تابعونا

اقتصاد و مال

استحواذ (ماسك) علي تويتر .. اللي معاه قرش محيره يجيب حمام ويطيره.

اللي انت محتاج تفهمه إن شراء (ماسك) لتويتر هو مشروع شخصي لبني ادم ربنا كرمه بفلوس مبقاش عارف يوديها فين فقرر يصرف شوية حلوين منها علي تجربة مجتمعية لاثبات وجهة نظره .. فيه مثل شعبي في مصر بيقول اللي معاه قرش ومحيره يجيب حمام ويطيره وده فعلاً اللي (ماسك) عمله .. هو جاب تويتات وطيرها .. مش لسبب غير انه مش لاقي حاجة يصرف فيها فلوسه فقرر أنه يشتري الحاجة اللي كانت مضايقاه وهي تويتر .. الموضوع يبان تافه وهو حقيقي تافه إن ملياردير يكون متضايق من اللجان الاليكترونية اللي بتشتم فيه وفي شركاته وفي انجازاته.

15 نوفمبر، 2025 590

مهم تفهم نقطة وهي إن مفيش حاجة بتلعب في دماغ الرجاله قد الفلوس والنسوان .. بما اننا النهاردة بنتكلم عن تويتر اللي بقي اسمها اكس فاحنا بنتكلم عن الفلوس فحط حتة النسوان دي علي جنب وخلينا نتكلم عن ازاي الفلوس بتلعب في دماغ الرجاله .. حاول تغمض عينك وتتخيل سيناريو كده ان طلعلك المصباح السحري بتاع علاء الدين والمارد عرض عليك ال3 أمنيات وانت زي اي حد عاقل في الدنيا قلتله انا بتمني يبقي معايا فلوس كتير .. كتير فشخ .. ليكن مثلاً انت بقي فجأة حسابك في البنك 100 مليون دولار .. حاول تعمل التمرين العقلي ده مع نفسك هو انت لو معاك الفلوس دي كلها شخصيتك حتتغير ازاي .. متعمليش فيها زاهد في الدنيا وتقولي حفضل زي ما انا لإن لو كنت حتفضل زي ما انت مكنتش اتمنيت يبقي معاك فلوس كتير اصلا .. هل علاقتك بالناس حتفضل زي ما هي .. هل اهتماماتك حتفضل زي ما هي .. هل حتفضل المواطن البسيط اللي مرة في الاسبوع علي الاقل حيبقي عايز يروح يضربله طبق فول وبيض وبتنجان من علي عربية الفول اللي علي اول الشارع .. اجابة السؤال ده انت تحددها مش انا بس اللي انا عايز اوصله انك صعب اوي انت وانا وغيرنا كمواطنين بنجري ورا اكل عيشنا اننا نبقي فاهمين ايه اللي بيحصل في دماغ الرجاله اللي زينا بس ربنا كرمهم وبقي معاهم ملايين ومليارات الدولارات .. ناس زي (ايلون ماسك) كده.

لو دخلت علي النت دلوقتي عملت سيرش علي مين هم اغني اعنياء العالم حتلاقي اسم (ايلون ماسك) ملعلع بثروة بتوصل 471.1 مليار دولار بس مش دي القضية .. القضية إن (ماسك) مورثش الفلوس دي .. (ماسك) متولدش وفي بقه معلقة دهب .. هو بدأها من تحت خالص بس مشيت معاه بميكس من توفيق ربنا وانه حرفياً ومش ببالغ ده بني ادم عايش عشان شغله .. هو ممكن عادي جداً يفضل قايم نايم في مكتبه بالاسبوع ميروحش .. ده بني أدم معندوش فكرة الحياة الاجتماعية رغم انه اتجوز قبل كده وطلق فوق 3 مرات وعنده فوق العشرين طفل بس هو مش رجل عائلة بالمعني التقليدي لكلمة رجل العائلة اللي بيروح كل يوم لمراته وعياله .. هو معندوش فكرة ان يبقي فيه توازن بين شغلي وحياتي الشخصية .. مفيش الكلام ده .. وعشان هو شخصياً عايش عشان شغله فهو مستني من كل اللي شغالين معاه انهم هم كمان يعيشوا عشان شغلهم .. انت ممكن تبقي شغال في شركة ومديرك يقولك لازم تسهر وتتعب وتنزل الشغل ايام الاجازات وتلاقي مديرك ده بيمشي العصر وكل وييك ايند يروح الشاليه بتاعه في السخنة وسايبك انت تسف تراب في الشغل .. بس (ماسك) مش كده .. لو انت بتروح بيتك تنام في سريرك بعد يوم شغل طويل هو بيبات في المكتب .. ولو هو روح بيته زيك بتلاقيه تاني يوم جاي الشغل الفجر قبل الناس كلها .. اللي هو بيطلبه منك هو بيطبقه علي نفسه .. الدماغ دي اللي فيه ناس حتعجبها وفيه ناس حتقول عليها مريضة هي السبب ورا ان الرجل ده عمل الثروة دي في الوقت القليل ده.

للناس اللي متعرفش أصلاً مين هو (أيلون ماسك) فده حضرتك لحد يناير 2022 اللي كانوا يعرفوا اسم (ماسك) هم المهندسين اللي زي حالاتي كده لإن الرجل ده بالنسبة لينا كمعشر المهندسين كان النسخة الحية من شخصية Iron Man بالضبط .. المهندس رجل الأعمال الغني الذكي اللي بيخترع واللي دايما ماشي مع عارضات أزياء ومغنيات وممثلات .. هو عمل فلوس حلوة أوي من تأسيسه لشركتين غيروا مسار البيزنس اللي هم Tesla ودي أكبر شركة بتعمل عربيات بالكهرباء و كمان شركة SpaceX ودي شركة بتصنع صواريخ فضاء .. فاهم انت الحاجات الولادي دي أصل مفيش بنت حتبقي مهتمة تعرف تطور انتاج صواريخ فالكون Falcon الفضائية اللي بتعملها SpaceX أو يا تري ازاي تكنولوجيا الصواريخ معادة الاستخدام Reusable Rockets بتشتغل .. ولا حتي ازاي Tesla استحوذت علي نصيب الأسد من سوق العربيات اللي بالكهرباء بسبب تطويرها لتكنولوجيا البطاريات .. فجأة من 2022 وانت طالع وسيرة واسم (ماسك) بقوا علي كل لسان .. مبقاش اسمه بيتقال وسط الولاد الدحيحة والنيردات اللي بيحبوا مواضيع الهندسة والتكنولوجيا .. بقي حتي البنات عارفين اسمه .. حتي الكبار في السن بقوا عارفين اسمه .. وكل ده حصل لما قرر (ماسك) انه يشتري تويتر Twitter وده اللي احنا عايزين نتكلم عنه النهاردة .. رحلتنا النهاردة هي لفهم ازاي وليه (ماسك) بعزقله 44 مليار دولار عشان يشتري تويتر والأهم اننا مع بعض نفهم هو ياتري مستقبل تويتر رايح علي فين.

واحدة من الصور اللي قلبت الانترنت كانت في يونيو 2022 لما (ماسك) دخل مقر تويتر لأول مرة وهو شايل حوض صيني .. السبب في الصورة دي ان في اللغة الانجليزية فيه مصطلح اسمه Let it Sink in اللي ترجمته بالعربي انك تهدي بالله لحد ما تستوعب الكلام اللي بيتقال وكلمة Sink معناه يغرق أو حوض فهو قرر ياخد معاه الحوض علي أنه يعني بيقول للناس اللي كانت ضد شراءه للشركة انهم يستهدوا بالله لحد ما يستوعبوا ان خلاص استحواذه علي تويتر بقي حقيقة مسلم بيها.

ازاي .. أراك توزع من مال الست الوالدة:

مهم تفهم ان (ماسك) منطش علي تويتر بالباراشوت لإن قبل ما تنور في نفوخه فكرة انه يشتري تويتر هو كان واحد من أهم الناس اللي ليها حساب علي تويتر .. الأكونت الشخصي بتاع (ماسك) علي تويتر كان بيتابعه فوق ال100 مليون مستخدم وكان كل ما يلاقي نفسه زهقان يفتح تويتر يبعتله تويته .. مرة يقول معلومة ملهاش لازمة عن واحدة من شركاته سواء Tesla أو SpaceX .. مرة يبعت نكتة بايخه محدش بيضحك عليها غيره واتنين كمان .. استحواذ (ماسك) علي تويتر حصل بنفس نظرية الضفدعة وحلة المياه السخنة .. في حالة انك مش فاهم انا قصدي ايه فلو معاك ضفدعة ومعاك حلة ميه مغلية ورميت الضفدعة في المياه المغلية فالضفدعة بسرعة حتنط بره الحلة عشان تنقذ نفسها .. بس لو حطيت الضفدعة في حلة مياه باردة وبدأت تسخن المياه تدريجي واحدة واحدة فحتلاقي الضفدعة ماتت في الحلة من غير ما تحس بالتغيير وقبل ما تلحق تنقذ نفسها .. خلال الفترة من 1 يناير لحد 24 مارس 2022 (ماسك) بدأ يتدحلب وواحدة واحدة يشتري اسهم في تويتر لحد ما وصلت قيمة الاسهم اللي هو بيملكها 7.5% من اجمالي اسهم الشركة .. يوم 25 مارس اشتري 3.5 مليون سهم كمان عشان فجأة كده يتحول (ماسك) من واحد كل ما يبقي زهقان يبعت تويته لواحد معاه الحصة الأكبر من أسهم الشركة وهنا الفار بدأ يلعب في عب الناس اللي ماسكه الشركة أصل مفيش حد بيدفع المبالغ ده عشان يشتري أكبر حصة من أسهم الشركة عشان هو عايز يأمن مستقبله من عوايد السهم من ارباح الشركة لما يطلع معاش لإن الشركة أصلاً كانت بتخسر فلوس ودي نقطة حنتكلم فيها كمان شوية .. التفسير المنطقي للي بيحصل هو إن (ماسك) عايز يسيطر علي الشركة وأول خطوة كانت انه يحط رجله فيها.

يوم 4 ابريل 2022 طلع (ماسك) في تويته يقول فيها ان اجمالي اسهمه في تويتر بقت 9.2% يعني الرجل دلوقتي تحت ايده ثروة تعادل 3 مليار دولار علي شكل اسهم في تويتر .. كان المفروض إن ده يكون باين من أول ما العرض اتحط علي الطرابيزة بإن (ماسك) يبقي صاحب الحصة الأكبر من اسهم الشركة .. كان المفروض يبقي مفهوم إن (ماسك) عايز يعمل ايه بس مش منطقي إن حد يرفض عرض ب3 مليار دولار .. الفلوس جرت ريقهم .. هم تخيلوا لما يعرضوا علي (ماسك) كرسي في مجلس الإدارة في اليوم اللي ورا علي طول اعلان انه بقي صاحب الحصة الاكبر من اسهم الشركة اللي هو 5 ابريل 2022 فهو كده حيتبط ويهدي .. المهم الناس قدموله العرض عشان ينضم لمجلس الإدارة وفي اليوم اللي كان (ماسك) المفروض يحضر فيه أول اجتماع لمجلس الإدارة اللي هو 11 ابريل 2022 بعت Email قالهم انه بيرفض العرض وانه مش عايز يبقي عضو في مجلس الإدارة ومش بس كده ..  يوم 14 ابريل 2022 هو قدم عرض رسمي للاستحواذ علي تويتر علي اساس تسعير 54.2 دولار للسهم اللي هو تقريبا 44 مليار دولار وده كان رقم فوق القيمة السوقية للسهم بتاع تويتر اللي كان تقريبا 36 دولار للسهم ومش بس كده .. العرض إن الدفع كاش وعلي الطرابيزة.

اقف بقي هنا .. هو يبان إن اللي Offer بتاع (ماسك) يتقال عليه كلام جميل كلام معقول مقدرش اقول حاجة عنه .. الرجل مقدم عرض للشراء بمبلغ اكبر من سعر السوق بس ده كده اكنك تقول ربنا بيقول في سورة الجمعة ولا تقربوا الصلاة .. انت بس لازم تكمل الأية لإنه بيقول وانتم سكاري .. المشكلة مكنتش في Offer قد ما كانت في طريقة تقديم Offer .. هو مبعتش Offer في Email رسمي اوله Dear All وفي اخره Best Regards .. هو قالهم إن لو انتوا كمجلس ادارة لتويتر موافقتوش علي البيع فانا حبيع كل اسهمي اللي هي 9.7% من اجمالي الاسهم وحبيعها بالرخيص فده حيخلي سعر السهم بتاع الشركة يروح في ستين داهية .. ده في عرف السوق بيسموه Hostile Takeover او استحواذ بالعافية .. هو كده حط مجلس الادارة في خانة اليك .. لو باعوا فهم خسروا سيطرتهم علي الشركة .. ولو رفضوا هم خسروا سيطرتهم علي سعر السهم في البورصة.

السؤال بقي .. هو (ماسك) جاب 44 مليار دولار كاش وعلي الطرابيزة دول منين؟ .. الحقيقة ان الفلوس دي جت من مصدرين بس مصدر فيهم عليه علامات استفهام من هنا لحد السنة الجايه:

  • يوم 21 ابريل 2022 (ماسك) وصل لاتفاق مع بنك مورجان ستانلي انه حياخد منهم قرض بقيمة 13 مليار دولار بالاضافة ل12.5 مليار دولار حياخدهم كقرض برده بس بيسموه قرض هامشي Margin Loan اللي هو قرض حيسحبه وحيتكتب في الورق بتاع البنك ان الفلوس حتروح لزيادة اسهم (ماسك) في تويتر قصاد ان القرض الاساسي اللي 13 مليار دولار حيتكتب في الورق بتاعه ان السبب هو رغبة (ماسك) في شراء تويتر .. الضامن بتاع القرضين حيكون قيمة اسهم (ماسك) في شركاته سواء Tesla أو SpaceX أو حتي PayPal.
  • 21 مليار دولار حيسحبهم (ماسك) من ثروته الخاصة ودول حيبقوا كاش.

الناس كلها كانت عارفه إن مجلس الإدارة بتاع تويتر مكنش عايز يبيع بس (ماسك) لإنه أولاً وأخيراً رجل أعمال فهو كان عارف اللي فيها .. أي حد في الدنيا له ثمن حتي المليونيرات .. 44 مليار دولار كان رقم مينعش يتقاله لا .. يوم 25 ابريل 2025 تمت الموافقة من كل الأطراف علي الصفقة يعني بتتكلم ان خلال 11 يوم بس من اعلان (ماسك) نيته للشراء لحد ما كان مجلس الأدارة باعت جواب موافقته علي البيع .. بس هي المشكلة مش في كده .. لما حضرتك بتروح تشتري عربية مستعمله فعملية البيع والشراء بتتم علي مرحلتين .. أول مرحلة إن البايع يحط السعر اللي هو عايزه .. حضرتك كمشتري بتقول انا مبدأياً موافق علي السعر بس لازم افحص العربية الأول واتاكد انها سليمة ومع كل عيب بتلاقيه في الفحص جزء من السعر المبدئي اللي حطه البايع بيتشال لحد ما في الأخر بتتفقوا علي سعر بيع نهائي .. لما (ماسك) قدم علي شراء Twitter هو قالهم 44 مليار دولار ده سعري المبدائي بس انا محتاج افحص الشركة .. يعني ايه .. هو طلب تقارير مفصلة عن وضع الشركة ومن ضمن التقارير اللي هو طلبها نسبة ما يسمي Bots اللي هي اكونتات مزيفة بس مش كلها بيديرها بني أدمين انما بتبقي برامج كومبيوتر برده اللي انت يمكن عارفها باسم اللجان الأليكترونية لإنهم كانوا صداع في دماغ (ماسك) .. الكلام الرسمي اللي كان بيطلع من الشركة إن عدد الاكونتات المزيفة اللي متسجله علي Twitter متجيش 5% من اجمالي الاكونتات بس الكلام ده مكنش داخل دماغ (ماسك) .. موقف (ماسك) الرسمي يا الشركة تقدم تقريرها الحقيقي عن وضع اكونتات اللجان الاليكترونية أو إنه حيلغي عرضه بشراء الشركة.

عدي 3 شهور من يوم موافقة مجلس ادارة الشركة علي البيع و(ماسك) مش راضي يكمل الصفقة .. قدام الناس موقف الشركة كان زي الزفت .. اصل اكيد انتوا مش عايزين تنشروا التقارير الحقيقية عن وضع اللجان الأليكترونية علي تويتر عشان (ماسك) عنده حق وده معناه ان الشركة لسنين وسنين كانت بتكدب علي الناس .. مع كل يوم بيعدي والشركة مش راضية تنشر التقارير الحقيقية و(ماسك) مش راضي يشتري وسهم الشركة عمال يغطس لحد ما بقي سعر السهم اقل بكتير من 44 مليار دولار اللي (ماسك) كان مقدمها في الاول .. في أكتوبر 2022 الشركة رفعت قضية علي (ماسك) بحجة إنه قال كلمة ولازم ينفذها والا هو كده كان بيلعب بسعر السهم وكان عامل تمثيلية الشراء دي عشان يوقع الشركة وقبل اليوم الأول من جلسات المحاكمة الطرفين بيوصلوا لاتفاق و(ماسك) بيشتري الشركة بالمبلغ اللي كانوا متفقين عليه في الأول.

صورة اللوجو بتاع تويتر وهو علي شاشة بورصة نيويورك يوم 11 ابريل 2022 والناس كلها كانت مستنيه خبر الموافقة علي استحواذ (ماسك) علي الشركة.

ليه .. فرق كبير بين اللي بيتقال قدام الناس والحقيقة:

الحقيقة إن السؤال اللي فعلاً محتاج يتسأل ويتجاوب عنه بصدق هو ليه .. ليه (ماسك) بعزقله الفلوس دي كلها عشان يشتري Twitter .. المبلغ اللي هو رماه في بلاعة السوشيال ميديا ده كان ممكن يتصرف علي تسريع خطة SpaceX إنها تروح المريخ أو حتي القمر ودي كانت حلم من أحلام (ماسك) أول ما عمل الشركة في 2002 .. وهنا بيبان أوي إن فيه وجهتين نظر أو سببين .. واحد بيتقال قدام الناس والثاني محدش عايز يتكلم عنه عشان الكلام عنه بيخلي شكل (ماسك) وحش قدام الناس:

السبب اللي بيتقال قدام الناس .. حماية حرية إبداء الرأي: فيه حاجة كده كنا جبنا سيرتها لما اتكلمنا عن فيسبوك وهي ما يسمي Moderation Rules ودي بمنتهي البساطة الاجابة عن سؤال عن هو ايه اللي بيحصل لما انت كمواطن بتتزحلق علي الانترنت وعايش علي Home Page في فيسبوك وتشوف بوست مش عاجبك تقوم عامله Report .. اللي بيحصل إن فيسبوك معينة ناس دورها إنهم فاتحين البوستات اللي بيتعمل عليها Report في العالم كله وكل موظف من دول قدامه كام ثانية عشان يقرر هل البوست ده يستحق فعلاً يتشال أو إن اللي عمل Report ده بيستعبط .. اللوايح اللي علي أساسها الموظفين بياخدوا القرار ده هي اللي بتتسمي Moderation Rules أو قواعد فض الاشتباك .. الناس بتاعة Twitter ماشيين بنفس المبدأ بتاع اخواتهم في Facebook وعشان كل تقريباً Reports اللي بتتعمل بيتوافق عليها وفعلاً بيتم التعامل مع البوستات اللي هي متقدمة فيها علي إنها بتحرض علي العنف أو الكراهية أو معاداة السامية أو العنصرية أو سميها زي ما تسميها فالحاج (ماسك) قال إن الكلام ده مش نافع وTwitter لازم يمارس دوره إنه يبقي بكابورت الناس كلها ترمي رأيها فيه بمنتهي الأريحية وبغض النظر عن الريحة الوحشة اللي طالعه من البكابورت .. مهم برده إن (ماسك) كان بيتكلم قبل شراءه لTwitter علي إن مش عاجباه فكرة إن أي حد يقول حاجة مش عاجبه الناس فعشان الشركة ميبقاش شكلها وحش تقوم رازعاه واحد Ban ولا قرار الحرمان اللي كان بيطلع من بابا الفاتيكان ضد أي حد يعترض علي كلام الكنيسة الكاثوليكية .. في نفس الوقت هو حيخلي الشركة تعين فريق كبير من المهندسين عشان يخلصوا من Bots بشكل نهائي.

نقطة تانية برده (ماسك) كان بيتكلم عنها هو Recommendation Algorithms أو خوارزميات التوصيات .. يعني ايه البتاع ده .. دلوقتي حضرتك مثلاً فاتح الفيديوهات أو Reels علي Twitter واتفرجت علي فيديو معين وهو عجبك وعايز تشوف حاجة تانية زيه وليكن مثلاً فيديو لأهداف ماتش في دور ال16 من Champions League وانت عايز تشوف الاهداف اللي جات في باقي الماتشات .. المفروض إن فيه برنامج كومبيوتر بيسموه Algorithm أو خوارزمية وهو متسمي علي اسم العالم الجليل (محمد بن موسي الخوارزمي) الله يرحمه اللي اخترع علم الجبر والبرنامج ده بيشوف هل حضرتك كملت الفيديو لحد اخره او حضرتك عملت Like أو Share للفيديو وساعتها هو بيعرف إنك عجبك الفيديو فبيبدأ يوريك فيديوهات تانية شبهه أو قريبه منه .. شركات السوشيال ميديا بتتنافس مع بعضها علي تطوير Recommendation Algorithms وكل شركة بتعتبره سر حربي من أسرارها وعشان كده أغلب الشركات بتسميه Closed Source اللي هو حاجة شبه iOS كده اللي هو البرنامج التشغيلي لموبايلات iPhone .. اللي (ماسك) كان عايز يعمله إنه يخلي Recommendation Algorithms يبقي Open Source اللي هو حاجة شبه Android OS بحيث أي حد يقدر يعمله Download ويعدل فيه ويعمله Customize علي مزاجه.

السبب اللي محدش بيجيب سيرته .. فين وفين بعد ما (ماسك) اشتري Twitter خلاص اكتشفنا إن الرجل اللي أسس Twitter واسمه (جاك دورسي) كان بيزن فوق دماغ (ماسك) إنه يمسك الشركة بقاله سنين لإن (دورسي) كانت له وجهة نظر غريبة حبتين تلاتة إن Twitter مينفعش تبقي شركة .. الرجل ده وجهة نظره إن Twitter عاملة زي ميدان التحرير وقت ثورة يناير كده الله يرحمها اللي هو ساحة إن الناس تقول رأيها وتلاقي وجهات النظر ده هو اللي يحرك المجتمع لقدام .. مكان زي ده مينفعش تقول أنا ححكمه وحديره كأنه شركة .. ليه؟ .. الشركات هدفها أولاً وأخيراً الربح وانها تجيب فلوس .. بس ده قصاد نقطة تانية وهي إن (ماسك) مهووس بفكرة إن محدش يحاسبه .. سنة 2018 قامت خناقة لرب السما بينه وبين حاجة اسمها SEC ودي اختصار Securities and Exchange Commission اللي هي هيئة الأوراق المالية والبورصة الأميريكية لما الهيئة رفعت ضده 4 قضايا بسبب تويته هو كتبها علي اكونته علي تويتر قال فيها إنه بكره الصبح لو حابب يقدر يبيع سعر السهم في شركته Tesla ب420 دولار للسهم والهيئة فرضت علي (ماسك) غرامة ب20 مليون دولار عشان ميعملش كده تاني لإن بتويته واحدة وعشان هو له ملايين المتابعين علي تويتر يقدر يلعب في سعر السهم بتاع شركاته.

اللي انت محتاج تفهمه إن شراء (ماسك) لتويتر هو مشروع شخصي لبني ادم ربنا كرمه بفلوس مبقاش عارف يوديها فين فقرر يصرف شوية حلوين منها علي تجربة مجتمعية لاثبات وجهة نظره .. فيه مثل شعبي في مصر بيقول اللي معاه قرش ومحيره يجيب حمام ويطيره وده فعلاً اللي (ماسك) عمله .. هو جاب تويتات وطيرها .. مش لسبب غير انه مش لاقي حاجة يصرف فيها فلوسه فقرر أنه يشتري الحاجة اللي كانت مضايقاه وهي تويتر .. الموضوع يبان تافه وهو حقيقي تافه إن ملياردير يكون متضايق من اللجان الاليكترونية اللي بتشتم فيه وفي شركاته وفي انجازاته .. عايز اقولك مثلا ان فيه اكونت علي تويتر عامله حد محدش عارف هو مين اسمه ElonJet وده اكونت عمله واحد ملوش لا شغله ولا مشغلة غير انه يتابع هي الطيارة الشخصية بتاعة (ماسك) سافرت فين النهاردة وكل يوم يحط تويته علي الطيارة مكانها فين في العالم .. الموضوع ده كان مضايق (ماسك) جدا لدرجه انه رفع سماعة التليفون كلم المدير التنفيذي CEO للشركة (باراج أجروال) والسبب ان اسمه صعب انه من اصول هندية وطلب منه انه يلغي الاكونت بس (باراج) طنشه .. الغريبة ان الكلام ده تم في اول يناير 2022 وده الشهر اللي بدأ (ماسك) يشتري في اسهم تويتر .. انت متخيل يا مان .. متخيل ان (ماسك) علي رأي الفنان (عادل امام) في مسرحية الواد سيد الشغال لما قالك يعني (نابليون) ساب المماليك والانجليز قعد يمضي علي اطباق .. اهو (ماسك) ساب صواريخه وعربياته اللي بالكهرباء وقعد يشتري في اسهم في تويتر عشان مكنش عاجبه الناس اللي بتشتمه واللي بتراقب تحركات طيارته الخاصة .. وعلي فكرة لما (ماسك) اشتري تويتر هو فعلا عمل Ban لكل الاكونتات اللي بتتكلم عن طيارته الخاصة .. يعني حرية ابداء الرأي مش مكفولة للجميع زي ما انت كنت بتقول.

المستقبل .. هل تويتر راح في سكة اللي يروح ميرجعش:

الحقيقة إن (ماسك) مستناش ان الناس تلحق تاخد نفسها من خبر استحواذه علي تويتر لإن في أول اسبوع ليه مشي المدير التنفيذي CEO للشركة (باراج أجروال) .. عدد موظفين تويتر اتخسف بيهم الارض من 7,500 بقوا 2,000 .. مش بس كده .. فاكر في الاول لما كلمتك عن طريقة إدارة (ماسك) لشركاته .. هو بدأ يطبق ده في تويتر .. فجأة الالفين موظف اللي كانوا لسه شغالين في تويتر اتقالهم ان خلاص وجبة الغداء المجانية اللي كانت بتتصرفلهم اتلغت .. مبقاش فيه حاجة اسمها شغل من البيت أو Remote Work .. كتير من غرف الاجتماعات اتحولت لغرف نوم عشان بقي يتقالهم انتوا حتشتغلوا أوفرتايم وحتباتوا في الشغل كمان .. ده بالنسبة للي الناس اللي شغاله في تويتر .. بالنسبة ليك كمستخدم فمصاريف استخدامك الاكونت الموثق زادت .. بقي فيه اعلانات جوه الفيديوهات اللي انت بتتفرج عليها زي ما بيحصل في Facebook و YouTube .. بس يمكن الخطوة اللي خلت الناس كلها تتكلم عن ادارته لتويتر هي قراره بالغاء كل قرارات Ban اللي كانت طلعت قد شخصيات عامة ويمكن اشهرهم علي الاطلاق كان كيس الشيتوس الحجم العائلي (دونالد ترامب).

المعلومة اللي ناس كتير مكنتش تعرفها يمكن قبل ما (ماسك) يستحوذ علي تويتر هو إن الوضع المالي للشركة كان زي القطران .. في اخر 8 سنين قبل الاستحواذ ما يتم الشركة كانت بتحقق خساير مالية في 6 سنين من الثمانية .. السبب ورا هذا الفشل المالي كان تقريباً واضح للكل بس محدش كان بيتكلم عنه وهو إن ببساطة من وجهة نظر تسويقية بحتة فالناس بتاعة Marketing كانت بتشوف انها افضل ليها تدفع فلوس في اعلانات علي Facebook أو TikTok احسن بكتير من تويتر .. الفكرة دي جت يمكن بسبب طبيعة التويتات اللي كانت بتطلع علي تويتر من أول ما ظهر للناس في 2006 وهو المكان اللي بيتقال عليه كل الأخبار المهمة اللي بتحصل في الدنيا .. يمكن الجيل الجديد بتاع اليومين دول ميحسش بده بس انتوا مش متخيلين اهمية تويتر ايام ثورة يناير مثلاً .. تويتر كان بيتم التعامل معاه كانه قناة الجزيرة مباشر .. الناس اللي كانت علي تويتر من بدايته خالص كانوا المشاهير والسياسيين ولاعيبه الكورة .. (جاك دورسي) اللي اسس تويتر كان شايف العيب ده وحتي (ماسك) هو كمان حاطط ايده علي ده .. في سوق السوشيال ميديا فتويتر بعيد أوي عن نفوذ فيسبوك او تيك توك.

نقطة المشاكل المالية دي اللي كانت بتعيشها تويتر يمكن كانت هي السبب الحقيقي ورا ان (ماسك) فجأة رجع في كلامه لو تفتكر وكانت ذريعته اللي قالها للناس انه عايز التقارير الحقيقية لعدد اكونتات اللجان الاليكترونية وفعلا ممشاش في اجراءات الشراء الا لما مجلس ادارة الشركة رفع عليه قضية .. اللي (ماسك) يمكن اكتشفه متأخر لما المحاميين بتوعه كانوا بيخلصوا ورق الاستحواذ وبعد ما بصوا علي ورق الحسابات بتاع الشركة إن تويتر كانت رايحه في سكة اللي يروح ميرجعش .. مجلس الادارة أملاً في إنه يحل مشكلة عدد المستخدمين القليل مقارنة بفيسبوك أو تيك توك كانوا ناويين ياخدوا شوية خطوات ولا واحدة فيهم جابت نتيجة .. كانوا ناويين يمشوا تقريبا نص الموظفين عشان يوفروا مرتباتهم اللي هي الخطوة اللي (ماسك) لقي نفسه مضطر يعملها والناس كلها سبتله ميه ملة بسببها .. ده السبب ورا قرار مجلس الادارة الموافقة علي البيع .. بالنسبة ليهم (ماسك) كان هو اللي حيلبس وحيحاسب علي المشاريب .. وزي ما انت عارف المصايب مش بتيجي لوحدها لإنهم بيكونوا عاملين جروب واتس اب عشان يتجمعوا فيه .. زود علي كده الغزو الروسي لأوكرانيا اللي يمكن انت دلوقتي مش بتفكر فيه كتير بس احب اقولك ان في ابريل 2022 كان يدوبك بقاله شهرين فالناس كلها جالها حالة فزع ويمكن حالة الفزع دي كانت السبب ورا أزمة خطوط الشحن اللي اترجمت في اعلي معدل تضخم يحصل من بعد الأزمة المالية العالمية في 2008.

يمكن اللي انا عايز اختم بيه ان قصة شراء او استحواذ (ماسك) علي تويتر هي تعتبر تجسيد مصغر لكل المشاكل اللي احنا بنعيشها تحت مظلة النظام الرأسمالي المتحكم فينا كلنا .. هو يبان كلام انشاء ينفع لموضوع تعبير بس فكر فيها من وجهة نظرك انت كمواطن بسيط .. دلوقتي انت بيتقالك ان الحكومة حتاخد حتة من مرتبك كضرائب علي أساس ان مرتبك ده فلوس انت بتاخدها في ايدك .. حلو .. وبيتقالك برده ان الحكومة مش حينفع تاخد ضريبة من رجل اعمال مثلا شاري اسهم بالملايين في شركة وعايش علي قفا الربح اللي بيجيله من الاسهم دي .. تيجي تسال الحكومة طب ليه؟ .. هي جت علي الغلبان يعني .. يقولولك اصل الاسهم دي مش فلوس ملموسه فمينفعش ناخد عليها ضرايب .. هو اه ممكن ثروة الرجل تتقدر بالملايين بس احنا مينفعش ناخد ضرايب منه الا لما يبيع اسهمه .. المبدأ الي حد ما مفهوم .. انت متقدرش تاخد ضرايب علي الاسهم علي اساس ان قيمة السهم طالعه نازلة يعني ممكن بكره الصبح السهم يروح في ستين داهية والرجل ثروته تروح في غمضة عين .. علي عيني وعلي راسي .. يقوم (ماسك) لما يقدم العرض بتاع شراه لتويتر يقولهم في نص Offer انه حيدفع 44 مليار دولار وانه حيحط اسهمه في شركة Tesla اللي هو بيملكها كضمان للسداد .. بااااس .. يعني انت بتقولي ان مينفعش افرض عليك ضرايب علي اسهمك بس سبحان الله تيجي تشتري انت حاجة بمليارات فتقدر تستخدم الاسهم دي كضمان عادي جدا .. ولما مجلس ادارة تويتر يوافق علي عرض الشراء يروح (ماسك) سالف 44 مليار دولار من بنوك وبرده ححطلكوا الاسهم بتاعتي في Tesla كضمان للسداد عشان انا مش عايز ابيع اسهمي في Tesla عشان امول صفقة شراء تويتر .. انت فاهم المشكلة فين .. النسخة المنيلة بستين نيلة للراسمالية اللي احنا عايشين فيها بتدي الفرصة لحد زي (ماسك) انه يشتري حاجة بضمان اسهمه في شركة هو اللي اسسها بس لما نيجي نقوله عايزين ضرائب علي الاسهم دي يقولك علي عيني ده الاسهم دي اصول مجمدة مينفعش اصرفلك منها ضرائب.

المصادر:

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!