فيه مبدأ في العلوم العسكرية اسمه Force Multiplier وهو ملوش ترجمة حرفية أوي بس لو حاولت تترجمه فهو حاجة شبه كلمة مضاعف القوة .. يطلع ايه البتاع ده .. تعالي اديلك مثال .. تعالي نفترض إن أنا معايا فريق من أربعة وأنا الخامس بتاعهم بنلعب Call of Duty بس بحق وحقيقي ومطلوب مننا إننا نقتحم شقة في عمارة قاعد فيها مثلا 10 إرهابيين .. لنفترض إن الفريق بتاعي معاها تكنولوجيا بتخلينا مثلاً يعني نشوف اللي مستخبي ورا الحيطة اللي هو حاجة شبه X-ray vision اللي لو انت بتتفرج علي مسلسل The Boys شفتها مع شخصية Homelander ولو معانا التكنولوجيا دي فاحنا نقدر ننفذ المهمة بتاعتنا بسهولة إلي حد ما لإننا حنبقي شايفين الإرهابي اللي مستخبي ورا الحيطة بس هو مش شايفنا .. نفس المهمة هي هي بس مش معانا التكنولوجيا دي تفتكر حتحتاج كام شخص يقوم بيها عشان تنجح؟ .. برده 5 أفراد؟ .. أظن صعب .. نقول 10 .. يمكن 20 .. ده اسمه Force Multiplier .. إن تكنولوجيا معينة تحت ايدي خلتني أقوم بمهمة صعبة جداً في تنفيذها بعدد قليل من الأفراد قصاد لو مش معايا التكنولوجيا دي فانا ححتاج أضحي بعدد كبير من عساكري عشان احقق نفس التارجيت .. في الحروب الحديثة اللي بتحصل دلوقتي وحتحصل في المستقبل مفيش Force Multiplier تقدر قوات مسلحة في أي بلد تعتمد عليه زي الطيارات بدون طيار Drones اللي انت يمكن تعرفها باسم المسيرات.
مخبيش عليك إن الأمريكان هم أول ناس داسوا جامد في حوار الطيارات بدون طيار ده .. يمكن معداش عليك قبل كده اسم برنامج الطيارات بدون طيار أو Drone Program ويمكن ده موضوع محتاجين نتكلم عنه بشيء من التفصيل في وقت تاني بس خلال الفترة من 2008 لحد 2012 اللي هي فترة الحرب علي الإرهاب وقت ما كان بيحكم أمريكا (باراك أوباما) كانت وكالة المخابرات المركزية الأمريكية CIA عايشة دور ديسكتر مورجان أو هانيبال ليكتر بس سلاح القتل مكنش سكينة انما كان سرب طيارات بدون طيار طراز MQ-1 Predator و MQ-9 Reaper بتقتل كل يوم عشرات المشتبه بيهم في الانضمام لتنظيمات إرهابية سواء القاعدة أو داعش .. برنامج اغتيالات مات فيه الالاف فيه منهم اللي فعلاً متهمين بارتكاب جرايم وفيه كتير منهم أبرياء ملهمش ذنب .. شوية ودول تانية بدأت تفهم إن المستقبل مش إنك تصرف دم قلبك علي مشروع مقاتلات حديثة .. الحل مش إنك تشتريلك كام طيارة يفضولك الميزانية بتاعة بلدك .. ليه لأ منقلدش الأمريكان في لعبتهم ونعتمد علي الطيارات بدون طيار؟
الغزو الروسي لأوكرانيا فعلاً اللي أثبت صحة الفكر ده وأديك بتشوف بنفسك في الاخبار اللي بتطلع علي السوشيال ميديا إزاي الأوكرانيين والروس مطلعين عين بعض بالطيارت بدون طيار .. إيران بهدلت تل أبيب بيها .. ودلوقتي موضوعنا النهاردة هو عن العروسة اللي قدامك دي .. اسمها MQ-28 Ghost Bat ومن اسمها باين انها امتداد لاخواتها الكبار Predator و Reaper .. زيهم هي من تصنيع شركة بوينج Boeing الأمريكية بس المرة دي المشروع ده هي عملته بالتعاون مع القوات الجوية الأسترالية عشان تبقي هي Force Multiplier للقوات الجوية الأسترالية اللي تقدر تديها أفضلية ضد الكيان اللي أستراليا بتعتبره تهديد واضح وصريح لأمنها القومي .. الصين.
الفكرة بمنتهي البساطة هو الأتي .. حلم أي قوات جوية في الدنيا إن يبقي عندها عدد مش بيخلص من الطيارات اللي بتطير لوحدها من غير طيارين .. تخيل كده ربنا يكرمك ويبقي عندك بيزنس مثلاً مركز تأجير عربيات بحيث يبقي عندك أسطول عربيات بتأجرها يا لوحدها يا بالسواق بتاعها .. تخيل اليوم اللي اجي أقولك فيه أنا حديك 20 عربية بتسوق نفسها ومش محتاجه سواق .. انت مستوعب انا بقولك ايه .. 20 عربية من غير سواق يعني حتوفر مرتب 20 سواق بالحوافز بالأجازات بتاعتهم .. طول ما العربيات فيها بنزين حتمشي ومش حتقولك عايز اروح انام أو عايز اشوف عيالي .. الأهم انك بتتكلم عن 20 عربية تقدر تتحكم فيهم من مكتبك .. تقدر توديهم وتجيبهم وتمشيهم بتكة زرار .. زي ما بيقولوا إن العربية دي بيت مفتوح عشان المصاريف اللي بتتصرف عليها لو حنقول إن 20 عربية دول بعشرين موظف محتاجين 20 سواق عليهم فصاحب بيزنس تاني عشان يقدر ينافسك محتاج 20 ضعف عدد ساعات الشغل عشان يحقق الفلوس اللي انت حتجيبها لمجرد ان بقي عندك 20 عربية بتسوق نفسها .. ده باختصار اللي اسمه Force Multiplier .. إن يبقي تحت ايدك تكنولوجيا بتخلي ليك أفضلية علي غيرك اللي عشان يعوضوها محتاجين يصرفوا كتير فشخ.
الطيارة MQ-28 Ghost Bat الواحدة غير انها مش محتاجة طيار يطير بيها فهي عشان فيها موتور نفاث تقدر تنفذ نفس المناورات الجوية اللي بتعملها أجدعها طيارة مقاتلة نفاثة .. شكلها بيديها قدرة علي التخفي من الرادار فبقي عندك طيارة جيل خامس زيها زي F-22 Raptor أو F-35 Lightening II .. طيارة بيتركب عليها صواريخ فبتبقي طيارة هجومية .. بيتركب عليها أنظمة مراقبة فبقت طيارة استطلاع .. بيتركب عليها اجهزة تشويش فبتبقي طيارة حرب أليكترونية .. طيارة بتقدر تطير 3,700 كيلومتر متواصل اللي هي أرقام مش حتلاقيها في أي طيارة مقاتلة .. الأهم إن بيتركب عليها اجهزة اتصالات بتخليها تقدر تتواصل بشكل سهل جداً مع أهم 3 طيارات في سلاح الجو الأسترالي اللي هم F-35A و F/A-18 Super Hornet والاتنين طيارات مقاتلة ومعاهم E/A-18 Growler ودي طيارة حرب أليكترونية وكمان تقدر تتواصل مع الأقمار الصناعية العسكرية الاسترالية .. يا بلاش .. لحد أكتوبر 2024 اتعمل منها 8 نسخ أولية Prototypes طاروا أكتر من 100 ساعة.
اللي بيخلي الطيارة MQ-28 Ghost Bat في حتة تانية هي إن من ضمن الافكار اللي هي جايه تحققها إنها تبقي حاجة بيسموها Wingman ودي بمنتهي البساطة إن لو أنا طيار مقاتل في سلاح الجو الأسترالي وطاير بطيارة مثلاً ولتكن F/A-18 Super Hornet فانا حيبقي معايا طاير جنبي يا طيارتين يا ثلاثة MQ-28 Ghost Bat .. الثلاث طيارات دول حيبقوا كلب الحراسة بتاعي وانا في الجو .. لو فيه منصة دفاع جوي ضربت عليا صاروخ أرض- جو فواحدة فيهم تقدر تاخد هي الصاروخ بدالي .. لو صواريخي خلصت فهم يقدروا يضربوا صواريخهم علي الهدف اللي انا عايز ادمره .. فكرة إن الطيارات دي ليها القدرة علي التخفي من الرادار بتخليني اقدر ابعتها لمهام استطلاع انا يمكن اخاف اعملها بطيارتي عشان ممكن الرادارات المعادية تلقطني .. في ديسمبر 2025 طلع بيان من بوينج إنها نجحت في تجربة اطلاق صاروخ جو-جو طراز AIM-120 AMRAAM من تصنيع شركة رايثون Raytheon .. كلمة AMRAAM دي اختصار Advanced Medium Range Air to Air Missile يعني صاروخ جو-جو متوسط المدي متقدم وعلي فكرة دي أول مرة علي الإطلاق في تاريخ الطيران إن طيارة بدون طيار تقدر تطلق صاروخ زي ده وتوجهه وتدمر الهدف بنجاح.
اللي حصل في التجربة إن الطيارة MQ-28 Ghost Bat كان طاير جنبها طيارة استطلاع طراز E-7A Wedgetail وطيارة مقاتلة F/A-18 Super Hornet بحيث الطيار المقاتل يبعت اشارة لطيارة الاستطلاع انه عايز يخلي الطيارة MQ-28 Ghost Bat تضرب الهدف ده وفي لحظات كان الصاروخ طلع علي الهدف اللي مطلوب تدميره .. مع كل يوم بيعدي قدرات الطيارة MQ-28 Ghost Bat بتزيد .. بوينج وقيادة القوات الجوية الأسترالية اعلنوا اصلا عن إنهم شغالين علي الجيل الثاني من الطيارة اللي في عرف الطيران بيسموها Block 2 وهي بتتصنع بناء علي الدروس المستفادة من التجارب اللي اتعملت علي Block 1 بميزانية 400 مليون دولار عشان تتعمل 3 طيارات Prototype من Block 2.
خليني اختم معاك بإن اللي أنا واقف قدامه الحقيقة في قصة الطيارة MQ-28 Ghost Bat هي إن دي أول طيارة تصنيع محلي أسترالي تتعمل من أكتر من 50 سنة ولما الأستراليين حبوا يعملوا طيارتهم بأيديهم هم راحوا لشركة قديمة في السوق زي بوينج وقالولها ساعدينا نعمل حاجة بايدينا .. دي نفس الفكرة بتاعة الخبر اللي اتمني انه يكون صح إن مصر وتركيا قرروا يتعاونوا سوا في مشروع طيارة مقاتلة جيل خامس ليها القدرة علي التخفي من الرادار .. اتمني يكون الخبر صحيح.
المصادر:
- فيديو بعنوان Boeing MQ-28 Ghost Bat: Australia’s New Loyal Wingman UAV عملته قناة اسمها Defense Central تقدر تتفرج عليه علي YouTube من لينك ده:
https://www.youtube.com/watch?v=UhYwK_YZKvg&pp=ygU7Qm9laW5nIE1RLTI4IEdob3N0IEJhdDogQXVzdHJhbGlh4oCZcyBOZXcgTG95YWwgV2luZ21hbiBVQVY%3D - مقالة بعنوان Boeing MQ-28 Ghost Bat fires AMRAAM in first RAAF missile test نشرت علي موقع AeroTime وده لينك المقالة الأصلية:
Boeing, RAAF complete first MQ-28 Ghost Bat missile test - مقالة بعنوان Boeing’s MQ-28A Ghost Bat Fires AIM-120 AMRAAM at Target Drone نشرت علي موقع The Variationist وده لينك المقالة الأصلية:
Boeing’s MQ-28A Ghost Bat Fires AIM-120 AMRAAM at Target Drone – The Aviationist
