداً بس في نفس الوقت تفكيره عملي وواقعي لأبعد الحدود.
عشان أشبهلك دماغه هو مش زي الجوكر اللي فيه سلك في دماغه ضرب وعايز يقلبها فوضي ويشوف الدنيا بتولع قدامه .. إنما هو أشبه ب(باين Bane) شخص عنيف جداً بس عملي أوي وكل حركة بيعملها بحساب مش مقضيها بدراعه وخلاص .. علي فكرة ده مش رأي ضابط الموساد لوحده .. (محمد دحلان) أكتر بني أدم مكروه من حماس واللي في حالة إنك متعرفش هو مين فده كان ماسك نفس منصب (يحيي السنوار) بس جوه حركة فتح اللي ماسكه الضفة الغربية واللي حالياً قاعد في الإمارات بيقول عليه نفس الكلام .. الإتنين (محمد دحلان) و(يحيي السنوار) من مواليد مخيم خان يونس والإتنين كانوا صحاب وهم صغيرين.
خلال سنة واحدة من ساعة ما بقي هو اللي ماسك حركة حماس في القطاع قدر (يحيي السنوار) إنه يخلي قادة حماس اللي بره القطاع وقاعدين في بيروت وإسطنبول والدوحة يحطوا الجزم القديمة في بقهم .. ومش لوحدهم علي فكرة .. أي حد بيوصف نفسه إنه متشدد ودماغه ناشفة جوه القطاع حالياً ميقدرش يفتح بقه قدام (يحيي السنوار) .. هو فاهم إن مشكلة حماس وقطاع غزة عموماً حالياً هي الإقتصاد .. زمان حماس كانت معتمدة علي أنفاق التهريب عشان تنقل بيها مقاتليها جوه وبره إسرائيل عشان ينفذوا عملياتهم وكانت بتستخدم الأنفاق دي عشان تدخل أكل وشرب وفلوس للقطاع .. بداية من 2016 وإسرائيل ومصر شغالين في تدمير الأنفاق دي ومن الخناقات التاريخية سنة 2017 إن (محمد ضيف) قائد كتاب (عزالدين القسام) كان عايز يستخدم أخر الأنفاق اللي لسه متدمرتش إنه ينفذ بيها سلسلة هجمات علي إسرائيل تقدر تسميها حفلة توديع العزوبية كده بس (يحيي السنوار) رفض.
فيه ناس كتير جوه القطاع من اللي شالوا سلاح ضد إسرائيل جوه القطاع شايفين إن (يحيي السنوار) عنده حق في إنه يسعي ورا حل سياسي مع إسرائيل .. واحد زي (خالد البطش) من حركة الجهاد الإسلامي شايف وهو بيتكلم صح إن سواء حماس أو غيرها معندهمش جيش .. حرب جديدة مع إسرائيل حتبقي نهاية قطاع غزة اللي هو أساساً فاضله تكة وينهار بسبب الإقتصاد وإن مفيش خدمات .. الوضع زي الزفت لدرجة إن (يحيي السنوار) قال في أول مؤتمر صحفي له من بعد ما بقي هو اللي ماسك القطاع إن أكبر مشكلة بتواجهه إنه بقي شايف إن الشباب الفلسطيني اللي عايش في غزة فقد الأمل إنه في يوم من الأيام حيقدر يعيش حياة كريمة .. علي فكرة (يحيي السنوار) من الشخصيات الطموحة جداً ويوم بعد يوم الفلسطينيين سواء في القطاع أو الضفة بقوا شايفينه حيبقي هو زعيم كل الفلسطينيين خصوصاً إن (محمود عباس ابومازن) خلاص بقي عنده 82 سنة ومبقاش قادر يصلب طوله .. هل ده حيحصل؟ الله أعلم .. هل فعلاً (يحيي السنوار) حيبقي (نيسلون مانديلا) بتاع فلسطين؟ الحقيقة معرفش بس ياريت.
المصدر:
- مقالة بعنوان The Leader of Hamas in Gaza is the Most Influential Man in Palestineيعني قائد حماس في غزة هو أكتر رجل له نفوذ في فلسطين .. نشرت في مجلة The Economist وده لينك المقالة الأصلية:
https://www.economist.com/middle-east-and-africa/2018/05/26/the-leader-of-hamas-in-gaza-is-the-most-influential-man-in-palestine
