مستقبل البنزين و السولار .. طريقك مسدود مسدود يا ولدي.

فيه تقرير ابن حلال اوي طلع من تحت ايد واحد اسمه (مارك لويس Mark Lewis) و ده يبقي رئيس إدارة الإستدامة أو Sustainability في بنك BNP Paribas يعني ده رجل شغلته إنه يحدد هو الكلام اللي إنت بتسمعه عن الإستدامة و Green Energy و LEED ده بيجيب فلوس و بيأكل عيش ولا كله هجص؟ .. التقرير إسمه Wells, Wires, and Wheels. EROCI and the Tough Road Ahead for Oil و الحقيقة إن التقرير ده لما تقراه تلاقي نفسك لو إنت شغال في مجال البتروكيماويات مش بتقول غير ده يبقي نهار أزرق يا أستاذ (ممتاز) علي رأي (محمد هنيدي) في فيلم سور الصين العظيم .. ملخص التقرير عشان لو ملكش خلق علي القراية بيقول إن خلال السنين الجاية عشان البنزين يقدر ينافس بطاريات الكهرباء كوقود للعربيات فهو لازم يتباع بسعر ما بين 10 ل 20 دولار لبرميل البنزين و ما بين 17 ل 19 دولار لبرميل السولار .. عارف هو برميل البترول بكام دلوقتي؟ .. ب60 دولار .. دلوقتي بقي جه وقت نفهم هو فيه إيه و يعني إيه الكلمتين اللي أنا لسه قايلهم دول؟

السر كله في كلمة إتقالت في عنوان التقرير اللي هي EROCI و دي إختصار Energy Return on Capital Investment و دي بمنتهي البساطة معناها إن لو أنا معايا مثلاً 100 مليار دولار عايز أحطهم كإستثمارات مباشرة في قطاع الطاقة بتاعة المواصلات فأنا قدامي سكتين: يا إما أحطهم في قطاع البترول عشان أزود من كمية البنزين و السولار اللي بيتباعوا في محطات البنزين و كمان أحطهم كإستثمار في طلمبات بنزين أحدث و كده .. يا إما أحطهم في قطاع الطاقة المتجددة Renewable Energy يعني أوفر محطات شحن بطاريات للعربيات اللي بالكهرباء .. فالسؤال دلوقتي قصاد الفلوس اللي أنا ححطها أنهي إستثمار فيهم حيديني طاقة أكتر؟ .. الإجابة إن علي سعر البترول الحالي اللي هو 60 دولار للبرميل فأنا لو حطيت فلوسي في محطات شحن البطاريات بالكهرباء حيجيلي 6 أضعاف الطاقة اللي أنا باخدها لو كنت حطيت فلوسي في محطات البنزين و حيجلي ما بين 3 ل 4 أضعاف الطاقة اللي كنت حاخدها لو حطيت فلوسي في محطات السولار .. ده معناه إنك لو بتبني إقتصاد بلد من الصفر فالأرقام و بالورقة و القلم بتقول إحنا لازم نرمي العربيات اللي شغالة بالبنزين و السولار في الزبالة و نبدأ نعتمد إعتماد كلي علي العربيات اللي ماشية ببطاريات الكهرباء.

إنت مش متخيل قد إيه قطاع البترول و قطاع المواصلات مرتبطين ببعض .. عشان بس أحطك في الصورة ف36% من إجمالي البترول اللي إحنا كبشر بننتجه بيروح كبنزين و سولار للعربيات و الترلات اللي بتمشي علي الطرق .. ده في مقابل إن 5% بس من إنتاج البترول العالمي بيروح لمحطات إنتاج الكهرباء .. سامعك يا اللي بتقول إنت إيه الكلام الماسخ اللي إنت بتقوله ده .. ده أنا لسه بوداني دول سامع إن 33% من إجمالي الطاقة اللي البشر بينتجوها جاي من البترول قصاد 4% بس بيجوا من الطاقة المتجددة يعني لسه Renewable Energy قدامها سنين و سنين لحد ما تحصل البترول .. كلامك صح بس ده عامل زي ما حد يقولك ولا تقربوا الصلاة بس ميكملش الأية لأخرها .. البترول ده جاي من أبار بترول و كل سنة فيه أبار بترول يا بتخلص يا إما البترول اللي فيها بيقل أوي لدرجة إن تكلفة إستخراج البترول اللي فاضل بتبقي أعلي من الفلوس اللي بتيجي من بيعه فشركة البترول بتقرر إنها تقفل البير ده لإن إقتصادياً معادتش له قيمة .. قصاد كل بير بترول بيتقفل لازم بير بترول جديد يتفتح .. الوقت و الفلوس اللي بيروحوا لحد ما البير الجديد يخش الخدمة كتير و خلال الوقت اللي بيروح ده السوق بيبقي محتاج تضخ فيه طاقة مطلوبة و هنا بتلاقي إن الطاقة المتجددة بتطلع للبترول زي الخازوق .. خلال الخمس سنين الجاية متوقع إن الخوازيق تفضل تكتر و الإقتصاد بتاع كل بلد حيبقي أسهله إنه يبني محطة طاقة شمسية علي إنه يستني شركة بترول زي Exxon Mobil مثلاً إنها تاخد الموافقات و تعمل الإستعدادات الهندسية المطلوبة إنها تطور بير بترول هي لسه مكتشفاه .. خد التقيلة بقي .. عشان شركات البترول تتفادي المشكلة دي فلازم كل شركات البترول في العالم تتفق مع بعضها إن كل سنة يحطوا من جيبهم 25 ترليون دولار كل سنة لمدة 25 سنة لمجرد إنهم يضمنوا إنهم يكسبوا Renewable Energy في حين إن شركات الطاقة المتجددة عشان تضرب شركات البترول بالقاضية لازم كلهم مع بعض يتفقوا إنهم يحطوا من جيبهم ما بين 4.6 ل 5.2 ترليون دولار كل سنة.

خلي بالك إني في كلامي مجبتش سيرة البيئة ولا الإحتباس الحراري ولا أي حاجة من الحاجات دي .. أنا كلامي كان فلوس بحت .. المستقبل للعربيات اللي بالكهرباء بس ياريت يبقي عندنا حكومة تكون فاهمة إن بدل ما هي بتعايرنا بالدعم علي البنزين فهي ممكن تريح نفسها و تريحنا كلنا لو بس سابتلنا عربيات Tesla تنزل من غير جمارك.

المصدر: