JSOC .. زكريا الدرديري بتاع القوات المسلحة الأميريكية.

لينك التسجيل الصوتي للمقالة علي ساوند كلاود:
https://on.soundcloud.com/A6E67

موضوعنا النهاردة اللي حنتكلم عنه هو جاي-سوك JSOC .. أنا عارف إنك مستغرب الإسم .. جاي-سوك JSOC ده يبقي الإسم المختصر لقيادة العمليات الخاصة المشتركة الأميريكية اللي هي Joint Special Operations Command .. إسم JSOC إتقال قدامك في أفلام أكشن كتير أوي علي فكرة بس يمكن اللي بيترجم بيقول عليهم القوات الخاصة وخلاص بس هم مش مجرد وحدة قوات خاصة .. دول مش زي 777 ولا 999 اللي عندنا في الجيش المصري .. عشان تفهم قد إيه القيادة دي مهمة وليها مكانة كبيرة في قلوب وعقول الأمريكان خليني أديك الإحصائية دي .. في أخر 193 يوم قضاها (باراك أوباما) كرئيس لأميركا هو أمر JSOC بإنها تنفذ 21 مهمة عسكرية داخل دول مش في حالة حرب مع أمريكا وأهم الدول دي كانوا اليمن والصومال وباكستان .. يعني بتتكلم عن مهمة عسكرية بتتنفذ كل تقريباً 10 أيام .. جري الشريط لأول 193 يوم في حياة الرئيس الأميريكي الجديد (دونالد ترامب) حتلاقيه أمر JSOC بإنها تنفذ 965 مهمة .. أيوه زي ما سمعت .. أنا بتكلم عن 5 أضعاف عدد المهمات اللي كانت بتتنفذ قبل كده .. إحنا متؤكدين إن JSOC نفذت 92 مهمة في اليمن و 4 مهمات في باكستان و 6 مهمات في الصومال وده بيخلينا نحاول نسأل كذا سؤال مهمين:

• مين هي JSOC دي أصلاً؟ وهل هم جنود خارقين عشان ينفذوا العدد المهول ده المهمات في وقت ضيق زي ده؟
• هل هم يقدروا يكملوا ينفذوا مهماتهم بالمعدل ده؟

خلينا نبدأ بإننا نفهمك مين هي JSOC دي أصلاً؟

القوات المسلحة الأميريكية زيها زي أي قوات مسلحة في العالم بتتكون من أفرع رئيسية اللي هي القوات الجوية USAF والقوات البحرية US Navy والقوات البرية US Army .. من ضمن الأفرع الرئيسية للقوات المسلحة الأميريكية هي قيادة العمليات الخاصة Special Operations Command وإختصاراً بتتسمي SOCOM حاول تتخيل إن الأمريكان خدوا وحدات الصاعقة في الجيش المصري فصلوها عن القوات البرية وبقت قيادة مستقلة بذاتها زي القوات الجوية والبحرية .. اللي حصل إنهم سنة 1980 لما قامت الثورة الإسلامية في إيران تم إحتجاز 52 مواطن أميريكي اللي كانوا شغالين في السفارة الأميريكية في طهران كرهاين .. إتفرج علي فيلم Argo وإنت حتعرف تفاصيل اللي حصل .. الأمريكان لما حاولوا يحرروا الرهاين دول بعملية عسكرية العملية باظت منهم خالص بسبب سوء الإعداد والتدريب .. رد فعل المؤسسة العسكرية الأميريكية إنهم قالوا لنفسهم إحنا محتاجين نبقي أحسن من كده ومن الكارثة دي إتولدت فكرة JSOC.

هم جابوا منتخب من نخبة النخبة من الناس اللي شغالين في مختلف الأفرع الرئيسية دي كلها .. جابوا طيارين من القوات الجوية .. جابوا صفوة بحارة القوات البحرية .. جابوا أحسن ناس في قوات دلتا فورس Delta Force اللي هي القوات الخاصة بتاعة القوات البرية الأميريكية .. جابوا أحسن ناس في Navy SEAL اللي هم القوات الخاصة للقوات البحرية  .. جابوا أحسن عناصر في الفيلق ال75 لقوات الجوالة Rangers … جابوا الناس دي كلها وحطوهم جوه قيادة مستقلة بتتبع SOCOM وسموا القيادة دي أو المنتخب ده JSOC أو Joint Special Operations Command اللي هي إدارة العمليات الخاصة المشتركة .. القيادة دي مقرها قاعدة فورت براج Fort Bragg في ولاية كارولينا الشمالية .. لو إنت كنت طيار هليكوبتر في القوات الجوية الأميريكية وكنت جامد زخليقة لدرجة إنهم ضموك لJSOC فإنت خلاص مبقاش ليك علاقة بسلاح الجو .. ممكن عشان تنفذ مهمة يدولك طيارة هليكوبتر تابعة للقوات الجوية بس محدش من القوات الجوية له كلمة عليك.

مهم تكون عارف إن الناس بتوع JSOC مش ضباط مخابرات .. هم مش ضباط في وكالة المخابرات المركزية CIA .. ده معناه إن كل مهمة بينفذوها من حق المواطن الأميريكي إنه يعرف كل حاجة عنها .. إنت لو معاك باسبور أمريكاني من حقك تعرف كل مهمة إتعملت فين؟ وإمتي؟ وليه؟ .. المهمات الوحيدة اللي بتعتبر مهمات سرية هي 4 غارات جوية إتعملوا بطائرات بدون طيار Drones فوق باكستان اللي هي دولة المفروض إنها حليفة لأميركا بس ده ممنعش الأميريكان إنهم يضربوها بالطيران كل فترة من سنة 2004 .. كل 6 شهور بتقعد لجنة ممثلة عن JSOC قدام الكونجرس الأميريكي عشان يشرحلوا لأعضاء مجلس الشعب إيه هي المهمات اللي إتتفذت؟ وليه؟ وإمتي؟ .. دور JSOC عامل زي دور الأستاذ (زكريا الدرديري) في فيلم الناظر .. هم بيعملوا كل حاجة .. تصفية و إعتقال الإرهابيين تلاقي .. تحرير رهاين تلاقي .. جمع معلومات مخابراتية تلاقي .. إستطلاع عسكري برده تلاقي .. و هي دي المشكلة .. إنت بتتكلم عن فئة محدودة أوي من القوات المسلحة يدوبك أفرادها كلهم يمثلوا 5% من إجمالي الناس اللي علي ذمة القوات المسلحة الأميريكية بس ال5% دول مسئولين عن أغلب العمليات العسكرية اللي بتحصل حالياً .. بتتكلم عن 5% شايلين شغل يشيله جيش بلد بحاله.

فيه شوية نقاط عايزين نحطهم عشان تبدأ تفهم صعوبة شغل JSOC ومنه تفهم قد إيه الناس دي بيتحط عليها زي ما بنقول:

• أول حاجة إن الناس دي مش شغالة بمبدأ نقتل الأول ونسأل بعدين .. الفكر اللي JSOC إتبنت عليه إنهم مش موجودين عشان يصفوا الإرهابيين وخلاص .. هم موجودين عشان يقبضوا علي الإرهابيين أحياء عشان يستجوبوهم ويطلعوا منهم بمعلومات تفيدهم .. الفكر ده ساهم في إنه يبقي موجود واحد إسمه الجنرال (جوزيف فوتيل Joseph Votel) .. الرجل ده لحد مارس 2019 كان قائد القيادة المركزية الأميريكية بس في الفترة من 2014 لحد 2016 كان شغال قائد SOCOM اللي بفكرك هي قيادة القوات الخاصة .. وفي الفترة من 2012 لحد 2014 كان هو قائد JSOC.
• ثاني حاجة ودي نقطة مرتبطة بالأولي .. الناس بتوع JSCO هم رأس الحربة للقوات المسلحة الأميريكية ضد الإرهاب والناس دي تقدر تقول إنهم إقتنعوا إن إغتيال قادة داعش والقاعدة بغارات جوية بطائرات بدون طيار مبقاش يجيب نتيجة .. الجنرال (جوزيف فوتيل) بنفسه قال كده لما الصحفيين سألوه عن إنهم كل شوية يسمعوا تقارير إن الروس بيقولوا إنهم قتلوا زعيم تنظيم داعش (أبوبكر البغدادي) في غارة جوية وإن ولا مرة الأمريكان طلعوا قالوا إنهم إستهدفوه .. صحيح إن الأمريكان قتلوا (أبوبكر البغدادي) بغارة بطيارة بدون طيار برده في أكتوبر 2019 بس في كل مرة الجنرال (جوزيف فوتيل) بيتسأل السؤال ده كان رده إنك حتي لو قتلت (البغدادي) حيطلع غيره ولو قتلت البديل بتاعه حيطلع واحد تاني .. التنظيمات الإرهابية زي داعش والقاعدة مينفعش تقضي عليها بفكر يلا نقطع رأس الحية.
• النقطة الثالثة ودي أهم نقطة إن المخ بتاع JSOC مش عسكريين .. ده حقيقي علي فكرة .. المخ بتاع القيادة دي المسئول عن تحديد الأهداف ومين القائد الميداني في داعش أو القاعدة اللي محتاجين يقبضوا عليه؟ وإزاي يقبضوا عليه؟ ده عبارة عن لجنة شبه مستقلة إسمها Pre-Strike Pause Cell واللي أنا بسميها لجنة فرملة النفس قبل تنفيذ العمليات العسكرية .. من إسمها اللجنة دي بتفرمل رغبة العسكريين إنهم يشدوا أجزاء مدفعهم الرشاش عشان يروحوا يقتلوا حد .. اللجنة دي مكونة من مدنيين وعسكريين شغالين مع بعض عشان يتحط قدامهم كل المعلومات المخابراتية عشان يراجعوها ويقروها كلمة كلمة لحد ما يوصلوا في الأخر لهدف وطريقة لقتل أو إعتقال الهدف من غير ما يحصل أي سقوط لقتلي من المدنيين وإنك تكون ضامن إنك قتلت أو إعتقلت الإرهابي الصح.

فكرة إني أطلب منك إن المدنيين يبقي ليهم حق الرقابة علي شغل العسكريين مش معناه خالص إني شاكك في قدرات العسكريين .. أنا بس عايز حد يراجع ورا شغلهم .. زي ما بالضبط في أي شركة تصميم هندسي فيه مهندسين بيراجعوا ورا شغل المصممين .. مش لعدم ثقة إنما لإن الأخطاء واردة والمراجعة بتتفادي الأخطاء وبتطلع شغل زي الفل .. وهي دي المشكلة اللي بتواجه JSOC .. في بداية عهد (باراك أوباما) والكلام ده كان سنة 2008 كان باين أوي إن القوات المسلحة بقت بتعتمد علي شغل JSOC .. ضغط الشغل الزيادة بيولد أخطاء .. دي معلومة أو قاعدة أي حد في سوق الشغل عارفها .. من هنا جت فكرة إن لازم الكونجرس يراقب شغل JSOC بشوية إهتمام زيادة .. سنة 2012 الكونجرس طلع قانون إن لازم كل 6 شهور يجي ممثل من وزارة الدفاع يتكلم مع الكونجرس يشرحلهم إيه هي المهمات العسكرية اللي إتنفذت خلال الفترة دي؟ .. سنة 2017 إتعدل القانون إن بدل ما كانت الزيارة دي بتحصل كل 6 شهور بقت بتحصل كل شهر .. ليه؟ .. لإن الناس كلها عارفه إن الضغط علي JSOC كبير وبالتالي محتاجين نركز أكثر في المراجعة ورا شغلهم.

في كل مرة بيجي ممثل وزارة الدفاع للكونجرس فالرجل ده بيتعصر في حاجة إسمها جلسة إستماع أو Hearing .. زي ما إحنا في مصر البرلمان مقسوم نصين اللي هم مجلس الشعب والشوري فكمان الكونجرس مقسوم نصين اللي هم الشيوخ والنواب أو Senate و House .. كل نص فيهم فيه لجنة قوات مسلحة مستقلة أساميهم SASC و HASC .. أعضاء SASC حوالي 27 عضو وأعضاء HASC حوالي 61 عضوا بيستنوا ممثل وزارة الدفاع عشان يعصروه وينزلوا منه ضباط صغيرين .. عادة مش كلهم بيحضروا كل واحد علي حسب جدوله .. بس لما بتكون JSOC عاملة مصيبة وبيجي ممثل وزارة الدفاع قدام الكونجرس فبتبقي الجلسة كاملة العدد .. أخر مرة ده حصل كان يوم 29 يناير 2017 لما قبلها JSOC عملت مصيبة بإنها نفذت مهمة كارثية في اليمن راح ضحيتها 29 مدني وإتقتل ضابط من Navy SEAL وتحطمت طيارة هليكوبتر ثمنها 70 مليون دولار .. في الجلسات دي JSOC بيمثلها عدد من المسئولين بيكونوا Mix من مدنيين علي عسكريين والناس دي بتبقي من مكتب مساعد وزير الدفاع الأميريكي للعمليات الخاصة.

اللي دايماً بيعمل مشكلة بين أعضاء الكونجرس اللي المفروض إن دورهم هو الرقابة المدنية علي شغل JSOC هو إنهم مش متفقين علي نموذج الإجابة .. حاول تتخيل إن  JSOC هو طالب بيمتحن ولجنة القوات المسلحة في الكونجرس هي المصحح .. في أغلب الوقت الطالب اللي هو JSOC بيبقي مقتنع بإن الإجابة الصح للأسئلة المطروحة عليه هي اللي هو حطها في ورقة الإجابة .. المشكلة إن المصحح بيبقي في دماغه إجابة تانية .. خليني أحط ده قدامك بسؤال: هو إمتي تقول إن وحدة قتالية خاصة زي JSOC أو حتي 777 نجحت في مهمتها؟ السؤال من ناحية تانية .. لنفترض جدلاً إن JSOC دي مصرية وهي اللي شغاله في مكافحة الإرهاب في شبه جزيرة سيناء فإزاي تحكم علي شغل JSOC إذا كان جايب نتيجة أو لا؟

فكر فيها كده حتلاقي عندك 3 معايير لو واحد فيهم علي الأقل إتحقق يبقي كده JSOC نجحت:

• أول معيار إنك تسمع في الجرايد والإعلام إن التنظيمات الإرهابية في سيناء وصلت لإتفاق سلام مع الحكومة لإنهاء حالة الحرب وساعتها يبقي فعلاً Game Over وكده JSOC جابت الدرجة النهائية لإنك عرضت التنظيمات الإرهابية في سيناء لخسائر فادحة أجبرتها إنها تعترف إن خلاص مفيش فايدة الحرب دي تكمل.
• ثاني معيار إن العمليات الإرهابية اللي بتحصل في سيناء تقل بشكل ملحوظ .. إنت هنا موصلتش لمرحلة إنك أجبرت التنظيمات الإرهابية إنها تمضي علي إتفاق سلام .. بس إنت حجمت دورها أوي .. لو في أول معيار حنعتبره إمتياز فخلينا نعتبر المعيار ده إنه كأنه درجة جيد جداً.
• ثالث معيار إنك تسمع كل شوية في الإعلام إن JSOC صفت بؤر إرهابية وقتلت كام إرهابي .. إنت هنا عمال تقلل من عدد المقاتلين في صفوف العدو .. بس لا العدو بيبطل هجماته ولا فيه إتفاق سلام .. هنا إنت بتتكلم إن JSOC  درجتها جيد وممكن تخليها مقبول كمان.

بص كده علي سجل JSOC في حربها ضد داعش وحتلاقي إن درجتهم في الأول لو جابت جيد يبقي إنت كده بتكرمهم وفضل تقديرهم يعلي ويعلي لحد ما وصلوا لمرحلة الجيد جداً .. الناس دي في حالة حرب ضد داعش بقالهم 6 سنين من شهر أغسطس 2014 لما (أوباما) أعلن قيام التحالف الدولي ضد داعش .. في الوقت ده CIA اللي هي وكالة المخابرات المركزية الأميريكية قدّرت عدد المقاتلين اللي في صفوف داعش حوالي 20,000 مقاتل لو كتروا أوي يبقوا 31,500 مقاتل والكلام ده إتقال نصاً في تقرير إسمه Country Reports on Terrorism بتطلعه وزارة الخارجية الأميريكية كل سنة .. سنة 2016 التقديرات قالت إن عدد مقاتلي داعش قل بقي ما بين 12,000 ل15,000 مقاتل .. يعني إيه الكلام ده؟ .. لو جبت المتوسط فمقاتلي داعش قلوا بنسبة 48% من 25,750 مقاتل سنة 2014 لحد ما بقوا 13,500 سنة 2016 .. حط ده علي جنب دلوقتي .. بعدها بسنة يعني 2017 القائد بتاع SOCOM اللي هو الجنرال (طوني توماس Tony Thomas) قال يوم 21 يوليو 2017 إن القوات المسلحة الأميريكية قتلت حوالي 60,000 أو 70,000 مقاتل من داعش .. ده معناه إن الرجل ده بيقول إنهم قتلوا عدد أكثر بحوالي ضعفين ونص العدد اللي CIA قدّرت إنه إجمالي عدد مقاتلي داعش من سنتين .. ده معناه إن عندك 3 إحتمالات: إما CIA كانت بتهبد وجابوا تقديراتهم دي بانهم كانوا بينجموا .. إما إن الأخ (طوني توماس) فشار وكداب كدب الإبل .. أو إن JSOC حتي فشلت في إنها تحقق المعيار الثالث اللي هو تقلل من عدد مقاتلي العدو لإنهم بالعكس زادوا.

مش داعش لوحدها اللي JSOC مش قادرة عليها .. عندك اليمن .. بعد أكثر من 200 غارة جوية خلال ال8 سنين اللي فاتوا تلاقي وزارة الخارجية الأميريكية طالعه تقول إن تقديرها لأعداد مقاتلي تنظيم القاعدة في شبه الجزيرة العربية اللي مقره اليمن زاد من مئات المقاتلين سنة 2010 لحد ما بقوا 4000 مقاتل دلوقتي.

ده يودينا للسؤال الثاني: هل بعد ما أثبتنا إن JSOC مش قادرة أو خلينا نقول فاشلة في القضاء علي الإرهاب فهل (دونالد ترامب) حيفضل معتمد عليها برده؟

الإجابة بمنتهي الوضوح اه .. (ترامب) معندوش حل غير اللي لجأ له (أوباما) وإنه يفضل معتمد بشكل متزايد علي JSOC .. المشكلة إنه مش بس بيؤدي لإرهاق سلاح القوات الخاصة الأميريكية إنما كمان ده سلاح مش فعال وملوش أي كفاءة ملحوظة .. وده يوريك قد إيه الإعتماد علي الحل العسكري لمشكلة سيناء مش حيجيب نتيجة .. لو إحنا واخدين الأمريكان كمرجع أو Reference فالوضع قدامك أهو .. عندك JSOC اللي هم صفوة الصفوة في العمليات الخاصة مش عارفين يخلصوا علي داعش .. عشر سنين عشان بس يقدروا يحجموا من دورها فإيه اللي مخليك مقتنع إن الجيش المصري قادر إنه يحقق معجزة ما ويقضي عليهم في سيناء؟ .. الحل العسكري لوحده مش حيجيب نتيجة بس للأسف زي ما إنت متقدرش تروح لدكتور تقوله إن كل اللي إنت إتعلمته عن التشريح في الكلية غلط لإنه ببساطة مش حيصدقك وحيعتبرك واحد أهبل مش فاهم إنت بتتكلم عن إيه فبرده مش حينفع تروح للعسكريين تقولهم إن كل اللي أنتوا إتعلمتوه في الكلية وفي حياتكوا العملية مش حيجيب نتيجة لإن الرد بمنتهي البساطة حيكون لما تدخل الجيش إبقي إتكلم أو خلي الست الوالدة تروح هي تدافع عن سيناء.

المصدر:

• مقالة بعنوان Donald Trump is Pushing America’s Special Forces Past the Breaking Point نشرت في مجلة Foreign Policy الأميريكية وده لينك المقالة الأصلية:
  http://foreignpolicy.com/2017/08/01/donald-trump-is-pushing-americas-special-forces-past-the-breaking-point-jsoc-navy-seal/