اللي حتكلم عنه النهاردة هو واحد من المواضيع اللي محدش عارف يفهمها في السياسة الأميريكية و هي الإجابة عن سؤال يبان بسيط و سهل و تافه كمان: هل (دونالد ترامب) رجل إبن وس*&؟ .. عمرك شفت سؤال أسهل من كده؟ .. عشان الأمريكان يقرروا هل فعلاً (ترامب) رجل إبن وس** أو لا جابوا واحد إسمه (روبيرت مالر Robert Mueller) و قالوله شكل الفريق اللي إنت عايزه و خد وقتك بس عايزين في الأخر تكتبلنا تقرير يقول صراحة كده هل (ترامب) إبن وس*& أو لا؟ .. لما فريق التحقيق ده إتشكل إتسربت معلومة إن لما الخبر جه ل(ترامب) كان قاعد علي مكتبه و قال للمساعدين بتوعه إن تشكيل اللجنة دي حاجة بنت وسخ*& و أنا كده Fucked و في حالة إنك مش فاهم أوي هو قال إيه فخليني أحاول أبقي مؤدب و أقولك إنه قال إن ده معناه إنه حيتنفخ.
بعد أكثر من سنتين من التحقيقات و الإعتقالات و الإستجوابات أخيراً طلعلنا (روبيرت مالر) بتقرير من 400 ورقة و تقريباً فيه شبه إجماع علي إن أهم جملة إتقالت في التقرير هي دي .. لو كان فريق التحقيق عنده أي ثقة إن الرئيس بريء تماماً من تهمة تعطيل سير تحقيقات قضائية كنا حنكون أول ناس تطلع تقول .. أرجوك بقي متكملش قراية قبل ما تقرأ الجملة دي كذا مرة و تحاول تفهمها .. خليني أقربهالك بتشبيه إن إنت بتعمل Interview لشغلانة و إنت في الCV بتاعك كاتب أنا إتفصلت من شغلتي القديمة لإني حرقت عربية مديري و هو راكنها في الجراج بس لما إتعملت لجنة تحقيق قالوا إن مفيش ضدي أدلة كفاية تثبت إني فعلاً اللي حرقت العربية .. لو حد قالك كده في Interview فانت أكيد حتفكر ألف مرة قبل ما تعينه.
اللي ححاول أفهمولك في المقالة دي هو زتونة التقرير بتاع (روبيرت مالر) و الحقيقة اللي أنا بحاول أعمله ده حاجة صعبة جداً لإن مستحيل أختصرلك و أختذلك تقرير إتكتب في 400 صفحة يدوبك في مقالة بس خليني أحاول .. سبب أساسي إن التقرير معرفش يثبت علي (ترامب) إنه ابن وس*& هو حاجتين:
- إن لما (ترامب) خلي ناس بيشتغلوا معاه يتكلموا مع الروس عشان يدوله معلومات سرية ممكن تكون بتدين (هيلاري كلينتون Hillary Clinton) و اللي بفكرك إنها كانت نازلة ضده الإنتخابات في 2016 كانوا ناس بعيد عنك بني أدمين بروؤس حمير و بوظوله الدنيا فمخش اللي هو عايزه.
- إنه لما خلي ناس بيشتغلوا معاه يعطلوا سير تحقيقات شغالة ضده الناس دي رفضت تنفذ تعليماته عشان ضميرهم نقح عليهم.
خليني أبدأ معاك بشلة البهايم اللي حول (ترامب) و اللي كانوا سبب إنه يطلع براءة:
أكبر بهيمة فيهم هو المحامي الخاص بتاعه (مايكل كوين Michael Cohen) .. من ولسه (ترامب) في حملته الإنتخابية و هو عنده هسهس إنه عايز يبني برج له في العاصمة الروسية موسكو .. ده لوحده مصيبة .. تخيل كده إن إتعرف مثلاً إن الفريق (أحمد شفيق) أيام ما كان مرشح نفسه للرئاسة قصاد (محمد مرسي) الله يرحمه إنه بيحاول يتكلم مع الإسرائيليين عشان يعمل Business في تل أبيب أياكش حتي يكون عايز يفتح محل كشري و تخيل رد فعل الناس كان حيبقي عامل إزاي .. لما (مايكل كوين) حاول يتواصل مع الروس جرب يوصل لوزير الإعلام الروسي (ديميتري بيسكوف Dmitri Peskov) بس معرفش يوصله .. تدري ليش؟ .. الإيميل بتاع (ديميتري بيسكوف Dmitri Peskov) أخره بإعتباره موظف في الحكومه .gov بس البهيمة (مايكل كوين) قعد شهور يكتبله في إيميلات اخرها .gof و هنا أنا محتاج أحلفلك علي المصحف إني مش بهزر و الكلام ده إتكتب صراحة في التقرير بتاع (روبيرت مالر) .. بس إذا كنت فاكر إن ده كان أخر حاجة يقدر يوصلها (زين الهابدين إبن حموده) اللي هو (مايكل كوين) فإنت محتاج تفكر تاني لإن اللي عمله بعد كده يعتبر كارثة.
لما (مايكل كوين) فشل يوصل ل(ديميتري بيسكوف) الزهر لعب معاه في إن مراة واحد إسمه (ديميتري كلوكوف Dmitry Klokov) و ده يبقي شغال سكرتير إعلامي لوزير الطاقة الروسي بعتت كذا إيميل لبنت (دونالد ترامب) اللي هي (إيفانكا Ivanka) و في الإيميلات دي هي قالت إن جوزها بصفته سكرتير إعلامي لوزير الطاقة الروسي يقدر يقدم معلومات حساسة ممكن تودي (هيلاري كلينتون) في ستين داهية اللي تاني بفكرك إنها كانت مترشحة ضد (ترامب) في إنتخابات الرئاسة .. (إيفانكا) قامت عامله Forward للإيميلات ل(مايكل كوين ) اللي بمنتهي البراءة دخل علي Google و كتب إسم (ديميتري كلوكوف Dmitry Klokov) و اللي بسبب تشابه أسماء فده نفس إسم رباع أوليمبي روسي معتزل .. رباع دي اللي هي حد بيلعب رفع أثقال للي ميعرفش المعني بتاع الكلمة .. اللي فعلاً يهلك من الضحك إن لشهور (ديميتري كلوكوف) الحقيقي فضل يحاول يبعت في إيميلات ل(مايكل كوين) و (مايكل كوين) يبعت يرد عليه في إيميلات ويبعتها ل(ديميتري كلوكوف) بتاع رفع الأثقال .. لدرجة إن لما الفريق بتاع (روبيرت مالر) قبض علي (مايكل كوين) و بدأوا يحققوا معاه و واجهوه بالإيميلات اللي هو باعتها فضل يحلف إن (ديميتري كلوكوف) بتاع رفع الأثقال هو هو السكرتير الإعلامي لوزير الطاقة الروسي و مكنش مصدق إن ده تشابه أسماء.
التقرير بتاع (روبيرت مالر) فعلياً بيقول إن السبب الأساسي إن مفيش حد عارف يثبت تهمة الخيانة العظمي علي (ترامب) إنه كان محوط نفسه بشوية بهايم مش عارفين الألف من كوز الدرة و إن غباءهم خلاهم يعملوا تصرفات مينفعش يتقال عليها جريمة قانونية قد ما لازم تتصنف بإنها جريمة في حق تشغيل الدماغ .. خد عندك مثال ثالث هو الإجتماع المشهور أوي اللي حصل في البرج بتاع (دونالد ترامب) في مدينة نيويورك الأميريكية و الإجتماع ده حضره 4 بني أدمين منهم 3 حاضرين بالنيابة عن (ترامب) اللي هم إبنه الكبير (دونالد ترامب جونيور) و جوز بنته (جاريد كوشنر Jared Kushner) و اللي كان ماسك حملته الإنتخابية (بول مانوفورت Paul Manafort) و الثلاثة قعدوا مع واحدة قالت عن نفسها إن ليها صلات بالحكومة الروسية و معاها ورق شوف سبحان الله يا أخي برده ممكن يودي (هيلاري كلينتون) في ستين داهية .. فريق التحقيق في تقريره قالوا إن الثلاثة فعلياً مكانوش عارفين إن اللي بيعملوه ده غلط .. خليني أحطك في الصورة بس .. (جاريد كوشنر) المفروض إن ده يبقي البني أدم اللي شغلته إنه يخلص صفقة القرن اللي المفروض علي أساسها أهل غزة يقعدوا في سيناء و أهل الضفة الغربية يعزلوا لغزة و ينتهي حلم الدولة الفلسطينية .. المفروض إن البني أدم اللي دوره إنه يخلص أهم صفقة في تاريخ البشر مش عارف معلومة إن مينفعش بأي حال من الأحوال مرشح رئاسي يقعد في إجتماع مع ممثل حكومة أجنبية عشان ياخد منه أدلة ممكن تدين المرشح اللي نازل ضده الإنتخابات .. عشان في الأخر الناس تسألني هو إنت ليه يا فؤش مش مقتنع بإن صفقة القرن حتحصل؟ .. عشان بعيد عنكوا ماسكها شوية بهايم.
ده يحطك قدام حقيقة إن الروس كانوا حيموتوا و يتواصلوا مع الحملة الإنتخابية بتاعة (ترامب) و حاولوا كتير أوي يوصلولوه عشان يساعدوه يكسب بس البعيد لا هو ولا اللي حوليه كانوا بيفهموا و ده اللي طلعهم زي الشعرة من العجين من تحت إيد فريق التحقيق .. ده حيوديني للجزء التاني من الكلام و هو إن حتي لما (ترامب) حاول بكل الطرق إنه يخلي الناس اللي حوليه تعوق مسار العدالة و دي تهمة ممكن تودي في داهية في أميركا بس اللي حواليه في كل مرة كانوا فعلياً و مش بهزر بينفضوله.
التنفيض كان طوق النجاة اللي أنقذ (ترامب):
التقرير بيقول إن (ترامب) بعت أوامر ل10 مسئولين في حكومته عشان يخليهم يا إما ينهوا شغل فريق التحقيق بتاع (روبيرت مالر) أو علي الأقل ياخدوا منه صلاحيات التحقيق بس في كل مرة المسئولين دول بينفضوله .. الموقف ده حصل بالضبط إن (ترامب) بعت رسالة لواحد من المساعدين بتوعه إسمه (كوري ليفاندوفسكي Corey Lewandowski) عشان هو اللي يكلم النائب العام وقتها (جيف سيشنس Jeff Sessions) بإنه يمشي (روبيرت مالر) .. (كوري ليفاندوفسكي) زي ما تقول كده قال لنفسه طب ما تكلمه إنت يا روح أمك .. لما (ترامب) بعتله الرسالة تاني فهو نفضله تاني بس خلي السكرير بتاعه هو اللي يبقي يكلم (جيف سيشنس) .. السكرتير هو كمان زي ما تقول كده قال لنفسه طب ما تكلمه إنت يا روح أمك .. و ده حضرتك ملخص البيت الأبيض هو شوية موظفين كل ما حد فيهم يستلم أمر من الرئيس يقوله طب ما تعملها إنت يا روح أمك.
خليني أحطلك ده في مثال تقدر تفهمه .. تخيل إن الأهلي بيلعب في نهائي أفريقيا ضد الرجاء البيضاوي مثلاً و الشوط الأول خلص بإن الأهلي مغلوب واحد صفر .. الشوط الثاني بدأ و عرفت من المعلق إن لاعيبه الأهلي طردوا المدير الفني (لاسارتي) بره أوضة اللبس و قالوا إن (وليد أزارو) هو اللي حيمسك الفرقة في الشوط الثاني بس الماتش خلص بإن الأهلي كسب البطولة .. هنا إنت كمشجع أهلاوي حتحس بكذا حاجة .. فرحان إن (لاسارتي) إتشال .. بس مرعوب من إن (أزارو) بقي المدير الفني .. بس مرتاح إن الأهلي كسب البطولة .. بس في نفس الوقت خايف علي مستقبل الفرقة إن مش كل مرة اللاعيبه حتمشي المدير الفني اللي مش عاجبها .. المرة دي ربنا سترها بس هل معني كده إن ربنا حيسترها معانا في كل مرة؟ .. بدأت تفهم المصيبة فين؟
مثال صارخ تاني علي إزاي موظفين جوه الحكومة الأميريكية بيتجاهلوا أوامر الرئيس تتلخص في الحكاية المسلية فشخ بين (ترامب) و واحد من المحامين اللي شغالين في البيت الأبيض إسمه (توم ماجان Tom McGahn) .. لشهور (ترامب) فضل يبعت إيميلات ل(توم ماجان) إنه لازم يعزل (روبيرت مالر) و هو بينفضله لحد ما الرجل زهق .. راح الشغل في يوم لم حاجته و بعت إيميل إستقاله للناس كلها زي أي موظف في أي شركة بس كتب في الميل إن سبب إستقالته إن الرئيس بيطلب منه Crazy Shit .. تخيل إنك قاعد في الشركة اللي إنت شغال فيها في أمان الله و يجيلك إيميل وداع لواحد من زمايلك بس كاتب في الإيميل إنه ماشي من الشركة عشان الTeam Leader بتاعه بني أدم مجنون بيطلب منه حاجات مينفعش تتنفذ.
اللي أنا عايز أختم به هو بس إني أديلك مجرد رؤية لإيه اللي ممكن يحصل في الأيام الجايه .. صحيح إني قلتلك إن الحاجة اللي نجت (ترامب) من حبل المشنقة إنه كان محاوط نفسه بناس أولاً مبتفهمش و ثانياً خايفين علي نفسهم بس المشكلة إن أغلب الناس دول قدموا إستقالتهم و المجموعة اللي حول (ترامب) دلوقتي من الناس اللي تقدر توصفهم بإنهم بيقولوا حاضر و نعم .. خد مثال عليهم بالنائب العام الحالي (وليام بار William Barr) .. عشان تفهم قد إيه الرجل ده واقف في صف (ترامب) حاول تتخيل إن الرئيس (السيسي) جاب (أحمد موسي) عينه نائب عام .. قبل ما التقرير بتاع (روبيرت مالر) ما يتنشر الأخ (وليام بار) عمل حاجتين غراب أوي الحقيقة .. أول حاجة إنه طلع من نفسه تقرير تقدر تسميه الزتونة بتاعة ال400 ورقة بس الزتونة دي قالت إن يا جماعه أنتوا كنتوا مكبرين الموضوع زيادة عن اللزوم و إن الرئيس بريء براءة الذئب من دم سيدنا (يوسف) و إن (ترامب) ده مش إبن وس** زي ما كنتوا بتقولوا ده أنتوا اللي ولاد تييييت إنكوا طلعتوا عليه الإشاعات دي .. بعد ما التقرير ما طلع عمل مؤتمر صحفي يدافع بإستماته عن (ترامب) ولا كإنه (مدحت شلبي) بيدافع عن (تركي ال شيخ).
المستقبل مش معروف ملامحه لحد دلوقتي .. صحيح التقرير بتاع (روبيرت مالر) إتنشر بس أجزاء كتير منه محجوبة .. التقرير ده مع إنه التقرير الختامي للتحقيق الفشيخ اللي إتعمل خلال سنتين إلا إن أنا عايزك تعرف إن التحقيق بعد ما خلص إتقسم ل14 تحقيق فرعي منهم 12 تحقيق إتحطوا تحت بند السرية المطلقة .. التحقيق ده لما بدأ من سنتين كان الكلام اللي طالع من الناس اللي حول (ترامب) إن التحقيق ده إتعمل عشان يثبت هل فعلاً كان فيه Collusion أو تواطؤ بين الحملة الإنتخابية بتاعه (ترامب) و بين روسيا؟ .. الحقيقة إن إختيار الناس اللي حول (ترامب) لمصطلح Collusion ده كان ضربة معلم لإن القانون الأميريكي مفيهوش الكلمة دي و بالتالي الناس كلها لما التقرير طلع كانوا مستنيين يسمعوا هل التهمة دي أُثبتت علي (ترامب) ولا لا .. التقرير قال إن مفيش Collusion .. معاك في دي .. بس في نفس الوقت التقرير طلع بلاوي.
المصدر:
حلقة من برنامج Last Week Tonight with John Oliver و ده لينك الحلقة علي YouTube لو حبيت تتفرج عليها:
https://www.youtube.com/watch?v=YMBj_tU7HRU
