موضوعنا النهاردة اللي حنتكلم عنه هو القهوة و ده موضوع مش محتاج مقدمات .. فيه مننا ناس لو سحبت منهم فنجان القهوة بتاع الصبح فإنت كده حرمتهم من الإصطباحة بتاعتهم و أنا منهم الحقيقة و يومهم بيقفل خلاص و عشان كده القهوة مهمة بالنسبة لناس كتير مش بس في مصر إنما في العالم كله .. اللي حنتكلم عنه النهاردة هو إن إزاي كمان كام سنة فنجان القهوة اللي إنت بتصطبح به الصبح حتتحرم منه بسبب ظاهرة الإحتباس الحراري.
الحقيقة إن الإستهلاك العالمي للقهوة مبقاش زي الأول .. القارة الأوروبية لوحدها بتستهلك ثلث الإنتاج العالمي للقهوة لدرجة إنك تحس إن الأوروبيين بيشربوا قهوة أكتر ما بيشربوا مياه و خمرة حتي .. الصين علي الناحية الثانية خلال الخمس السنين اللي فاتوا إستهلاكها من القهوة تضاعف و لما دولة تعداد سكانها معدي المليار و نص نسمة إستهلاكها من حاجة يزيد الضعف فإنت عندك مشكلة كبيرة .. عندك كندا اللي 90% من إجمالي سكانها بيشربوا قهوة علي الأقل مرة في اليوم .. اللي نقدر نفهمه من كل ده إن الإستهلاك العالمي للقهوة و الطلب عليها بيزيد يوم عن يوم خصوصاً في الدول المتقدمة زي أميركا و كندا و أوروبا و الصين .. ده بيشكل ضغط علي الدول اللي بتنتج القهوة و اللي أغلبها دول نامية .. بس إنت لو بصيت عليها من وجهة النظر دي فإنت مش حتقدر تفهم المشكلة فين لإن المنطق بيقول هو حد بيقول للرزق لا .. إنتي دولة نامية بتنتجي منتج ما و الطلب عليه بيزيد فإيه المشكلة؟ ما أنا عمال أنتج و أبيع و أكسب فلوس .. المشكلة بتظهر لما بتدخل ظاهرة الإحتباس الحراري في المعادلة.
مهم تكون فاهم إن القهوة هي أكتر منتج بيتباع و بيتاجر به في العالم بعد البترول .. إذا كان البترول إنتاجه و تصديره حكر علي شوية دول اللي هم دول الأوبيك OPEC فإنت عندك البن بيتزرع في أكتر من 60 دولة و فيه أكثر من 25 مليون عيلة علي مستوي العالم دخلها قائم علي زراعة و إنتاج البن يعني بتتكلم عن بأقل التقديرات 100 مليون بني أدم علي مستوي العالم دخلهم اليومي معتمد علي زراعة و إنتاج البن .. أهم 3 دول بيزرعوا و ينتجوا بن هم البرازيل و فيتنام و كولومبيا .. الإنتاج العالمي للقهوة سنة 2017 وصل لمستويات محدش كان متخيل إننا ممكن نوصلها .. إن العالم ينتج 153 مليون شوال كل شوال حمولته 60 كيلوجرام فإنت محتاج تقف و تسأل نفسك هو إحنا نقدر نكمل ننتج قهوة بالمعدلات الرهيبة دي لحد إمتي؟ و الحقيقة إنك لازم تسأل نفسك السؤال ده لإن القهوة تعتبر Business كبير أوي .. فيه تقديرات بتقول إن Business القهوة بيتقدر ب100 مليار دولار يعني كحجم Business هو زيه زي تجارة السلاح فأي هزة أو عدم إستقرار فيه حتعمل مصايب.
برده إحنا مقولناش إيه المشكلة؟ .. المشكلة إن أغلب أراء الخبراء بتقول إن بعد إن شاء الله 80 سنة يعني علي سنة 2100 و عليك ألف خير لو كملنا علي نفس الحال بتاع دلوقتي فأكثر من 50% من مزارع البن في العالم مش حتبقي صالحة للزراعة أصلاً و ده سببه كذا حاجة من إرتفاع درجة حرارة سطح الأرض للتغيرات اللي بتحصل لمعدلات سقوط الأمطار الموسمية .. في الاخر الإستنتاج النهائي إننا كبشر لو كملنا علي نفس الحال اللي إحنا ماشيين عليه دلوقتي مش حنقدر نحافظ علي نفس معدلات إنتاج البن اللي إحنا بننتجها دلوقتي .. ظاهرة الإحتباس الحراري ممكن تدمر إقتصاديات دول كاملة من اللي إقتصادها معتمد علي إنتاج البن .. بناء علي تقديرات الأكاديمية الوطنية للعلوم National Academy of Science فدول أميركا الجنوبية لوحدها حتخسر أكثر من 90% من إجمالي أراضيها الزراعية اللي بيتزرع فيها بن .. دولة زي أثيوبيا اللي تعتبر سادس أكبر منتج للبن علي مستوي العالم حتخسر أكثر من 60% من أراضيها الزراعية بحلول سنة 2050 .. ده يفسرلك ليه الأثيوبيين مكملين بالإرادة دي في بناء سد النهضة بتاعهم لإن السد ده يعتبر مسألة حياة أو موت .. الأثيوبيين عارفين إن من غير السد ده هم حيموتوا من الجوع.
خلينا نرعبك شوية و نقولك السيناريو اللي حيحصل بالتدريج للإنتاج العالمي للقهوة و البن لو البشر معملوش خطوات جادة لحماية الأرض من الإحتباس الحراري:
- في الأول خالص درجة حرارة سطح الأرض حتبدأ تعلي و الأمطار الموسمية حتبدأ تقل فحتبدأ الحشرات و الأمراض اللي بتصيب المحاصيل الزراعية زيها زي أي كائن حي يهاجر من المناطق الإستوائية اللي درجة الحرارة فيها بقت لا تطاق و مينفعش يتعاش فيها لمناطق درجة حرارتها أبرد شوية.
- لإن أكثر من 80% من اللي بيزرعوا بن في العالم هم فلاحين مش متاح ليهم مبيدات حشرية حديثة ولا وسائل حماية من الحشرات فحيلاقوا نفسهم مضطرين عشان يعرفوا يعيشوا يبطلوا يزرعوا بن لإنهم معندهمش وسائل متطورة لحماية محاصيلهم و يبدأوا يزرعوا محاصيل تانية بتقدر تستحمل درجات الحرارة العالية .. بس فيه شوية مزارعين حيفضلوا يزرعوا بن عادي بس بكميات كبيرة و ده حيأثر أوي علي جودة البن اللي بينتجوه.
- حبيبات البن اللي الجودة بتاعتها عالية بتتزرع في أماكن محددة في العالم اللي درجة الحرارة فيها بتخلي حبة البن تنضج في الوقت الصح .. عندك مثلاً فيه نوع من البن أسمه الأرابيكا Arabica Coffee و اللي بيمثل 75% من إجمالي البن اللي بيستهلك علي مستوي العالم هو أعلي فئة من البن و مفيش جودة أعلي منه .. لما إنت فجأة تلاقي إن عدد المزارعين اللي بيزرعوا بن قلوا و اللي فضل منهم يزرع بن مبقاش بيهتم أوي بالجودة قد ما بيهتم بالكم فإنت حتلاقي في الاخر إن جودة و سعر حباية البن بيتأثر جامد .. فيه حاجة إسمها تأثير ستار باكس Starbucks Effect متسمي علي إسم سلسلة محلات القهوة المشهورة و اللي بيقول إن الجودة بتاعة البن اللي إنت بتشربه دلوقتي أعلي بكتير من جودة البن اللي كنت بتشربه من 10 أو 20 سنة .. ده معناه إن لما الإحتباس الحراري يبدأ يأثر علي إنتاج البن مش حتلاقي حبيبات بن بجودة عالية زي دلوقتي.
- مع الوقت حتلاقي سعر البن عمال يتضاعف .. دلوقتي السعر العالمي للبن هو 1.28 دولار للباوند الواحد بس لو الوضع كمل فإنت ممكن تشوف سعر البن وصل 3.39 دولار للباوند و علي فكرة السعر ده وصلناله قبل كده سنة 1977 و محصلش تاني إن سعر البن وصل للرقم ده من ساعتها.
اللي عايزك تعرفه من المقالة دي كذا حاجة .. أول حاجة إنك قريب حتبدأ تشوف بنفسك إن سعر البن بدأ يزيد بشكل تصاعدي فإنت حضر نفسك من دلوقتي إنك لو بتشرب أكثر من فنجان قهوة في اليوم إبدأ قلل إستلاكك اليومي ده لمصلحتك والله .. ثاني حاجة هو إن الدول الفقيرة اللي بتنتج بن دلوقتي معندهاش الفكر ولا التكنولوجيا بتاع إنها تحمي محصول البن بتاعها وعشان كده إحتمال تلاقي بدل ما تروح تشتري بن برازيلي ولا بن كولومبي تروح تلاقي بن كندي لإن الكنديين شغالين دلوقتي علي إنهم يزرعوا بن علي أرضهم .. أيا كان فنجان القهوة اللي في إيدك ده حاول تستمتع بكل شفطة منه لإنك ممكن تتحرم منه قدام.
المصدر:
مقالة بعنوان It won’t be long before coffee becomes a luxury. Make the most of it. نشرت في Website إسمه Quartz و ده لينك المقالة الأصلية:
https://qz.com/1100767/free-coffee-could-soon-be-a-thing-of-the-past-thanks-to-climate-change
