نابولي .. الدوري مش ورث ده جاي بخلع الدرس.

في مصر إحنا منعرفش يعني إيه تشجيع كورة و ده لسبب بسيط جداً هو إن أنا في رأيي الشخصي طالما إنت كأسمعلاوي أو إنت كأسكندراني أو إنت كأسواني لو ولاءك الأول و الأخير مش للنادي بتاع محافظتك يبقي إنت معندكش ثقافة كرة قدم .. أنا فاهم كويس إن الكورة الصامتة اللي عندنا عشان مفيش مشجعين بيخشوا الأستاد خلت الكرة المصرية تخسر كتير من قيمتها بس حتي إرجع بالزمن بتاعك لورا قبل حتي ثورة يناير 2011 و قولي كده هو لما الإتحاد السكندري بيلاعب الزمالك أو الأهلي في استاد الإسكندرية مشجعين مين أكتر كانت في الإستاد؟ .. أنا حجاوب بالنيابة عنك .. الأهلي .. عشان كده أنا مقتنع إقتناع تام إننا في مصر مش بنشجع كورة .. إحنا بنشجع اللي بيكسب مش اللي بنحبه .. ده السبب اللي حيخليني أقول من دلوقتي إن إحتمال كبير إنت تطلع من مقالة النهاردة و إنت مش فاهم أوي يعني إيه يعني لما نابولي ياخد الدوري الإيطالي لأول مرة من 33 سنة من ساعة أخر مرة وقت ما كان بيلعب معاهم أسطورة كرة القدم الأرجنتينية (دييجو أرماندو مارادونا Diego Armando Maradona) .. إنت ممكن تتريق و تقول بصوا للزمالك بس صعب تفهم الإحساس بتاع أهل نابولي .. قليلين أوي اللي حيبقي عندهم القدرة إنهم يحسوا نفس إحساس مشجع الكورة اللي بحق و حقيقي .. النهاردة حنتكلم سوا عن المشجعين اللي بجد .. حنتكلم عن رحلة مشجع نابولي اللي عايش في مدينة نسبياً صغيرة فيها 2 مليون نسمة بس من المجد في التسعينات لليأس في 2004 لما النادي هبط لدوري الدرجة الثالثة ثم للمرارة بعد ما المجد قرب منهم أوي و فلت من بين طراطيف صوابعهم في 2014 ثم للمجد مرة تانية في 2023 و إحتمال كبير من أول الموسم الجاي يكونوا في رحلة عودتهم لليأس تاني بس مش مهم .. المهم إن يبقي الكيان .. المهم إن نابولي يفضل.

نابولي مش بس خدوا الدوري الإيطالي موسم 2022-2023 دول داسوا علي وش كل فرق إيطاليا .. إنت بتتكلم عن فرقة شيلت يوفينتوس 5-1 .. فرقة لعبت 31 ماتش كسبت 25 و إتعادلت 3 و خسرت 3 و بكده جمعت 78 نقطة و تحت منهم لاتسيو اللي خصلوا الدوري و معاهم 61 نقطة .. نابولي خرجوا من دور الثمانية في بطولة Champions League قصاد إيه سي ميلان .. و ده اللي عايزين نركز عليه إن صعب تعمل فرقة تحقق كل ده بالحظ .. أكيد فيه حاجة .. أكيد فيه حاجة في المقادير بتاعة الطبخة اللي زي الفل دي .. و في نفس الوقت برده مهم نقول إن قرار المدير الفني اللي حقق المعجزة دي (لوتشيانو سباليتي Luciano Spalletti) إنه يمشي و ياخد سنة أجازة يخليني أقلق علي مستقبل الفرقة و ده حيخلينا نحاول سوا نجاوب علي سؤالين:

• إزاي نابولي حققوا معجزة فوزهم بالدوري الإيطالي السنة دي؟
• يا تري المستقبل مخبي إيه مش بس للنادي إنما لجماهيره كمان؟

خلينا نبدأ بالسؤال الأولاني .. الماضي و الحاضر:

يمكن إيطاليا من الحاجات المشتركة بينها و بين مصر إن وجه بحري شايف نفسه شويه قصاد وجه قبلي لإن خليك عارف إن نابولي دي تبقي الصعيد بتاع إيطاليا .. زي ما في مصر مجد الكرة المصرية صنعه الأهلي و الزمالك اللي هم ناديين في القاهرة فبرده مجد الكرة الإيطالية صنعه أندية شمال إيطاليا من أول يوفينتوس اللي من مدينة تورينو لقطبي مدينة ميلان و فيه ناس حتي ممكن تضم ليهم ناديي العاصمة روما و لاتسيو .. محصلش في تاريخ كرة القدم الإيطالية إن نادي من الصعيد حقق الدوري غير يدوبك هم إتنين نابولي و معاهم كالياري اللي خدوا الدوري سنة 1970 .. لسنين و سنين و الإعتقاد اللي مسيطر علي دماغ صعايدة إيطاليا إن بما إن وجه بحري معاهم فلوس يبقوا هم حيفضلوا مسيطرين علي البطولات لحد ما جت الثمانينات لما تقريباً إدارة ناوبلي إتخبطت في نافوخها و دفعت 12 مليون يورو لنادي برشلونة عشان يشتروا (مارادونا) و اللي كان سنة 1984 رقم خزعبلي ميقدرش عليه غير الأندية اللي بتاكل مال اليتيم .. السؤال هو إزاي ده حصل؟ .. بمعني أخر نابولي جابوا الفلوس دي منين؟

برده من ضمن الحاجات المشتركة بين إيطاليا و مصر إن معارفك الكبار بيحلولك أي حاجة و ده يمشي علي البني أدمين و يمشي علي الأندية .. يعني مثلاً .. السر اللي كان عارفه الطليان كلهم إن نادي روما خد الدوري في الثمانينات عشان إدارة النادي كانت مسنودة أوي من الحكومة فده خلاهم عرفوا يجيبوا مدير فني محترم اللي هو (نيلز ليدهولم Nils Liedholm) و مهاجم حلو اللي هو (فالكاو Falcao) .. ده اللي خلي مدير نادي نابولي وقتها (كورادو فيرلاينو Corrado Ferlaino) يشوف هي إدارة روما عملت إيه و عمل زيهم .. رئيس النادي ميل علي عمدة مدينة نابولي اللي هو كمان ميل علي رئيس بنك عشان يوافق يدي نادي نابولي قرض بقيمة 12 مليون يورو عشان يشتروا مارادونا في الميركاتو الصيفي بتاع سنة 1984 و الحق يتقال إن القرض إترد بس ده عشان (مارادونا) عمل اللي النادي جابه عشانه .. جابلهم ثنائية الدوري و الكاس موسم 1987 ودي كانت أول مرة في تاريخ نابولي ياخدوا الدوري .. جابهم الدوري الثاني موسم 1990 وفي النص جابلهم بطولة Europa League موسم 1989 وده اللي خلي (مارادونا) له المكانة دي في قلوب عشاق النادي و خلاهم يسموا استاد النادي علي اسمه بعد وفاته و قبل كل ماتش علي أرضهم لازم الجمهور يغني الأغنية بتاعة (مارادونا) زي ما كده جمهور ليفربول لازم يغني You Will Never Walk Alone قبل أي ماتش علي ملعب أنفيلد .. عشان أهل نابولي يحبوك لازم يبقي فيك 3 حاجات .. تبقي سالك .. يبقي دمك خفيف .. تبقي ابن بلد و جدع .. لو فيه الثلاثة فحتبقي واحد منهم و هم حيقفوا وراك مهما حصل و ده اللي أهل نابولي شافوه في (مارادونا) .. عشان بس أوريك قد إيه أهل نابولي ولاد نكتة لما خدوا الدوري لأول مرة في تاريخهم سنة 1987 من ضمن الإحتفالات إن واحد رسم جرافيتي في المقابر بتاعة المدينة كاتب عليها أنتوا متعرفوش أنتوا فاتكوا إيه.

بعد ما (مارادونا) مشي بدأت الدنيا تقع مش عشان حاجة غير إن زي ما قلت من شوية كرة القدم في إيطاليا هي و السياسة عاملين زي العسل الأسود و الطحينة كده .. صادف مع مشيان (مارادونا) إن بدأت حملة تطهير للسياسيين الفاسدين في نابولي إتعرفت باسم فضيحة تانجينت-بولي Tangentpoli طار فيها سياسيين كتير من ضمنهم عمدة المدينة اللي كان ساند النادي .. سنة 1998 النادي هبط لدوري المظاليم و سنة 2004 النادي أعلن إفلاسه و هبط لدوري الدرجة الثالثة أو دوري الغلابة عشان يجي بعد كده منقذ النادي و اللي ناس كتير وأنا كنت منهم الحقيقة بشكل مش صح الحقيقة بيقولوا عليه (مرتضي منصور) نابولي .. اللي أنقذ النادي كان السبكي بتاع إيطاليا (أوريليو دي لورينتيسAurelio De Laurentiis ) .. زي ما السبكي بيعمل أفلام أغلبها كوميدية فبرده (دي لورينتيس) يعتبر من أهم منتجين السينما الإيطالية خصوصاً الكوميدية و عشان هو أصلاً ابن نكتة و دي واحدة من أهم المعايير اللي أهل نابولي بيبنوا عليها حبهم ليك من عدمه فأول حاجة عملها بعد ما إشتري النادي بعد ما دفع فيه 29.5 مليون يورو إنه سماه نابولي سوكر Napoli Soccer علي أساس إن كرة القدم في أميركا بيسموها سوكر Soccer مش فوتبول Football كنوع من التريقة اللي دخلت دماغ أهل نابولي أوي و جزء كبير من الفلوس اللي إتدفعت راحت لدفع الديون اللي علي النادي و هنا يبان دور الجمهور .. الجمهور اللي بيشجع ناديه بجد و أرجع و أقولك إن دي حاجة إحنا في مصر ممكن منقدرش نفهمها أوي .. تخيل يا مؤمن إن في أول ماتش ليهم في دوري الدرجة الثالثة علي أرضهم قصاد فرقة من تحت بير السلم اسمها سيتاديلا يحضر الماتش 55,000 مشجع .. تخيل كده الإسماعيلي أو الإتحاد السكندري لا قدر الله يهبط حتي لدوري المظاليم و تلاقي الأستاد كامل العدد في أول ماتش ليهم .. دي درجة الإرتباط بالنادي اللي مش حتلاقيها في مصر.

سنة 2006 كانت الكرة الإيطالية بتعيش أحلي لحظاتها بتتويجها بكأس العالم و في نفس الوقت بتعيش أسوأ كوابيسها بعد فضيحة كالشيوبولي اللي تورط فيها خمس أندية اللي هم يوفينتوس و إيه سي ميلان و لاتسيو و فيرونتينا و ريجينا و كلنا عارفين إن يوفينتوس إتعاقب بإنه هبط دوري المظاليم و ميلان إتخصم منه نقط و كانت فضيحة كبيرة بس اللي خرج منها زي الشعرة من العجين كان نادي إنترميلان .. لو تفتكر إن لمدة 4 مواسم متتالية مفيش حد كان عارف ينافسه بسبب العقوبات اللي إتوقعت علي باقي الفرق نتيجة فضيحة كالتشيوبولي .. ليه ده مهم؟ .. عشان سنة 2007 نابولي بيرجع يلعب في الدوري الممتاز بعد يدوبك 3 سنين من شراء (دي لورينتيس) للنادي ..  صحيح إنترميلان كان دايس علي وش باقي فرق إيطاليا بس الفروقات بين الفرق دي كلها باستثناء الإنتر كانت طفيفة بشكل كبير .. عشان كده في موسم 2007-2008 لما نابولي اشتري (إيزيكيال لافتزي Ezequiel Lavezzi) بستة مليون يورو و معاه (ماريك هامسيك Marek Hamsik) بخمسة و نص مليون قدر النادي إنه يقف علي رجله .. مع كل صفقة جديدة (دي لورينتيس) بيجيبها بتلاقي إن نابولي إمكانياته بتبان أوي عن باقي فرق إيطاليا لحد ما بقينا دلوقتي في مرحلة إن نابولي بيتصنف من أندية التوب فور.

خلي بالك من نقطة .. (دي لورينتيس) لما إشتري النادي هو موعدش الجمهور إنه حيجيبلهم الدوري في شوال .. هو مقالش إن إيطاليا حتبات من المغرب خوفاً من سيطرة نابولي علي الدوري .. هو كل اللي وعد بيه إن النادي حيقدر مادياً و مالياً يقف علي رجليه و ده التارجيت بتاعه و الحقيقة برده اللي لازم تتذكر إن جمهور نابولي كان بالوعي الكافي إنه يفهم إن حتي الوعد الأي كلام ده أو سقف التوقعات الواطي ده في الحقيقة هو أحسن كتير من اللي رؤساء أندية تانية وعدوا بيه جمهورهم و فشلوا .. خد (سيلفيو بيرلسكوني Silvio Berlusconi) رئيس وزراء إيطاليا السابق و اللي كان رئيس نادي إيه سي ميلان كمثال .. صحيح هو عمل اللي ميتعملش مع النادي بس بسبب إن النادي كان بيحرق فلوس و معندهمش سياسة مالية تخش دماغ ناس عاقلين إتفرج علي الميلان دلوقتي .. نفس الكلام مع (ماسيمو موراتي Massimo Moratti) مالك نادي إنترميلان وقت مع حققوا الثلاثية سنة 2010 مع (جوزيه مورينيو Jose Mourinho) و اللي برده حرق علي النادي ملايين و دلوقتي مش عارفين حتي يدفعوا مرتب (روميلو لوكاكوRomelu Lukaku ) و رجعوه تاني تشيلسي بعد إنتهاء إعارته رغم إن النادي عارف إنه لاعيب مهم .. يا رجل ده هو هو نفس الوضع مع عيلة (أنييلي Agnelli) اللي كانت ماسكة نادي يوفينتوس و سابوه نادي غرقان في الديون.

بمعني أخر ودي نقطة مهمة تتفهم دلوقتي و حتفيدنا بعدين إن (دي لورينتيس) بيدير نابولي كأنه شركة لازم تكون بتعرف تصرف علي نفسها .. مش مهم إنت فاكر نفسك مين كلاعيب أو حققت إيه لو جه ليك عرض كويس حتتباع و يتجاب غيرك و يتباع و يتجاب غيرك .. المفروض إن نابولي تحت لوجو النادي يكتبوا مقولة إن الشغل مبيقفش علي حد .. سنة 2010 إشتروا (إدينسون كافانيEdinson Cavani ) مقابل 17 مليون يورو .. سنة 2012 جابلهم بطولة كأس إيطاليا و إتباع عادي .. الجمهور بتاع نابولي ممكن يكون حاطط في دماغه الخناقة مع يوفينتوس بس (دي لورينتوس) ولا في الهواء .. الموضوع بالنسبة له بيزنس بحت .. يعني مثلاً سنة 2018 كان موسم للتاريخ في الدوري الإيطالي خلص بإن نابولي في المركز الثاني معاه 91 نقطة بس يوفينتوس خدوا الدوري ومعاهم 95 نقطة و لحد دلوقتي جمهور نابولي شايف إن يوفينتوس سرق البطولة دي بالتحكيم و شايفين إن موسم 2023 ده الإنتقام بتاعهم للي حصل بس أرجع تاني في دماغ (دي لورينتيس) كل ده في البلالة .. هو مش في دماغه ينافس يوفينتوس ولا إنه يهيمن علي الكرة الإيطالية .. المهم إن النادي يعيش .. (دي لورينتيس) مش عايز ينافس يوفينتوس هو مش عايز يبقي زيهم .. مش عايز يبقي النادي اللي فلس بسبب صفقة شراءه للاعيب أسطوري زي (كريستيانو رونالدوCristiano Ronaldo ) .. مش عايز يبقي النادي اللي بيدفع مرتبات أكتر من الفلوس اللي بتخشله .. عشان كده هو اللي قرر إن ميزانية المرتبات بتاعة نابولي تقل من 150 مليون تبقي 70 مليون كل سنة بحيث ده يمشي سوا مع سياسة شراء لاعيبة بتلعب بالبيضة و الحجر و مدير فني عارف يعمل من الفسيخ شربات و ده حيودينا لأهم شخصيتين ورا (دي لورينتيس) في النادي:

• الأولاني يبقي (كريستيانو جونتوليCristiano Giuntoli ) اللي سنة 2015 بقي المدير الرياضي للنادي اللي هو علي سبيل التقريب ده يبقي كابتن (سيد عبدالحفيظ) بتاع نابولي و الرجل ده حرفياً مش فارق معاه إنت ابن مين في البلد .. لو حتتعوج حتمشي .. ده اللي مشي (دريز ميرتينزDries Mertens ) الجناح البلجيكي و الهداف التاريخي للنادي .. هو اللي مشي (لورينزو إنيسيني Lorenzo Insigne) و ده اللي فعلاً يتقال عليه ابن النادي .. هو اللي وافق علي بيع قلب الدفاع السنغالي (كاليدو كوليبياليKalidou Koulibaly) لنادي تشيلسي مقابل 38 مليون يورو اللي هو أساساً يعني 6 أضعاف الفلوس اللي إتدفعت عشان نابولي يشتريه .. في نفس الوقت الرجل ده عينه مبتخيبش .. هو اللي جاب المهاجم النيجيري (فيكتور أوسييمين Victor Osimhen) من نادي ليل الفرنساوي بس يمكن صفقة عمره كانت جناح الجورجي (خفيتشا كفاراتسخيلياKhvicha Kvaratsckhelia) اللي إتدفع فيه يدوبك 10 مليون يورو و دلوقتي بقي أكتر لاعيب صنع أهداف في الدوري الإيطالي .. هو اللي جاب قلب الدفاع الكوري الجنوبي (كيم مين جايKim Min-jae ) اللي برده مكنش حد عارف هو مين وبيلعب في فاناربخشة التركي و دلوقتي بايرن ميونيخ خطفه من نابولي .. عشان تاني .. ده بيزنس.
• الثاني يبقي (لوتشيانو سباليتي) .. الرجل ده إتعين مدير فني في 2021 و اللي جمهور نابولي مكنش عايزه لدرجة إنه لما مسك الفرقة سرقوا عربيته الفيات باندا و كتبوله بانر علي استاد النادي لو عايز عربيتك قدم استقالتك .. قام هو رادد عليهم بإنه عايز عربيته بس قبل ما ياخدها يقولوله هي حالتها إيه دلوقتي و عداد الكيلومترات بتاعها مشي قد إيه و العجل بتاعها فسي ولا لسه بس الأهم لسه موجود فيها السي دي هات بتاعة الفنان (بينو دانييلي) اللي هو من ولاد مدينة نابولي .. الموقف ده بالذات ورا أهل نابولي إن (سباليتي) فيه الخصال الثلاثة اللي هم بيحبوها في أي حد .. سالك .. دمه خفيف .. ابن بلد و جدع مبيحبش حد يقوله يعمل و ميعملش إيه .. بمعني أخر (سباليتي) و (جونتولي) كانوا علي نفس التراك سوا .. اللاعيب اللي شايف نفسه مع السلامة الباب يفوت جمل .. و دي تبقي الخلطة السحرية لأي نادي عايز ينجح .. سياسة مالية رشيدة .. عين بتفهم عشان تنقي اللاعيبة الكويسة .. مدير فني عارف هو عايز يعمل إيه .. النتيجة كانت لقب الدوري بفرق 17 نقطة عن لاتسيو في المركز الثاني.

نيجي بقي للسؤال المهم .. يا تري المستقبل مخبي إيه؟

منطقي إن أندية أوروبا الكبيرة و خصوصاً في إنجلترا تبقي عاملة زي الضباع اللي بتحوم حولين لاعيبة نابولي .. أنا شخصياً كنت مستغرب إزاي (أوريليو دي لورينتيس) ساب (لوتشيانو سباليتي) يمشي و يجيب مكانه المدير الفني الفرنساوي (رودي جارسيا Rudi Garcia) اللي كان بيدرب نادي النصر السعودي و سابه بخناقة مع (رونالدو) .. ناس كتير شايفة إن نابولي بيتعامل مع الوضع نفس تعامل فرق مش في دماغها تعمل لنفسها اسم و ناس كتير شايفة إن بنسبة كبيرة نابولي مش حيقدر يحافظ علي لقب الدوري الإيطالي الموسم الجاي .. كل دي أراء تحترم بس في نفس الوقت فيه الوش التاني من الشريط .. كلنا شفنا نابولي السنة دي و هم بيدوسوا علي وش كل فرق إيطاليا بس متنساش إن الصيف اللي فات قبل ما السيزون يبدأ إنت كنت قصاد نادي إدارته قررت تخفض ميزانية المرتبات 30% و اللاعيب اللي مش عاجبه مع ألف سلامة الباب يفوت جمل .. بتتكلم عن نادي من كتر ما باع في لاعيبة حقق أرباح في الميركاتو 13 مليون يورو .. إنت قبل السيزون التاريخي ده ما يبدأ سبت (لورينزو إينسيني) يمشي .. (إينسيني) ابن النادي و ابن أكاديميته اللي كان أهم لاعيب في تشكيلتك في العشر سنين اللي فاتوا .. ومش بس كده .. إنت سبته يمشي ببلاش في صفقة إنتقال حر .. قلب الدفاع بتاعك (كاليدو كوليبالي) لأكتر من 8 سنين سبته يمشي يروح تشيلسي .. سبت الهداف التاريخي للنادي (دريز ميرتينز) يمشي يروح جالاطاسراي التركي .. سبت صانع الألعاب الأساسي بتاعك (فابيان رويز Fabian Ruiz) يروح باريس سانجيرمان .. سبت كل دول يمشوا و في الأخر خدت الدوري .. ده إيه الفُجر ده .. بمعني أخر حاجة جوايا بتقولي متقلقش علي مستقبل نابولي .. هم شافوا موتات كتير قبل كده.

اللي أنا عايز أقوله إن أي تغيير كبير في أي فرقة كورة سواء رحيل مدير فني بعد سنين أو إن إتباع كذا لاعيب مرة واحدة زي مثلاً حال تشيلسي دلوقتي فده في عٌرف الكورة بيتقال عليه فترة إنتقالية .. إدارة نابولي من 2006 وهم عايشين في فترة إنتقالية مش عايزة تخلص لدرجة إنهم إخترعوا لنفسهم مصطلح جديد انا بسميه تعمير البندقية .. هم معاهم البندقية بس اللي حصل إن الذخيرة خلصت فبيجيبوا غيرها .. ده نفس اللي عرف يوصله (بيب جوارديولا Pep Guardiola) دلوقتي مع مانشستر سيتي .. فكرة الفترة الإنتقالية إنك بتقول لنفسك أنا النادي بتاعي بيعيش تغييرات كتير فمنطقي و مقبول إننا نطلع سيزون أو إتنين صفر بطولات أو يمكن منتأهلش لبطولة Champions League أصلاً .. الأندية اللي إتكحرتت في السوق وبقت ماشية بمبدأ التعميير بتاع البندقية ده بقت ممكن تشقلب الفرقة كلها و تلاقيهم السنة الجاية بينافسوا علي اللقب عادي جداً ولا كأن حاجة حصلت .. السر إن اللاعيب اللي يمشي يبقي عندك الناس اللي عينها حلوة و تقدر تجيب غيره بحيث أهم حاجة إن نتايجك متتأثرش .. بالنسبة لنابولي مش مهم ياخدوا الدوري الموسم الجاي بس المهم يضمنوا مكان وسط الأربعة الكبار و ده التارجيت اللي هم حاطينه لنفسهم و للمدير الفني الجديد (رودي جارسيا) و عشان كده الرجل ده لو حقق معجزة و جاب بطولة فأهل نابولي حيتنططوا من الفرحة ولو ده حصل فأنا مش حستغرب.

المصادر:

• فيديو بعنوان Why Napoli made us believe in football again| From bankruptcy to Serie A winners نشر علي YouTube و ده لينك الفيديو:
  https://www.youtube.com/watch?v=uM6VGnXATfI&t=11s
• مقالة بعنوان Naples Starts to Believe نشرت في جريدة The New York Times و ده لينك المقالة الأصلية:
  https://www.nytimes.com/2023/04/20/sports/soccer/napoli-serie-a-scudetto.html
• مقالة بعنوان How Napoli, the team of Diego Maradona and ‘Kvaradona,’ became Europe’s best نشرت علي موقع قناة ESPN و ده لينك المقالة الأصلية:
  https://www.espn.com/soccer/story/_/id/37636400/how-napoli-team-diego-maradona-kvaradona-became-europe-best
• مقالة بعنوان Napoli’s reload, not reboot, is working in Serie A and Champions League. Can other clubs follow suit? نشرت علي موقع قناة ESPN و ده لينك المقالة الأصلية:
  https://www.espn.com/soccer/story/_/id/37632592/napoli-reload-paying-serie-champions-league