لينك التسجيل الصوتي للمقالة علي Sound Cloud:
https://soundcloud.com/user-112011687-312727988/ka52-m4a
موضوعنا النهاردة اللي حنتكلم عنه هو الطيارة الهليكوبتر الهجومية Ka-52 الروسية و اللي من تصنيع شركة إسمها كاموف Kamov و السبب اللي حيخلينا نتكلم عن الطيارة دي بالذات هو إن سنة 2015 مصر مضت إتفاق مبدأي مع روسيا علي إننا حنشتري الطيارات دي و الحقيقة إحنا حنشتري حبه حلوين منهم .. الإتفاق إننا حنشتري 46 طيارة فيه منهم علي الأقل 15 طيارة مصر حتستلمهم مع نهاية سنة 2017 .. بفكرك بس إن الإتفاق ده إتمضي سنة 2015 يعني كنا لسه في السنة الأخيرة من رئاسة الرئيس الأميريكي (باراك أوباما Barack Obama) و كانت العلاقات بينا و بين الأمريكان زي الزفت بسبب الإنتقادات المستمرة اللي الإدارة الأميريكية كانت بتوجهها لمصر بسبب ملف حقوق الإنسان فالإدارة المصرية قررت إنها محتاجة تبعت رسالة لأميركا إنها تقدر تشتري سلاح من روسيا و من غيرها و مش ملزمة إنها تفضل تشتري سلاح من أميركا .. الطيارة دي معروفة بإسم تاني هو التمساح Alligator و الإتفاق اللي إتوقع بين مصر و روسيا هو إننا حنستلم موديل مخصوص إسمه تمساح النيل Nile Crocodile .. الفرق بين النسخة التقليدية من Ka-52 و بين اللي حتستلمها مصر هو الأتي:
- شاسية الطيارة حيبقي أقوي شوية و مكوناتها حتبقي قادرة علي إنها تستحمل درجات الحرارة العالية اللي حتشوفها لما تشتغل في الصحراء المصرية.
- حيتركب عليها رادار أقوي شوية و إمكانيات هروبها من الصواريخ المعادية أو زي ما بيمسوها Countermeasures حتبقي أحسن.
بس قبل ما تقول لنفسك أيوه صح إحنا جبنا الطيارات دي عشان تشتغل علي متن حاملتي طائرات الميسترال Mistral اللي إحنا إشتريناهم من فرنسا فخليني أقولك إن روسيا عاملة نسخة مخصوص من Ka-52 بتشتغل علي حاملات الطائرات إسمها Ka-52K و لسه فيه مفاوضات شغالة علي هل حنشتري النوع ده كمان ولا حنكتفي بNile Crocodile .. الفروق بين Ka-52 Alligator و بين Ka-52K Katran و دي النسخة بتاعتها اللي بتشتغل علي متن حاملات الطائرات بتخليك تسأل نفسك طب إحنا إشترينا الميسترال و دافعين فيها دم قلبنا فليه إشترينا 46 طائرة Ka-52 Alligator و مشترناش Ka-52K Katran أحسن؟ .. مجرد جولة سريعة في الفرق بين K-52 Alligator و بين Ka-52K Katran يوريك إن فيه حاجة غلط:
- المراوح بتاعة Ka-52K Katran بتطبق بحيث لما تركنها علي سطح حاملة الطائرات متاخدش مساحة كبيرة و بدل ما كنت حتحط مثلاً 10 طيارات Ka-52 Alligator بس علي سطح حاملة الطائرات فإنت تقدر تخليها تشيل 20 طيارة Ka-52K.
- عشان الهبوط علي سطح حاملات الطائرات أصعب من الهبوط علي أرض مطار فمعدات الهبوط علي متن Ka-52K Katran أقوي بكتير من Ka-52 Alligator.
- السطح الخارجي بتاعها معمول من مادة مضادة للأكسدة عشان لما تشتغل في البحر متصديش.
- ده غير إن الرادار بتاعها أقوي من الرادار بتاع Ka-52 Alligator و الأهم إنها بتقدر تضرب صواريخ Kh-35 المضادة للسفن و لو قلت لنفسك بسيطة حنبقي نجيب طيارات Ka-52 Alligator عادية و نركب عليها صواريخ جو-جو عادية برده و الطيار المصري حنعلمه إزاي يصطاد بيها السفن بس المشكلة إن صواريخ Kh-35 بتقدر تصطاد سفن من علي بعد 120 كيلومتر.
اللي أنا مستغربله أكثر أساساً إن حاملتي الطائرات الميسترال اللي إحنا إشتريناهم من فرنسا كانوا رايحين لروسيا بس لما روسيا إستولت علي شبه جزيرة القرم من أوكرانيا الإتحاد الأوروبي فرض حظر تصدير أسلحة لروسيا و حاملتي الطائرات فضلوا مركونين مش لاقيين مشتري لحد ما إحنا جينا إشتريناهم .. و أساساً الروس كانوا حيموتوا و يشتروا الميسترال لإن يدوبك هم مصنعين شوية طائرات Ka-52K Katran و بيشغلوها علي متن حاملة الطائرات الوحيدة اللي تحت إيد روسيا و اللي اسمها الأدميرال كوزينستوف Admiral Kuznetsov و هي أساساً حاملة طائرات عطلانة و بتمشي بالعافية و لما الميسترال راحت من روسيا إضطروا يركنوا أسطول طيارات Ka-52K Katran لإنه فعلياً مبقاش له عازة في القوات البحرية الروسية .. طب إحنا ليه بما إننا إشترينا الميسترال مرحناش نشتري الكام طيارة Ka-52K Katran من روسيا و كنا خدناهم بسعر حلو لإنهم فعلياً مركونين ملهمش لازمة عندهم؟ و ليه ندفع دم قلبنا في 46 طيارة Ka-52 Alligator و لسه حندفع دم قلبنا برده في شراء طيارات Ka-52K Katran؟ اللي عنده إجابة يا ريت يقولي لاني مش لاقي.
عشان كده إحنا قررنا نتكلم عن الطائرات دي اللي هي Ka-52 Alligator .. عشان نفهم هو إحنا إشترينا إيه بالضبط؟
مبدأياً كده الطيارة Ka-52 سهل أوي تميزها من شكلها بسبب مقدمتها العريضة اللي مخليه إن قمرة القيادة اللي فيها كرسيين بتخلي الإتنين الطيار و الملاح يقعدوا جنب بعض عكس مثلاً الطيارة الهليكوبتر أباتشي Apache الأميريكية اللي الإتنين بيقعدوا ورا بعض .. بسبب شكلها فالطيارة دي معروفة بإسم التمساح Alligator و هي أساساً إتصممت عشان تبقي طيارة هليكوبتر هجومية و بتقدر تقوم بمهام إستطلاع ليها قدرة عالية علي المناورة .. ياريت تاخد بالك إن الطيارة دي فيها مروحتين أساسيتين فوق بعض و الإتنين بيدوروا عكس بعض و ده هدفه إنه يدي الطيارة إستقرار Stability أكتر .. عايزك كمان تاخد بالك إن الطيارة مفيهاش مروحة خلفية في الديل عكس أغلب الطيارات الهليكوبتر اللي بتشوفها و ده سببه إن مروحة الديل عموماً بتزود من مقاومة الهواء لحركة الطيارة لقدام و عشان كده الKa-52 بتقدر تطير بسرعات بتوصل ل294 كيلومتر في الساعة يعني أسرع بحوالي 20% من طيارات أباتشي Apache الأميريكية.
النسخة الأقدم من Ka-52 كان إسمها Ka-50 Black Shark و الفرق بينها و بين Ka-52 Alligator هو إن النسخة القديمة كان فيها كرسي واحد بس للطيار و دول حلف شمال الأطلسي NATO لما عرفت إن الروس صنعوها كانوا متخيلين إن الروس صنعوها عشان تبقي طيارة هليكوبتر هجومية مضادة للطيارات الهليكوبتر اللي زيها .. بإختصار الناس بتوع NATO كانوا متخيلين إن Ka-50 Black Shark إتصنعت عشان تصطاد طيارات الأباتشي Apache و يمكن السبب في الإعتقاد ده جه لما شافوا إن الطيارة دي بتقدر تشيل صواريخ R-73 و دي صواريخ جو-جو بتجري ورا الإشعاع الحراري اللي بيطلع من موتور الطيارات الهليكوبتر المعادية .. بس الحقيقة إن الروس مصنعوش الطيارة Ka-50 Black Shark ولا Ka-52 Alligator عشان كده هم صنعوها عشان هي متصممة لتنفيذ هجمات علي أهداف ارضية و ده بالضبط اللي مصر إشترت الطيارات دي عشانه.
في الفترة من التسعينات و الألفينات فيه 32 طيارة Ka-50 Black Shark بس كانوا في الخدمة في القوات المسلحة الروسية .. أشهر مهمة قامت بيها كانت سنة 2001 لما عدد من الطيارات دي نفذت غارة بالصواريخ الموجهة بالليزر علي معسكرات تدريب تابعة للمتمردين الشيشانيين .. لما الطيارة Ka-52 Alligator إتصنعت القوات الجوية الروسية طلبت تشتري 146 طيارة منهم 94 طيارة إتسلمت فعلاً في أواخر سنة 2016 .. في يناير 2016 أعلنت الحكومة الروسية إنها حتسحب قواتها الجوية الموجودة في سوريا بس اللي إحنا عرفناه متأخر إن في نفس الوقت الروس بعتوا سرب من طيارات هليكوبتر Ka-52 Alligator لسوريا عشان تنفذ غارات جوية ضد أهداف تابعة لداعش و للثوار السوريين .. في إبريل 2016 بدأت الأخبار تظهر إن الطيارات دي بتشن غارات جوية في سوريا وصلت لحد إنها بتشن 5 غارات جوية في اليوم.
الروس كانوا بيستخدموا أنظمة التوجيه بالليزر اللي موجودة علي طيارات دي عشان تستطلع أماكن معسكرات داعش في سوريا و بعد ما تحددها تيجي مقاتلات زي سوخوي خمسة و عشرين Su-25 Frogfoot تقصف الأهداف دي .. الفكر اللي ممكن تفكر بيه الإدارة المصرية هو برده إنك تستخدم الطيارات دي عشان تستطلع أماكن البؤر الإرهابية في سيناء و تحددها عشان بعد كده مقاتلات F-16 Fighting Falcon تقصفها .. كل دي مجرد أفكار لإزاي تستخدم كل الكم ده من الطيارات اللي إحنا إشتريناه .. الفكرة إن الروس إستخدموا طيارات Ka-52 Alligator كتير أوي في سوريا لدرجة إن دول كتير بدأت تتفرج علي إمكانياتها و تشبط فيها زي ما العيل الصغير بيشبط في اللعب المتعلقة في المحل و هو ماشي مع مامته خصوصاً إن فيها شوية إمكانيات بتخليها مغرية أوي للدول اللي زي مصر اللي بتواجه حرب داخلية ضد جماعات إرهابية:
- السلاح الأساسي علي الطيارات دي هو 12 صاروخ جو-أرض إسمه 9K121 Vikhr و فيه ناس بتسميه Whirlwind و دي صواريخ مضادة للدبابات .. و إنت طاير بالهليكوبتر تقدر و إنت علي بعد 7.5 كيلومتر تصطاد طابور دبابات أو طابور عربيات نقل شايل معدات و مقاتلين لداعش بتكة زرار .. الأهم إن مسافة ال7.5 كيلومتر دي بتخليك متطمن علي نفسك إنك واقف علي بعد بيحميك من مدي نيران الصواريخ المحمولة علي الكتف المضادة للطيارات زي مثلاً صواريخ ستينجر Stinger.
- الرادار بتاعها قوي جداً و هو رادار موديل FH-01 Arbalet بس مشكلته إنه متركب في مقدمة الطيارة و ده بيخليك كطيار عشان تعمل Scan لمنطقة قدامك لازم تطير و مقدمة الطيارة كلها مكشوفة و ده بيعرضك لخطر إن ممكن أنظمة دفاع جوي تصطادك .. صحيح مدي الرادار بتاع Ka-52 Alligator بيعدي ال22.5 كيلومتر بس علي عكس مثلاً طيارات أباتشي AH-64 Apache اللي الرادار بتاعها متركب تحت المروحة الأساسية فإنت كطيار ممكن تكون مستخبي ورا شوية شجر أو ورا جبل بس كاشف المنطقة كلها قدامك.
- لو أخدت بالك من الجناحين القصيرين بتوع الطيارة عليهم 6 أماكن تعليق بتتسمي Hardpoints عشان تركب عليها الصواريخ و القنابل و لو أخدت بالك برده في طرف الجناحين فيه علبه شبه العلبة البلاستيك دي بيتحط فيها Flares و دي عشان لو طيارة معادية ضربت صاروخ جو-جو من اللي بيجري ورا الإشعاع الحراري للهليكوبتر بتاعتك فالطيار يقدر يرمي الFlares دي و هي عبارة عن شعلات بتنور و بتطلع حرارة عالية عشان الصاروخ يجري وراها بدل ما يجري ورا الطيارة.
- إذا كانت صواريخ 9K121 Vikhr هي السلاح الأساسي للهليكوبتر دي بس السلاح الأهم هو مدفع رشاش 2A42 عيار 30 مليمتر بيتركب تحت جسم الطيارة و ده بيتقال عليه Autocannon يعني تقريباً بيشتغل لوحده و بتستخدمه لتدمير الأهداف الأرضية.
- لو بصيت علي صور الطيارة حتلاقي متركب في جسمها من تحت حاجه شبه الكرة البلاستيك و دي تبقي مجموعة حساسات Sensors بيتقال عليها Electro-Optical and Forward Looking Infrared و إختصاراً بيسموها FLIR و دي عشان تلقط الأهداف المعادية و ده أهم جزء في نظام التوجيه بالليزر.
- لحد دلوقتي مفيش فروقات كبيرة أوي بين Ka-52 Alligator و بين AH-64 Apache بس اللي بيفرق بينهم و بيدي أفضلية لAH-64 Apache هو إنها بتستخدم أنظمة حرب أليكترونية و Avionics أعلي و أقوي بكتير من Ka-52 Alligator و إن كانت Ka-52 Alligator فيها إضافة مش عارف إنت ممكن تبصلها إزاي و هي إن الEjection Seat او المقعد القاذف بتاع الطيار فيه خاصية إنه بيفجر المرواح بتاعة الطائره قبل ما يطلق قمرة القيادة بتاعة الطيار و الملاح عشان يديلهم حماية أكثر.
نقطة أخيرة بس حابب أقولها .. أنا فاهم كويس إن قرار شراء الطيارات دي جه في وقت إحنا كنا متخانقين فيه مع الإدارة الأميريكية بس لما أنا أشوف إن الروس حاولوا كتير أوي يلاقوا مشتري أجنبي لطيارات Ka-52 Alligator و لفوا علي دول كتير زي كوريا الجنوبية و الهند و تركيا لدرجة إنهم عملوا موديل مخصوص منها سموه Ka-52 Erdogan علي إسم الرئيس التركي (رجب طيب أردوغان) عشان يغروا الأتراك يشتروها و برده الأتراك طنشوا .. فهل إحنا لما قررنا نشتري الطيارات دي كنا شايفين حاجة أمة محمد كلها مكانتش شايفاها؟
المصدر:
مقالة بعنوان The ‘Alligator’: This Russian Helicopter Is Coming to the Middle East نشرت في مجلة The National Interest و ده لينك المقالة الأصلية:
http://nationalinterest.org/blog/the-buzz/the-alligator-russian-helicopter-coming-the-middle-east-23210
