سمع هوووووووووس .. هو انا مش عارف أجيبهالكوا إزاي بس الشيكولاتاية اللي عندك في الصورة إسمها (لاشانا لينش Lashana Lynch) و دي حتبقي هي (جيمس بوند) الجديدة .. بص انا عارف إن الموضوع صدمة بس الناس اللي شافت فيلم Captain Marvel إحتمال تكون ميزتها .. اللي إحنا عارفينه إن الجزء الجديد من السلسلة و اللي حيبقي رقم 25 حيبدأ بإننا نعرف إن (جيمس بوند) اللي إحنا عارفينه و اللي بيقدمه (دانييل كريج) طلع معاش و قاعد يستكنيص في جامايكا و عينوا واحدة مكانه إدوها رقمه 007 بس إضطروا برده يرجعوا (جيمس بوند) من المعاش عشان حد شرير كلبوب جديد محدش عارف يوقفه بس شوف يا أخي سبحان الله (جيمس بوند) الوحيد في الدنيا اللي حيقدر يثبته.
الحقيقة إن فكرة إنهم يجيبوا واحدة ست لا و كمان سمرا عشان تكمل سلسلة (جيمس بوند) مهواش المصيبة الوحيدة .. لا خالص .. مصايب الفيلم ده بدأت في أكتوبر سنة 2015 لما (دانيل كريج) طلع في مؤتمر صحفي قال إنه معندوش مشكلة ينتحر ولا إنه يرجع تاني يعمل جزء جديد من السلسلة الفقر دي .. في 2017 مشوا المخرج الأولاني (سام مينديز) واللي كان عمل Skyfall و Spectre لإنه كان حالف إنه مش حيخرج للسلسلة دي تاني .. جابوا بعدها واحد إسمه (داني بويل) .. (داني بويل) مقعدش سنة وكان مقدم إستقالته و جابوا مخرج ثالث إسمه (كاري فوكوناجا) وده اللي أخرج الموسم الأول من مسلسل True Detective بالمناسبة .. الفيلم إتكتبله أكتر من 3 سيناريوهات لحد ما (دانييل كريج) أصر إن المنتجين يجيبوا واحدة إسمها (فيبي والر بريدج) عشان تبقي تاني ست في تاريخ السلسلة تكتب السيناريو لفيلم من السلسلة بنت ستين كلب دي.
تفتكر مشاكل الفيلم تخلص .. لا أبداً .. عرفنا إن ده حيبقي أخر جزء ل(دانيل كريج) بعد كده الإنترنت إتملي بترشيحات ناس تكمل السلسلة .. اللي يقولك (إدريس البا) .. و اللي يقولك (توم هاردي) .. شوية و طلع ناس قالت نجيب واحدة ست وده اللي خلي المنتجة (باربرا بروكولي) تقول للناس أنتوا بتستعبطوا؟ ست إيه دي اللي تعمل (جيمس بوند) .. و أديكوا جبتوا الست يا ست هانم .. لا و كمان جبتوها سمرا يا ست هانم.
المصدر:
مقالة بعنوان Bond’s Number is UP: Black Female Actor is the New 007 .. نشرت في جريدة The Guardian وده لينك المقالة الأصلية:
https://www.theguardian.com/film/2019/jul/15/lashana-lynch-new-007-james-bond-daniel-craig?fbclid=IwAR1Z36wC77gdDHZFKj1W87Okn8OID0DqIWnsYMr-xzz8Yt7Kf3LHsaVx0V4
