في الوقت اللي الناس كلها قبل بداية كل سيزون بتجري و بتتناقش و بتتخانق حول صفقات إنتقالات اللاعيبه و مين مشي و مين قعد و مين دفع كام عشان يشتري اللاعيب الفلاني .. و لسه صحيح الدوشة قبل بداية كل سيزون لتشكيلة الفانتازي و نجيب مين و منجيبش مين و مين حيبقي مفاجأة الموسم .. كل المواضيع دي مسلية طبعاً و ليها جمهورها بس النهاردة أنا عايز أقف الحقيقة قصاد 3 دروس مهمين أوي لأي حد شغال في بيزنس إدارة كرة القدم خصوصاً في مصر .. الأندية في مصر عندها مشكلة كبيرة في حتة الإدارة دي و يمكن ده السبب إن في السنين اللي فاتت مشفناش فلتات تخليك كمشجع كورة تبقي مبسوط بيها .. مفيش النادي اللي يطلع يدي الأهلي و الزمالك فوق دماغهم من غير ما يكون بيحرق فلوس زي بيراميدز .. أنا بتكلم عن الأندية اللي علي الله حكايتها كموارد و إمكانيات بس عندها طموح إنها تحقق حاجة .. يمكن مقالة النهاردة توريك لمحة عن ليه ده محصلش هنا.
درس رقم واحد .. أحيانا لازم تعض عشان الإدارة تسيبك تشتغل:
واحدة من العيوب القاتلة في أي مدير هي الدماغ الناشفة .. العيب ده بيبقي كارثة لو المدير اللي إحنا بنتكلم عنه يبقي رئيس نادي و أظن إن مثال صارخ علي ده هو (دانييل ليفي) مدير نادي توتنهام .. أنا شخصياً لو حد سألني تقيم إزاي فترة رئاسة (دانييل ليفي) للنادي فأنا صدقني مش حلاقي إجابة .. تحس فترة رئاسته دي دحلاب كده متعرفش تمسكها .. صحيح هو بني إستاد جديد للنادي و إتكلمنا قبل كده عن إزاي الإستاد ده تحفة هندسية تتدرس في كليات الهندسة .. وصل بيهم لنائي تشامبيونز ليج .. توتنهام بقي إسمه بيتحط دايماً كواحد من المرشحين للأربعة الكبار في بداية كل موسم و دي نقلة محترمة من الفترة اللي كان فيها النادي لما يلعب قصاد مانشستر يونايتد ففي المحاضرة اللي قبل الماتش كل اللي السير (أليكس فيرجسون) كان محتاج يقوله للاعيبته يا رجاله دول توتنهام اللي هو يا ريت منصعبش الماتش علي نفسنا .. تحس إن الاندية الكبيرة زمان كانت بتتعامل مع توتنهام زي ما الأهلي و الزمالك بيتعاملوا مع المقاولين العرب كده .. كل ده إتغير في فترة رئاسة (دانييل ليفي) .. بس في نفس الوقت فيه إحساس عندنا كلنا إن كان ممكن النادي يحقق نجاح أكبر من ده بكتير لولا حاجة واحدة بس .. (دانييل ليفي).
واحدة من الأسباب اللي خلت اللاعيبة بتاعة توتنهام تنزل مش مركزة في ماتش الفاينال بتاع تشامبيونز ليج موسم 2019 قصاد ليفربول هو إن في الأيام اللي قبل الماتش الإعلام ساب الكلام عن النهائي و مين ممكن يكسب و يا تري تشكيلة الفرقتين حتبقي عاملة إزاي و كله بقي ملوش لا شغلة ولا مشغلة غير هو يا تري (ماوريسيو بوتشيتينو) حيكمل في منصبه كمدير فني للفرقة ولا (دانييل ليفي) حيمشيه؟ .. يا تري هو (دانييل ليفي) قعد مع (بوتشيتينو) و إتفقوا علي ميزانية شراء لاعيبة للموسم الجاي ولا لا؟ .. طب هو (بوتشيتينو) متقدمله عرض من ريال مدريد ولا مانشستر يونايتد؟ .. تقدر تقول و حيبقي عندك حق إن تدخل رئيس النادي بشكل أوفر في شئون الفرقة ضرها أكتر ما نفعها .. صحيح إنتوا وصلتوا للفاينال بس بسبب الضغط الإعلامي اللاعيبة منزلتش مركزة و خسروا الماتش .. بعدها جه (جوزيه مورينيو) و زي ما يكون (دانييل ليفي) بقي قاعدلهم جوه أوضة اللبس .. كل شوية (مورينيو) يطلع يقول في الإعلام إنه مش عاجبه الطريقة دي علي أمل إن (دانييل ليفي) يختشي علي دمه و البعيد أبداً .. اللي فيه داء بيبقي صعب يغيره .. لحد ما جه (أنتونيو كونتي).
(كونتي) مبيهزرش .. بمعني .. لو قالك إنت لو عملت الحاجة الفلانية حاخد بعضي و أمشي فهو فعلاُ بياخد بعضه و يمشي لو إنت عملت الحاجة اللي هو قالك متعملهاش .. في إنتر ميلان هو مكنش عاجبه طريقة تعامل الإدارة مع الفرقة بعد ما خد الدوري .. قالهم لو متعدلتوش حمشي .. إفتكروه بيهوش .. خد بعضه و مشي .. ده اللي راعب (دانييل ليفي) و مخليه يمشي علي السراط المستقيم .. مفيش حاجة إسمها التفاوض مع الصفقات الجديدة يتأخر لأخر يوم في الميركاتو .. مفيش حاجة إسمها رئيس النادي يحشر مناخيره في الفرقة .. إنت مال أهلك إنت أخلي اللاعيبة تلف التراك 42 مرة ولا حتي 50 مرة في فترة الإعداد .. لو مش عاجبك و إعترضت حاخد بعضي و أمشي و عشان كده (دانييل ليفي) حاطط جزمة قديمة في بقه و ساكت .. و عشان كده لو سألت أي حد من اللي بيشجع توتنهام حتلاقيه مستني الموسم الجديد علي أحر من الجمر.
الدرس ده مهم جداً للأندية المصرية و خصوصاً لرؤساء الأندية اللي شايفين نفسهم جامدين زحليقة و مؤهلين إنهم هم اللي يمسكوا الفرقة بدل المدير الفني و تقريباً بيطلعوا يتكلموا في الإعلام عن تفاصيل متخصهمش .. إنت جايب مدير فني عشان يشتغل .. سيبه يشتغل .. و في نفس الوقت المدير الفني محتاج يعض و محتاج يرسم حولين نفسه صورة إن الناس بتخاف منه عشان اللاعيبة متتدلعش و في نفس الوقت رئيس النادي يحسبها ألف مرة قبل ما يقرر يحط مناخيره في اللي ملوش فيه.
درس رقم إتنين .. عشان خاطري عين ناس بتفهم في أكاديمية الناشئين:
أول مسمار في نعش أي إدارة نادي هو إنها تتعامل مع قطاع الناشئين إنه مكان للعلاقات الإجتماعية .. حابيبنا و ولاد حبايبنا يتشالوا علي الراس .. التعيينات بالواسطة .. الشاطر اللي مش ملوش ظهر ملوش لازمة .. ده مع الوقت بيخلي النادي يخسر كتير أوي أوي أوي .. علي سبيل المثال يعني .. يحكي أن نادي إيفرتون الإنجليزي لما (إيرلينج هالاند) كان عنده 15 سنة إتعرض عليهم يشتروه ب60,000 جنيه إسترليني اللي هو رقم بخس يعني في لاعيب حيبقي كمان كام سنة إن لم يكن دلوقتي فعلاً هو رأس الحربة رقم واحد في العالم .. طبعاً حتقولي مش منطقي إن من و هو عنده 15 سنة الناس تبقي شايفه مستقبله و حقولك عندك حق بس اللي أنا عايز أقف عنده هو التقرير اللي كتبه المسئول عن قطاع الناشئين بخصوص مستوي (هالاند) .. الكابتن الجامد زحليقة كتب و قال إن صحيح (هالاند) جسمانياً أقوي بكتير من اللاعيبة في نفس سنه بس ده في حد ذاته حاجة مش كويسة لإن بيخليه بطيء و ملوش مستقبل في الملاعب الإنجليزية .. إنت متخيل؟
علي فكرة ده داء أسود في كتير من الأندية علي مستوي العالم .. في تشيلسي مثلاً فيه بني أدم أقل ما يقال عنه إنه بهيمة كتب تقرير قال إن (ديكلان رايس) اللي حالياً بيتصنف إنه من أحسن لاعيبة خط الوسط في العالم لما كان لسه ناشيء في النادي إنه مينفعش و ملوش مستقبل و حرام النادي يفضل يصرف عليه .. الواد بيروح لأكاديمية نادي ويستهام و بيكمل معاهم و بقي أصغر لاعيب يلبس شارة الكابتن في تاريخ النادي وجابلهم بطولة أوروبية صحيح هي بطولة Conference League بس مش مهم و دلوقتي بقي أغلي صفقة في تاريخ أرسنال لما أشتروه من ويستهام .. (كيني داجليش) أسطورة نادي ليفربول و هو صغير إترفض من أكاديمية نادي ليفربول و أكاديمية نادي ويستهام و إضطر يسافر وهو صغير أسكتلندا عشان يقدم في أكاديمية نادي سيلتيك .. ده فيه لاعيبه لو قلتلك أسماءهم و إنهم إترفضوا و هم صغيرين من أكاديميات أندية عشان ماسكها شوية بهايم حتتخض .. (رود خوليت) أسطورة هولندا .. (بول جاسكوين) أحرف لاعيب في تاريخ إنجلترا .. (جون بارنز) أحسن وينج في تاريخ ليفربول بعد (محمد صلاح) .. يا مؤمن ده حتي (ألان شيرير) الهداف التاريخي للدوري الإنجليزي و هو لسه ناشيء اللي كان ماسك أكاديمية نادي نيوكاسل كان شايف إنه مينفعش يبقي مهاجم و كان راسه و ألف سيف يلعبه حارس مرمي .. بس شوف كل ده كوم و القصة الجاية دي كوم تاني.
سنة 1978 واحد إسمه (هاري هاسلام) كان مدير فني لنادي إسمه شيفيلد يونايتد بيلعب دلوقتي في دوري المظاليم في إنجلترا كان شوية و حيبوس إيد إدارة النادي توافق تديله 200,000 جنيه إسترليني عشان يشتري لاعيب ناشيء جاحد عنده 17 سنة و إدارة النادي راسها و ألف سيف لا الرقم ده كبير علي لاعيب في السن ده .. بعد خناق قالوله بص يا إبن الحلال خد ال160,000 ألف دول إشتري بيهم لاعيب ناشيء برده رئيس قطاع الناشئين عندنا بيشكر فيه أوي إسمه (أليكس سابيلا) .. هل تعلم عزيزي القاريء مين هو اللاعيب الناشيء الفشيخ اللي (هاري هاسلام) كان حيموت و يشتريه؟ .. (دييجو أرماندو مارادونا) .. .. (مارادونا) .. بتقولوا مين يا ولاد .. (مارادونا) .. كان ممكن يبقي لاعيب في شيفيلد يونايتد ولا تخرج قبل أن تقول سبحان الله.
قطاع الناشئين في الأندية خصوصاً الكبيرة ممكن يبقي منجم ذهب بس لو الإدارة بتاعة النادي في دماغها بإتنين جنيه مفهومية .. يحكي أن برشلونة في موسم 2011 لعبوا ماتش ب11 لاعيب كاملين من أكاديمية لاماسيا .. كل الأندية الكبيرة في العالم بتتفشخر أوي قدام الناس لو عندها لاعيب أساسي كان إبن من أبناء النادي .. بتشوف ده مع (ترينت أليكساندر أرنولد) في ليفربول .. بنشوفه مع (فيل فودين) في مانشستر سيتي .. صحيح الناس كلها كانت بتتكلم من أول ما عرفنا خبر إن (هالاند) راح السيتي هو يا تري بقي الفيلسوف (بيب جوارديولا) حيعرف يقعده دكة؟ .. يا تري مين حيحتاج يتغير عشان مين؟ ..(هالاند) محتاج يتعلم يبقي لاعيب False Nine يعني مهاجم مزيف ولا يا تري السيتي هم اللي محتاجين يتعلموا إزاي يلعبوا مع مهاجم صريح في الصندوق؟ .. كل ده علي عيني و علي راسي بس اللي فعلاً بيخليني أفكر يا تري الكاريير بتاعة (هالاند) كانت حتبقي إزاي لو اللي ماسك قطاع الناشئين في نادي إيفرتون كان بيفهم شوية؟
درس رقم ثلاثة .. أوعي تبقي زي مانشستر يونايتد .. أوعي:
حاول تفكر في السؤال ده .. هل لو إنت مدير و تحت منك موظف شاطر بس بيعمل مشاكل فهل ده يخليك تقرر تمشيه ولا ممكن تحاول إنك تستفيد منه قدر الإمكان و تحتوي مشاكله؟ .. بمعني أخر .. هل إنت كمدير من الناس اللي مش بتحب وجع الدماغ؟ .. ده السؤال اللي (إيريك تين هاج) المدير الفني لفرقة مانشستر يونايتد محتاج يجاوب عليه عشان يعرف هو ناوي يهبب إيه مع (كريستيانو رونالدو) .. اللي أنا متؤكد منه إن لما (تين هاج) جاله الأوفر بتاع إنه يمسك الفرقة أخر حاجة كان بيفكر فيها إن أول مشكلة حتفرقع في وشه هي إن (رونالد) حيعمل زي العيل الصغير اللي شبطان في لعبة و مامته مش عايزه تجيبهاله فوقف في الشارع يعيط و يدبدب في الأرض .. (رونالدو) عايز يلعب في فرقة بتشارك في التشامبيونز لييج .. هو عايز يلعب في فرقة بتعرف تلعب كورة أصلاً .. دي اللعبة اللي هو شبطان فيها .. الأم بقي اللي هي (تين هاج) قدامها إختيارين:
- لو (تين هاج) كان عايز (رونالدو) يكمل في الفرقة بس اللاعيب دماغه ناشفه و أجبر النادي يبيعه فساعتها (تين هاج) حيخسر سيطرته علي الفرقة لإن اللاعيبه حتشوفه مهزأ .. ده اللي هو إن الأم تشتري اللعبة لإبنها لمجرد إنه يبطل عياط و ميخليش شكلها وحش في الشارع بس بعدين لما الولد ده يكبر هي مش حتعرف تمشي كلمتها عليه.
- لو (تين هاج) نشف دماغه و قالك مفيش حاجة إسمها تمشي و (رونالدو) قعد غصب عنه فهو كده برده حيدمر أوضة اللبس لإن أخر حاجة إنت كمدير عايزها إنك تخلي عندك موظف مش عايز يقعد.
بإختصار (تين هاج) موقفه فعلاً صعب .. من ناحية (رونالدو) هو هداف الفرقة .. من ناحية تانية لو (رونالدو) مشي فمفيش حد حيعرف يحل محله .. (ماركوس راشفورد) تقريباً نسي إن عشان الجون يتحسب لازم الكورة تخش جوه الشبكة .. و ده يوريك درس مهم أوي .. أحياناً كتير الكيان لوحده مش بيكون مهم أوي بالنسبة للاعيب .. دلوقتي الأندية كلها معاها فلوس .. زمان الأندية اللي كان معاها فلوس تدفع مرتبات خزعبلية للاعيبة كانت تتعد علي الصوابع .. دلوقتي الوضع إختلف .. اللاعيب بقي بيبص مش بس للفلوس إنما هو حيحقق إيه في الكاريير بتاعته و أنا هنا بتكلم عن اللاعيبة اللي عايزه تعمل إسم لنفسها خلي بالك .. مانشستر يونايتد كيان كبير .. إسم الناس كلها عارفاه .. نادي معاه فلوس و عنده تاريخ .. بس حالياً في اللحظة اللي إحنا بنتكلم فيها دي ميقدرش يدي (رونالدو) الحاجة اللي هو عايزها إنه يلعب في التشامبيونز لييج.
مشكلة إدارة مانشستر يونايتد إنها بتقيم نجاحها علي أساس حاجة واحدة بس .. هو إحنا بنحقق أرباح كل سنة ولا لا .. هم بيتعاملوا مع النادي كأنه فرانشايز فراخ بروستد اللي هو طالما بنكسب يبقي إحنا كده زي الفل .. هو صحيح النادي الرياضي محتاج الإدارة بتاعته تديره كأنه بيزنس تجاري عشان يجيب فلوس تخليه يقدر يقف علي رجله و ينافس بس أكيد يعني المنطق بيقول إن فيه إختلافات بين الطريقة اللي إنت بتدير بيها نادي الإتحاد السكندري عن الطريقة اللي إنت بتدير بيها فروع كنتاكي .. الفرق و ده اللي بيكون صعب شوية علي الناس بتوع الحسابات إنهم يفهموه إنك بتتعامل مع بني أدمين .. لسبب ما المحاسبين مبيعرفوش يفهموا إن التعامل مع البشر مختلف حبتين من التعامل مع الإيكسيل شيت .. بمعني .. حضرتك نادي بتجيب فلوس فمش حتلاقي مشكلة إنك تلاقي رعاة أو سبونوسرز يدولك فلوس .. المشكلة إنك مش حتلاقي لاعيبة عايزة تيجي.
لما إتعرف إن نادي بنفيكا كان معندوش مشكلة يبيع (داروين نونييز) إتقال إن فيه ناديين بيتنافسوا عليه اللي هم ليفربول و مانشستر يونايتد .. إتقال إن الأوفر المالي اللي اليونايتد قدمه كان أكبر بس اللاعيب إختار يروح ليفربول .. ليه؟ .. عشان ليفربول دلوقتي نادي مغري أكتر في عين اللاعيبة عن يونايتد .. ليه؟ .. ليفربول في أخر خمس مواسم لعبوا في التشامبيونز لييج منهم 3 مرات وصلوا الفاينال .. مانشستر سيتي بقالهم 11 سنة ورا بعض بيشاركوا في التشامبيونز لييج .. في التسع مواسم اللي فاتوا تشيلسي لعب في التشامبيونز ليج سبع مرات و في أخر مرة هم متأهلوش ليها راحوا كسبوا اليوروبا لييج .. فهمت ليه (رونالدو) عايز يمشي؟
دي مش مشكلة مكان شغل شغال فيه موظف ماضي عقد و هو عايز يمشي قبل عقده ما يخلص .. لا خالص .. دي مشكلة إن الموظف شايف إن الإدارة بتاعة المكان مش فاهمه هي بتعمل إيه و هو شايف إنه ملوش مستقبل في المكان ده .. لما (رونالدو) مضي العقد عشان يروح اليونايتد أنا متؤكد إن أخر حاجة كان بيفكر فيها إنه حيلاقي نفسه بيلعب في اليوروبا لييج .. الحقيقة دي كلها مش مشاكل (تين هاج) و هو مش مسئول عنها.
يمكن اللي أنا عايز أختم بيه إني أوريك إن أهم 3 دروس في إدارة كرة القدم مفيش ولا نادي في مصر بيطبقهم .. مفيش رئيس نادي بيسيب المدير الفني يشتغل من غير ما يتدخل في شغله .. النقطة دي بالذات عشان تشوفها بعنيك في مصر إتفرج لما مثلاً (مرتضي منصور) ساب إيده من اللي بيحصل في الفرقة و (فيريرا) بقي المسئول عنها لوحده و إزاي حاجة بسيطة زي دي ممكن تكون هي السبب في إن النادي ياخد الدوري .. لازم الأندية تبص لقطاع الناشئين بشكل مختلف شوية عن كونه مجرد للمجاملات الإجتماعية و مؤخراً الأهلي و الزمالك شافوا إزاي إن قطاع الناشئين ممكن يبقي الأمل اللي الفرقة تبني عليه مستقبلها بس السؤال هم يا تري حيكملوا في السكة دي ولا اللي فيه داء عمره ما حيبطله و حيروحوا يبعزقوا فلوسهم علي لاعيبه مستحقش ربع المبالغ اللي بتتدفع فيها .. و أخيراً لازم الإدارة تفرق بين إنك كرجل أعمال صادف إنك رئيس نادي إن طريقة تعاملك مع موظفينك في البيزنس بتاعك مختلفة حبتين تلاتة عن التعامل مع لاعيبة في نادي.
المصادر:
- مقالة بعنوان Levy has worked out that Conte is different to Pochettino and Mourinho نشرت في جرنان The Daily Mail و ده لينك المقالة الأصلية:
https://www.dailymail.co.uk/sport/football/article-11014967/MARTIN-SAMUEL-Daniel-Levy-worked-Antonio-Conte-different-rest.html - مقالة بعنوان The Cristiano Ronaldo spat is a reckoning for mediocre Manchester United that was always going to happen نشرت في جرنان The Daily Mail و ده لينك المقالة الأصلية:
https://www.dailymail.co.uk/sport/football/article-10981515/Cristiano-Ronaldo-future-leaves-new-Manchester-United-boss-Erik-ten-Hag-big-call-make.html
