لينك التسجيل الصوتي علي ساوند كلاود:
https://on.soundcloud.com/ImH3kdsqsPoriuBWw1
من الحاجات اللي بحترمها في الصهاينة فكرة إن مهما كان موقف القوة اللي هم فيه بس ده مش بيمنعهم إنهم يقفوا قصاد المراية ويسألوا نفسهم هو إحنا إيه اللي عملناه غلط وممكن نصلحه إزاي .. يمكن ده جاي من فلسفة الرجل العاشر المغروسة في فيهم من وقت ميلاد فكرة الوطن القومي للصهاينة في فلسطين وهي فكرة قايمة علي إن الحاكم لو له 10 مستشارين وتسعة من العشرة أجمعوا علي رأي معين فواجب الحاكم هنا مش إنه يسمع كلام التسعة إنما يحط قدامه احتمال إن ما يمكن الرجل العاشر اللي معترض شايف حاجة الباقيين مش شايفينها وده ممكن يكون السبب ورا تجنب مصيبة سودا ممكن توديهم في داهية .. أنا قلت المقدمة دي الحقيقة لسبب وهو إن بعد نكسة يونيو 1967 اللي يمكن الغرب بيحب يسميها حرب الأيام الستة وبعد ما الصهاينة خدوا شبه جزيرة سينا والضفة الغربية والقدس الشريف وهضبة الجولان وضع يد وفي الوقت اللي المفروض يعني تكون معنوياتهم في السما وشايفين نفسهم ياما هنا ياما هناك فاذا بيهم يكتشفوا الحقيقة اللي المقالة دي معموله عشانها .. باشا احنا عندنا قوات مسلحة معهاش بندقية ألية عليها القيمة.
اللي حصل إن خلال حرب فلسطين عصابات الصهاينة اللي بعد كده ضموها علي بعض عشان تشكل جيش الدفاع الإسرائيلي اللي بيسموه IDF ودي اختصار Israeli Defense Force فالعصابات دي كانت بتحارب الجيوش العربية وهي شايله كوليكشن ملوش ملامح من الأسلحة .. إنت ممكن تلاقي مجموعة من عصابة الهاجاناه مثلاً واحد فيهم معاه بندقية ألماني وزميله معاه بندقية أنجليزي و واحد ثالث معاه بندقية من تشيكوسلوفاكيا .. 3 مسلحين المفروض بيحاربوا مع بعض كل واحد فيهم شايل بندقية شكل وكل بندقية ليها عيار طلقات مختلف عن الثاني .. ده بالضبط لما تبقوا 3 اخوات واحد شايل iPhone و واحد شايل سامسونج و واحد ماسك موبايل نوكيا القديم اللي من غير شاشة تاتش ده .. انت متخيل إن لو واحد فيكوا الشاحن بتاعه باظ فهو مش حينفع يستلف شاحن واحد من اخواته و حيضطر يفضل طول الليل باصص في السقف لحد ما يصحي بكره الصبح يروح الشغل يستلف شاحن من واحد زميله .. ده بس مجرد مثال أوريك بيه قد إيه العك كان وصل لذروته مع عصابات الصهاينة ورغم كده هم كسبونا في حرب فلسطين .. لما حرب فلسطين خلصت واتأسست دولة إسرائيل و بدأ يبقي فيه ملامح لما يسمي جيش الدفاع الإسرائيلي فهم كانوا محتاجين يعالجوا مشكلة السلاح دي .. المشكلة إن بعد حرب فلسطين فيه دول كتير فرضت حظر تصدير سلاح لإسرائيل فده خلي الخيارات قصاد الصهاينة قليلة ويمكن عشان كده هم قرروا إن البندقية FAL اللي بتصنعها شركة FN البلجيكية وبتستخدم طلقة عيار 7.62 مليمتر تبقي هي السلاح الرسمي لعساكر جيش الدفاع الإسرائيلي .. ده حيودينا للنكسة .. بندقية FAL مكنتش بندقية كويسة .. هي كانت طويلة زي ما تكون شايل هموم الدنيا .. بندقية تبصلها تعطل فدي يمكن بندقية كويسة للأجواء الأوروبية الباردة بس مع حر و تراب ورملة الصحراء فانت مينفعش تعتمد عليها .. طب والحل؟
سنة 1923 بيتولد في روسيا طفل اسمه (إسرائيل بالاشنيكوف Israel Balashnikov) ولما الحرب العالمية الثانية خلصت هاجر زي كتير من أهل بلده من اليهود لإسرائيل .. (إسرائيل بالاشنيكوف) بدأ حياته في إسرائيل كمقاتل في عصابة الهاجاناه وبعد تاسيس دولة إسرائيل كان شغال مهندس أسلحة وجزء من شغله بعد نكسة يونيو إنه يبدأ يذاكر ويفهم هي البندقية الألية كلاشينكوف AK-47 بتشتغل ازاي .. كتير من البنادق دي وقعت في ايد الصهاينة بعد انسحاب القوات العربية من الأراضي اللي احتلتها إسرائيل .. مع الوقت (إسرائيل بالاشنيكوف) بدأ يكتشف شوية حاجات من مذاكرته للبندقية كلاشينكوف:
- خلينا نتفق إنك لو معاك بندقية FAL و بندقية كلاشينكوف فانت دقتك علي التنشين أعلي بكتير بالبندقية FAL ومفيش مقارنة بين دقة تصويبها وبين دقة الكلاشينكوف.
- البندقية FAL تقيلة في وزنها .. الكعب بتاعها ثابت في مكانه مبيتحركش .. خزنة الطلقات بتاعتها بتشيل 20 رصاصة قصاد 30 رصاصة في خزنة الكلاشينكوف .. كل ده زي الفل لبندقية في ميدان مفتوح بس الكلام ده ميأكلش عيش في حرب مدن أو تبقي سلاح في ايد أطقم المدرعات والدبابات.
- علي الناحية الثانية في الوقت اللي البندقية FAL أطول من الليلة السودا فالكلاشينكوف أقصر بكتير .. الكلاشينكوف مش محتاجه تنظيف ولا صيانة زي FAL .. الكلاشينكوف بتشتغل في أي وضع و أي مكان وتحت أي ظروف.
السؤال دلوقتي هو إيه اللي يحصل لو ضربنا الاتنين في الخلاط .. خلي بالك .. (إسرائيل بالاشنيكوف) مش هو ابوالعريف الوحيد اللي سال نفسه السؤال ده يعني .. قبله الفنلنديين كانوا عملوا نسخة متعدلة من الكلاشينكوف اسمها Valmet RK 62 فاللي حصل إن (إسرائيل بالاشنيكوف) خد التصميم بتاع RK 62 عدل فيه شوية هو كمان وعمل بندقية جديدة بتحققلك نفس الأعتمادية بتاعة الكلاشينكوف وفي نفس الوقت دقة النشان بتاعتها زي FAL وكان عايز يسمي البندقية دي علي اسمه بالاشنيكوف زي ما AK-47 متسميه كلاشينكوف علي اسم (ميخائيل كلاشينكوف) اللي اخترعها بس اتمني تكون لاحظت تشابه الأسماء الغريب بين الاتنين .. ده كان السبب إن البندقية الجديدة اتسمت جليل Galil بدل ما كان المفروض تتسمي بالاشنيكوف .. لو حطيت قدامك بندقية جليل وبندقية AK-47 انت ممكن تتلخبط ما بينهم لإنهم شبه بعض جداً بس لو فكيتهم الاتنين حتلاقيهم من جوه مختلفين شوية فمينفعش تبدل القطع الداخلية بتاعتهم مع بعض .. انت ممكن تعمل ده ما بين جليل وبين RK 62 الفنلندي لإنهم قريبن جداً من بعض داخلياً و خارجياً.
المفروض إن أي سلاح بيتصنع في أي حتة في الدنيا بيتم اختباره قصاد أسلحة تانية عشان نعرف إمكانياته ولو انت صدقت كلام الصهاينة فأول جولة من الأختبارات للبندقية جليل تمت قصاد المدفع الرشاش العوزي اللي صممه (عوزيل جال) وحط عليه حطة وحشة أوي .. بعد كده اتعملت جولة ثانية للبندقية جليل ضد البندقية M16 الأمريكاني والبندقية الألماني HK33 و كمان ضد الكلاشينكوف .. نتيجة الجولة خلصت بإن جليل تفوقت عليهم بسكور وصل 97.5% .. جت وراها الكلاشينكوف بسكور 85.3% و بعديها M16 بسكور 82.7% .. تاني ده كلام الصهاينة وطبعاً زي ما بقول دايما الكلام معليهوش ضرايب.
إمكانيات البندقية جليل إلي حد كبير كويسة جداً .. بندقية بتقدر تضرب بيها طلقات سواء أوتوماتيك أو نص أوتوماتيك اللي هي بتضرب طلقة طلقة .. لو ضربت بيها طلقات أوتوماتيك فانت طول ما انت دايس علي الزناد حتضرب طلقاتها لحد ما الخزنة تخلص وهي بتقدر تضرب لحد 650 طلقة في الدقيقة .. النسخة الأساسية من البندقية جليل اسمها Galil AR وكلمة AR دي اختصار Assault Rifle يعني بندقية هجومية .. البندقية وزنها حوالي 4 كيلوجرام وده رقم كبير الحقيقة لإنها بكده بقت أتقل في الوزن من الكلاشينكوف وده سببه إن أجزاء كتير من البندقية معمولة من الصلب ومش من سبائك الألمونيوم وفيها ميزة إن كعب البندقية تقدر تطبقه فطول البندقية الإجمالي بيقل معاك وبتوصل حوالي 73 سنتيمتر ولو فتحت الكعب علي الأخر طولها بيوصل 96 سنتيمتر .. البندقية بتضرب طلقات عيار 5.56 مليمتر ودي الطلقات الرسمية للدول الأعضاء في حلف شمال الأطلنطي NATO .. المشكلة اللي المصممين بتوع البندقية حطوا نفسهم فيها وهي إن شكل خزنة الذخيرة غبي .. الباشاوات خدوا شكل الخزنة بتاع RK 62 زي ما هو وتقريباً نسيوا إن علي عكس القوات المسلحة الفنلندية فإسرائيل معهاش رخصة تصنيع بنادق كلاشينكوف بس إسرائيل بتستلم بنادق M-16 من أمريكا فكان الأولي لو انت ناوي يعني تعدل علي الكلاشينكوف وتعمل النسخة الإسرائيلي منها فمعاك احتفظ بالشكل العام للكلاشينكوف وميكانيزم شغلها الداخلي بس تعالي علي الخزنة وصممها بحيث البندقية تقبل تاخد خزن الذخيرة بتاعة البندقية M16A1 اللي عساكر جيش الدفاع الإسرائيلي بيستخدموها بس ده محصلش .. خزنة ذخيرة البندقية جليل شكلها المختلف بيخليها تشيل 35 طلقة يعني فيها 5 طلقات زيادة عن الخزنة التقليدية بتاعة الكلاشينكوف وحتي بتاعة M16A1.
البندقية جليل بتنزل السوق بكذا نسخة:
- أول نسختين اسمهم Galil ARM واختها الكبيرة Galil AR .. كلمة AR زي ما قلنا من شوية هي اختصار Assault Rifle و كلمة ARM هي اختصار Assault Rifle Medium .. الاتنين بيستخدموا طلقات عيار 5.56 مليمتر وخصوصاً الطلقة SS109 المستخدمة في كل دول الأعضاء في NATO .. النسخة Galil AR دي البندقية اللي بيستلمها العسكري العادي في القوات البرية وبيتركب فيها مسند ثنائي و محمل زي اللي في شنط السفر .. النسخة Galil ARM بيتشال منها المسند والمحمل.
- ثالث نسخة اسمها Galil SAR وكلمة SAR دي اختصار Short Assault Rifle ودي نسخة محندقة شوية بحيث طولها لما تتني كعبها بيوصل 60 سنتيمتر بس وهي بندقية معمولة أولاً وأخيراً لعناصر القوات الخاصة .. بعد كده نزلت نسخة أصغر كمان من SAR اسمها MAR ودي اختصار Micro Assault Rifle طولها لما بتتني كعبها بيوصل 47 سنتيمتر ووزنها يدوبك 3 كيلوجرام وبرده بتحتفظ بالخزنة اللي بتقدر تشيل 35 طلقة.
- رابع نسخة وهي النسخة بتاعة القناصة من البندقية ودي بتستخدم طلقات عيار 7.62 مليمتر واسمها جالاتز Galatz.
سنة 1972 طلع قرار بإن من هنا ورايح البندقية جليل حتبقي هي السلاح الرسمي للقوات البرية الإسرائيلية بس حرب أكتوبر 1973 خلت تنفيذ القرار ده يتأجل حبه حلوين وأول دخول ليها لساحة معارك كانت في غزو إسرائيل للبنان سنة 1982 .. البندقية جليل مش من البنادق الألية اللي سمعت أوي في السوق العالمي يعني الصهاينة مبعوش منها غير لجنوب أفريقيا وقت ما كانت بيحكمها نظام التفرقة العنصرية ضد السمر اللي بيسموه نظام الأبارتهايد Apartheid .. البندقية جليل ليها برده زباين من بره إسرائيل لإنها البندقية الأساسية للقوات المسلحة والشرطة الكولومبية وكمان القوات المسلحة التشيلية و الفيتنامية .. البندقية جليل تصنيع محلي إسرائيلي علي ايد شركة IMI ودي اختصار Israeli Military Industries اللي بعد كده اتغير اسمها بقت IWI ودي اختصار Israeli Weapons Industry .. الدروس المستفادة اللي إسرائيل اتعلمتها من تصنيع البندقية جليل ساعدتهم كتير الحقيقة إنهم يعملوا البندقية اللي وراها اللي تخش الخدمة في القوات المسلحة بتاعتهم وهي البندقية تافور Tavorواللي ممكن نبقي نتكلم عنها في وقت تاني.
عايز اختم معاك إن سبب أساسي ورا قرار إسرائيل إنهاء تصنيعها للبندقية جليل كانت أمريكا .. أي حد جرب البندقية جليل حيشهد ليها إنها بندقية كويسة جداً خصوصاً للبيئة الصحراوية بس هي مشكلتها زي ما قلت في كلامي وزنها التقيل اللي سببه إن كتير من أجزاءها وخصوصاً كعبها بيتصنع من الصلب .. عشان البندقية جليل ميبقاش ليها سوق فأمريكا عرضت علي إسرائيل تستلم بنادق M16 و بنادق M4 برخص التراب لدرجة إن مبقاش منطقي من وجهة الفلوس علي الأقل إن برنامج تصنيع البندقية جليل يفضل مكمل لإنه بقي واقف علي الصهاينة بخسارة.
المصادر:
- مقالة بعنوان Meet the Origin of Israel’s Small Arms Industry: The Galil Rifle نشرت في موقع The National Interest وده لينك المقالة الأصلية:
Meet the Origin of Israel’s Small Arms Industry: The Galil Rifle – The National Interest - مقالة بعنوان The Evolution and Legacy of the Israeli Galil Battle Rifles and Their Designer Yisrael Galili نشرت في موقع JA Industries وده لينك المقالة الأصلية:
The Evolution and Legacy of the Israeli Galil Battle Rifles and Their Designer Yisrael Galili - مقالة بعنوان IMI Galil: An Israel’s derivative of legendary AK-47 نشرت في جرنان The Fox Times Newspaper وده لينك المقالة الأصلية:
IMI Galil: An Israel’s derivative of legendary AK-47 - مقالة بعنوان The Israeli Galil: Then & Now نشرت في موقع American Rifleman وده لينك المقالة الأصلية:
The Israeli Galil: Then & Now | An Official Journal Of The NRA
