موضوعنا النهاردة اللي حنتكلم عنه هو بطارية صواريخ باتريوت Patriot اللي اسمها بالكامل Patriot PAC-2 و دي منظومة صواريخ دفاعية مضادة للصواريخ الأمريكان هم اللي عاملينها و من تصنيع شركة رايثون Raytheon و بيبيعوها للدول اللي بيتقال عليها حليفة لأميركا زي مصر و السعودية .. سبب إننا حنتكلم عن الصواريخ دي هو الحادثة اللي حصلت في سبتمبر 2017 و اللي يمكن فيه مننا سمع عنها في الأخبار و هي إن المتمردين الحوثيين في اليمن أطلقوا صاروخ سكود Scud Missile علي مطار الرياض و الحادثة دي كانت من أسباب إن الحكومة السعودية تطلع تقول إنها في حالة حرب مع إيران و كانت كمان من الحجج الأساسية اللي إتقالت لتبرير الحصار البحري اللي فارضاه السعودية دلوقتي علي اليمن .. صدقني لو قلتلك إن مش المهم إن الحوثيين أطلقوا صاروخ بعيد المدي بيتصنف علي إنه من فئة صواريخ كروز Cruise Missile علي السعودية و مش المهم في الخبر هو إزاي الحوثيين جابوا الصاروخ؟ أو إن إزاي المخابرات السعودية فشلت إنها تحبط وصول صاروخ زي ده للحوثيين؟ .. صواريخ سكود Scud مش قرش حشيش حتخبيهم في هدومك الداخلية عشان تهربهم بين الحدود بين اليمن و السعودية .. فكك من كل ده .. اللي حنتكلم عنه هو إزاي منظومة الدفاع الجوي السعودية اللي إتصرف عليها مليارات و اللي معتمدة بشكل أساسي علي بطاريات صواريخ باتريوت Patriot فشلت في إعتراض الصاروخ و هو جاي؟
الكلام اللي إنت بتسمعه في الإعلام إن صواريخ باتريوت Patriot دي أميريكية و لإن عندنا عقدة الخواجة فبنتخيل إن بما أن الأمريكان هم اللي عاملينها تبقي ده صواريخ جامدة زحليقة و تقدر توقع أي حاجة بتطير .. الكلام ده مش حقيقي .. بطاريات صواريخ باتريوت Patriot ثبت إن فيها مشكلة كبيرة من أيام حرب الخليج الثانية سنة 1991 و المشكلة دي متحلتش و محدش فكر يحلها و رغم كده الدول العربية برده بتدفع ملايين عشان تروح تشتري بطاريات الصواريخ دي لمجرد إن مكتوب عليها صنع في أميركا Made in USA .. من سنة 1991 و كان المفروض السعوديين يفهموا إن بطاريات صواريخ Patriot فيها عيب و بلاش يشتروها و الصواريخ اللي إشتروها يا يبعتوها للأمريكان يصلحوها أو يطلعوها بره الخدمة بس ده محصلش.
ده حيخلينا نسال السؤال المهم .. هي إيه مشكلة بطاريات صواريخ Patriot؟
مبدأياً كده الصواريخ بعيدة المدي سواء كانت صواريخ عابرة للقارات ICBM أو صواريخ أصغر زي صواريخ كروز Cruise Missiles اللي بيندرج تحتها صواريخ سكود Scud اللي الحوثيين ضربوها علي السعودية عشان إنت تسقطها و هي في الجو بصاروخ تاني كأن إنت واقف في الشارع و حد رمي عليك طوبة فإنت مطلوب منك إنك تجيب زلطة صغيرة واقعة علي الأرض جنبك و تحدفها علي الطوبة و هي جاية تقوم مخليها تقع قبل ما الطوبة تفتح راسك .. كل ده و إنت مغمض عنيك .. محدش قال إن الموضوع سهل أو بسيط .. بس إن الحوثيين يضربوا عليك صاروخ سكود Scud تقوم إنت طالق عليها 5 صواريخ Patriot و ولا واحد فيهم يعرف يصطاد الصاروخ و هو جاي بناء علي الكلام اللي إتقال في جرنان The New York Times يبقي إنت محتاج تفهم هو فيه إيه؟
دلوقتي صواريخ سكود Scud التقليدية خالص إتصممت علي إنها تطير لمسافة قصوي 300 كيلومتر .. سنة 1991 لما قامت حرب الخليج الثانية المهندسين العراقيين كان مطلوب منهم يلاقوا طريقة إنهم يخلوا الصواريخ تقدر تطير لمسافات أكبر .. الحل كان إنك تخلي طول الصاروخ أكبر و تخفف وزنه و بالتالي حجم الرأس المتفجر بتاعه و كتلته بتقل .. بإختصار إنت بدل ما تحدف حد بطوبة كبيرة فإنت حتحدفه بطوبة خفيفة عشان تطير في الجو مسافة أطول .. صحيح مش حتعوره زي ما الطوبة الكبيرة حتعوره بس علي الأقل حتقدر تجيبه من مسافة بعيدة .. اللي عمله الحوثيين إنهم جابوا نفس الحل بتاع المهندسين العراقيين و طبقوه في الصاروخ اللي سموه بركان-2 و ده صاروخ الحوثيين بيقولوا إنهم هم اللي مصنعينه بس الحقيقة هم جابوا صاروخ Scud تقليدي و خففوا وزنه شوية و زودوا طوله بحيث إن بدل ما كان بيقدر يطير لمسافة 300 كيلومتر بقي بيقدر يطير 600 كيلومتر مستريح .. المشكلة إنك لعبت في الAerodynamics بتاعة الصاروخ و ده خلاك مش بتقدر تتحكم أوي هو الصاروخ لما يطير حيطير إزاي.
العراقيين أيام حرب الخليج الأولي كانوا بيخلوا صواريخ Scud المعدلة بتاعتهم تطير لفوق لحد ما تطلع بره الغلاف الجوي للأرض و تطير حبة صغيرين في الفضاء الخارجي بحيث إنها توصل لأقصي إرتفاع 100 كيلومتر عن سطح الأرض و بعد كده تبدأ تنزل علي الهدف بتاعها .. المفروض إن لإن التصميم الأصلي بتاع صواريخ Scud فارض إن كتلة الصاروخ كبيرة فإنت بتبقي عامل حسابك إن و الصاروخ نازل كتلته حتخليه ينزل عمودي علي سطح الأرض .. كأن سباح بينط في حمام سباحة من منط عالي بتلاقيه بينزل لمياه حمام السباحة كأنه زي ما يكون سيف نازل عمودي علي سطح المياه .. المشكلة إن لما العراقيين لعبوا في وزن و طول الصاروخ فلما بيجي ينزل علي الهدف بتاعه بدل ما مقدمة الصاروخ بتنزل عمودية علي سطح الأرض بتلاقيه يميل و ينزل ببطنه .. الإجهادات الحرارية و الإحتكاك مع الغلاف الجوي بيزيد أوي كل ما سطح الصاروخ المعرض للإحتكاك مع الهواء بتزيد و فجأة بتلاقي إن الإجهادات كبرت أوي لدرجة إنها كسرت الصاروخ و هو نازل .. بتلاقي الصاروخ بيفك من بعضه و ينزل كأنه شهاب أو مذنب نازل من الفضاء الخارجي.
المشكلة إن الكومبيوتر و الرادار بتاع بطارية صواريخ Patriot لما بيجي يلقط ده مبيفهمش إن ده صاروخ Scud إتفك من بعضه و بقي نازل للأرض حتت .. لا ده بيفهم إن دي مجموعة صواريخ Scud كلهم جايين مع بعض علي الهدف اللي المفروض إن بطارية صواريخ Patriot بتدافع عنه و تحميه .. فجأة ضابط الدفاع الجوي المسئول عن البطارية بيلاقي نفسه قدام هجوم ساحق من جهة معادية و مبيبقاش قدامه غير إنه في الأول يطلق صاورخين Patriot لإعتراض الصاروخ أو زي ما هو شايف مجموعة الصواريخ اللي جايه و لو الصاروخين دول فشلوا فالكومبيوتر من نفسه بيطبق بروتوكول الحالات الحرجة إنه بيطلق حمولة البطارية كلها من الصواريخ مرة واحدة .. و دي تاني مشكلة .. مش معني إن الكومبيوتر قالك إن صاروخ باتريوت Patriot إنفجر يبقي كده هو قدر يفجر صاروخ Scud و هو جاي لإن ده مش اللي صواريخ Patriot إتصممت علي أساسه.
فاكر لما شبهتلك إن الصواريخ المضادة للصواريخ دي عاملة زي ما يكون حد رمي عليك طوبة فإنت بتجيب زلطة عشان ترميها علي الطوبة و هي جاية في الجو علي أمل إن الزلطة دي تخلي الطوبة تقع علي الأرض قبل ما تعورك؟ .. صواريخ Patriot مش بتشتغل كده أوي .. صواريخ Patriot بتقدر تحسب مسار الصاروخ المعادي و هو جاي و بترمي نفسها قصاده و بتفجر نفسها قدامه بحوالي 10 متر بحيث يبقي شبه مؤكد إن الصاروخ و هو جاي يخبط في شظايا صاروخ Patriot اللي إنفجر و بكده تتأكد إن الصاروخ المعادي حينفجر في الجو قبل ما يسقط علي هدفه .. مجرد ما صاروخ Patriot ينفجر فالكومبيوتر بيدي لضابط الدفاع الجوي إشارة Probable Kill يعني إحتمال كبير يكون صاروخ Patriot أسقط الصاروخ المعادي .. الضباط اللي بيبقوا مسئولين عن البطارية نادراً ما حد فيهم بيطلع بره كابينة التحكم عشان يتأكد بنفسه هل الصاروخ المعادي سقط فعلاً ولا لا إنما هم بيستنوا شوية لو مجتلهمش معلومات عن سقوط صواريخ علي المنطقة اللي هم بيحموها فمن نفسهم بيحولوا إشارة Probable Kill إلي Confirmed Kill .. اللي هم مش بيكونوا عارفينه إن صاروخ Scud المعادي دي إتفكك من بعضه من تأثير الحرارة و الإجهادات Stresses اللي إتعرضلها و هو بيخترق الغلاف الجوي للأرض و إن غالباً صاروخ Patriot إتلخبط و فجر نفسه قدام جزء من أجزاء الصاروخ و إن إحتمال كبير الرأس المتفجر نفسه بتاع صاروخ Scud يكون وقع في حتة تانية و إنفجر و محدش من بطارية الدفاع الجوي بتاعة Patriot خد باله .. و ده بالضبط اللي كان بيحصل حرب الخليج الثانية و ده برده بالضبط اللي حصل لما الصاروخ بتاع الحوثيين وقع علي مطار الرياض.
الحوثيين و العراقيين من غير ما يقصدوا حولوا صواريخ Scud من صواريخ بعيدة المدي لمركبة بتطير بسرعة عالية محدش بيقدر يلقطها بالرادار .. صحيح المركبة دي مش بتصيب الهدف اللي هي رايحة تدمره بس في نفس الوقت إنت مش بتقدر توقعها و هي جاية .. سنة 1991 الأمريكان حاولوا يصلحوا المشكلة دي بإنهم يعالجوا الComputer Code بتاع أنظمة التوجيه و الإطلاق بس ده ممنعش إن حوالي 50% من ال158 صاروخ Patriot اللي أُطلقوا خلال حرب الخليج الثانية أُطلقوا علي شظايا صواريخ Scud مش علي صواريخ حقيقية .. إحنا محتاجين إن تتشكل لجنة عشان نعرف بالضبط هل مشكلة بطاريات صواريخ Patriot ينفع تتعالج ولا لا بس فيه مشكلة تانية و هي هو مين اللي حيحشكل اللجنة دي؟ .. سنة 1991 إتشكلت لجنة فعلاً عشان تشوف إيه اللي حصل بس اللجنة دي إتشكلت من ناس من وزارة الدفاع الأميريكية و من شركة Raytheon الأمريكية اللي هي نفسها بتصنع بطاريات صواريخ Patriot بس طبعاً اللجنة طلعت تقرير قالت إن الدنيا ماشية و زي الفل و إننا إحنا اللي بنبالغ.
المصدر:
مقالة بعنوان Why the Patriot Missile Might Fail America’s Military نشرت في مجلة The National Interest و ده لينك المقالة الأصلية:
https://nationalinterest.org/feature/why-the-patriot-missile-might-fail-americas-military-23530
