النهاردة هنتكلم عن فكرة عمل الموبايل وازاي بيتم إرسال واستقبال المكالمات الهاتفية .. اولا وبكل بساطة هنشرح الفكرة بتاعه المكالمات الهاتفية .. في البداية لما بتتكلم الصوت بيدخل الموبايل عن طريق الـ microphone وبيتم تحويله إلى digital signals بواسطة MEMS sensor والـ ic الموجود في الموبايل .. الـ digital signal دي بتبقى عبارة عن صوتك بس على هيئة binary system ودي ببساطة اللغة اللي بتفهمها الألة أو الكمبيوتر ومكون من رقمين بس صفر أو واحد
كده احنا معانا صوتك عباره عن شفره مكونه من اصفار و وحايد .. بيتم تحويل الشفرة دي عن طريق حاجة اسمها الـ antenna في الموبايل الى electromagnetic waves مع الاحتفاظ بشكل شفرة الصوت بحيث ان رقم واحد يكون تردده عالي والصفر يكون تردده منخفض.
كده أنت كل اللي محتاجه انك تنقل الـ electromagnetic wave دي للطرف تاني وهو هيستقبل الاشارة ويسمع كلامك بس الموضوع مش بالبساطة دي لانها بتتأثر بالعوامل البيئية المحيطة زي المطر وخلافه وكمان بالاجهزة الكهربائية .. وحتى لو تغلبنا على كل ده فهي مش هتنتقل للابد وهتقف بعد فترة بسبب كيرڤ الارض الكروي الشكل
وده بيخلي الإنتقال للطرف التاني مستحيل بدون الاستعانة بمصدر ينقل الاشارة .. علشان نحل المشكله دي استخدمنا ابراج الاتصالات ودي بتعتمد على cellular technology او التكنولجوية الخلوية .. فكرة عملها أن المنطقة الجغرافيه اتقسمت الى خلايا سداسية الشكل , الخلايا دي اقرب في شكلها لخلية النحل .. جوا كل منطقة برج اشارة خاص بيها .. الابراج دي متوصلة ببعض عن طريق أسلاك أو عشان نكون أدق عن طريق optical fiber cable ودي بتكون تحت الأرض أو في المحيطات
نرجع لل electromagnetic waves اللي طالعة من الموبايل و اللي بيتم التقاطها عن طريق البرج اللي في المنطقة بتاعتك وبيتعملها معالجة وبعدين تتنقل للـ destination tower وده البرج اللي عند الشخص المستلم .. بيقوم البرج ده بإرسال الموجات والموبايل بتاع الشخص التاني بيتسقبل الاشارة وعن طريق عملية عكسية للي قولناه فوق بيقدر يسمع صوتك
يبقى كده عرفنا أن ال mobile communication مش بتعتمد على فكرة ال wireless كليا بالعكس فيه اعتماد على wires كمان زي ما قولنا .. ممكن تفكر الموضوع انتهى بس فيه مشكلة غفلنا عنها وهي أن الاتصال هينجح في حالة واحدة وهي لما الاشارة تتنقل من البرج الخاص بيك للبرج الخاص بالشخص التاني .. طب ازاي البرج بتاعك عرف في اي منطقة البرج الخاص بالشخص التاني علشان يبعت الاشارة عليه؟
عشان نفهم الموضوع ده تم ازاي هنتخيلها بمثال بسيط وهو أن أنت قاعد في “بيتكم” وعاوز تكلم صاحبك فهتكلمه على عنوان “البيت” بتاعه الاول .. طب لو هو برة البيت ومفيش وسيلة تواصل معاه هتضطر تكلم بيته الاول وتعرف منهم هو فين بالظبط وهيوصلوك ليه؟ .. بالظبط ده اللي بيحصل في حالة الاتصال .. بيستخدموا حاجه اسمها MSC ودي اختصار لـ Mobile Switching Center
تعالى نفهم ايه ال MSC ده الاول .. انت اول مابتشتري شريحة للموبايل كل معلومات اشتراكك ومعلوماتك كلها زي الموقع او حالة الاتصال بتاعتك بتتخزن في ال MSC وده بيبقى اسمه Home MSC زي البيت بتاعك بالظبط .. لما بتسافر وتبعد عن ال Home MSC بتاعك بتتوصل باقرب MSC ليك وبيكون اسمه foreign MSC وبيتواصل مع ال Home بتاعك وال home دايما بيبقى عارف معلوماتك زي الموقع بتاعك وتبع أي برج أنت وكل حاجه عنك
الـ home بيشتغل ببعض الTechniques او الطرق عشان يقدر يحدد موقعك لما تبعد عنه ويعمله Update باستمرار وهي :
- بيعمل Update للموقع بعد فترة معينة من الوقت
- لما الموبايل يعدي عدد معين من الابراج بيتم عمل Update للموقع
- واخرهم لما الموبايل يكون مغلق ويتفتح بيتم عمل Update للموقع تلقائي
علشان نربط كل الكلام ده ببعضه تعالى نقول مثال بسيط .. أنت عاوز تتصل بصاحبك فبالتالي الاشارة بتاعتك هتروح لبرج الاتصالات التابع ل Home MSC .. بعد كده الHome بتاعك بيبعت الاشارة لHome بتاع صاحبك الاول وبيشوف هو موجود هناك ولا لا .. لو موجود الاشاره بتروح للبرج اللي هو موجود فيه وبتشوف الاول هو معاه مكالمة تانيه او موبايله مقفول ولا لا .. لو متاح الموبايل هيرن وهيتم توصيله بالمكالمة .. طب لو هو مش في الHome بتاعه؟ .. هيبدأ بقا يشوف الموقع بتاعه موجود عند انهي Foreign MSC وهيتعرف على البرج التابع ليه ويشوف هو متاح ولا لا ويبعتله عليه المكالمة .. كده الى حد ما بسطنا مبدأ عمل الاتصالات على قد مانقدر بدون الدخول في تفاصيل هندسيه معقدة
