القوات الجوية التركية .. لما تمام يافندم توديك في ستين داهية.

تعديل إتعمل يوم 16 مارس 2021 .. بسبب قرار تركيا شراء منظومة الدفاع الجوي S-400 فالأمريكان طردوهم بره برنامج الطيارة F-35 Lightening II بعد ما كان المفروض تركيا تاخد 20 طيارة منها.

موضوعنا النهاردة حيدور حول الغباء .. مشكلة الغباء إنه عامل زي الموت كده لما بتموت كل الناس بتشوفك ميت وبتعيط عليك بس إنت مش بتحس بحاجة لإنك مش معانا .. الغباء كده برده .. الناس كلها بتشوفك غبي إلا إنت بتبقي الوحيد اللي شايف نفسك علي حق .. الموضوع بيزداد سوء لما اللي ربنا بيبتليه بالغباء بيبقي شخص في منصب سلطة إتعود إن محدش يقوله لا فياعيني بيبقي حوليه دايرة مستشارين كل وظيفتهم إنهم يطبلوله ويمجدوا فيه ومش بيحسسوه خالص بغباءه فبنبقي إحنا كلنا شايفينه غبي إلا هو شايف نفسه طبيب الفلاسفة .. ده بالضبط اللي حصل في القوات الجوية التركية لإن مفيش تفسير تاني للي عمله الرئيس التركي (رجب طيب أردوغان) .. عشان تفهم اللي حصل خليني أرجعك بالزمن ليوم 15 يوليو 2016 وده اليوم اللي  إتقال فيه إن حصلت محاولة الإنقلاب الفاشلة للإطاحه ب(أردوغان) لو تفتكر.

لو أخدت بالك أنا قلت “إتقال فيه إن حصلت محاولة الإنقلاب” والحقيقة إني قاصد أقول كده .. تركيا دولة بينها وبين الإنقلابات العسكرية علاقة من اللي بيتقال عليها Abusive اللي هو طرف في العلاقة بيعامل الطرف التاني زي الزفت بس الطرفين مبسوطين بكده .. من سنة 1960 لحد سنة 1997 حصلت في تركيا 4 إنقلابات عسكرية علي حكومات مدنية منتخبة اللي هو بمعدل إنقلاب عسكري كل عشر سنين .. بالمعدل ده القوات المسلحة التركية بقت بتعرف تعمل إنقلابات عسكرية وهي مغمضه .. لو حطيت ده في إعتبارك وبصيت علي اللي حصل يوم 15 يوليو 2016 حتلاقيك قدام ناس مش عارفه ألف باء إنقلابات:

• فيه مجموعة جنود ضمن المجموعة اللي نفذت الإنقلاب كان مطلوب منها تقفل كوبري البوسفور اللي بيربط مدينة إسنطبول بباقي تركيا .. اللي حصل إن المتخلفين بدل ما يقفلوا الكوبري في الإتجاهين قفلوه في إتجاه واحد بس.
• أكيد إنت شفت فيديوهات علي YouTube لضباط جيش أتراك من المفروض إنهم شاركوا في الإنقلاب وهم بيستسلموا للمدنيين ورجال الشرطة التركية.
• خد التقيلة بقي .. وقتها لما الإنقلاب حصل (أردوغان) كان في أجازة ولما عرف إن فيه إنقلاب ركب طيارته الخاصة ورجع تاني تركيا .. وهو في الجو فيه إتنين مقاتلات F-16 Fighting Falcon طاروا ورا الطيارة بتاعة (أردوغان) وكان المفروض إنهم يوقوعوها في الجو بس ده محصلش .. ليه؟ الله أعلم .. يعني إيه اللي حصل خلي الإتنين طيارين ولا واحد فيهم يتك علي الزرار بتاع إطلاق الصاروخ ويقتل (أردوغان) والإنقلاب ينجح؟ محدش عارف.

تفاصيل الإنقلاب ده أو خلينا نكون دقيقين ونقول محاولة الإنقلاب الفاشلة اللي إتلمت في أقل من ساعة دي لما ناس ركزت فيها شوية طلعت نظرية قالت إن أساساً ده إنقلاب مزيف وإن مكنش فيه إنقلاب ولا حاجة وإن دي مسرحية عملتها الحكومة التركية عشان يبقي ليها حجة إنها تطهر المؤسسة العسكرية من كل الجنرالات والرتب الكبيرة اللي معروف عنهم إنهم متعاطفين أو مؤمنين بفكر واحد إسمه (عبدالله جولين) وده رجل كبير في السن عايش دلوقتي في أميركا بس الرجل ده كان حليف وصديق مقرب من (أردوغان) لحد ما فجأة قلبوا علي بعض سنة 2006 ومن ساعتها و(أردوغان) بيتهمه بإنه عايز بأي طريقة يطيح به عشان يحكم هو .. سواء إنت كنت مصدق النظرية دي أو لا مش حتفرق خالص  .. لإن اللي حصل بعد كده كان غلطة لا تغتفر عملتها القوات المسلحة التركية في حق نفسها.

أنا أقدر أفهم إنك عايز تكنس المؤسسة العسكرية من أي حد متعاطف مع فكر (عبدالله جولين) بس ده مش مبرر إنك تطلع بره الخدمة 300 طيار مقاتل شغالين علي أسطول مقاتلات F-16 Fighting Falcon اللي هي العمود الفقري للقوات الجوية التركية .. صحيح إن (أردوغان) حقق اللي هو عايزه إنه ضمن إن القوات المسلحة التركية بقت في جيبه بس لازم حد يلاقي إجابة علي السؤال ده: هو بالصلاة علي النبي مين اللي حيطير بأسطول مقاتلات F-16 بتاعتكوا؟

أهم حاجة في الدنيا هي التوقيت .. إنت ممكن تكون نيتك صافية بإنك تروح لخطيبتك ببوكيه ورد في شغلها بس تكون هي متخانقة مع رئيسها في الشغل وإنت متعرفش تقوم رايحلها تصالحها وهي مش في المود تقوم مزعقه في وشك وإنت يا عيني مش فاهم إيه اللي بيحصل .. الأتراك دلوقتي شغالين في حرب في شمال سوريا وطايحين في مدينة عفرين ومحدش عارف هم ناووين يقفوا لحد فين ومعرضين في أي لحظة إن تحصل مواجهة جوية مع مقاتلات إسرائيلية أو أميريكية أو سورية أو حتي روسية وده اللي حصل فعلاً قبل كده لو تفتكر إن مقاتلة F-16 Fighting Falcon تركية أسقطت مقاتلة روسية فوق المجال الجوي التركي .. اه بالمناسبة الطيار التركي اللي أسقط الطيارة الروسية هو واحد من ال300 طيار مقاتل اللي إتسرحوا من الخدمة بعد محاولة الإنقلاب.

الأتراك زي ما يكونوا مكانوش مش واخدين بالهم إن تسريح 300 طيار مقاتل مرة واحدة مش حيعملهم مشكلة كبيرة وبقوا محتاسين يحلوا المشكلة دي إزاي فبدأوا يحاولوا يجيبوا طيارين من بره .. ده حقيقي .. الأتراك طلبوا من الأمريكان يبعتولهم طيارين أمريكان يدربوا الطيارين الأتراك اللي لسه متخرجين من الكلية الجوية بس الأمريكان رفضوا وقالوا إن الأتراك يقدروا يبعتوا الطلبة بتوعهم أميركا يتدربوا هناك بس الأمريكان مش حيبعتوا حد .. الأتراك طلبوا مساعدة الباكستانيين اللي هم برده عندهم أسطول كبير من مقاتلات F-16 بس فكرة إن الأتراك يتدربوا علي إيد الباكستانيين ده في حد ذاته بيعتبر خرق لإتفاق شراء المقاتلات اللي مضته تركيا مع أميركا .. في خطوة فعلاً توريك قد إيه قيادة القوات الجوية التركية وصلت لمرحلة اليأس إنهم طلعوا قرار تعسفي بإنهم حيسحبوا رخصة الطيران المدني لأكثر من 330 طيار سابق طلعوا علي المعاش خلاص أو قدموا إستقالاتهم لو رفضوا يرجعوا تاني للخدمة في القوات الجوية التركية لمدة 4 سنين بس الحل ده ممكن يفرقع في وش الحكومة التركية لإن ممكن شركات الطيران اللي الطيارين الأتراك شغالين فيها ترفع قضايا عليها وفيه كلام كتير علي إن الحل ده مش حيتنفذ.

وسط الحيرة ووسط اللطم والصويت والتفكير في إزاي القوات الجوية التركية حتحمي سماء تركيا وهي معندهاش طيارين كفاية طلع حد متفهمش هو مين ولا إتكلم بصفته إيه وإقترح إن تركيا تروح تشتري أنظمة دفاع جوي متقدمة .. اللي هو إحنا معندناش طيارين بس حنشتري بطاريات دفاع جوي قال يعني ده حيغطي علي ده .. المهم إن الأتراك راحوا إتكلموا مع الروس عشان يشتروا منهم بطاريات صواريخ S-400 البعيدة المدي والمضادة للطيارات وهنا إنت محتاج تفهم كذا نقطة عشان تشوف قد إيه الأتراك لبسوا في الحيط ومش لاقيين حل يا عيني للمصيبة اللي هم وقعوا نفسهم فيها.

الأتراك أعضاء في حلف شمال الأطلسي NATO اللي هو بيعتبر روسيا عدو إستراتيجي زي ما إحنا كعرب كده بنعتبر إسرائيل عدو إستراتيجي .. الأتراك بفكرك وقعوا طيارة روسي فوق تركيا السنة اللي فاتت والعلاقات بين البلدين كانت زي الزفت بس عشان الأتراك لبسوا في الحيط مبقاش عندهم حل غير إنهم يقولوا للكلب يا سيدي ويعصروا علي نفسهم لمونة ويروحوا يشتروا بطاريات S-400 من الروس .. مش كده وبس .. الأتراك إتفقوا مع شركة فرنسية إيطالية اسمها يوروسام Eurosam عشان تصنع لتركيا مخصوص صواريخ دفاع جوي أرض-جو بعيدة المدي.

شوف الغباء لما محدش بيعرف يفرمله خلي الأتراك يعملوا ايه:

• خلاهم في لحظة نرفزة يمشوا 300 طيار مقاتل علي مقاتلات F-16 والطيار الواحد واقف علي الحكومة التركية ب11 مليون دولار ده عشان بس يتخرج من الكلية اللي هو يعني يبقي طيار Fresh Graduate .. زود علي كده إنه مع كل ساعة طيران بيطيرها خبرته بتزيد لحد ما يبقي Senior Pilot وساعتها قيمة الطيار ده مبقتش ينفع تتحسب لإنه بقي غالي جداً عشان كده القوات الجوية الأميريكية مثلاً معندهاش مشكلة إنها عشان تغري طياريها ميطلعوش بره الخدمة بدري تديهم حوافز بتوصل نص مليون دولار في السنة .. فإنت لما تمشي جزء كبير من الطيارين اللي حيلتك مش بس إنت بترمي فلوسك علي الأرض إنت كمان بتضيع سنين خبرة متتعوضش.
• لما الأتراك لقوا نفسهم من غير غطاء جوي لإن معندهمش طيارين كفاية يطيروا أسطول الF-16 بتاعهم لقوا إنهم عشان يأمنوا نفسهم لازم يدفعوا دم قلبهم عشان يشتروا منظومة S-400 الروسية اللي هي أساساً عمرها ما حتشتغل مع منظومات الدفاع الجوي اللي شغاله بيها دول الNATO يعني إزاي الأتراك حيدخلوا المنظومة في الخدمة عندهم ده صداع في راسهم الله أعلم حيحلوه إزاي؟ وكمان حيدفعوا دم قلبهم عشان يخلوا شركة Eurosam تعملها صواريخ دفاع جوي بعيدة المدي عشان تصطاد الصواريخ الباليستية .. يعني إنت حتدفع عشان تشتري منظومتين دفاع جوي مرة واحدة لمجرد إنك مشيت 300 طيار .. طب ما كنتوا خلوا الطيارين يا أخي.

المصادر:

• مقالة بعنوان How Turkey Destroyed Its Own Air Force نشرت في مجلة The National Interest وده لينك المقالة الأصلية:
  http://nationalinterest.org/blog/the-buzz/how-turkey-destroyed-its-own-air-force-24942