موضوعنا النهاردة اللي حنتكلم عنه هو الأمير (الوليد بن طلال) .. إنت في مصر أو في العالم العربي عموماً متعرفش عنه غير إنه أمير سعودي معاه فلوس كتير لدرجة إن إسم (الوليد بن طلال) لوحده إرتبط في الفكر المصري بشخصية الأمير السعودي اللي معاه فلوس .. يمكن تعرف إنه مؤسس شركة Rotana و ده مخلي ناس كتير في مصر إما تكرهه لإنهم زي ما بيتهموه بيصرف ملايين علي المغنيات و الرقاصات في حين إن الفلوس دي لو صرف ربعها علي فعل الخير لكان زمانه من أولياء الله الصالحين أو إن الناس في مصر إرتبط إسم (الوليد بن طلال) في خيالها بفكرة الأمير السعودي اللي معاه فلوس اللي في نفس الوقت هلاس معندوش حاجة في حياته يعملها غير إنه يعمل حمام طيارته الخاصة من الذهب الخالص .. إرمي بقي كل ده في الزبالة .. اللي حنتكلم عنه النهاردة هو الجانب اللي إنت متعرفوش عن (الوليد بن طلال) المتعلق بفلوسه اللي بيحطها بره العالم العربي.
الرجل ده بقاله 25 سنة مشغل فلوسه في إستثمارات ضخمة جداً بره العالم العربي .. يمكن لإننا كعرب هلاسين و نحب أي حاجة ليها علاقة بالهلس فلما حب يستثمر فلوسه هنا عمل شركة Rotana بس بره هو حط فلوسه في حاجات تانية خالص .. ده رجل عنده 62 سنة ثروته تقدر ب17.2 مليار دولار و مجرد بصة سريعة لهو حاطط فلوسه فين بره حتبدأ تفهم دماغ الرجل ده:
- (الوليد بن طلال) سنة 1991 إستثمر 590 مليون دولار في بنك Citigroup و بقي هو صاحب الحصة الأكبر من أسهم البنك في البورصة و هو اللي أنقذ بنك Citigroup Inc الأميريكي من الإفلاس بعد الأزمة المالية العالمية.
- هو اللي حط فلوسه في شركه Euro Disney بعد ما كان المشروع حيتلغي بسبب نقص التمويل.
- هو الوحيد اللي وقف ورا رجل الأعمال البريطاني (روبيرت مردوخ Rupert Murdoch) بعد ما أوروبا كلها كانت ضده بعد ما ثبت إن قنواته الفضائية و الجرايد اللي هو شاريها الصحفيين بتوعها عشان ياخدوا أخبار و سبق صحفي بيتجسسوا علي تليفونات مشاهير الفن و رجال السياسة في بريطانيا.
- فيه بينه و بين (بيل جايتس Bill Gates) مؤسس شركه Microsoft Inc شغل كتير أوي .. سنه 2007 إشترك مع شركة Cascade Investment LLC بتاعة (بيل جايتس) و إشتروا مجموعه فنادق Four Seasons مقابل 3.8 مليار دولار و حالياً كل واحد فيهم بيملك 45% من حصة الفندق في البورصة .. و كمان الإتنين إشتغلوا مع بعض في مؤسسة (بيل جايتس) الخيرية عشان يعملوا مشروع إسمه Breakthrough Energy Coalition و ده تحالف من مجموعة كبيرة من رجال الأعمال عشان يبدأوا يحطوا فلوسهم كإستثمارات في مجال الطاقة المتجددة Renewable Energy.
- (الوليد بن طلال) من أكبر المستثمرين اللي حطوا فلوسهم في شركة Twitter Inc و كمان شركة Accor SA أكبر شركة إدارة فنادق في أوروبا.
جري الشريط دلوقتي و شوف حال (الوليد بن طلال) اليوم .. أحب بس أفكرك إن الرجل ده تحت الإقامة الجبرية من يوم 4 نوفمبر اللي فات يعني بقاله أكثر من شهر في فندق رياض ريتز كارلتون و مش لوحده .. ده معاه مئات الشخصيات ما بين أمراء في العائلة المالكة و سياسيين و رجال أعمال سعوديين كلهم محبوسين ضمن حملة لمكافحة الفساد و في الوقت اللي (الوليد بن طلال) كان مستني إن صحابه اللي هو صرف فلوسه عشان ينقذهم وقت زنقتهم حد فيهم يجي يقف جنبه محدش رفع سماعة التليفون كلمه سأل عليه أو طلع في التليفيزيون قال إنه واقف معاه .. إن (بيل جايتس) يطلع يقول في بيان صحفي طلعه المحامي بتاعه إن (الوليد بن طلال) يعتبر شريك مهم له في الأعمال الخيرية اللي مؤسسته بتعملها إنت كده مقلتش حاجة جديدة .. الرجل محبوس بقاله شهر و أخر حاجة هو محتاجها منك إنك تطلع قدام الناس تقول اه أنا إشتغلت مع (الوليد بن طلال) قبل كده .. حتي رئيس مجلس إدارة بنك Citigroup إسمه (مايكل كوربات Michael Corbat) طلع وصف (الوليد بن طلال) بإنه سند حقيقي للبنك .. يا إبن التييييييييت الرجل أنقذ البنك بتاعك من الإفلاس و يوم ما يحتاجك تقوله ربنا معاك .. ما هو أكيد ربنا معاه بس هو محتاج أكثر من كده.
ده بيحط (الوليد بن طلال) و بيحطنا كلنا قدام واقع جديد .. الفلوس مبتشريش صحاب .. كل صحابه أو اللي كان متخيل إنهم صحابه خايفين إنهم إذا طلعوا وقفوا جنبه فبكده هم ممكن يزعلوا الأمير (محمد بن سلمان) ولي العهد السعودي و إبن الملك (سلمان بن عبدالعزيز) و اللي بيقود الحملة الشرسة دي ضد اللي هو بيسميه الفساد اللي إنتشر في كل حتة في المملكة .. أي حد من اللي (الوليد بن طلال) كان مستني إنهم يقفوا جنبه بيبص للوضع و بيقول لنفسه أنا إيه اللي يخليني أخاطر بإني أخسر ملايين و يمكن مليارات لو وقفت مع (الوليد بن طلال) و زعلت مني (محمد بن سلمان)؟ و هل لو أنا طلعت وقفت جنب (الوليد بن طلال) فهل أنا كده بساعده ولا بضره أكثر؟ الحقيقة إنك لو هديت شوية و بدأت تبص للمنطق بتاع الناس دي حتبدأ تفهم هم ليه ساكتين.
إسأل أي حد من اللي (الوليد بن طلال) إشتغل معاهم أو حط فلوسه معاهم سواء في أوروبا أو أميركا حيقولولك إنه رجل محترم و إنهم مش مقتنعين بإنه مرتشي أو فاسد و شبه متؤكدين إن (محمد بن سلمان) إعتقله عشان هو عارف إن (الوليد بن طلال) من أقوي خصومه السياسيين فهو بس عايز يخوفه و يخليه ميتفحش بقه تاني كصوت للمعارضه جوه العائلة المالكة .. بس في نفس الوقت كل المحامين اللي حاولوا يوصلوا لورق الإتهامات أو يشوفوا صور من الأدلة اللي المفروض إن النيابة السعودية معاها ضد (الوليد بن طلال) بيتم الرد علي طلباتهم دي بالرفض فهم مش عارفين بالضبط هو محبوس ليه؟ .. مش يمكن (الوليد بن طلال) فاسد فعلاً؟ و لو وقفوا معاه دلوقتي و جت الدولة السعودية نشرت الأدلة دي يبقي شكلهم وحش قدام الناس؟ و الأهم من كده إن ساعتها حيبقي من حق (محمد بن سلمان) إنه يمنعهم إنهم يستثمروا فلوسهم تاني في المملكة و ساعتها حيضيع عليهم فلوس كتير كانت ممكن تخش جيوبهم .. طب إفرض إن فعلاً (الوليد بن طلال) مظلوم مش يمكن لو وقفوا معاه يبقوا كده بيضروه؟ و بعدين حتي لو هو مظلوم و مفيش أدلة ضده مجرد ما ده يتعرف قدام العالم كله فإنت تقدر تقول إن أي فرصة لأي مستثمر أجنبي يروح يحط فلوسه في السعودية إنتهت خالص.
فيه ناس علي Social Media شمتت في (الوليد بن طلال) و قالت يمكن لو كان حط جزء صغير من الفلوس بتاعته في عمل الخير لأبناء المسلمين كان ربنا نجاه و خفف عنه كربه .. فيه ناس تانية واقفة معاه بس خايفة تتكلم و ناس واخده صف (محمد بن سلمان) و بتتهمه إنه فعلاً فاسد إستغل صفته كأمير سعودي عشان يدخل لنفسه فلوس حرام .. أيا كان رأيك و أيا كان موقفك فخلينا نتفق علي إن الدنيا دواره أو زي ما ربنا قال “و تلك الأيام نداولها بين الناس” .. نصيحة ليك .. بطل تلم في فلوس .. بطل يبقي كل همك دنيتك .. أهو عندك واحد أوتي من الثروة إن كتير مننا بيتمني و لو جزء من المليون من الفلوس اللي معاه و رغم كده دلوقتي بنحمد ربنا إن فوقنا سقف يغطينا و إن محدش قابض بإيده علي حريتنا و إننا الحمد لله معندناش الملايين اللي تخلي السلطة تحاول تحاكمنا سواء كنا مذنبين أو لا لمجرد إنهم ياخدوا حصة من فلوسنا.
المصدر:
مقالة بعنوان Saudi Prince Who Wooed West Finds Few Friends in Tough Times نشرت علي Website إسمه Bloomberg و ده لينك المقالة الأصلية:
https://www.bloomberg.com/news/articles/2017-11-28/saudi-prince-who-wooed-west-finds-few-friends-in-tough-times
