إن رئيس أمريكا يقعد في جلسة مباحثات مع رئيس كوريا الجنوبية عشان يدردشوا شوية وبعد كده يقفوا ياخدوا فوتوسيشن سوا مش الحدث اللي الناس بتستناه أو المفروض إنه يطلع بخبر يقلب الدنيا .. بس يمكن عشان كيس الشيتوس الحجم العائلي اللي بيحكم أمريكا (دونالد ترامب) مش شخص طبيعي زي باقي خلق ربنا فهو قرر إن ايه الملل ده ما اطلع قرار يصدم الناس والقرار اللي هو طلعه إن حكومة الولايات المتحدة فجأة ومن غير لا احم ولا دستور مبقاش عندها مشكلة إن كوريا الجنوبية يبقي عندها غواصة نووية عشان تبقي سابع دولة علي مستوي العالم اللي يبقي عندها التكنولوجيا دي بعد أمريكا و روسيا و الصين و فرنسا و أنجلترا و الهند .. الحقيقة هو إنت غالباً حتلاقي الخبر وقف لحد هنا لو كنت قريته علي السوشيال ميديا بس انت محتاج يبقي عندك خلفية عن تداعيات الأمور .. النهاردة احنا محتاجين سوا نجاوب علي كذا سؤال عشان تبقي قادر تفهم هو القرار ده معناه إيه؟
- هو بالصلاة علي النبي يعني ايه غواصة نووية؟
- ليه الأمريكان أصلاً وافقوا علي حاجة زي دي وليه كانوا معارضين؟
الغواصات النووية .. السلاح الفشيخ اللي بتحلم بيه أي بلد:
كلمة غواصة نووية Nuclear Powered Submarine هي غواصة شغالة بموتور عبارة عن مفاعل نووي .. في الكتب بتاعة البحرية الأمريكية هم بيدوها اختصار SSN ودي اختصار Submersible Ship Nuclear وعشان هي شغاله بمفاعل نووي فهي نظرياً تقدر تفضل غطسانة تحت المياه لسنين وسنين والسبب الوحيد اللي بيخليها تطلع من تحت المياه هو إن أكل البحارة اللي فيها خلص .. علي الناحية الثانية النوع الثاني من الغواصات بيكون غواصات بتشتغل بمواتير ديزل بس عشان الغواصة متشيلش بنزينة سولار وهي غطسانة تحت المياه فالمواتير الديزل دي بتشتغل ببطاريات فكل ما البطاريات تفضي ومحتاجة تتشحن فالغواصة لازم تطلع لوش المياه عشان تسحب هواء يخليها تشغل مواتير الديزل عشان تشحن البطاريات دي .. ده معناه إن لمجرد إن الغواصة بيحركها مفاعل نووي فهي تقدر أولاً تفضل غطسانة لسنين لو حبت .. سرعتها أعلي بكتير من الغواصات التقليدية اللي شغالة بمحركات ديزل .. وعشان المفاعل النووي مفيهوش عملية احتراق داخلي وبساتم طالعه نازلة زي موتور عربيتك فالغواصات النووية مبيطلعش منها أي صوت يخليها تتلقط .. من كل اللي انا قلته ده واضح إن الغواصات النووية دي سلاح سيكسي بيجري ريق أي بلد عندها تكنولوجيا نووية.
الموقف الأمريكاني .. طب ما نجرب يمكن يكونوا بيعرفوا:
عشان تفهم الموقف الأمريكاني من اللي حصل حط في اعتبارك 3 حاجات وال3 حاجات دول ملهمش علاقة ببعض بس لما اتحطوا مع بعض في الخلاط بقي عندك خلطة توابل ملهاش أي منطق بس في الاخر ادتك الأكلة اللي انت شايفها قدامك:
رئيس فاكر نفسه طبيب الفلاسسفة .. أنا بقيت شبه مقتنع إن مدرسة (ترامب) في الحكم هي هي نفسها مدرسة (حزلقوم) في الحياة .. طب ما اجرب يمكن الاقي نفسي بعرف .. لمن لا يعلم يعني أو اللي ملوش في افيهات الأفلام فكان فيه فيلم اسمه لا تراجع ولا استسلام القيضة الدامية وهو فيلم كوميدي .. في الفيلم ده كان فيه مشهد لضابط مخابرات بيقوم بدوره الممثل (ماجد الكدواني) بيسأل شخصية (حزلقوم) اللي أكيد انت عارفها وجسدها الممثل (أحمد مكي) انت بتعرف تسوق .. فرد (حزلقوم) الصادم كان لا بس لما اجرب يمكن الاقي نفسي بعرف .. (ترامب) قبل ما يبقي رئيس في فترة رئاسته الأولانية في 2016 مكنش عنده أي خبرة في حتة الحكم .. لا هو اشتغل محافظ ولا حتي رئيس حي .. لا عمره دخل البرلمان ولا عمره كان مستشار لأي رئيس قبل كده .. ورغم كل ده كسب الانتخابات وبقي رئيس وهي فكرته كلها في الحكم إن معلش يعني ما كان بيحكم أمريكا قبلي ناس كنتوا بتقولوا عليهم جهابزة وفي الاخر لفيتوا لفيتوا وجيتوا لواحد حلانجي بيلعب بالتلت ورقات زي حالاتي.
بص للدنيا من شباك بلكونة (ترامب) .. دلوقتي انا استلمت الحكم للمرة الثانية في 2024 .. حلو .. أول ما جيت قمت رازع العالم كله تعريفة جمركية قال يعني عشان احمي الصناعة المحلية بس الناس كلها عارفه إن الكلام ده فشنك وإن اللي حيدفع ثمن التعريفات الجمركية دي هم المستهلكين اللي هم الناس البسيطة اللي عايزه تاكل عيش سواء جوه أمريكا أو في العالم .. عشان الحكومات بتاعة الدول الثانية ميبقاش شكلها وحش قدام شعوبها فكل حكومة حتيجي تتفاوض معايا عشان نتكلم في تخفيف التعريفات الجمركية .. جميل .. جت حكومة كوريا الجنوبية اتكلمت معايا إن ليه لا نقلل التعريفات الجمركية من 25% نخليها 15% بس وقصاد ده كوريا الجنوبية حتستثمر 350 مليار دولار من ضمنهم 150 مليار دولار حيروحوا في استثمارات مباشرة في قطاع الترسانات البحرية وبناء السفن .. خلي بالك من حتة الترسانات البحرية دي عشان حنجيلها بعدين .. فايه المشكلة يعني لما في مقابل ده اسمح للكوريين الجنوبيين إنهم يبقي عندهم غواصات نووية .. هو حد يقول للرزق لا.
وزارة دفاع محتاسة حوسة البلجيك .. نظرياً من وجهة نظر عسكرية بحتة ودون الدخول في تفاصيل سياسية واقتصادية فكون إن كوريا الجنوبية بقي عندها اسطول غواصات نووية فده خبر حلو جداً للمؤسسة العسكرية الأمريكية .. ليه؟ .. دلوقتي أمريكا مبقتش هي اللي حتبقي مسئولة عن حماية سواحل شبه الجزيرة الكورية لإن اسطول الغواصات النووية الكوري الجنوبي المنتظر حيبقي دوره إنه هو اللي يصد قلة الأدب اللي بتعملها الصين وكوريا الشمالية .. ده حيدي فرصة للأسطول الأمريكاني إنه يركز شوية علي حماية تايوان .. انا يمكن عايز أرجعك لسنة 2019 لإن في السنة دي قائد القوات الأمريكية في المحيط الهاديء الأدميرال (فيليب ديفيدسون Philip Davidson) شهد في جلسة استماع للجنة الدفاع والأمن القومي في البرلمان الأمريكاني اللي انت عارفه باسم الكونجرس وفي شهادته دي قال كلام مهم إنك تسمعه وتفهمه.
دلوقتي لحد سنة 2019 كان فيه 400 غواصة هجومية في العالم .. جميل .. فيه منهم 75% متكربسين بس في المحيط الهاديء وخصوصاً في الحتة اللي انت عارفها باسم جنوب شرق أسيا .. حلو .. فيه 160 غواصة من أصل 400 تحت سيطرة الصين و روسيا و كوريا الشمالية .. في الوقت اللي كل سنة الدول الثلاثة بتزود من عدد الغواصات اللي تحت ايدها خصوصاً الصين فالترسانة العسكرية الأمريكية مبتعملش حاجة غير إنها تطلع غواصاتها النووية بره الخدمة عشان قدمت .. الكلام ده في 2019 .. جري الشريط ليوم 1 يوليو 2025 حتلاقي إن البحرية الأمريكية مبقاش حيلتها غير 49 غواصة نووية والمفروض إن بقدرة قادر ال49 غواصة دول يغطوا العالم كله بس خلي بالك .. الفلسفة العسكرية الأمريكية بتقول إن العدد ده اللي هو 49 غواصة بيتقسم ل3 حتت .. تلت العدد ده بيكون في الخدمة في المحيطات المختلفة من الكرة الأرضية .. التلت التاني قاعد في القواعد العسكرية البحرية الأمريكية مستني أي حالة طواريء .. التلت الثالث في عنابر الصيانة يا بيتصلح يا بيتصين .. ده معناه إن علي الورق اه أمريكا عندها 49 غواصة نووية بس لو الفاس وقعت في الراس في اي لحظة انت فعلياً معندكش غير تلتين العدد ده بس تقدر تستفيد بيه.
حكومة كوريا جنوبية زهقت من إنها تبقي قطة شيرازي .. كانت المشكلة الوحيدة اللي لسنين فضلت واقفة في زور كوريا الجنوبية هو إن كان فيه اتفاق اتمضي بينها وبين أمريكا بيقول إن صحيح كوريا الجنوبية بلد عندها تكنولوجيا نووية وصحيح لو بكره الصبح كوريا الجنوبية حبت تعمل غواصة نووية فهي تقدر بس كوريا الجنوبية مش مسموح ليها إنها تعيد تصنيع الوقود النووي المستنفز مع إن كوريا الجنوبية عندها التكنولوجيا دي ومش محتاجة مساعدة حد .. اللي حصل إن خلال جلسة مباحثات عادية جداً بين الرئيس الكوري (لي جاي ميونج Lee Jae Myung) وبين (ترامب) كانت يوم 29 أكتوبر 2025 زي ما تقول كده الرجل فضفض لكيس الشيتوس عن قد ايه هو حاسس بالاحباط من موقف الحكومات الأمريكية اللي قبل كده من رفضها إن كوريا الجنوبية يبقي عندها غواصات نووية .. تاني يوم علي طول الناس اتصدمت لما (ترامب) طلع قرار بموافقة أمريكا علي إن كوريا الجنوبية يبقي عندها السلاح اللي بقالها سنين بتتمناه .. كوريا الجنوبية حالياً تحت ايدها 20 غواصة وده رقم كبير مش صغير لإن مصر مثلاً عندها 10 غواصات بس بس ال20 غواصة كلهم غواصات تقليدية شغالة بالديزل.
اللي عاجبني الحقيقة هو الطريقة اللي رئيس كوريا زغلل عين (ترامب) بيها .. هو باعله الفكرة علي إن أولاً كوريا الجنوبية مش عايز تفضل معتمدة علي أمريكا عشان تحميها زي القطة الشيرازي اللي مبتعملش حاجة غير انها تاكل وتنام .. بلده عندها طموح تلعب دور أكبر ودي حاجة بتبسط (ترامب) جدأً لإنه من فترة رئاسته الأولانية وهو بيشتكي إن دول أوروبا مفخدة ومعتمدة علي الوجود العسكري الأمريكاني عشان يحميها من روسيا .. تاني حاجة إنه باعله فكرة إن لما أمريكا تعتمد علي كوريا الجنوبية إنها تحمي نفسها فكده الضغط المحطوط علي القوات المسلحة الأمريكية حيخف وبناء عليه الموارد والفلوس اللي بتتصرف علي حماية كوريا الجنوبية ممكن تروح تتصرف في أي حتة تانية.
الميزة اللي يمكن عند كوريا الجنوبية ومش عند حد تاني هي إنهم مش محتاجين يتعلموا تصنيع الغواصات النووية من الأول خالص .. كوريا الجنوبية فعلياً بتصنع غواصات محلية واحدة اسمها جانجبوجو Jangbogo-III والثانية اسمها يانج يونجسيل Jang Yeongsil وهم صحيح غواصات شغالة بمواتير ديزل بس الكوريين وهم بيصنعوها عملوها جسمها أكبر سيكا بحيث يستحمل إن مواتير الديزل دي تتشال ويتركب مكانها مفاعل نووي .. ده معناه إن في الوقت إن بلد تانية لو عايزه يبقي عندها غواصة نووية وحتبدأ رحلتها من الأول فهي محتاجة مثلاً 30 سنة قصاد إن كوريا الجنوبية في أقل من 10 سنين حيبقي عندها أسطول غواصات نووية والأهم إنه حيكون تصنيع محلي .. حتة التصنيع المحلي دي ممكن تبقي مشكلة كبيرة تقف في وش الصفقة وهي إن (ترامب) طلع علي موقع السوشيال ميديا بتاعه اللي اسمه تروث سوشيال Truth Social وأيوه (ترامب) عنده موقع سوشيال ميديا خاص بيه زي فيسبوك كده .. المهم إن (ترامب) قال إن الغواصات النووية الكورية الجنوبية حتتعمل في ترسانة فيلادلفيا اللي هي اساساً مملوكة لشركة كوري جنوبي اسمها هوانوا Hanwha بس هي الفكرة إن لو الغواصات اتبنت في أمريكا فاللي حيشتغل عليها هم عمال أمريكان والمشروع نفسه حيخلق فرص عمل بالهبل حتخلي شكل (ترامب) قدام الناس حلو .. علي الناحية الثانية الكوريين الجنوبيين عايزين يعملوا الغواصات بايديهم عشان يتعلموا سر الصنعة .. فيه كلام علي إن ممكن يبقي فيه حل وسط .. اساسا اسطول الست غواصات Jangbogo-III اللي تحت ايد كوريا الجنوبية منهم خمسة متصنعين في ترسانة فيلادلفيا .. حرجعك تاني لل150 مليار دولار اللي كوريا الجنوبية وافقت انها تضخهم في استثمارات .. اساساً يعني هم رايحين للشركة بتاعتهم اللي هي بتملك ترسانة بحرية في أمريكا يعني الفلوس دي كانت كوريا الجنوبية كده كده حتدفعها فايه المشكلة إن يتقال قدام الناس انها اتدفعت رضوخا لطلبات (ترامب) قصاد إن كوريا الجنوبية تاخد اللي هي عايزاه .. هو الكلام عليه ضرايب.
دايماً حتة الخوف من سباق التسلح بتتقال في المواقف اللي زي دي يعني مثلاً أكيد حد حيقول إن لو كوريا الجنوبية بقي عندها غواصة نووية فايه اللي يمنع كوريا الشمالية هي كمان إنها تعمل ده .. إذا كانت كوريا الجنوبية قالت إن غواصاتها الجديدة حتكون صحيح شغالة بمفاعل نووي بس مش حتشيل صواريخ برؤوس نووية فكوريا الشمالية مش بس حيبقي عندها غواصة بمفاعل نووي إنما كمان شايلة صواريخ عابرة للقارات برؤوس نووية .. لو ده رأيك إنت كمان فاحب أقولك إن حتي قبل ما يطلع كيس الشيتوس بطلعته البهية عشان يوافق علي إن كوريا الجنوبية يبقي عندها النوع ده من الغواصات ففي 2021 كوريا الشمالية بدأت مشروع تصنيع غواصة بمفاعل نووي والمفروض لو حتصدق كلامهم يعني فالغواصة حتخلص علي اخر 2025.
المصادر:
- مقالة بعنوان US submarines are outnumbered in the Pacific. South Korea has a plan to help نشرت علي موقع وكالة أنباء CNN وده لينك المقالة الأصلية:
US submarines are outnumbered in the Pacific. South Korea has a plan to help | CNN - مقالة بعنوان The US will help South Korea build nuclear ‘attack’ submarines – here’s what that means نشرت في موقع هيئة الإذاعة البريطانية BBC وده لينك المقالة الأصلية:
US-South Korea nuclear submarine deal: What does it mean?
