لينك التسجيل الصوتي علي ساوند كلاود:
https://on.soundcloud.com/kGgb9
فيه مواقف صغيرة بتوريك معزة ناس في قلوب ناس .. موقف زي لما (محمد صلاح) سأل مراسل BeIn Sports عن هو فين (أبوتريكه) .. موقف تاني زي اللي عمله (جوردان هينديرسون Jordan Henderson) كابتن فرقة ليفربول بعد ما كسبوا بطولة Champions League .. لحظة إستلام كابتن الفرقة لكاس أي بطولة دي حاجة كده شبه لما تبقي أول المدرسة ويجي المدير يكرمك قصاد طابور الصباح .. وإنت طالع تتكرم مبتاخدش معاك حد لإنك طالع تتكرم لوحدك .. حتي لو إنت بتحب مدرس معين من المدرسين اللي بيدرسولك فإنت مش بتطلع تتكرم وهو واقف جنبك .. ناس كتير متعرفش إن (هيندرسون) كان عايز هو والمدير الفني (يورجين كلوب Jurgen Klopp) يشيلوا الكاس سوا بس المدير الفني لإنه إبن أصول رفض .. الأصول إن كابتن الفرقة هو اللي يشيل الكاس مش حد تاني.
بعدها صحفي سأل (هيندرسون) عن هل هو شايف أي مدير فني تاني بيعرف يطلع من اللاعيبه أخر حاجة عندها زي (كلوب) فكانت إجابة (هيندرسون) هي لا .. هنا إنت محتاج برده تفهم معني الكلام اللي هو قاله .. الأصول إن لما صحفي يسأل لاعيب كورة مين أحسن مدرب هو شافه فدايماً الأدب إنه يختار حد من اللي هم دربوه .. يا إما المدير الفني الحالي بتاعك أو المدير الفني اللي خلاك أساسي في الفرقة الأولي وإنت ناشيء .. بس إن صحفي يسألك هل فيه مدرب في العالم يقدر يخلي اللاعيبه تجيب أخرها في الملعب زي (كلوب) فتكون إجابتك لا وإنت عارف إن الإسبوع الجاي حتلعب مع منتخب إنجلترا فده فعلاً معناه إنك مش شايف في الدنيا غير (كلوب) .. طب حتبص في عين (جاريث ساوثجيت Gareth Southgate) المدير الفني بتاع المنتخب إزاي؟ .. علي فكرة في ماتش نص نهائي بطولة League of Nations بين هولندا وإنجلترا (ساوثجيت) قعد (هيندريسون) دكة فعلاً وإنجلترا خسرت الماتش .. إنت زي ما تكون رحت كلت عن خالتك وقلتلها إن إنتي أحسن واحدة بتعمل محشي وهي كانت بتكلم أمك في التليفون ومامتك سمعتك .. بذمتك حتبص في وش مامتك إزاي بعد ما قلت كده.
زي ما المثل الشعبي بيقول كل شيخ وله طريقة فكمان كل مدير فني وله طريقة .. فيه اللي بيدافع وفيه اللي بيهاجم .. فيه اللي بيستحوذ علي الكورة وفيه اللي بيلعب علي الهجمة المرتدة .. (كلوب) طريقته هي إنك تلعب بقلبك .. بتدافع أو بتهاجم .. معاك الكورة أو مش معاك لازم تلعب بقلبك .. سيبك من ليفربول .. الفترة اللي اللي كان بيدرب فيها بوروسيا دورتموند مجاش في تاريخ النادي مدير فني بيعرف يولع الملعب زيه .. (كلوب) هو أول أغنية مهرجان بتشتغل في الفرح بعد أسماء الله الحسني عشان تخلي المعازيم ترقص .. الحيط الأصفر العلامة المميزة لإستاد ويشتفالين شتاديون Westfalen Stadion بتاع بروسيا دورتموند شاف أحلي أيامه مع (كلوب) لدرجة ودي قصة حقيقية بالمناسبة المهندسين اللي صمموا إستاد فرقة توتنهام الجديد عملوا المدرج ورا حارس المرمي بتاع الفرقة بنفس درجة الميل بتاعة ستاد سيجنال إيدونا بارك بتاع بروسيا دورتموند عشان يخلوا أجواء استاد توتنهام قريبة من استاد بروسيا دورتموند.
ناس كتير مسمعتش عن (كلوب) غير لما درب بروسيا دورتموند ووصل بيهم نهائي Champions League قصاد بايرن ميونيخ وخسره .. الحقيقة إن كتير مننا ميعرفش حاجة عنه غير إنه رجل متخصص يخسر نهائيات وده طبيعي أصل إحنا عايشين في عصر Social Media .. عصر يهمك فيه تاخد الزتونة مش إنك تفهم ده حصل ليه؟ وإمتي؟ وإزاي؟ .. اللي أنا عايزك تطلع به من المقالة دي مش إن (كلوب) ده رجل تخصص خسارة نهائيات قد ما أنا عايزك تعرف إنه رجل الدنيا داست علي وشه بما فيه الكفاية .. رجل لما بتشوفه بيعيط عشان فرقته خدت البطولة فده مش ضعف قد ما دي فرحة رحلة طويلة إحنا للأسف منعرفش حاجة عنها ويمكن النهاردة ححاول أفسرلك حتة منها.
حياة (كلوب) من أول ما أتولد وهي مليانه بناس كان نفسها توصل بس معرفتش .. أبوه (نوربيرت Norbert) كان حارس مرمي في فرقة الناشئين في نادي كايزرسلاوترن بس ربنا موفقوش إنه يكمل في لعب الكورة وبقي شغال بياع .. ناس كتير من اللي قريبين منه قالت إنه ورث من أبوه الكاريزما بتاعته والأهم إنه إتعلم منه أهم مبدأ عاش عليه (كلوب) وهو الإنتماء للكيان اللي هو بيشتغل فيه .. (كلوب) شخصياً الدنيا كانت ملخبطة معاه ومعرفش يبقي لاعيب كرة محترف إلا لما بقي عنده 23 سنة لما نادي ماينز مضي عقد معاه .. هو كان نفسه يلعب في أكاديمية نادي شتوتجارت اللي هو كان بيشجعه وهو صغير بس متقبلش ودي كانت صدمة له .. تخيل بس إنت مكانه للحظة .. عندك 23 سنة متجوز جوازتك الأولانية وعندك إبن (مارك Marc) .. بتدرس إدارة الأعمال في كرة القدم في جامعة جوته بحيث الصبح في التدريبات وبليل في الجامعة .. فيه كام واحد عنده 23 سنة كان شايل المسئولية دي كلها إنه يبقي متجوز ومخلف وبيدرس في الجامعة ويشتغل لاعيب كورة؟ .. معلش ده رجل إتداس علي وشه من الدنيا ويمكن الدنيا ضحكت في وشه لما راح ماينز بس قبلها كان بيتنطط بين الأندية يدور علي حد يمضي معاه عقد .. طبيعي إن ميبقاش فارق معاه إنه يخسر 6 نهائيات من ضمنهم بطولتين Champions League وبطولة Europa League.
لما (كلوب) يطلع يقول علي لاعيبته المسلمين سواء (محمد صلاح) أو (ساديو ماني Sadio Mane) إنه عادي بالنسبة له إنهم يتأخروا علي الإجتماعات عشان بيصلوا لإن فيه حاجات في الدنيا أهم من كرة القدم فالرجل ده مش بيقول كده لمجرد الشو الإعلامي .. هو فعلاً مؤمن باللي هو بيقوله .. يُحكي أن إنه لما روح بيته في ليفربول بعد ما خسر النهائي بتاع سنة 2018 قصاد ريال مدريد لقي البيت كله مناحة .. العيلة كلها بتعيط ولا كأنهم ماتلهم حد إلا هو .. حتي وكيل أعماله (مارك كوسيكي Marc Kosicke) كان بيعيط بس هو لا .. هو شاف موتات أكتر من كده بكتير .. نهائي إيه ده اللي أزعل إني خسرته.
اللي إختار (كلوب) عشان يلعب في ماينز وكانوا بيلعبوا في دوري المظاليم أو Bundesliga 2.0 وقتها رغم سنه الكبير كان مدير فني الفرقة (ولفجانج فرانك Wolfgang Frank) وده كان رجل عجوز بس سابق عصره .. هو شاف (كلوب) بيلعب مهاجم وخلاه مدافع .. في الوقت اللي أغلب أندية ألمانيا كانت بتلعب 3-5-2 بثلاثة في خط الظهر إتنين مساكين وليبرو فكان هو أول واحد في ألمانيا يخلي فرقته تلعب 4-4-2 عشان هو شاف فرقة ميلان اللي كان بيدربها الأسطورة (أريجو ساكي Arrigo Sacchi) بتلعب بيها وقال لنفسه طب ما نجربها إحنا كمان .. كان أول واحد في ألمانيا يدخل فكرة إنه يجيب شرايط الفيديو بتاعة ماتشات الفرق التانية يتفرج عليها ويحللها .. بإختصار (ولفجانج فرانك) كان هو (بيب جوارديولا Pep Guardiola) أيام ما كان (بيب جوارديولا) لسه عيل صغير .. في موسم 2000-2001 الرجل ده مات فجأة وموته خلق حالة فوضي ولا الفوضي وسط النمل لما ترمي عليهم شوية مياه .. المشكلة إن الرجل ده كان سابق عصره زي ما قلتلك وموته خلي إدارة النادي مش لاقية حد يحل محله ويملا الفراغ اللي هو كان ماليه .. إتنين مدربين مؤقتين جم وبوظوا الدنيا لدرجة إن ماينز بقت فرقة مهددة بالهبوط لدوري الدرجة الثالثة.
متفهمش مين لعب في مخ (كريستيان هايدل Christian Heidel) مدير نشاط الكورة في النادي إنه يجيب لاعيب لسه بيلعب في الفرقة يعينه مدير فني والكلام ده كان في فبراير 2001 .. فيه كذا حاجة لازم تلفت نظرك .. (كلوب) مكنش كابتن الفرقة ومكنش هو أحرف لاعيب فيها بس لما (كريستيان هايدل) قعد مع الفرقة لاعيب لاعيب ياخد رأيهم كلهم شهدوا إن (كلوب) أكتر بني أدم عنده دم في الفرقة وأكتر حد بيفهم كورة في الفرقة .. (ولفجانج فرانك) الله يرحمه كان واخده تحت جناحه لإنه كان شايف فيه مدير فني كويس لما يبطل كورة .. مش بقولك هو (جوارديولا) بس الزمن خلاه يموت من غير إسمه ما يتخلد في التاريخ وإتنسي مع اللي إتنسوا.
تاني .. مفيش أي تفكير منطقي يقدر يبرر إزاي (كريستيان هايدل) أساساً فكر في (كلوب) وإزاي قدر يقنع مجلس الإدارة بده فمتحاولش تلاقي تفسير منطقي .. الغريب إن لما هو قعد مع (كلوب) يشرحله هو عايز منه إيه ف(كلوب) مخدتش أكتر من خمس ثواني عشان يوافق .. تاني يوم من تعيينه كان بيحضر أول تمرينة مع الفرقة .. أول ماتش له كان ضد فرقة إسمها إم إس في دويزبيرج MSV Duisburg ويكفي إني أقولك إن فرقة ماينز داسوا علي وشهم .. صحيح إن الماتش خلص 1-0 بس لماينز لكن الماتش كان One Side Game لدرجة مفيش حد من اللي بيشجعوا ماينز شافها قبل كده .. الفرقة كانت نازله جعانة كورة .. الحقيقة إن سر الخلطة بتاعة (كلوب) كان تافه لدرجة تخليك تقول طب ما هي سهلة أهي .. إلعب بنفس طريقة اللعب الثورية بتاعة (ولفجانج فرانك) بأربعة في خط الظهر .. إجري لحد ما الفرقة الثانية متبقاش عارفه تصلب طولها .. بس كده .. (كلوب) إستلم فرقة مهددة بالهبوط وبعد ِشهرين كانوا ضمنوا البقاء في الدوري .. لما تفكر فيها هو ده إسلوب لعبه سواء في ماينز أو بروسيا دورتموند أو ليفربول .. نفس طريقة اللعب تقريباً ثابتة 4-3-3 بس إعتماد رهيب علي الروح .. هو معندوش مشكلة إن الفرقة تخسر بس تكون جريت في الملعب لحد ما يتقطع نفس الفرقة التانية .. إلعب بقلبك وحتلاقي في أخر الماتش النتيجة لصالحك.
مشكلة إن طريقة لعبك تعتمد علي إنك تلعب بقلبك إنها مينفعش تطلع من رجل واحد .. دي لازم تطلع من النادي كله .. لازم روح الفانلة الحمرا زي ما الأهلاوية بيسموها تتوزع علي الفرقة كلها .. علي حد زي (هيندرسون) كابتن الفرقة واللي كان مع (كلوب) من اليوم الأول اللي إتعين فيه في ليفربول .. علي لاعب ناشيء زي (جو جوميز Joe Gomez) إتربي في النادي بس عمره ما لعب في الفرقة الأولي .. وحتي علي اللاعيبه اللي لسه جايه جديد زي (فيرجيل فان دايك Virgil van Dyke) .. طب ده لاعيب إنت كنت محظوظ إن كل الأندية اللي هو لعب فيها كانت أندية شعبية سواء سيلتيك في أسكتلندا أو ساوثهامبتون في إنجلترا ففكرة روح الفانلة ده مش غريبة عليه بس ده في حد ذاته حاجة تتحسب للمدير الفني إنه عرف يزرع ده في كل حتة في النادي .. بين اللاعيبه وبين طقم التدريب وحتي عمال الإستاد وصدقني دي مش حاجة سهلة خصوصاً لو بتتكلم عن مدير فني أساساً مش إنجليزي إنما ألماني وعامل اللغة برده مهم.
الروح بتتزرع بإن يبقي عندك فرقة كلها رجاله .. كلمة راجل هنا مش معناها حد صوته عالي أو شايف نفسه أو بياخد مرتب أعلي من زمايله .. كلمة راجل معناها إنه عارف إنه مجرد ترس في مكنة .. إن الفرقة أهم من الفرد .. الحقيقة إن فرقة ليفربول لو تبص عليها حتلاقي كلها رجاله في كل المراكز .. (فان دايك) مثال واضح علي ده .. كابتن منتخب هولندا وكابتن ليفربول في غياب (هيندرسون) .. (جيمس ميلنر James Milner) أو موظف كرة القدم زي ما بسميه .. الفكرة إن المدير الفني يزرع بين رجالته إن كلهم سوا شايلين الفرقة .. عشان كده عادي إن لو (هيندرسون) مش موجود (ميلنر) هو اللي يتكلم مع اللاعيبه ويشرحلهم هم حيعملوا إيه في الماتش لإن دي فلسفة (كلوب) .. ليفربول فرقة إنجليزي فاللي يتكلم بإسم الفرقة لازم يبقي إنجليزي .. من الحاجات اللي توريك قد إيه مهم إن المدير الفني يحاوط نفسه بلاعيبه رجاله هو اللي عمله (هيندرسون) قبل ماتش الفاينال لما لم الفرقة كلها في إجتماع بحضور (كلوب) وقالهم اللي عايز يقول حاجة يقولها .. تاني .. (كلوب) مكنش عارف إن الإجتماع حيتعمل ولا كان عارف حيتقال فيه إيه بس هو حضره وساب الناس كلها تتكلم .. إيه كم الثقة بالنفس دي .. فيه مديرين تانيين لو بس سمع خبر إن فيه حد بيتكلم من وراه بيتجن.
بس بلاش تتخيل إن (كلوب) من الناس اللي عايشة بمبدأ ماشي بنور الله بدعي وأقول يا رب .. مش صدفة إن ليفربول يكسب برشلونة 4-0 .. هم وصلوا للفاينال وكسبوه بنفس الطريقة اللي إنت بتخلص بيها شغلك .. فيه وقت نحرق فيه جامد وفيه وقت نريح فيه … خد ماتش الفاينال كمثال لده .. ناس كتير قالت وهي عندها حق إن توتنهام لعب أحسن من ليفربول .. معاك إستحواذ توتنهام كان أعلي .. معاك إن فرصهم علي الجون كانت أكتر .. بس هي دي طبيعة ماتشات الفاينال .. ماتشات الفاينال عبر عنها (محمد صبحي) لما قال تشتغل كتير تغلط كتير تترفد .. تشتغل نص نص تغلط نص نص تتجازي .. متشتغلش خالص متغلطش خالص تترقي .. كان فيه أوقات كتير في الماتش ليفربول بيضيع وقت سواء في ركنيات أو في طريقة لعب بس هي دي كانت تعليمات (كلوب) وهو بني فرقة إتعودت تقوله حاضر وتمام يافندم .. مع كامل إحترامي لفرقة توتنهام في الماتش بس أنتوا دخل فيكوا جون من ضربة جزاء صحيحة في أول دقيقة وإحتاجتوا 78 دقيقة كاملة عشان تشوطوا أول كرة علي الجون .. بالمعدل ده لو كان (لويس كاريوس Luis Karios) هو اللي واقف في الجون مش (أليسون Alison) كان برده ليفربول كسب.
في كل ماتشات توتنهام في بطولة Champions League الموسم اللي وصلوا فيه للفاينال محصلش ولا مرة إنهم طلعوا من الشوط الأول كسبانين .. عاجلاً أم أجلاً إحصائية زي دي كانت حتجيب أجلهم وده اللي حصل في الفاينال .. (كلوب) نفسه قال إنه عدي علي نهائيات هو لعب فيها قبل كده كانت فرقته بتلعب أحسن وبتضيع أكتر بس خسروا .. إفتكر جملة (محمد صبحي) .. دي طبيعة ماتشات الفاينال .. تغامر حتاخد علي قفاك .. يمكن (كلوب) بيتعلم ببطء شوية بس بيتعلم .. اللي إنت شفته في ماتش فاينال Champions League قصاد توتنهام ده رجل إتداس علي وشه بما فيه الكفاية لحد ما إتعلم إزاي يوصل للي هو عايزه.
عادة لما فرقة تكسب بطولة Champions League فبيتولد إحساس متفهمش جه منين وسط اللاعيبه إن كده خلاص جبنا أخرنا ومعادش فيه حاجة نعملها .. بس مع فرقة ليفربول موسم 2020 تقريباً كلهم باصين لقدام .. ده فريق متوسط سنه صغير والمصيبة إنهم بقوا متعودين علي إنهم يلعبوا في الفاينال كل سنة .. أنا شخصياً مبحبش (جوزيه مورينيو Jose Mourinho) بس لما كان بيحلل ماتش الفاينال علي BeIn Sports قال حاجة بصراحة لازم نفكر فيها .. بص علي كل سنة أسامي الأندية اللي بتحط تارجت ليها إنها تكسب البطولة .. مانشستر سيتي ويوفينتوس وريال مدريد وبرشلونة وبايرن ميونيخ وباريس سانجيرمان ورغم أسامي العناتيل دول إلا إن فرقة ليفربول صعدت الفاينال سنتين ورا بعض .. إنت قدام واقع جديد وهو إن فرقة كاملة إقتنعت بإن مكانها هو وسط كبار أوروبا وإبقي قابلني لو حد خد مكانهم .. قارن كلام حالة ليفربول بحالة توتنهام .. قارن الروح اللي خلقها (كلوب) باللوغاريتمات اللي قالها (ماوريسيو بوكتشينو Mauricio Pochettino) في المؤتمر الصحفي .. أنا مبحبش أختذل كلام حد في جملة هو قالها بس أنا عايز أقف قدام جملة مش عارف أعديها لما قال .. بعد خمس سنين في النادي أنا كنت باديء شغلي بمشروع واضح بس دلوقتي جه الوقت إننا نهدي ونغير رأينا ونتكلم وياريت تبقي بداية مرحلة ناجحة للنادي .. خدت بالك إنه قال للنادي .. ده الفرق بين توتنهام وليفربول .. فرقة خلاص عرفت مكانها وفرقة تانية مش عارفه مستقبلها إيه .. صحيح في ماتش الفاينال ليفربول كسب 2-0 وتوتنهام كان أخطر بس لو تسألني في الحقيقة إيه الفرق بين ليفربول وتوتنهام؟ أقولك 26 نقطة بين المركز الثاني والرابع.
المصادر:
- مقالة بعنوان He’s the Truly Special One: Nobody Does it Better than Klopp .. نشرت في جريدة The Daily Mail البريطانية وده لينك المقالة الأصلية:
https://www.dailymail.co.uk/sport/football/article-7096905/Liverpools-unique-manager-Jurgen-Klopp-draws-extraordinary-spirit-players.html - مقالة بعنوان How a Gut Decision Began Jurgen Klopp’s Managerial Rollercoaster .. نشرت في جريدة The Guardian وده لينك المقالة الأصلية:
s://www.theguardian.com/football/2019/may/31/jurgen-klopp-champions-league-final-liverpool-mainz
