لينك التسجيل الصوتي علي ساوند كلاود:
https://on.soundcloud.com/eMsAS
لسنين فضل سوق الغواصات في العالم كله ماشي في سكتين .. يا إما إنت في بلد غنية و عندها تكنولوجيا نووية فبتروح لسكة الغواصات النووية ودي غواصة الموتور بتاعها بيكون مفاعل نووي .. أو إنك بتتكلم عن بلد حتي لو عندها تكنولوجيا نووية فهي بلد مش غنية أوي لدرجة إنها تستحمل تصنع و تشغل غواصة نووية فبتروح في سكة الغواصات التقليدية و الغواصة التقليدية دي غواصة ماشية علي موتورين .. الأولاني هو محرك ديزل زي اللي موجود في أي ترلة من اللي إنت بتشوفهم ماشيين في الشارع و الثاني هو بطارية زي البطارية اللي في موبايلك بالضبط .. فعلياً مفيش فرق كبير بين الغواصة النووية و الغواصة التقليدية إلا في حاجة واحدة .. الإتنين بيقدروا يشيلوا طوربيدات و صواريخ بعيدة المدي و صواريخ نووية كمان لو حبيت .. فعلياً الفرق الوحيد بين أي غواصة نووية و غواصة تقليدية هو إن الغواصة النووية بتقدر تفضل غاطسة تحت المياه بالشهور في حين إن الغواصة التقليدية لو كانت جامدة أوي يعني تفضل غاطسة تحت المياه أسبوع .. ليه الفرق الكبير ده؟ هنا بيجي دور الكلام شوية عن الهندسة.
الغواصة التقليدية لما بتغطس تحت المياه فهي بتمشي و بتشغل كل الأجهزة اللي فيها عن طريق البطاريات .. زي ما قلتلك دي بطاريات شبه بطارية موبايلك بالضبط وده معناه إنها بعد عدد ساعات شغل معين بتفضي و بتحتاج تتشحن .. بطاريات الغواصات أخرها في الشغل لما تبقي بطارية جاحدة يعني ممكن تستحمل معاك أسبوع و بعد كده لازم تتشحن .. عشان بطارية موبايلك تتشحن فإنت محتاج تحط الشاحن في فيشة الكهرباء .. بس في البحر مفيش فيشة كهرباء .. هنا بيجي دور محرك الديزل.
الغواصة بتطلع لسطح المياه تعوم زي السفينة أو بتفضل غاطسة تحت المياه بس بترفع حاجة بيسموه سنوركيل Snorkel شبه خرطوم النظارة اللي إنت بتلبسها لما بتعمل سنوركلينج Snorkeling في البحر الأحمر .. مش بتلاقي النظارة طالع منها خرطوم بلاستيك كده لفوق .. الخرطوم دي هدفه إنه يسحب هواء عشان حضرتك تتنفس و إنت وشك غطسان في المياه تتفرج علي السمك .. في حالة الغواصة فالسنوركيل ده بيسحب هوا عشان موتور الديزل يعرف ياخد الهواء ده يحرقه مع السولار عشان يشغل مولد كهرباء Generator و المولد ده هو اللي بيشحن البطاريات .. بمجرد ما البطاريات تتشحن الغواصة تقدر تغطس تاني براحتها.
فضل الوضع زي ما شرحتلك كده لحد ما طلعت فكرة جديدة إسمها AIP و دي إختصار Air Independent Propulsion .. تكنولوجيا AIP دي مش حاجة واحدة .. دي مجموعة من الأفكار بتتطبق مع بعضها بحيث إن كتير من المعدات الموجودة علي الغواصة بتقدر تشتغل من غير ما تحتاج كميات ضخمة من الأكسجين .. مش كده وبس .. التكنولوجيا دي بتخلي الغواصة تمشي تحت المياه بهدوء أكتر من اللي بتقدمهولك المفاعلات النووية .. طب أزيدك من الشعر البيت .. الغواصات التقليدية كان أخرها تفضل غاطسة تحت المياه أسبوع بس مع AIP فالمدة دي ممكن تزيد لشهر .. يمكن العيب الوحيد للتكنولوجيا دي هي إنها بتقلل شوية من سرعة الغواصة .. طبعاً فيه منكوا كتير بيهرشوا في شعرهم دلوقتي وفي دماغهم سؤال واحد .. ده سحر ولا شعوذة؟
الحقيقة إن سر تكنولوجيا AIP هو في حاجة إسمها محرك ستيرلينج Sterling Engine .. بمنتهي البساطة إنت محتاج فيشة تشحن بيها البطاريات لإن لما الغواصة بطارياتها بتشتغل فهي بتغطس تحت المياه و محدش بيعرف يلقطها .. الغواصة بتحتاج تطلع للسطح بس عشان تسحب هواء تشغل محركات الديزل اللي بتشغل المولد اللي بيشحن البطاريات .. طب لو أنا قلتلك إني لقيت طريقة إني أشحن البطاريات من غير محركات الديزل دي خالص .. إذا كان موتور الديزل فكرته إن بيبقي عندك إسطوانة فيها بستم Piston بحيث إنك بتدخله هواء و سولار و البستم ده بيطلع لفوق يضغط الخلطة دي عشان السولار يوصل لمرحلة الإشعال الذاتي فينفجر و الإنفجار ده هو اللي يجبر البستم إنه ينزل لتحت عشان يحرك عمود الكرانك ودي الفكرة اللي في أي ترلة أو عربية نص نقل اللي إنت بتشوفها في الشارع بس محرك ستيرلينج لا فيه إنفجار ولا فيه سولار ولا فيه أي حاجة خالص .. هو مجرد إسطوانة فيها إتنين بساتم و حدافة Flywheel .. حضرتك كل اللي مطلوب منك إنك تدخل هواء أو بعدين إكتشفنا إن الأحسن إنك تستخدم أكسجين مسال عشان الدورة بتاعة Compression و Expansion هي اللي تلفف الحدافة Flywheel و بالتالي بتلفف عمود الكرانك اللي بيشغل المولد اللي بيشحن البطاريات.
أول غواصة في العالم تشتغل بفكرة AIP كانت غواصة سويدي إسمها جوتلاند HSMS Gotland و الغواصة دي دخلت الخدمة سنة 1996 يعني إلي حد ما مش جديدة وكانت بتقدر تفضل غاطسة تحت المياه لمدة شهر كامل .. الغواصة دي أبعادها و حجمها صغير .. يدوبك طولها 92 متر و البطاريات بتاعتها بتديك 75 كيلووات .. تحس إنها شبه العربية الKIA Picanto كده .. سنة 2005 إتعملت مناورة عسكرية شاركت فيها حاملة الطائرات الأميريكية USS Ronald Reagan و وقتها كانت لسه الحاملة دي جديدة لانج وكانت متكلفة 6.2 مليار دولار و الأمريكان كانوا فرحانين بيها أوي .. سيناريو المناورة إن Strike Group اللي هم حاملة الطائرات و المدمرات اللي معاها و كمان غواصات الحماية بتاعتها حيتعرضوا لهجوم من غواصات معادية كانت من ضمنهم الغواصة HSMS Gotland .. في المناورة دي الغواصة السويدي الصغيرة دي قدرت تتفادي كل الدفاعات اللي حول حاملة الطائرات و تعدي وسط غواصات الحماية بتاعتها من غير ما تتلقط و تضرب كذا طوربيد غرقوا حاملة الطائرات.
طبعاً هي مضربتش طوربيدات بحق و حقيقي دي كانت مجرد مناورة بس ده كان قلم علي وش الأمريكان .. سنتين و البحرية الأميريكية بتحاول تلاقي حل إزاي يلقطوا الغواصة السويدي دي و اللي يجننك أكتر إنها متكلفة كلها علي بعضها شاكب راكب حوالي 100 مليون دولار يعني تقريباً غواصة بثمن مقاتلة F-35 .. هل معني كده إن المستقبل للغواصات التقليدية مش للغواصات النووية؟ .. طب لو ده فعلاً الحل فالسؤال دلوقتي الأمريكان يهببوا إيه في المصيبة السودا دي؟ لإن أخر غواصة تقليدية كانت تحت إيدهم طلعوها بره الخدمة سنة 1990.
قدرات الغواصة HSMS Gotland كانت فعلاً مرعبة بالنظر لسعرها .. بتقدر تفضل غاطسة تحت المياه لمدة أسبوعين و بتعوم بسرعة 9 كيلومتر في الساعة و لو الغواصة إتلقطت و حبت تهرب بسرعة فهي بتقدر تشغل البطاريات الإحتياطي و تعوم بسرعة 35 كيلومتر في الساعة و دي أرقام أي غواصة تانية تقليدية شغالة بمحرك ديزل مبتعرفش توصلها .. بلاش دي .. الغواصة فعلاً مبتطلعش صوت .. الغواصات النووية عشان تبقي ساكتة زي ما إنت بتشوفها في الأفلام بيركبولها طلمبات تبريد مخصوص جوه المفاعل.
يمكن عشان هي حجمها صغير فالسويديين قدروا يحطولها شوية إضافات و إكسسوارات مكلتفش كتير .. عادة لما أنا أحب أحمي ميناء الإسكندرية مثلاً ضد الغواصات فأنا بركب حاجة إسمها Magnetic Anomaly Detectors في قاع البحر حول الميناء عشان البتاعة دي تقدر تلقط لو غواصة معادية قربت من الميناء .. السويديين مركبين علي HSMS Gotland حوالي 27 مغناطيس كهربي أو Electromagnets بحيث إن المجال المغناطيسي ليهم يخفي الغواصة عن أي Detector يحاول يلقطها .. كل المكن اللي جوه الغواصة مطلي بمادة من المطاط بتتسمي Rubber Acoustic Deadening Buffers بحيث إن المكن حتي وهو شغال ميطلعش أي صوت كافي إن السونار بتاع أي غواصة معادية يلقطه .. جسم الغواصة كله من بره مطلي بالكامل من طلاء أو Coating بيحميها من إنها تتلقط بسونار الغواصات المعادية.
فوق ده كله فهي ليها قدرة مش طبيعية علي المناورة .. تحس إنها عربية بتعمل بيها دريفتات تحت المياه بسبب إن البرج بتاعها لو خدت بالك طالع منه زعنفتين عاملين مع البرج مع بعض علامة الصليب أو + .. عشان الأمريكان يلاقوا حل فهم طلبوا من الحكومة السويدية إنهم يأجروا منهم الغواصة HSMS Gotland بالطاقم بتاعها لمدة سنتين بحيث يشتغلوا بشكل مكثف شوية علي إزاي يلقطوها .. بعد سنتين شغل إكتشفوا إن الأنظمة الدفاعية لأي حاملة طائرات أميريكية ملهاش أي ستين لازمة ضد غواصة شغالة بتكنولوجيا AIP System.
ورا السويد علي طول الصين دخلت علي الخط .. الصين شافت قدرات الغواصة HSMS Gotland وعملت زي العيل الصغير اللي شاف لعبة و شبط فيها .. اللي عملته الصين إنها صممت غواصة تقريباً Copy & Paste من HSMS Gotland و سموا الطراز ده من الغواصات Yuan Class Type 039A وفيه ناس تانية بتسميه Type 041 فلو شفت الإسمين متفتكرش إنهم حاجتين غير بعض .. الصين عملت 15 غواصة من الطراز ده و مخططين إنهم يعملوا كمان 20 واحدة .. زي ما قلتلك الغواصات الصيني دي لإنها Copy & Paste من الأصل بتاعها السويدي فهي حتستخدم كغواصات حماية للسواحل الصينية بحيث لو حصل و حاملة طائرات أميريكية قربت فهي تقدر تتسلل قريب منها عشان تضربها بالطوربيدات .. ده كان الوضع اللي العالم كله عارفه عن إسطول الغواصات التقليدية الصينية لحد ما في 2010 الصين غفلت العالم كله و قالت إن أول غواصة من طراز جديد سمته كينج كلاس Qing Class و ليها إسم تاني اللي هو Type 032 دخلت الخدمة فعلاً بعد ما قعدوا يبنوها 6 سنين كاملة.
الغواصة الجديدة دي ضخمة حبتين .. طولها بيعدي 92 متر و حالياً هي تعتبر أكبر غواصة تقليدية في العالم .. لما تيجي تبص علي إمكانيات الغواصة دي تحس إنك محتاج تسقف للصينيين و تقولهم شابووه يا جماعه والله تسلم إيديكوا .. عادة أنا لما بصنع غواصة تقليدية فبيكون هدفها هو حماية السواحل بتاعتي و بستخدمها لتدمير حاملات طائرات أو مدمرات يعني بتتكلم عن قطع حربية كبيرة .. عشان كده نادر أوي تلاقي غواصة تقليدية بتقدر تشيل صواريخ بعيدة المدي .. بس إنك تلاقي غواصة تقليدية بتشيل صواريخ باليستية عابرة للقارات فدي بقي اللي يتقال عليها هذا ما لم نسمع به من قبل .. الصواريخ من النوع ده اللي بتضرب من علي غواصات بتتسمي Submarine-Launched Ballistic Missiles و إختصاراً بيتقال عليها SLBM عشان لو شفت الإختصار ده في أي حتة تميزه.
- لو بصيت علي برج الغواصة اللي بيتسمي Sail فإنت غالباً حتلاحظ 3 فتحات منهم واحده بيطلع منها البيروسكوب وده المنظار اللي لما الغواصة تبقي غاطسة تحت المياه القبطان بيبص منه علي هل فيه سفن عايمة جنب الغواصة ولا لا؟ .. الفتحتين التانيين بيتسموا منصات إطلاق رأسية Vertical Launch Systems أو VLS عشان تضرب بيها صواريخ باليستية عابرة للقارات إسمها JL-2A Ju Lang وليها إسم تاني هو Big Wave أو الموجة الكبيرة و الصواريخ دي ليها مدي طيران بيعدي 7500 كيلومتر.
- في الجزء الأمامي من الغواصة اللي قدام Sail و اللي بيتسمي Bow فيه 4 فتحات عشان يتركب عليها VLS برده بس المرة دي بيضربوا صواريخ JL-18B Yingji وليها إسم تاني اللي هو Eagle Strike أو ضربة النسر ودي صواريخ مضادة للسفن بتتوجه بالقمر الصناعي و أقصي مدي ليها 450 كيلومتر و يمكن أهم ميزة فيها إن الصواريخ دي لما بتقرب أوي من السفينة اللي إتضربت عليها سرعتها بتزيد ل2.5 ماخ يعني ضعفين و نص سرعة الصوت عشان تبقي أسرع من طلقات المدافع الرشاشة و صواريخ الحماية اللي بتبقي متوزعة علي المدمرات و حاملات الطائرات.
- كمان الغواصة Type 032 بتقدر تضرب صواريخ كروز بعيدة المدي عادية إسمها CJ-20A بس دي صواريخ بطيئة شوية و بتستخدم لو إنت ناوي تضرب هدف ثابت زي مبني مثلاً.
- مقدمة الغواصة فيها 4 فتحات .. 3 منهم قطر الواحدة فيهم 533 مليمتر ودي لإطلاق طوربيدات بس الرابعة دي قطرها 650 مليمتر ودي معمولة لإطلاق قوات ضفادع بشرية عشان تقوم بمهمات خلف خطوط العدو ودي إضافة بقت موجودة في أغلب الغواصات الحديثة.
بس أنا فيه سؤال بيلعب في دماغي .. هم بالصلاة علي النبي الصينيين عملوا الغواصة Type 032 دي ليه؟ .. دلوقتي أنتوا عندكوا فعلاً غواصات نووية إسمها Type 094 بتشيل برده صواريخ JL-2A Ju Lang الباليستية العابرة للقارات و الغواصات دي في الخدمة من 2015 .. ليه أتعب نفسي و أعمل غواصة مبتقدرش تفضل غاطسة تحت المياه أكتر من شهر في حين إن أنا عندي غواصة نووية أقدر أخليها تفضل غاطسة لمدة 6 شهور؟ .. زود علي كده لما تعرف إن أقصي سرعة للغواصة دي و هي تحت المياه مش بتعدي 24 كيلومتر في الساعة و أقصي عمق ليها 200 متر ودي قدرات متجيش حاجة جنب قدرات غواصة نووية أميريكية زي فيرجينيا كلاس Virginia Class .. زود علي كده كمان إن الصينيين معملوش منها إلا غواصة واحدة بس.
حط كل ده جنب بعضه حتلاقي نفسك قدام واقع إن الغواصة دي الصينيين معملوهاش عشان تحارب .. هم عملوها عشان تبقي معمل تجارب للصواريخ الباليستية العابرة للقارات اللي بتتركب علي الغواصات النووية .. إزاي غواصة إتعملت عشان تحارب تقولي إن الطاقم بتاعها 88 بني أدم وده رقم خزعبلي أصلاً و تيجي تقولي علي فكرة ده الرقم ده ممكن يوصل ل100 بني أدم ما بين مهندس و فني.
أظن اللي أنا عايز أختم به إني أقولك إني مش بقول إن الغواصات التقليدية اللي بتستخدم تكنولوجيا AIP Systems تقدر تحل محل الغواصات النووية .. أي حد يقولك كده يبقي بيهبد و بيضحك علي نفسه .. الغواصة النووية حتفضل هي النامبر وان .. الفكرة كلها إن تكنولوجيا AIP System عطت فرصة لدول معندهاش قدرة إنها تشتري غواصات نووية زي مصر أو السعودية أو إيران إنها تحمي نفسها من خطر حاملات الطائرات .. غواصة واحدة من دول تفضل غاطسة لمدة شهر مستنيه الأسطول الأميريكي في البحر المتوسط و بمجرد ما يقربوا منها ممكن تغرق حامله طائرات كاملة .. بس اللي يفكر صح.
المصادر:
- مقالة بعنوان China Has Built the Biggest and Baddest Conventional Submarine in the World .. نشرت في مجلة The National Interest وده لينك المقالة الأصلية:
http://://nationalinterest.org/blog/the-buzz/china-has-built-the-biggest-baddest-conventional-submarine-18629 - مقالة بعنوان Sweden’s Super Stealth Submarines Are So Lethal They Sank a U.S. Aircraft Carrier .. نشرت في مجلة The National Interest وده لينك المقالة الأصلية:
http://nalinterest.org/blog/the-buzz/swedens-super-stealth-submarines-are-so-lethal-they-sank-us-18383
