اللي حتكلم عنه النهارده هو السودان .. عشان مطولش كتير لإن الموضوع فعلاً حرج ومينفعش معاه إني أدي مقدمة مش حتقدم كتير ليكوا لإن خلينا نكون صرحا مع بعض .. إني أتكلم عن الأزمة في السودان زي ما إحنا نبقي عيلة وقاعدين نتكلم عن جيرانا (محمد) و (هناء) اللي كل يوم يتخانقوا وكل مرة بعد كل خناقة أهلها و أهله يجوا يكملوا خناق مع بعض وأخر مرة سمعناه بيرمي عليها يمين الطلاق .. إني أتكلم عن السودان بعمق مش حيفيد لإننا كلنا عارفين اللي فيها .. بمنتهي البساطة اللي بيحصل في السودان دولقتي هو هو اللي حصل في 25 يناير بس كلاكيت تاني مرة .. احنا كان بيحكمنا (حسني مبارك) الله يرحمه لأكتر من 30 سنة .. برده السودان كان بيحكمها بني ادم يستحق إننا نقف عنده شوية اسمه (عمر البشير) الله يرحمه برده لأكثر من 30 سنة .. الثورة عندنا قامت بهتاف بسيط أوي اللي هو عيش حرية عدالة إجتماعية .. برده في السودان المظاهرات بدأت لإن الناس مكنتش لاقيه العيش تاكله .. زي ما عندنا الثورة قام بيها شباب ملهمش أي توجهات سياسية فبرده الثورة في السودان تقدر تقول إن بيقودها حاجة اسمها تجمع المهنيين السودانيين ودول ناس مهندسين و دكاتره و غيرهم من المهن اللي عايشين في السودان وخلاص وصلوا لمرحلة إنهم مبقوش طايقين اللي بيحصل .. بس فيه فرق بينا وبين السودان الحقيقة .. إذا كنا إحنا كمصريين حاجة واحدة فالسودانيين كوكتيل مضروب في الخلاط .. متفتكرش عشان عندنا أهلاوية و زملكاوية وشوية صعايدة و شوية فلاحين و شوية ناس بتوع وجه بحري وكل حبة معتبرين نفسهم أصحاب فضل علي التانيين يبقي إحنا كده عندنا تنوع عرقي .. لا فوقوا يا مصريين.
السودان عبارة عن كذا عرق و كذا ديانة عايشين في حتة واحدة بس يمكن أكبر ناس فيهم عدداً هم العرب .. (البشير) مكنش زيه زي (صدام حسين) الله يرحمه .. (صدام) كان بيحكم بلد عايش فيها أغلبية سكانية شيعية وهو سني فكان عشان يضمن إن الشيعة ميقوموش عليه كان بيقمعهم و مخلي الأقلية السنية هي اللي تتحكم في كل صغيرة و كبيرة في العراق .. انا أقدر أفهم ده علي فكرة رغم إني شايفه غلط .. السودان مش كده .. السودان العرب فيها هم الأغلبية .. (عمر البشير) كان بيستقوي بيهم علي باقي الأقليات .. اللي بيخلي الثورة السودانية مختلفة شوية عن مصر هو إن كل فئات الشعب السوداني قامت ضد (البشير) حتي العرب .. نقطة كمان خلي بالك منها و هي إن الشعب السوداني نفسه صغير في السن .. 62% من تعداد السودان أقل من 25 سنة و 44% أقل من 15 سنة .. انت بتكلم عن بلد صغيرة جداً سناً كان بيحكمها واحد أغلب شعبها مكنش إتولد لما هو مسك الحكم .. إذا كنا في مصر (مبارك) صعب علينا و قلنا عليه حرام ده برده كبير و إتربينا وهو رئيسنا فالشباب السوداني كان بيبص ل(البشير) و يقول لنفسه هو مين الأخ؟ .. و حتي السودانيين نفسهم وهم بيثوروا ضد (البشير) كانوا عارفين اللي حصل معانا لإنهم شافوه بنفسهم .. واحد من هتافاتهم كانت النصر أو مصر .. هم مش بيتريقوا علينا علي فكرة .. هم شافوا إزاي الإخوان المسلمين إترموا في السجون بعد تجربة ديموقراطية فاشلة .. التجربة الديموقراطية في مصر من فشلها لو قارنتها بأي حاجة تانية حتلاقي مفيش غير تجربه إحتراف (عمرو زكي) في الدوري الإنجليزي .. بدأت حلو أوي و إنتهت بفضيحه.
بصوا خلينا نكون صرحا مع بعض .. قول علي (مبارك) اللي انت عايزه .. فيه ناس حتقول عليه ضلالي و حرامي وفيه ناس حتقول عليه ده ملاك (ده لو قارنته باللي عندنا دلوقتي) .. علي الأقل انا أقدر أفهم المبرر اللي يخلي أي حد يقول علي (مبارك) إنه بني أدم كويس .. المصيبة إن (عمر البشير) مينفعش بأي حال من الأحوال إلا إنك تقول عليه بني أدم وسخ وعشان تستوعب حجم وساخته لازم نتكلم شوية عن دارفور .. شوية العساكر اللي ماسكين السودان دلوقتي هم هم نفس الأوساخ اللي قتلوا مئات الالاف من المدنيين في دارفور .. قدام الناس كلها الفاترينة اللي معروضه كواجهة للمؤسسة العسكرية السودانية هو واحد اسمه (عبدالفتاح برهان) .. فكك منه ده مجرد واجهة .. ده رجل المؤسسة العسكرية السودانية كانت عارفه ‘ن بمجرد ما (البشير) حيمشي العالم كله حيبقي مركز معاهم فمينفعش يجيبوا واحد قتال قوتله عشان يمسك البلد .. إتكلم مع أي حد من المؤسسة العسكرية السودانية حيقولك ده إحنا جايبينلكوا رجل بلسم يتحط ع الجرح يطيب .. وعلي فكرة هو حيبقي عنده حق .. (عبدالفتاح برهان) يمكن يكون من القلائل جوه المؤسسة العسكرية السودانية اللي مش مطلوب لمحكمة العدل الدولية لإرتكابه جرائم حرب في دارفور .. تخيل كده لما المجلس الأعلي للقوات المسلحة في السودان حب يلاقي واحد يمسك البلد و عملوا Interviews وأهم سؤال في Application Form بتاعتهم هي هو انت مطلوب القبض عليك دولياً لإرتكاب جرائم حرب في دارفور ولا لا؟ .. اللي بيحرك الدنيا كلها في السودان هو واحد تاني خالص جوه المجلس الأعلي للقوات المسلحة في السودان اسمه (محمد حمدان دقلو) بس هو بيحب يتقاله (حميدي) .. (حميدي) ده مش عارف أشبهولك بمين .. عارف (ثانوس Thanos)؟ .. لا (ثانوس) طيب عنه .. طب عارف (هتلر)؟ .. لا برده (هتلر) كان بيفهم عنه .. عارف (أبوجهل) .. أهو (حميدي) ده عامل زي كفار قريش كده و صدقني انا مش بفتري عليه.
لما المزارعين السمر اللي عايشين في دارفور ثاروا علي الحكومة السودانية ولإن (البشير) مكنش عارف يمسك الدنيا ف(حميدي) قاله بسيطة يا ريس .. إحنا نجيب كل البلطجية اللي من أصول عربية اللي مش لاقيين شغل نديهم حصنة و جمال و سلاح و فلوس و ندعهمهم بطيارات و نطلقهم علي المتمردين في دارفور .. اللي عمله (حميدي) إنه جاب فكرة موقعة الجمل بس طبقها علي مستوي البلد .. البلطجية دول هو سماهم الجنجاويد ودي ترجمتها الجن اللي راكبين جياد أو حصنة .. الجانجويد دول إرتكبوا مذابح و جرائم انت لا تتخيل بشاعتها .. الشرير بتاع سلسلة Saw ده يبقي ملاك بالمقارنة بيهم .. (حميدي) هو اللي أمر الجيش إنه يضرب نار علي المتظاهرين في السودان .. الرجل ده معندوش أي رحمة أو شفقة .. هو مش شايف غير حاجة واحدة بس وهي إنه عايز يحكم السودان ومش حيسمح لأي حد إنه يقف في طريقه .. المصيبة إن الرجل ده مدعوم بشكل كبير من السعودية و الإمارات.
أول زيارة رسمية له بعد ما (البشير) مشي كنائب لرئيس المجلس الأعلي للقوات المسلحة السودانية كانت للسعودية و قعد مع (محمد بن سلمان) و إتفقوا علي إن السعودية و الإمارات حيدوا 3 مليار دولار مساعدات عاجلة مش للحكومة السودانية ومش للشعب السوداني .. الفلوس دي حتروح للمجلس الأعلي للقوات المسلحة .. بيفكرك بحاجة اللي انا بقوله ده؟ .. علي فكرة فيه ناس بتقول إن ده مجرد رد للجميل اللي عمله (حميدي) مع (محمد بن سلمان) .. فيه تقارير لحد دلوقتي محدش عارف يثبتها أو ينفيها بتقول إن (حميدي) بعت عدد مش محدد فيه ناس بتقول إنه بالالاف من الجنجويد عشان يحاربوا في اليمن مع القوات الموالية للسعودية .. هل ده حقيقي؟ الله أعلم .. بس حتي لو ده مش حقيقي فالسعوديين مهتمين أوي باللي بيحصل في السودان ..السودان بتطل علي البحر الأحمر وليها تأثير علي مضيق باب المندب و بالتالي ممكن تعمل مشاكل في خطوط الملاحة بتاعة تصدير البترول .. عادة لما السعوديين بيسمعوا كلمة ملاحة و بترول في كلمة واحدة بيحصلهم نفس اللي بيحصلك لما بنت تكلمك شات و تقولك إنها حتبعتلك نودز .. اللي مخلي السعوديين واخدين راحتهم أوي هو إن مفيش حد بيقولهم هو حضراتكوا بتعملوا إيه؟ .. الأمريكان مش موجودين ولا في دماغهم اللي بيحصل في السودان أصلاً .. الأمريكان معندوهمش سفير في السودان ويدوبك السفارة الأميريكية هناك مفيهاش إلا موظف اسمه (ستيفن كوتسيس Steven Koutsis) شغلته إدارية بحتة إنه يشوف الحضور و الإنصراف بتوع الموظفين.
إذا كان الأمريكان ملهمش أي ستين لازمة في السودان فالأوروبيين علي الناحية الثانية مهتمين جداً باللي بيحصل بس الأوروبيين مش مهتمين بالسودان عشان خاطر الديموقراطية و الحرية و الكلام اللي مش بيأكل عيش ده .. فاكر انت الأيام اللي كانت الأخبار و مواقع Social Media مليانه ببوستات عن سفن بتنقل مهاجرين غير شرعيين أفارقة و سوريين للسواحل الأوروبية؟ .. أغلب المهاجرين الأفارقة دول كانوا بيوصلوا لحد ليبيا عن طريق السودان .. في الوقت اللي انا بكلمك عنه ده السودان كان فيها 4 مليون لاجيء عمالين يروحوا لليبيا ومنها لأوروبا .. الأروبيين وقتها لإنهم مكانوش عايزين يستقبلوا أي مهاجرين فعملوا حاجة اسمها عملية الخرطوم Khatroum Process .. بص يا سيدي .. الأوروبيين مش عايزين أي مهاجرين ييجوا فجم علي الحكومات الأفريقية سواء في السودان أو ليبيبا وبقوا يدوهم فلوس .. قدام الناس الفلوس دي بتروح عشان يتحط System لإستقبال المهاجرين دول و يبدأوا يتحطوا علي قوائم اللجوء السياسي .. اللي كان بيحصل في الحقيقة إن الفلوس دي بتروح للحكومات عشان تقول للمهاجرين الأفارقة إمشي ياض منك له من هنا و متجوش هنا تاني .. في حالة السودان الفلوس دي كانت بتروح لحاجه اسمها قوات الدعم السريع .. حزر فزر مين هو قائد قوات الدعم السريع دي؟ .. شطور و سقفة كبيرة للناس اللي قالت الإجابة صح .. (محمد حمدان دقلو) .. طب أزيدك من الشعر بيت .. أساساً قوات الدعم السريع دي هي هي قوات الجنجاويد بس بعد ما غيروا اسمها.
انا شخصياً مش عارف الوضع حيخلص علي إيه في السودان .. فعلياً قلبي مع السودانيين في مواجهتهم لبني أدم مبيعرفش ربنا زي (محمد حمدان دقلو) .. و أتمني إنهم يكملوا و ميقعوش زينا .. دعواتكوا معاهم لإن أقل حاجة نقدر نقدمها ليهم فعلياً هي الدعاء.
المصدر:
حلقة من برنامج Patriot Act with Hassan Minhaj بتتذاع علي قناه Netflix وده لينك الحلقة علي YouTube لو حبيت تشوفها:
https://www.youtube.com/watch?v=2S3cBp4ucEU&t=62s
