لنفترض جدلا إنك من جيل الألفينات و بتحب كرة القدم .. بلاش بتحب دي خلينا نقول مدمن كرة قدم .. و لنفترض كمان إنك بتلعب فانتازي فإنت متابع جيد للدوري الإنجليزي و كمان بتشجع ريال مدريد فإنت عارف إيه اللي بيحصل في الدوري الإسباني .. يا سلام بقي لو كنت إنت في الجامعة و موراكش لا شغلة ولا مشغلة و بتتابع كمان الدوري الإيطالي و طبعا مش حننسي درة تاج كرة القدم الأوروبية بطولة دوري أبطال أبطال أوروبا Champions League .. إنت شاب لو كنت بتعرف تذاكر بنفس الشطارة اللي إنت بتتابع بيها كرة القدم كان زمانك معيد في الجامعة دلوقتي .. تخيلت النموذج اللي أنا بحاول أخليك تتصوره .. أهو النموذج ده واللي أنا متؤكد إن كتير منكوا شايف إن فيه حاجات كتير مشتركة بينكوا و بين بعض لو في إيدي أرجعك بالزمن تعيش سنة 1991 لكان حقا و صدقا و بدون أي مبالغة حتلاقي نفسك بتصرخ و بتقول يا خااااااااالي (عوض) ودوني الورشة.
سنة 1991 وما قبلها كان حمادة و بداية من سنة 1992 حمادة تاني خالص .. غير إن وقتها كان نجم مصر الأول في الغناء كان (حكيم) و (حميد الشاعري) كان مكسر الدنيا و إن الناس مكنتش بتعرف أخبار العالم غير من نشرة الأخبار علي القناة الأولي ففي عالم كرة القدم الدنيا حقيقي صعب عليك كمشجع حاليا إنك تستوعبها .. خليني أديلك مثال .. في أوروبا مثلاً مكنش فيه حاجة إسمها إن لاعب زي (محمد صلاح) يطلب فوق 3,00 ألف جنيه إسترليني في الأسبوع (يعني داخل في 14 مليون في السنة) لإن ده في معايير سنة 1991 كان كفر عشان أحرف لاعيب في العالم وقتها كان الفرنساوي (جان بيير بابان Jan-Pierre Papin) و اللي خد البالون دو أور بس اللي عايزك تعرفه إن (بابان) كان بياخد صحيح 2 مليون يورو بس في السنة .. زمان في الدوري الإنجليزي مكنش فيه حاجة إسمها إن مواعيد الماتشات تتوزع عشان الناس تعرف تتفرج إنما الماتشات كلها بتتلعب في نفس اليوم و في نفس التوقيت و أغلبها مش بيتذاع أصلاً علي التليفيزيون .. لو حنتكلم عن دوري أبطال أوروبا فأجحد فرقة في أوروبا كلها وقتها كانت ريد ستار بلجراد الصربي .. اللي هو إنت بتسمع الكلام ده و بتقول لنفسك ووووه.
ده حقيقي .. قبل سنة 1992 كرة القدم كصناعة أو كبيزنس مكنتش بتجيب فلوس .. الأندية حتي الكبيرة منها مكانتش براندات .. مكنتش بتمشي في الشارع تلاقي شاب لابس تي شيرت إيه سي ميلان مكتوب عليه إسم (ماركو فان باستن) أو تي شيرت إنتر ميلان عليه إسم (لوثار ماتيوس) .. إنت أساساً دلوقتي مش عارف مين الأسامي اللي أنا بقولها دي .. في أغلب دوريات أوروبا كان اخرك كنادي إنك تجيب إتنين لاعيبه أجانب بس في الفرقة كمحترفين .. المناخ و اللوايح دي كلها كانت فعيا مش حقول بتقتل كرة القدم بس خلينا نقول كانت مكتفاها .. قيود بسببها مكنش فيها حنفية اللاعيبه الفرنساويين في أرسنال زي (تييري هنري) و (باتريك فييرا) و (روبين بيريس) اللي خلونا نشوف أول فرقة تكسب الدوري الإنجليزي من غير ولا هزيمة .. قيود بسببها ريال مدريد مكنش عارف يعمل فرقة الجلاكتيكوس ويجيب (زين الدين زيدان) و (ديفيد بيكهام) و (لويس فيجو) و (رونالدو نازاريو) .. كل ده إنتهي سنة 1992 .. خليني أحاول أشبهلك تأثير سنة 1992 في كرة القدم إنه عامل زي تاريخ هجرة سيدنا النبي (عليه الصلاة و السلام) من مكة المكرمة للمدينة المنورة أو سنة ميلاد سيدنا (عيسي) عليه السلام اللي هي السنة اللي قبليها العالم كان ماشي بطريقة و بعدها مشي بطريقة تانية خالص .. السنة اللي كل حاجة فيها إتغيرت للأبد.
فيه حاجة إسمها The Perfect Storm و ده مصطلح أجنبي عشان أشرحهولك فهو عامل زي المثل الشعبي بتاعنا المصايب مش بتيجي لوحدها .. دايما بيكون عندها كوكتيل من الأحداث و الظروف اللي لما بتتجمع مع بعضها بتخلق الوقت المثالي للتغيير .. كرة القدم إتولدت من جديد عن طريق 3 حاجات حصلوا مع بعض .. ميلاد بطولة دوري أبطال أوروبا .. ميلاد بطولة الدوري الإنجليزي الممتاز .. قضية (بوزمان) و الثلاثة محتاجين نتكلم عنهم بشوية تفصيل.
دوري أبطال أوروبا .. البطولة اللي ميلادها غير كل حاجة:
دايما بيتقال إن مفيش حاجة بتشقلب حياة الرجل 180 درجة قد ميلاد أول طفل ليه .. ميلاد بطولة دوري أبطال أوروبا كان الحدث اللي قلب حياة كرة القدم .. اللي حصل إن في سنة 1992 إتلعبت بطولة أمم أوروبا و إتنظمت في السويد و البطولة دي مميزة أوي في تاريخ كرة القدم عشان اللي كسبها كانت الدانمرك مع إنها متأهلتش ليها .. اللي حصل إن بسبب حرب البلقان الإتحاد الأوروبي منع يوغوسلافيا إنها تشارك في البطولة و جابوا مكانها الدانمرك اللي الزهر لعب معاها و كسبت البطولة كلها .. بعد ما البطولة خلصت إتعملت قعدة بين رجل الأعمال الألماني (كلاوس هيمبل) مع الإتحاد الأوروبي لكرة القدم UEFA عشان يحاولوا يلاقوا طريقة يعملوا بيها بطولة جديدة لكرة القدم بتجيب فلوس أكتر من البطولات الأوروبية القديمة.
(كلاوس هيمبل) ده كان شايف الحل بوضوح أوي .. حق البث بتاع الماتشات و حق إعطاء حقوق الرعاية للشركات أو Sponsors لازم يكون في إيد الإتحاد الأوروبي لكرة القدم .. بمعني .. صحيح البطولة بيلعب فيها أندية إنجليزية و إسبانية و إيطالية و ألمانية و غيرها بس ولا إتحاد من دول له الحق في إنه يحدد أي حاجة .. مواعيد الماتشات بيحددها الإتحاد الأوروبي لكرة القدم .. أسامي الرعاة بيحددها الإتحاد الأوروبي لكرة القدم .. الحكام اللي حتحكم الماتشات حيددها الإتحاد الأوروبي لكرة القدم .. الدوريات المحلية ملهاش غير إنها تقول حاضر و نعم في مقابل إنهم ياخدوا فلوس .. و فلوس كتير كمان .. فضل بس نقطة إسم البطولة .. فيه ناس إقترحت إسم Super Tour .. فيه ناس إقترحت إسم Champions Cup .. و شوية ناس تقول سموها Champions Tour لحد ما في الأخر إتفقوا علي إسم Champions League .. بعدها حصلت قعدة تانية بين (كلاوس هيمبل) مع المؤلف الموسيقي البريطاني (توني بريتون) و طلب منه يألف مقطوعة موسيقية كلاسيكية و ياريت تكون مستوحاه من شغل المؤلف الموسيقي (كلاوس هيندل) عشان تبقي إفتتاحية البطولة الجديدة .. (توني بريتون) معادش إختراع العجلة الحقيقة لإنه خد مقطوعة Zadok the Priest اللي بتتعزف في كل مرة ملك أو ملكة جديدة بيقعد علي عرش بريطانيا و لعب فيها شوية عشان في الأخر يطلعلنا الموسيقي اللي كلنا عارفينا .. نشيد دوري أبطال أوروبا.
الحقيقة إن الشغل اللي عمله (كلاوس هيمبل) و إن كان في البداية ناس إعترضت عليه إلا إن النتايج اللي هو حققها خلت ناس كتير من اللي كانت معترضة علي هيمنة الإتحاد الأوروبي لكرة القدم علي البطولة ولا كأنه الكبير أوي في المزاريطة تحط في بقها جزمة قديمة .. أرباح البطولة نطت من 85 مليون فرانك سويسري سنة 1992 بقت مليار فرانك سويسري سنة 2002 .. جري الشريط لسنة 2021 حتلاقي إن بطولة Champions League لوحدها أرباحها الصافية بتوصل 2.5 مليار يورو .. مهم برده بالنسبة لي تبقي فاهم هي ليه بطولة دوري أبطال أوروبا اللي عملها (كلاوس هيمبل) نجحت بالشكل ده و كلمة نجحت هنا معناها عرفت تجيب فلوس كتير .. السر حضرتك إن الفرق الكبيرة في أوروبا بقت بتلعب ماتشات أكتر و بالتالي الرعاة بيدفعوا فلوس أكتر .. عارف إنك مش فاهم الحتة دي فخليني أشرحهالك بسرعة.
سنة 1987 فرقة نابولي اللي كانت بطلة إيطاليا و كان بيلعب فيها وقتها (دييجو أرماندو مارادونا) لسه بتقول يا رحمن يا رحيم في مشوارها في البطولة الأوروبية لقوا نفسهم بيلاعبوا ريال مدريد .. زمان إنت كنت بتلعب ماتش في الدور التمهيدي و بعد كده بتلعب في مرحلة خروج المغلوب علي طول و ده كان معناه إن الفرقة اللي بيلعب فيها (مارادونا) اللي يعتبر واحد من أهم لاعيبة كرة القدم في التاريخ ملعبتش في الموسم كله غير ماتشين بس في أوروبا .. بعدها بسنتين الدنيا بتلف زي المرجيحة و اللي حصل في نابولي إتعمل هو هو في ريال مدريد لما خرجوا علي إيد إيه سي ميلان و ملعبوش غير ماتشين بس برده في البطولة الأوروبية للأندية .. الطريقة اللي بتتلعب بيها بطولة دوري أبطال أوروبا دلوقتي بتخلي الفرق الكبيرة بتلعب 6 ماتشات في دور المجموعات و دي الماتشات اللي لازم تتلعب .. ده غير إن نظام المجموعات نفسه بيقسم الفرق الكبيرة علي رؤوس المجموعات و بالتالي فرقة ريال مدريد مثلاً لو هي بطل الدوري الإسباني مش حتلاقيها وقعت في نفس المجموعة بتاعة باريس سانجيرمان بطل الدوري الفرنساوي.
إنت تقدر تقول إن الطريقة اللي إتعملت بيها بطولة دوري أبطال أوروبا زي ما إشتغل عليها (كلاوس هيمبل) عملت كذا حاجة الحقيقة و تاني يمكن عشان إنت كشاب بتشجع كرة قدم مكنتش عايش قبل سنة 1992 فإنت مش متخيل أوي التأثير اللي عملته البطولة دي علي البيزنس بتاع كرة القدم:
- أول حاجة إن الفلوس جريت في إيد الإتحاد الأوروبي لكرة القدم اللي بدأت تتوزع علي الأندية اللي بتشارك في البطولة.
- ثاني حاجة إن الفلوس اللي بدأت تيجي متوزعتش بما يرضي الله لإن الأندية الكبيرة خدت نصيب الأسد و بالتالي الفروقات المادية بين الأندية الغنية و الفقيرة فضلت توسع و توسع.
- ثالث حاجة و دي اللي ممكن تهمك كمشجع إن الجماهير بقت مش بس بتتفرج علي ريال مدريد و برشلونة و مانشستر يونايتد في الدوريات المحلية الأوروبية إنما بدأت ليالي الأبطال يبقي ليها مكانها في قلوب مشجعي الكرة.
الدوري الإنجليزي الممتاز .. عملنا سوبر لييج كده بس علي الضيق:
لما طلعت فكرة السوبر لييج اللي كان الواجهة بتاعتها (فلورينتينو بيريز) رئيس نادي ريال مدريد و معاه أندية برشلونة و يوفينتوس كتير مننا مش بس إتريق عليها إنما إتهمها بصراحة كده إن الناس دي عايزة تبوظ كرة القدم اللي إحنا كلنا بنحبها .. في تقديري الشخصي إن الأندية الثلاثة كان نفسهم يعملوا في دوري أبطال أوروبا نفس اللي حصل في إنجلترا لما إتولدت بطولة الدوري الإنجليزي الممتاز Premier League بس يمكن قصة ميلاد الدوري الإنجليزي بالشكل اللي إنت بتتفرج عليه دلوقتي كانت مختلفة كتير عن المسخ اللي إسمه السوبر لييج ده .. اللي حصل إن سنة 1991 الأندية الخمسة الكبار في بريطانيا وقتها اللي كانوا مانشستر يونايتد و أرسنال و ليفربول و توتنهام و إيفيرتون كانوا جابوا أخرهم من اللي بيحصل في بطولة الدوري الإنجليزي وقتها و الحقيقة إن الناس دي كان عندها وجهة نظر تستحق إنك تقف قدامها و تفكر فيها:
- مبدأياً كده الشغب او Hooliganism و اللي إنت ممكن تكون تعرفة بإسم الهوليجانز كانت خصلة بنت تييييت في المشجعين الإنجليز .. المشجعين الإنجليز كل ما يسافروا أوروبا يشجعوا فرقهم يكسروا المحلات و يعملوا قلق لدرجة إن الإتحاد الأوروبي لكرة القدم طلع قرار بحرمان الإندية الإنجليزية من المشاركة في البطولات الأوروبية .. طبعاً قرار زي ده كان بيكلف الأندية فلوس .. الأندية بصت للإتحاد الإنجليزي عشان تقوله هو إنت مش ناوي تاخد أي أكشن لقوا الإتحاد عايم في مياه البطيخ.
- الإستادات اللي بقي حالها يصعب علي الكافر و مش أمنة إنها تستوعب العدد ده من الجماهير كل إسبوع و طبعاً تجديد الإستادات محتاج فلوس و فلوس كتير كمان.
- بس يمكن النقطة المهمة هي الفلوس .. بيزنس كرة القدم وقتها زي ما قلتلك مكنش بيجيب فلوس .. الأندية الإنجليزية زمان مكانتش زي دلوقتي معاه فلوس تشتري أي حد .. لو إنت لاعيب فلتة زي (ماركو فان باستن) أو (رود خوليت) أو (لوثار ماتيوس) فإنت بتروح تلعب في إيطاليا .. اللاعيبة الإنجليز الجاحدين هم نفسهم كانوا بيهربوا بره الدوري الإنجليزي .. (جاري لينيكير) اللي يمكن من أحسن المهاجمين في تاريخ إنجلترا راح لعب في برشلونة و (مارك هيوز) راح حصله علي هناك .. (إيان راش) أسطورة ليفربول زهق من اللي بيحصل و راح لعب في يوفينتوس .. الإتحاد الإنجليزي لكرة القدم مكانش عارف يسوق للبطولة و بالتالي مفيش فلوس حقوق رعاية و حتي الفلوس اللي بتيجي بتتوزع علي كل الأندية زي بعض يعني تخيل نادي زي مانشستر يونايتد بجلالة قدره ياخد نفس الفلوس اللي بياخدها نادي بيلعب في دوري الدرجة الرابعة.
كل ده إتغير سنة 1992 .. فاكر الأندية الخمسة اللي قلتلك إنهم زهقوا من اللي بيحصل .. رؤساء الأندية الخمسة بصوا علي اللي بيحصل في بطولة كرة القدم الأميريكية و الطريقة اللي الإتحاد هناك و إسمه NFL بيدير اللعبة و قالوا لنفسهم طب ما نعمل حاجة شبه الناس دي .. بمنتهي البساطة الرياضة عموماً و كرة القدم خصوصاً مش مجرد حدث محتاج يتذاع بالبث المباشر علي التليفيزيون و خلاص .. ماتش كرة القدم مش زي خطاب الرئيس أو صلاة الجمعة اللي هو نذيع الحدث أول ما يبدأ و بمجرد ما يخلص البث يخلص .. ماتش كرة القدم ده زيه زي المسلسل أو الفيلم .. ترفيه .. ليه لا الماتشات يبقي ليها أستوديو تحليلي يقعد بالساعات .. ليه ميبقاش عندنا السبت الممتاز و الأخد الممتاز علي BeIn Sports .. ليه لا الأندية هي اللي تدير الدوري بتاعها .. ليه لا فلوس الرعاية تتوزع علي أندية الدوري الإنجليزي الممتاز بس .. الأهم ليه لا ماتشات الدوري الإنجليزي الممتاز تتذاع كلها علي قناة واحدة و في مواعيد مختلفة عشان الناس تتفرج و تتبسط .. شفت أهي أهم كلمة هي تتبسط.
شوية بشوية الأندية التانية في الدوري وافقت علي الفكرة .. هوبا الدوري الإنجليزي بقي إسمه Premier League .. رجل الأعمال الأسترالي (روبيرت موردوخ) إشتري حق بث ماتشات الدوري الإنجليزي لمدة خمس سنين علي قناته سكاي Sky و دفع كاش علي الطرابيزة 300 مليون جنيه إسترليني ومن ساعتها الطريقة اللي إحنا بنتفرج بيها علي الماتشات إختلفت .. فكرة الأستوديو التحليلي قبل و بعد الماتش دي إخترعتها قناة سكاي و خدتها من اللي بتعمله القنوات اللي بتنقل ماتشات NFL في أميركا .. شوية بشوية و الأندية الإنجليزية بقي معاها فلوس تصلح و تطور من إستاداتها و كمان تشتري لاعيبه علي اعلي مستوي .. مانشستر يونايتد بدأ التريند ده سنة 1992 لما إشتروا (إيريك كانتونا) .. سنة 1995 أرسنال إشتري (دينيس بيركامب) من إنترميلان و دفعوا فيه 11 مليون يورو و ده كان رقم خزعبلي وقتها .. سنة 1996 تشيلسي إشتري الثلاثي الطلياني (جان فرانكو زولا) و (جيانلوكا فيالي) و (روبيرتو دي ماتيو) .. .. جري الشريط شوية من أول سنة 2000 و إنت طالع حتلاقي الأرقام عمالة تزيد و تزيد .. مانشستر يونايتد صرفوا 28.5 مليون يورو عشان يشتروا (روود فان نيستلروي) و 42.6 مليون يورو عشان يجيبوا (خوان سباستيان فيرون) .. بمعني أخر .. الفلوس جريت في إيد الأندية الإنجليزية ومن ساعتها و دوريات أوروبية كتير بدأت تقلد الموديل الإنجليزي.
قضية (بوزمان) .. حنفية بيع و شراء لاعيبه إتكسرت و غرقت الدنيا:
الحتة اللي جايه دي بالذات كل ما حد يقولك بلاش ندخل كرة القدم في السياسة تحطها في عنيه عشان ده غالباً بني أدم مش فاهم هو بيتكلم عن إيه .. جاهز .. يوم 7 فبراير 1992 إتمضت إتفاقية ماستريخت ودي كان بداية ميلاد الكيان اللي إنت عارفه دلوقتي بإسم الإتحاد الأوروبي .. أنا عارف إنك حاسس إن الكلام قلب علي حصة دراسات إجتماعية بس الصبر .. الإتفاقية دي قالت إن أي مواطن من ضمن الدول الأعضاء في الإتحاد يحقله إن في أي يوم يهفه الشوق إنه يروح يعيش في أي دولة تانية من الأعضاء في الإتحاد .. ده كان معناه إنك لو شغال دكتور أو مهندس أو صنايعي أو أي شغلانة تعجبك إنت تقدر تسافر تعيش في دولة تانية يعني أكنك بتلعب الكراسي الموسيقية بس اللي الكراسي تبقي الدول الأوروبية الأعضاء في الإتحاد و اللي بيلعبوا هم البني أدمين .. لكن .. هو مش لاعيبة الكورة دول موظفين برده؟
وقتها كان لا .. إنت لو لاعب كرة قدم ماضي عقد مع نادي و العقد ده خلص فمن حق النادي إنه ميخليكش تمشي إلا لما يتدفعله فلوس .. طبعاً إنت بتسمع الكلام ده و مستغرب بس ده كان الوضع فعلاً .. سنة 1995 كل حاجة إتغيرت لما لاعب كرة القدم البلجيكي (جان مارك بوزمان) رفع قضية في المحكمة الأوروبية عشان يخلي لاعب كرة القدم زيه زي أي موظف بعد ما عقده يخلص يحقله يهج من البلد اللي هو قاعد فيها .. اللي عمله (بوزمان) ده فعلياً غير ملامح كرة القدم علي مستوي أوروبا و بعد كده علي مستوي العالم .. بسببه بقي فيه حاجة إسمها إنتقال حر أو Free Transfer يعني لاعب يروح لنادي ببلاش عشان عقده في النادي بتاعه متجددش .. بسبب حكم (بوزمان) الإتحادات الأوروبية بدأت تلغي سقف اللاعيبة الأجانب اللي يحقلها تلعب في الدوري .. يعني مثلاً سنة 1998 نادي أرسنال كان بيلعب فيه 9 لاعيبه فرنساوين و لاعيب نيجيري و لاعيب أرجنتيني و لاعيب سويدي و لاعيب برتغالي و لاعيب نمساوي و لاعيب إسباني و إتنين لاعيبه هولنديين و طبعا المدير الفني بتاعهم كان الفرنساوي (أرسين فينجر) .. قبلها بخمس سنين بس لو كنت رحت مشيت في شوارع لندن قلت للناس إن حيجي اليوم اللي تشكيلة نادي أرسنال حيبقي فيها كراسة الرسم دي من اللاعيبة اللي كل واحد فيهم جاي من بلد شكل مكنش حد حيصدقني.
اللي أنا عايز أختم بيه إنك لما تتفرج علي فرقة مانشستر سيتي و هي بتاخد الدوري الإنجليزي و هي مفيهاش غير كام لاعيب إنجليزي يتعد علي الصوابع مش عايزك تستغرب .. زي ما برده مش عايزك تستغرب لما تشوف يوفينتوس مفيهوش لاعيبه طليان كتير .. واقع كرة القدم اللي إنت عايشه دلوقتي و إتولدت لقيته فعلياً بقي موجود من بعد سنة 1992 و قبلها كرة القدم كانت حمادة تاني خالص .. يمكن لو رجع بيك الزمن قبل سنة 1992 مكنتش حتبقي حابب تتفرج علي كرة القدم أصلاً.
المصدر:
فيديو بعنوان How modern football was born-Champions League revolution نشر علي قناة DW Kick off و ده لينك الفيديو علي YouTube:
https://www.youtube.com/watch?v=-rSc5y35cgI&t=96s
