لينك التسجيل الصوتي علي ساوند كلاود:
https://on.soundcloud.com/HcmuLfhkRU36k5Sdrm
موضوعنا النهاردة اللي حنتكلم عنه هو واحد من الموضوعات اللي مليانه متناقضات وحاجات عكس بعضها لدرجة تعصب الحقيقة وهو محاولة فهم هي يا تري الدول الإسكندنافية بتمشي مصروف بيتها ازاي .. هو يبان سؤال غريب ومعقد رغم بساطته بس انت محتاج تفهم أولاً مني أنا شخصياً هو إيه اللي خلاني أفتح سيرة الموضوع ده .. محسوبك العبد لله بعتبر نفسي من الناس اللي مهتمه بالسياسة الداخلية الأمريكية شوية وعشان كده أنا كنت بتابع انتخابات العمودية بتاعة مدينة نيويورك اللي اُعلنت نتيجتها في نوفمبر 2025 .. أيوه هو كلامي يبان منه إن قال يعني أنا معايا باسبور أمريكاني عشان أشغل بالي بقضية يمكن أساساً كتير من الأمريكان نفسهم ولا بيفكروا فيها بس هو السبب في اهتمامي بالانتخابات دي هو إن اللي كسبها واللي كان مخلي الدنيا كلها تتكلم عنه خلال حملته الإنتخابية كان واحد اسمه (زوهران ممداني) .. (زوهران) هو مهاجر من أوغندا راح أمريكا وهو صغير ودلوقتي بقي عمدة أكبر مدينة في العالم بس مش ده المهم .. الفكرة مش في الفلسفة العبقرية للحملة الإنتخابية بتاعته ولا إنه حرفياً كان بيمشي بالليالي يخبط علي البيوت عشان يسمع الناس ويشوف مشاكلها ويوعدهم بحلها .. مش ده اللي أنا واقف قدامه .. اللي أنا واقف قدامه هو الوعود الإنتخابية اللي (زوهران) كسب الإنتخابات علي حسها واللي لما تيجي تبصلها الحقيقة تلاقيها أفكار منطقية جداً والمفروض إنها سهل تتعمل.
مبدأياً هو بني حملته الإنتخابية كلها علي كتاف كلمة واحدة وهي Affordability وهي إن المواطن البسيط يقدر يعيش حياة كويسة .. يدفع إيجار ميبلعش مرتبه .. يعرف يأكل عياله .. يعلمهم كويس .. يعرف يعالجهم لو حد من عياله أو مراته تعب أو هو شخصياً رقد في السرير .. (زوهران) كان كل ما حد يسأله سؤال يرد عليه بكلمة Affordability .. طب إيه رأيك في كيس الشيتوس الحجم العائلي يقولهم أنا يهمني Affordability .. طب إيه رأيك في اللي بيحصل في غزة يقولهم هو تطهير عرقي وكل حاجة بس أنا أهم حاجة عندي هي Affordability .. ولما بيتسأل هو يا اسطي انت ازاي حتحقق التارجيت بتاع Affordability ده يقولهم هم 4 حاجات حيتعملوا .. ايجار الشقق حيتعمله تجميد ومش حيزيد تحت اي ظرف لمدة زمنية محددة .. المواصلات العامة حتبقي ببلاش .. حتتعمل مشاريع اسكان اجتماعي للشباب بتكلفة متقطمش ظهر أي شاب عايز يمتلك شقته .. حنعمل برامج كتير عشان نحقق العدالة الإقتصادية إن ميبقاش في نيويورك ناس فقيرة أوي وناس غنية أوي أوي .. لما (زوهران) قال الافكار دي كلها في حملته الإنتخابية كانت التهمة اللي بتتوجه ليه هو انت ياسطي اشتراكي ولا ايه .. ده اللي أنا وقفت قدامه أوي .. هو بالصلاة علي النبي ايه اللي جاب القلعة جنب البحر .. هو من امتي إن الحكومة تشتغل عشان تحقق العدالة الإجتماعية بقي بيتبصلها علي إن دي إشتراكية؟ .. مش كده وبس .. الناس في أمريكا بقوا بيقولوا إن (زوهران) عايز يخلي نيويورك تمشي علي نفس الفلسفة بتاعة الدول الإسكندنافية ودي برده نقطة تانية أنا واقف عندها .. هو بالصلاة علي النبي مين قال إن الدول الإسكندافية اشتراكية أصلاً؟ .. في حالة إنك بتسأل هي يا تري إيه هي الدول الإسكندافية فدي الدول اللي فوق خالص في أوروبا اللي جامدين فحت في كرة اليد ودايماً بيكسبونا في أخر ثانية اللي هم النرويج والسويد والدانمرك وفنلندا وأيسلندا.
الإشتراكية .. محاولة فهم حاجة مش موجودة في الدنيا:
كلمة إشتراكية أو Socialism في رأيي الشخصي بقت كلمة صعب تتفهم زيها زي الصوفية كده .. امشي في الشارع إسأل أي حد تعرف إيه عن الصوفية حيقولك دي ناس حشاشة ومشركة بالله والدليل بتاعه هو الحاجات اللي بنشوفها علي السوشيال ميديا في الموالد ويمكن أشهرها مولد السيد البدوي الله يرحمه بس هل تاريخ الصوفية كله ينفع اقصه واختزله في المظاهر الغلط اللي بيقوم بيها ناس غالباً هم شخصياً مش فاهمين يعني إيه تصوف .. الإجابة علي السؤال ده مش مجالنا دلوقتي بس اللي محتاجين نفهمه إن لو أنا جبت دكتور في كلية الإقتصاد سألته سؤال بسيط هو يعني إيه إشتراكية غالباً حيسمعلي التعريف اللي حطه (كارل ماركس) و (فريدريش إينجلز) اللي بيقول إن الإشتراكية هي فلسفة سياسية وإجتماعية وإقتصادية مبنية علي مجموعة من الأفكار الإقتصادية والإجتماعية الأصل فيها إن ملكية سبل الإنتاج في أي بلد هي لعامة الناس .. حلو .. دورلي بقي علي الخريطة علي بلد بتطبق الكلام ده .. خليني أوفر عليك إجابة السؤال .. مفيش .. ده معناه يا سيدي الفاضل إن وفق تعريف الإشتراكية اللي محطوط في الكتب فالدول الإسكندنافية مينفعش تصنفها علي إنها دول إشتراكية أصلاً.
الإشتراكية بتعريفها اللي محطوط في الكتب مش حتلاقي نموذج ناجح ليها سواء بتتكلم عن الإتحاد السوفيتي أو كوبا أو فنزويلا أو الهند أو حتي فرنسا .. ورغم كده جت فترة علي الدول الإسكندنافية كانت ماشيه بنفس السيستيم اللي كان حاطه (جمال عبدالناصر) الله يرحمه وهو إن الإقتصاد معتمد بشكل شبه كلي علي القطاع العام .. السويد مثلاً في الفترة ما بين السبعينات والتسعينات كانت حرفياً نسخة من مصر أيام الإشتراكية الناصرية بس السويد شدت فرامل اليد وغيرت سكتها بعد إنهيار الإتحاد السوفيتي سنة 1990 .. سنة 1992 قانون التعليم في السويد اتغير بحيث الطفل بقي من حقه هو اللي يختار عايز يخش مدرسة حكومة ولا مدرسة خاصة سنة 2007 قانون الضرايب الشنيع اللي كان ماشي في السويد بقاله سنين اتغير .. القطاع الخاص بقي هو الأساس اللي الإقتصاد قايم عليه.
طب لو الدول الإسكندنافية مش إشتراكية أومال هم إيه؟
هو الحقيقة إن هم شخصياً مش عارفين يسموها ايه فتلاقيهم بيقولوا إن السيستيم اللي اللي احنا ماشيين عليه اسمه الديموقراطية الإشتراكية Social Democracy وعلي فكرة الاسم ده بدأ يسمع أوي في أمريكا لما استخدمه كبير الإشتراكيين الأمريكان (بيرني ساندرز) اللي كان مرشح نفسه للرئاسة قبل كده ويعتبر من أنظف الشخصيات السياسية الأمريكية وحتي (زوهران ممداني) لما بيجي يعبر عن أراءه السياسية في أي انترفيو بيوصف نفسه إنه Social Democrat يعني ديموقراطي اشتراكي بس يمكن عشان المصطلح متركب من كلمتين ملهمش علاقة ببعض أوي فناس تانية بتسمي السيستيم بتاع الدول الإسكندنافية Cuddly Capitalism هو الرأسمالية الحنينة والوصف ده جاي من إن اللي ناس كتير متعرفوش إن الدول الإسكندافية هي دول رأسمالية عادي جداً بس الحكومات بتاعتها مش سايبه المواطن ملقف في وش شركات القطاع الخاص .. حكومات الدول الإسكندنافية كل واحدة فيهم بطريقتها الخاصة وبما يتوافق مع متطلبات مجتماعاتها بتحط برامج لحماية المواطن من جشع التجار ويمكن عشان كده الوصف اللي انا بميل ليه أكتر للسيستيم اللي ماشيه عليه الدول الإسكندافية هو Nordic Model أو النموذج الإسكندنافي.
كلمة النموذح الإسكندنافي هي بمنتهي البساطة بتتكلم عن السيستيم اللي قائم علي فكرة إن الحكومة دورها إنها تعمل شبكة أمان أجتماعي Social Safety Net وكنت قلت قبل كده إن فكرة شبكة الأمان الإجتماعي دي مقالة قديمة اتكلمت فيها عن الإشتراكية الجديدة وهي شبيهة جداً بفكرة بيت مال المسلمين اللي بدأ يتعمل في دولة الخلفاء الراشدين وهو إن دور الحكومة إنها تشد المواطنين بتوعها فوق خط الفقر حتي لو تطلب الأمر إنها تديهم في ايدهم فلوس كاش من تحصيل الزكاة اللي هو دلوقتي بتوع الإقتصاد بيسموه Universal Basic Income .. بمعني أخر .. كلمة Nordic Model هي ميكس بين حاجتين اللي هم نظام رأسمالي قائم علي فكرة السوق الحر وفي نفس ذات الوقت نظام بيضمن شبكة أمان إجتماعي للمواطنين بحيث إن أنا لو جيت قلتلك إن بلد ما ولتكن مثلاً النرويج ماشية بالسيستيم ده فده معناه شوية حاجات .. منها إن دي بلد محققة مستوي معيشة حلو أوي للناس اللي عايشه فيها .. منها إن مفيش فجوة كبيرة بين الأغنياء والفقراء ودي مرتبطة بالنقطة اللي قبلها اللي هو دي بلد مفيهاش (محمد رمضان) وفيها واحد مش لاقي ياكل وده سببه إن الناس كلها بيتحط عليها في الضرايب اللي بتتدفع للحكومة عشان تلم هي الفلوس دي كلها وتوفر للناس مدارس ببلاش و مستشفيات ببلاش و طرق ببلاش و معاشات تخليهم عايشين مستريحين.
اللي ناس كتير مبتقدرش تاخد بالها منه إن الإقتصاد والمجتمع مينفعش تفصلهم عن بعض .. الإقتصاد أساساً فكرته هي طريقة إدارة الموارد اللي ربنا عطاها لشوية الناس اللي قاعدين في حتة ما من الأرض بمعني إن الإقتصاد هو الطريقة اللي المجتمع بيحاول فيها إنه ميموتش من الجوع .. حاول تبصلها إن Nordic Model هو شوية سياسات ليها علاقة بالفلوس هدفها إن الدول الإسكندنافية تعرف تعيش كويس بما يتناسب مع طبيعة مجتمعاتها والسياسات دي إنت تقدر تلخصها في 4 نقط:
- الحكومة حتصرف فلوس كتير أوي كاستثمارات لحماية الأسرة .. ده معناه إن لما ست متجوزة وبتشتغل تخلف فالحكومة حتقولها إحنا حنساعدك تربي عيالك .. إحنا حنتصرف وتوفرلك أجازة وضع ورعاية طفل تخليكي جنب عيالك لما يتولدوا .. لما عيالك يكبروا حنساعدك في تعليمهم وعلاجهم بحيث إن إنتي كأم متحسيش في يوم من الأيام إن قرارك إنك تخلفي طفل كانه قرار إعدام للكاريير بتاعك أو نهاية مستوي المعيشة اللي إلي حد ما عالي اللي إنتي وجوزك قبل الخلفة كنتوا متعودين عليه.
- المرتبات اللي الناس بتاخدها مش بتتحط اعتباطا .. كل قطاعات الإقتصاد بتتكلم مع بعضها كويس أوي بحيث يحطوا مسطرة مرتبات عادلة ومنطقية بحيث ميبقاش فيه شغلانات مرتباتها عالية بشكل مش منطقي ومش صح وشغلانات تانية علي الله حكايتها من حيث المرتبات .. دي مشكلة كبيرة إحنا في مصر بنعاني منها جداً إن ممكن شغلانة مرتبها وحش تكون أهم بكتير من شغلانة مرتبها كبير.
- الحكومة مش دورها تمص دمك .. الحكومة دورها تساعدك .. تساعدك لو إنت مش لاقي شغل .. تساعدك لو إنت مرضت وعايز تتعالج .. تساعدك لو إنت طلعت معاش .. كل دي فلوس كتير بتتدفع من الموازنة العامة للبلد.
- النقطة اللي كل اللي فات قائم عليها إن نظام الضرايب مفيهوش خيار وفاقوس .. الناس كلها حتدفع.
ميلاد ما يسمي Nordic Model كان قديم حبتين في الثلاثينات من القرن العشرين لما بشكل تلقائي جداً وبدون تنسيق مسبق الدول الإسكندافية كل واحده فيهم منها لنفسها بدأت يحصل فيها اتفاقات بين الفلاحين والتجار قائمة علي فكرة العدل في توزيع الأرباح .. سنة 1933 أخواتك في الدانمرك عملوا التجربة الدانمركية بتاعتهم اللي تمثلت في اتفاقية كانسليرجاد Kanslergade Agreement .. اخواتك في السويد لحقوهم سنة 1938 لما عملوا اتفاقية سولتس يوبادين Saltsjöbaden Agreement .. الإتفاقيات دي بدأت تحط الأساس بتاع فكرة إن من حق النقابات العمالية إنها تتفاوض باسم العمال بتوعها مع أصحاب الشركات عشان تضمن حقهم من حيث المرتبات والأجازات والتعويضات .. مش بس كده .. الإتفاقيات دي حطت السيستيم بتاع هو يا تري لما صاحب الشغل يتخانق مع العمال بتوعه اللي بتمثلهم النقابة أزاي هم الاتنين يعرضوا وجهات نظرهم قدام الحكومة وازاي الحكومة ترجع حق المظلوم .. بسبب السيستيم ده اللي لما اتحط بقت الناس بتقعد تتكلم مع بعضها بهدوء من غير ما يبقي فيه أي داعي للمظاهرات أو الإعتصامات أو الإضرابات إذ تكتشف إن الدول الإسكندنافية مثلاً ملهاش حد أدني للمرتبات .. عشان النقابات بتتكلم مع القطاع الخاص وهم الاتنين بيحددوا هو ياتري مثلاً المهندس حديث التخرج حق ربنا ياخد في ايده مرتب كام فتلاقي إن الحكومة مش مطلعه قانون يقول الحد الأدني للمرتبات كام ومش بس كده .. بسبب إن النقابات بتتكلم مع شركات القطاع الخاص في كل صغيرة وكبيرة تخص العمال وحقوقهم تلاقي إن الحد الأدني للأجور في أي بلد أسكندنافي أعلي بكتير من أي مبلغ محطوط في نص القانون بتاع أي بلد أوروبية تانية.
الدول الإسكندنافية هي دول رأسمالية بامتياز فيها الرجاله والستات بيشتغلوا لكن الحكومة دورها هي إن لو ست متجوزة حبت تخلف فهي دورها إنها تساعدها وتوفرلها كل حاجة ممكنة عشان تربي عيالها مع احتفاظها بالكاريير بتاعها عشان الدول دي تحقق معجزة الحقيقة إن ازاي مجتمع رجاله وستات فيه بيشتغلوا وفي نفس الوقت العيال مش مرميين في الشارع.
أي نظام اقتصادي في الدنيا بيكون قائم علي شوية قواعد ومهم نفهم هو يا تري Nordic Model ده ماشي أزاي:
- مبدأياً الحكومة بتاخد منك ضرائب كتير .. كتير أوي .. في الدانمرك مثلاً ضريبة الدخل ممكن توصل 45.9% وده أعلي معدل ضريبة دخل في العالم .. بس الضرايب دي بتتصرف بما يرضي الله في برامج كتير من ضمنها زي ما قلتلك شبكة أمان أجتماعي تضمن إن مفيش حد في البلد ينام جعان .. برامج معاشات مش بتخلي أي حد طلع معاش يبقي قلقان من بكره.
- السيستيم هو رأسمالي بالأساس وده معناه إن الحكومة دورها تساعدك إنك تعمل البيزنس بتاعك ولو البيزنس بتاعك بيتطلب إنك تمتلك حتة أرض فمش حيجي اليوم اللي يقولك أصل الحكومة عايزة حتة الأرض اللي حيلتك عشان تعمل عليها مشروع قومي .. يمكن ده السبب إن الدول الإسكندنافية طلعت منها شركات تقيلة في البيزنس .. بتتكلم مثلاً عن أيكيا Ikea السويدية .. بتتكلم عن نوكيا Nokia الفنلندية الله يرحمها .. بتتكلم عن فولفو Volvo السويدية .. بتتكلم عن ليجو LEGO الدانمركية .. بس عشان الدول الإسكندنافية هي دول راسمالية بالأساس فده ممنعهاش إنها تقبل إن شركة Volvo مثلاً تتباع لشركة جيلي الصينية Geely Holding بس العرق الإشتراكي بقي بينقح لإن صفقة استحواذ Geely علي Volvo قالت إن مقر الشركة ومركز عملياتها ومصانعها تفضل في السويد.
- الهسهس اللي فعلاً مسيطر علي حكومات الدول الأسكندنافية هو مكافحة الفساد يعني يكفي إني أقولك إن سنة 2015 مؤشر مكافحة الفساد العالمي حط أكتر 10 دول علي مستوي العالم فيها سيستيم مكافحة فساد زي الكتاب ما بيقول والعشر دول منهم خمس دول اسكندنافية اللي هم النرويج و السويد و الدانمرك وأيسلندا و فنلندا .. الميكس بين إن يبقي عندك حكومة شغالة بما يرضي الله وتحت ايدها نظام تحصيل ضرايب شغال الله ينور فالحكومات الإسكندنافية بتقدر تحقق معجزة الحقيقة وهي إنها تقريباً الحكومات الوحيدة ضمن كل الدول الصناعية الكبيرة اللي ديونها بتقل .. خد السويد مثلاً .. سنة 1995 نسبة الديون المستحقة علي البلد من الناتج الوطني الإجمالي اللي هو GDP ودي اختصار Gross Domestic Product كانت 80% .. عشان تفهم اللي انا بقوله تخيل إنك رجل متجوز وبيحشلك في الشهر مثلاً 20 الف جنيه من مرتبك علي الفلوس اللي انت مسلفها لناس وردوهالك علي شوية الفلوس اللي الست والدتك بتديهوملك أول كل شهر فمجموع الفلوس دي كلها قبل ما تخصم منها مصاريف البيت بيسموها GDP .. أهو تخيل إن الديون اللي عليك 80% من مصروف البيت والكلام ده قبل ما نشيل منهم فلوس الأكل والشرب والعلاج والتعليم وغيره .. سنة 2017 النسبة دي في السويد قلت بقت 41%.
- علي الناحية الثانية الهسهس اللي فعلاً مسيطر علي دماغ البيزنس بقي هو النقابات العمالية يعني مثلاً .. 51% من القوي العاملة في النرويج منضمين لنقابات عمالية .. في أيسلندا النسبة بتنط ل88% .. قارن الأرقام الخزعبلية دي بدول تانية أوروبية برده زي ألمانيا تلاقي 18% بس من القوي العاملة هناك منضمة لنقابات عمالية .. في فرنسا النسبة 8% .. في أمريكا النسبة يدوبك 11% .. حتة النقابات العمالية دي كانت السبب إن شركة ساب Saab السويدية العملاقة اللي بتصنع حاجات كتير من ضمنها طيارات مقاتلة كانت زمان بتصنع عربيات بس إدارة تصنيع العربيات في الشركة قفلت فلما ده حصل وعشان الشركة خافت من النقابات العمالية فهم ممشوش الناس اللي كانت شغالة في الإدارة اللي قفلت ونقولهم لإدارات تانية ودلوقتي الشركة شغال فيها 1700 موظف 80% منهم مواطنين سويدين عايشين في السويد.
إمشاكل النموذج الإسكندنافي .. ابقي قابلني لو عرفت تطبقه:
مشكلة Nordic Model حتظهرلك علي حسب إنت قاعد في مدرجات مين رغم إن المشكلة ليها اسم واحد .. يعني مثلاً .. أهم مشكلة في النموذج الإسكندنافي هي إن الحكومة بتاخد نسبة كبيرة من دخلك كمواطن كضرايب .. دي مشكلة .. بس لو انت قاعد في أمريكا اللي ماشية بالنسخة المنيلة بستين نيلة من الرأسمالية فالمشكلة دي بيتبصلها علي إنها تعدي علي حقوق المواطن الأمريكاني وحريته إنه يصرف فلوسه زي ما هو عايز اللي هي مشاكل العالم الأول دي اللي ملناش دعوة بيها .. بس في بلد زي مصر رغم إن هي المشكلة ليها نفس الاسم وهو الضرايب العالية فعندنا شكل المشكلة بيختلف وهو مع الفساد اللي للركب ويمكن فوق الركب بشوية ايه ضمني أنا كمواطن إن الحكومة حتصرف الضرايب اللي بتاخدها مني بما يرضي الله وبما يتوافق مع مصالحي .. عشان تطبق النموذج الاسكندنافي في بلد زي مصر فده شبه مستحيل لإنك حتبقي محتاج حكومة منتخبة من الشعب بتشتغل عشان خاطر الشعب مش شوية الحرامية اللي بيحكمونا بقالهم سنين .. أساساً تطبيق النموذج الإسكندنافي بيشترط إن الحكومة تخلق مناخ رأسمالي مشجع للاستثمار وداعم للبيزنس اللي هو مش عندنا برده.
مشكلة تانية وهو عدد السكان .. دولة زي الدانمرك أو السويد عدد سكانها صغير فهي تقدر تطبق النموذج الأسكندنافي ده بسهولة بس بلد زي أمريكا صعب .. مش بس عشان أمريكا عدد سكان كبير إنما عشان أمريكا التنوع السكاني فيها كبير .. انت بتتكلم عن بلد عايش فيها كل الاعراق والديانات اللي اتخلقت في الكرة الارضية كلها .. المشكلة دي مش عندنا أوي في مصر لإن صحيح مصر عدد سكانها كبير بس تحس إن شعبها شبه بعضه وفكرة إن الشعب شبه بعضه دي بتسهل جداً تطبيق النموذج الإسكندنافي .. في نفس الوقت عدد سكان الدول الإسكندنافية مش كبير أوي يعني لإنك بتتكلم عن 5 دول عدد سكانهم شاكب راكب 26 مليون بني أدم اللي هم تقريباً نفس عدد سكان القاهرة الكبري.
مشكلة ثالثة ودي مشكلة عويصة أوي وهي إن النموذج الإسكندنافي أولاً وأخيراً مبني علي الثقة .. ثقة ناس اشتغلت عليها من سنة 1933 عشان تبنيها .. ثقة بين النقابات العمالية وبين شركات القطاع الخاص وبينهم وبين الحكومة .. الثقة دي مش موجودة في دول كتير حتي في أمريكا وخصوصاً في مصر.
خليني أختم معاك بفكرة خليها مهمة جداً في دماغك وهو إن النظام الإقتصادي في أي بلد هو في الأول والأخر سيستيم معمول عشان خاطر البني أدمين اللي عايشين في البلد وده بيخلي فيه علاقة قوية جداً بس للأسف محدش بياخد باله منها بين السيستيم بتاع الإقتصاد وبين عدد السكان .. النظام الإسكندنافي Nordic Model أهم خطر بيواجهه حالياً هو انفخفاض معدلات الإنجاب في الدول الإسكندنافية .. حالياً نسبة الإنجاب في الدول الإسكندنافية 1.6 ودي مشكلة الحقيقة .. عشان بلد ما زي مصر مثلاً تحافظ علي عدد سكانها زي ما هو لا بيقل ولا بيزيد لازم علي الأقل أي اتنين متجوزين يخلفوا طفلين عشان الطفلين يحلوا محل الأب والأم .. يعني عشان عدد سكان بلد ما يفضل ثابت لازم معدل الإنجاب ميقلش عن 2.1 بحيث 0.1 الزيادة دي تقدر تقول عليها لتغطية حالات الوفاة المبكرة للأطفال لا قدر الله .. صحيح إن معدل انجاب 1.6 ده متوافق مع المعدل السائد في الدول المتقدمة بس في نفس الوقت الرقم ده مينفعش يفضل كده.
المصادر:
- مقالة بعنوان Scandinavian ‘Socialism’: The Truth of the Nordic Model نشرت في موقع Life in Norway وده لينك المقالة الأصلية:
Scandinavian ‘Socialism’: The Truth of the Nordic Model – Life in Norway - مقالة بعنوان The Myth of the Nordic Utopia: Why the Scandinavian Model Isn’t All It’s Cracked Up to Be نشرت في موقع Aurica وده لينك المقالة الأصلية:
The Myth of the Nordic Utopia: Why the Scandinavian Model Isn’t All It’s Cracked Up to Be - مقالة بعنوان The Myth of Scandinavian Socialism نشرت في موقع مؤسسة التعليم الإقتصادي Foundation for Economic Education وده لينك المقالة الأصلية:
The Myth of Scandinavian Socialism - مقالة بعنوان The Myth of Nordic Socialism نشرت علي موقع The Liberation Institute وده لينك المقالة الأصلية:
The Myth of Nordic Socialism | The Libertarian Institute - مقالة بعنوان The Nordics are a model for all the world نشرت في موقع المنتدي الإقتصادي العالمي World Economic Forum وده لينك المقالة الأصلية:
How can we reconcile free trade, patriotism and inclusivity? | World Economic Forum
- مقالة بعنوان The Nordic Model: Capable of Responding to the Social Side of Crises and Sustaining Social Investment? نشرت في موقع Intereconomics وده لينك المقالة الأصلية:
The Nordic Model: Capable of Responding to the Social Side of Crises and Sustaining Social Investment? – Intereconomics
